ក្រោយមានការប្ដឹងផ្ដល់គ្នាអស់ជាច្រើនឆ្នាំមក តុលាការខេត្តកំពង់ស្ពឺ បានសម្រេចទម្លាក់ចោលបទចោទទៅលើសមាជិកសហគមន៍ការពារព្រៃឈើឧត្ដមស្រែពស់ជាង១០នាក់ ពាក់ព័ន្ធបណ្ដឹងរបស់យោធា នៃកងពល ង៧០។ សង្គមស៊ីវិលស្នើឱ្យតុលាការទម្លាក់រាល់បទចោទទាំងអស់ទៅលើសហគមន៍ការពារព្រៃឈើ និងប្រញាប់ចុះរកដំណោះស្រាយឱ្យសហគមន៍។
សហគមន៍ការពារព្រៃឈើឧត្ដមស្រែពស់ ឬហៅព្រៃមេត្តាធម្មជាតិ អះអាងថា តុលាការខេត្តកំពង់ស្ពឺ សម្រេចទម្លាក់ចោលបទចោទប្រកាន់ ទៅលើសមាជិកសហគមន៍ជាង១០នាក់ ពាក់ព័ន្ធបណ្ដឹងរបស់ទាហានកងពលង៧០ ដែលបានប្ដឹងពលរដ្ឋ ថាបានប្រើប្រាស់អំពើហិង្សាទៅលើពួកគេ។ ការទម្លាក់ចោលបទចោទនេះដោយសារតែដើមបណ្ដឹងមិនមានភស្តុតាងគ្រប់គ្រាន់ដើម្បីដាក់បន្ទុកទៅលើសហគមន៍។
តំណាងសហគមន៍ឧត្ដមស្រែពស់ លោក ឃន សារិទ្ធ អះអាងប្រាប់ទូរទស្សន៍អាស៊ីសេរី នៅថ្ងៃទី២០ ខែសីហាថា សហគមន៍ជាង១០នាក់ទទួលបានយុត្តិធម៌មួយករណីហើយ ជុំវិញការចោទប្រកាន់របស់ ទាហានកងពលង៧០ ។ ប៉ុន្តែលោកថា នៅមានបណ្ដឹងជាច្រើនទៀត ដែលតុលាការមិនទាន់ប្រកាសសាលក្រម ដោយត្រូវលើកពេលទៅប្រកាសនៅក្នុងខែកញ្ញាវិញ។ ទោះជាបែបនេះក្ដី លោកថា រាល់ការចោទប្រកាន់របស់ទាហានកងពលង៧០ មកលើសហគមន៍ សុទ្ធតែជារឿងមិនពិត និងអយុត្តិធម៌ សម្រាប់សហគមន៍ការពារព្រៃឈើរបស់ពួកលោក។
លោក ឃន សារិទ្ធ៖ «ខ្ញុំគិតថាវាអយុត្តិធម៌សម្រាប់ពួកខ្ញុំណាស់ ពួកខ្ញុំគ្រាន់តែការពារធនធានរបស់រដ្ឋ ហើយការពារនឹងក៏មិនការពារទៅធ្វើជារបស់ឯកជនរបស់នរណាម្នាក់ គ្រាន់តែការពារជាទ្រព្យសម្បត្តិរួម ជាសមូហភាពសម្រាប់ក្មេងៗជំនាន់ក្រោយមើល សំណូមពរដល់ថ្នាក់ដឹកនាំ ឬអាជ្ញាធរពាក់ព័ន្ធ សូមឲ្យជួយទម្លាក់ចោល ការចោទប្រកាន់ និងជួយអភិរក្សនៅតំបន់ព្រៃមាតាធម្មជាតិជាសម្បត្តិរួម»។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងអភិបាលខេត្តកំពង់ស្ពឺ លោក ជាម ច័ន្ទសោភ័ណ្ឌ ដើម្បីសុំការឆ្លើយតបបានទេ នៅថ្ងៃទី២០ ខែសីហា។
ទោះជាយ៉ាងណាក៏ដោយ ក្រោយពីតុលាការទម្លាក់បទចោទលើសហគមន៍ជិត១ខែស្រាប់តែថ្មីៗនេះមានករណីជនមិនស្គាល់មុខ បានលួចបាញ់ និងចាប់សត្វតូចចំនួន២ក្បាល ដែលកំពុងរស់នៅក្នុងព្រៃសហគមន៍ឧត្ដមស្រែខ្ពស់ ។ ពលរដ្ឋដាក់ការសង្ស័យថា នេះគឺជាការសងសឹក និងតាមធ្វើទុក្ខបុកម្នេញ មិនឲ្យសហគមន៍ និងសត្វព្រៃនៅតំបន់នោះរស់នៅបានសុខសាន្ដ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី ជំរុញឲ្យតុលាការទម្លាក់រាល់បទចោទទាំងអស់ទៅលើសហគមន៍ការពារព្រៃឈើ ហើយអាជ្ញាធរគួរប្រញាប់ចុះរកដំណោះស្រាយ ដោយត្រូវវាស់វែង និងកំណត់ព្រំប្រទល់សហគមន៍ ដើម្បីបញ្ចប់បញ្ហាទាំងអស់នោះ ដោយមិនត្រូវអូសបន្លាយ និងនាំភាពឈឺចាប់ដល់ពលរដ្ឋទៀតនោះទេ។
លោក យិន ម៉េងលី៖ «អាចធ្វើការទម្លាក់បទចោទចោល ដើម្បីបញ្ចប់រឿងទាំងអស់ទៅ ដើម្បីការអភិរក្សសម្រាប់សហគមន៍របស់គាត់ ហើយខាងភាគីម្ខាងទៀតគាត់អាចកសាងអ្វីៗទៀតទៅ មធ្យោបាយមានតែអញ្ចឹងទេ ដើម្បីបញ្ចប់បញ្ហាកុំឲ្យមានការអូសបន្លាយ កុំឲ្យពលរដ្ឋឈឺចាប់កាន់តែយូរថែមទៀត ដោយសារការផ្តើមចេញការពារផលប្រយោជន៍សហគមន៍»។
ព្រៃសហគមន៍ឧត្ដមស្រែពស់ គឺជាផ្នែកមួយនៃដែនជម្រកសត្វព្រៃភ្នំឱរ៉ាល់ ហើយត្រូវបានចុះបញ្ជីទទួលស្គាល់ជាព្រៃអភិរក្សពីក្រសួងបរិស្ថាន កាលពីឆ្នាំ២០០២។ កាលពីខែសីហា ឆ្នាំ២០២១រដ្ឋាភិបាលបានចេញអនុក្រឹត្យ ឆ្វៀលដីព្រៃសហគមន៍ឧត្ដមស្រែខ្ពស់មានទំហំជិត ៣រយ (២៦២,២៤) ហិកតារ ពីដែនជម្រកសត្វព្រៃភ្នំឱរ៉ាល់ ក្នុងភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកជូនគ្រួសារយោធិននៃកងពល ង៧០ ៤១គ្រួសារ សម្រាប់សង់លំនៅឋាន និងបង្កបង្កើនផល។
ព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិ ស្ថិតនៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ មានផ្ទៃដីជិត៩រយហិកតារ (៨៨៧) ដែលធ្លាប់មានសត្វព្រៃជាច្រើនប្រភេទរស់នៅ រួមមាន ទោចក្ងោក មាន់ព្រៃ ឈ្លូស និង ស្វាជាដើម។ ប៉ុន្តែបច្ចុប្បន្នព្រៃសហគមន៍មួយនេះ ត្រូវបានក្រុមអ្នកមានអំណាច មន្ត្រីយោធា ពលរដ្ឋ និងឈ្មួញខិលខូចមួយចំនួន ឈូសឆាយទន្ទ្រានដែលធ្វើឲ្យបាត់បង់ព្រៃឈើ និងសត្វព្រៃស្ទើរតែទាំងស្រុង។ ចំណែកអាជ្ញាធរនៅតំបន់នោះ មិនបានចាត់វិធានការទៅលើឧក្រិដ្ឋជនទាំងនោះឡើយ ផ្ទុយទៅវិញអាជ្ញាធរបានតាមធ្វើទុក្ខបុកម្នេញទៅលើសហគមន៍ការពារព្រៃឈើ៕
