អាជ្ញាធរខេត្តក្រចេះណែនាំឲ្យក្រុមហ៊ុនចិន ឈ្មោះ ហ្គ្រេតវ័នឌ័រ អេហ្គ្រីខលឈ័រ ឌឺវេឡូបមេន (Great Wonder Agriculture development) បញ្ឈប់ការឈូសឆាយផ្ទះ និងផលដំណាំ ដែលកំពុងមានវិវាទ ជាមួយពលរដ្ឋរស់នៅស្រុកអូរគ្រៀងសែនជ័យ។ ការសម្រេចនេះធ្វើឡើងបន្ទាប់ពលរដ្ឋជាង៣០០គ្រួសារ បានស្នើសុំកិច្ចអន្តរាគមន៍ ពីនាយករដ្ឋមន្ត្រី លោក ហ៊ុន ម៉ាណែត កាលពីថ្ងៃ៣១ ខែកក្កដា។
ក្រោយពលរដ្ឋមានបញ្ហាដីធ្លី នៅស្រុកអូរគ្រៀងសែនជ័យ ខេត្តក្រចេះ ជាង៣០០គ្រួសារ ដាក់លិខិតអន្តរាគមន៍ពីនាយករដ្ឋមន្ត្រី អស់រយៈពេលជាងកន្លះខែមកអាជ្ញាធរខេត្តក្រចេះបានចេញសេចក្ដីប្រកាសពន្យារពេល មិនឲ្យក្រុមហ៊ុនចិន ឈ្មោះហ្គ្រេតវ័នឌើរ អេហ្គ្រីខលឈ័រ ឈូសឆាយបំផ្លាញផ្ទះសម្បែង និងផលដំណាំរបស់ពលរដ្ឋ នៅឃុំរលួសសែនជ័យ ស្រុកអូរគ្រៀងសែនជ័យ ខេត្តក្រចេះ ដោយត្រូវរង់ចាំដំណោះស្រាយ និងសហការជាមួយអាជ្ញាធរមូលដ្ឋាន ដើម្បីស្វែងរកទីតាំងផ្ដល់ដីសម្បទានសង្គមកិច្ចស្របច្បាប់ដល់ពលរដ្ឋទាំងអស់នោះ។ នេះបើតាមលិខិតជូនដំណឹងរបស់រដ្ឋបាលខេត្តក្រចេះ កាលពីថ្ងៃទី០៥ ខែសីហា ដែលទូរទស្សន៍អាស៊ីសេរីទទួលបាននៅថ្ងៃទី១៣ ខែសីហា។
នៅក្នុងលិខិតនេះ អាជ្ញាធរក៏បានព្រមានពលរដ្ឋរងគ្រោះ មិនឲ្យទៅកាប់រុករានទន្ទ្រានដីរបស់រដ្ឋ ដែលបានផ្តល់សម្បទានសេដ្ឋកិច្ច ឲ្យទៅក្រុមហ៊ុនចិន ហ្គ្រេតវ័នឌើរ អេហ្គ្រីខលឈ័រ ដើម្បីធ្វើការវិនិយោគនោះឡើយ។
ទោះជាបែបនេះក្ដី តំណាងពលរដ្ឋរងគ្រោះ នៅឃុំរលួសសែនជ័យ លោកស្រី យ៉ា រ៉មី អះអាងប្រាប់ទូរទស្សន៍អាស៊ីសេរី នៅថ្ងៃទី១៣ ខែសីហាថា ពលរដ្ឋមិនទាន់ស្ងប់ចិត្ត ឬឈប់ចេញតវ៉ានោះឡើយ ពីព្រោះក្នុងលិខិតនោះមិនបានបញ្ជាក់ថា នឹងកាត់ឆ្វៀលដីស្រែចម្ការទុកឲ្យពលរដ្ឋអាស្រ័យផលនោះទេ។ លោកស្រីអះអាថា នៅព្រឹកថ្ងៃទី១៣ ខែសីហានេះ ពលរដ្ឋបានដាក់លិខិតមួយផ្សេងទៀត ដើម្បីជំរុញឲ្យអាជ្ញាធរកាត់ឆ្វៀលដីស្រែចម្ការទាំងនោះទុកឲ្យពលរដ្ឋជាង២០០គ្រួសារបានអាស្រ័យផលចិញ្ចឹមជីវិតទៅថ្ងៃខាងមុខ។
លោកស្រី យ៉ា រ៉មី៖ «ចង់បានរស់នៅខាងខ្ញុំ នៅកន្លែងនឹង អត់ចង់ដោះដូរទៅណា អត់មានត្រូវប្តឹងពួកខ្ញុំទៅណាទៀត ខ្ញុំចង់ឲ្យរដ្ឋាភិបាលដំណោះស្រាយឲ្យពួកខ្ញុំផង ព្រោះខ្ញុំមិនដឹងទៅរស់នៅឯណាទៀត បើបណ្តេញពួកខ្ញុំទៅ ព្រោះផ្ទះ ដំណាំ ខ្ញុំបានដាំដុះ អាស្រ័យនៅកន្លែងនឹងហើយរយះពេល៩ឆ្នាំហើយ បវរធិបតីហ៊ុន ម៉ាណែត និងនាយករដ្ឋមន្ត្រីហ៊ុន សែន ថ្នាក់ដឹកនាំក្រោមនឹងជួយដំណោះស្រាយឲ្យពួកខ្ញុំផង ដោះស្រាយជីវិភាពពួកខ្ញុំផង ខ្ញុំចង់បានដីធ្លីនេះរស់នៅតកូនតចៅ»។
តំណាងពលរដ្ឋរូបនេះ បន្ថែមទៀតថា រហូតមកដល់ពេលនេះ អាជ្ញាធរមិនទាន់បង្ហាញឯកសារផ្លូវការណាមួយ ដល់ប្រជាពលរដ្ឋ ថាក្រុមហ៊ុនឯកជនមួយនេះ ទទួលបានដីសម្បទានសេដ្ឋកិច្ចទំហំប៉ុន្មាននោះឡើយ។ ផ្ទុយទៅវិញ អាជ្ញាធរបានប្រើល្បិច ប្រាប់ពលរដ្ឋថា សកម្មភាពឈូសឆាយទាំងនោះ គឺគម្រោងធ្វើផ្លូវឆ្ពោះទៅស្រុកកោះញែក ខេត្តមណ្ឌលគិរី។ ក្រោយមកស្រាប់តែ អាជ្ញាធរចេញលិខិតឲ្យពលរដ្ឋរុះរើផ្ទះសម្បែង និងបង្ខំឲ្យពលរដ្ឋប្រគល់ដីឲ្យទៅក្រុមហ៊ុន។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទង អភិបាលខេត្តក្រចេះ លោក វ៉ា ថន ដើម្បីសុំការឆ្លើយតបបានទេ នៅថ្ងៃទី១៣ ខែសីហា។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី យល់ឃើញថា អាជ្ញាធរគួរតែស្វែងរកដំណោះស្រាយ ដើម្បីឲ្យពលរដ្ឋបានអាស្រ័យផល ចិញ្ចឹមជីវភាពគ្រួសាររបស់ពួកគាត់ ហើយអាជ្ញាធរគួរតែគិតគូរពីផលប្រយោជន៍ប្រជាពលរដ្ឋ ជាជាងគិតគូរតែផ្ដល់ផលប្រយោជន៍ឲ្យទៅក្រុមហ៊ុនឯកជន។
លោក យិន ម៉េងលី៖ «យើងសង្កេតឃើញថា អ្នកខុសគឺប្រជាពលរដ្ឋរហូត ជាអ្នកខុស ហើយយើងអត់ដែរលឺសូរថា មន្ត្រីនេះខុសចេះ មន្ត្រីនោះខុសចោះ អត់ដែរឃើញមានមន្ត្រីខុសទេ អ៊ីចឹងមន្ត្រីមិនដែរចេះខុសទេ ខុសតែប្រជាពលរដ្ឋ ជាការសង្កេតរបស់យើង សូមកុំភ្លេចថា មន្ត្រីក៏ជាមនុស្ស ប្រជាពលរដ្ឋក៏ជាមនុស្សដែរអ៊ីចឹងឲ្យតែជាមនុស្សតែងតែមានកំហុសដូចគ្នា តែសំខាន់ត្រូវមានវិធានការហើយកែប្រែ នេះជាចំនុចវិជ្ជមានដែរយើងចង់ឃើញ»។
កាលពីថ្ងៃទី៣១ ខែកក្កដា ប្រជាពលរដ្ឋប្រមាណ៧០នាក់ ដែលតំណាងឱ្យពលរដ្ឋ៣០០គ្រួសារ រស់នៅភូមិទុង ឃុំរលួសមានជ័យ ស្រុកអូរគ្រៀងសែនជ័យ ខេត្តក្រចេះ បានប្រមូលផ្តុំគ្នាដាក់ញត្តិនៅខុទ្ទកាល័យនាយករដ្ឋមន្ត្រី ដើម្បីស្នើសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន ម៉ាណែត ពាក់ព័ន្ធនឹងទំនាស់ដីធ្លី ក្រោយរដ្ឋបាលខេត្តក្រចេះបានដាក់ឱសានវាទបង្ខំឱ្យពួកគាត់ចាកចេញពីលំនៅឋាន ហើយប្រគល់ដីធ្លីទាំងនោះឲ្យទៅក្រុមហ៊ុន។
ពលរដ្ឋលើកឡើងថា ប្រសិនបើអាជ្ញាធរមិនព្រមរកដំណោះស្រាយសមរម្យ ពួកគាត់ក៏មិនព្រមឈប់ចេញវ៉ានោះឡើយ ពីព្រោះពួកគាត់ចាត់ទុកដីធ្លីទាំងនោះជាអាយុជីវិតរបស់ពួកគាត់៕
