ពលរដ្ឋរស់នៅស្រុកកោះញ៉ែក ខេត្តមណ្ឌលគិរី បារម្ភសាជាថ្មី ជុំវិញការសាងសង់ទំនប់វារីអគ្គិសនីស្រែពកក្រោម៣ ខណៈរហូតមកដល់ពេលនេះ មិនទាន់ឃើញមានដំណោះស្រាយ និងពិគ្រោះយោបល់ជាមួយពលរដ្ឋរងគ្រោះ។ សង្គមស៊ីវិល នៅតែទទូចឲ្យអាជ្ញាធរ និងភាគីពាក់ព័ន្ធ ត្រូវផ្តល់ព័ត៌មានគ្រប់ជ្រុងជ្រោយដល់ពលរដ្ឋ និងត្រូវសិក្សាពីផលប៉ះពាល់ និងរកដំណោះស្រាយឲ្យបានសមរម្យ និងយុត្តិធម៌។
ក្រោយស្ងប់ស្ងាត់អស់រយៈពេលជិតមួយឆ្នាំ ជុំវិញការសាងសង់ទំនប់វារីអគ្គិសនីស្រែពកក្រោមបី នៅចំណុចព្រំប្រទល់ស្រុកលំផាត់ ខេត្តរតនគិរី និងស្រុកកោះញ៉ែក ខេត្ត មណ្ឌលគិរី ពលរដ្ឋបារម្ភខ្លាចក្រុមហ៊ុនដាក់គ្រឿងចក្រឈូសឆាយ និងចាប់ផ្ដើមសាងសង់ ខណៈរហូតមកដល់ពេលនេះ អាជ្ញាធរ និងភាគីពាក់ព័ន្ធមិនទាន់បានសិក្សាអំពីផលប៉ះពាល់ឲ្យបានគ្រប់ជ្រុងជ្រោយនិងពិគ្រោះយោបល់ជាមួយពលរដ្ឋរងគ្រោះនោះឡើយ។
តំណាងប្រជាពលរដ្ឋ លោក មាស មិត្ត អះអាងប្រាប់ទូរទស្សន៍អាស៊ីសេរី នៅថ្ងៃទី១៦ ខែកក្កដា ថា ចាប់តាំងពីអាជ្ញាធរចុះគំរាមកំហែងពលរដ្ឋតាមផ្ទះឲ្យផ្លាស់ទីលំនៅ អស់រយៈពេលជិតមួយឆ្នាំហើយ មិនទាន់ឃើញមានសកម្មភាព ឬការជូនដំណឹងផ្លូវការណាមួយពីភាគីពាក់ព័ន្ធនោះឡើយ។ លោកថា ពលរដ្ឋបារម្ភខ្លាចស្ងាត់ៗ ស្រាប់តែក្រុមហ៊ុនដាក់គ្រឿងច្រកសាងសង់ និងឈូសឆាយបណ្ដេញពលរដ្ឋចេញដូចខេត្តដ៏ទៃដែរ។ លើសពីនោះ លោកថា កន្លងទៅអាជ្ញាធរធ្លាប់បង្ខំឲ្យពលរដ្ឋយកសំណង និងបង្ខំឲ្យចាកចេញពីតំបន់ម្ដងរួចមកហើយ ប៉ុន្តែពលរដ្ឋមិនព្រមនោះឡើយ ហើយបានស្នើឲ្យរដ្ឋាភិបាលលុបចោលគម្រោងមួយថែមទៀត។
លោក មាស មិត្ត៖ «ប្រជាពលរដ្ឋទាំងអស់នេះគឺសំណូមពរថា គេមិនចង់បានទេរឿង វារីអគ្គិសនីនេះ ព្រោះការផលប៉ះពាល់ការរស់នៅរបស់គេ រឿងដំណាំដាំដុះក៏ខាងក្រុមហ៊ុនក៏អត់ឃើញសិក្សាអីដែរ ការសំណូមពររបស់គេ គឺគេមិនចង់ចាកចេញពីទីលំនៅនឹងដែរ ទោះបីអាជ្ញាធរបង្ខំយ៉ាងម៉េចក៏អត់ចាកចេញដែ»។
កន្លងទៅអាជ្ញាធរខេត្តមណ្ឌលគិរី បានប្រាប់ប្រជាពលរដ្ឋរស់នៅតាមដងទន្លេស្រែពកថា មានពលរដ្ឋចំនួន៨ឃុំ រួមមាន ឃុំសេដា ឃុំកាឡែង ឃុំជ័យឧត្ដម ស្ថិតនៅស្រុកលំផាត់ និងឃុំបរខាំ ឃុំប៉ាតេ ស្រុកអូរយ៉ាដាវ ខេត្តរតនគិរី និង ឃុំណងឃីលិក ឃុំរយ៉ និងឃុំស្រែហ៊ុយ ស្ថិតក្នុងស្រុកកោះញែក ខេត្តមណ្ឌលគិរី នឹងរងផលប៉ះពាល់ពីការសាងសង់ទំនប់វារីអគ្គិសនីស្រែពកក្រោម៣ ដែលមានទីតាំងស្ថិតនៅស្រុកលំផាត់ ខេត្តរតនគិរី។
ជុំវិញរឿងនេះ ទូរទស្សន៍អាស៊ីសេរីមិនអាចទាក់ទងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា និងអភិបាលខេត្តមណ្ឌលគិរី លោក គង់ គីមនី ដើម្បីសុំការអធិប្បាយបានទេ នៅថ្ងៃទី១៦ ខែកក្កដា។ ចំណែកខាងតំណាងក្រុមហ៊ុន រ៉ូយ៉ាល់ គ្រុប លោក គិត ម៉េង ក៏ទូរទស្សន៍អាស៊ីសេរីមិនអាចទាក់ទងបានដែរនៅថ្ងៃដដែលនេះ។
ទោះជាយ៉ាងណា កាលពីខែធ្នូ ឆ្នាំ២០២៤ អាជ្ញាធរខេត្តមណ្ឌលគិរី អះអាងថា ក្រុមហ៊ុន រ៉ូយ៉ាល់ គ្រុប របស់លោក គិត ម៉េង នឹងផ្ដល់សំណងឲ្យពលរដ្ឋផ្ទះធ្វើពីឈើចំនួន១ខ្នង ដែលមានទំហំ ទទឹង៨ម៉ែត្រ បណ្ដោយ១០ម៉ែត្រ ដីលំនៅឋានទទឹង២៥ម៉ែត្រ បណ្ដោយ៥០ម៉ែត្រ និងដីស្រែចម្ការចំនួន៥ហិកតារ ស្ថិតនៅតំបន់៩៥ ក្នុងឃុំស្រែហ៊ុយ ស្រុកកោះញែក សម្រាប់បង្កបង្កើនផលចិញ្ចឹមជីវភាពគ្រួសារ។ ចំណែកពលរដ្ឋដែលរុះរើផ្ទះសម្បែងតាមផែនការរបស់ក្រុមហ៊ុន និងគោលការណ៍របស់អាជ្ញាធរ នឹងទទួលបានប្រាក់២ពាន់ (២.០០០) ដុល្លារ និងប្រាក់ថ្លៃដឹកជញ្ជូនសម្ភារៈចំនួន២ពាន់ដុល្លារថែមទៀត។ នេះបើតាមលិខិត ស្ដីអំពីដំណោះស្រាយផលប៉ះពាល់មួយច្បាប់ ដែលអាជ្ញាធរមូលដ្ឋានឲ្យប្រជាពលរដ្ឋ នៅឃុំណងឃីលិក ស្រុកកោះញែក ខេត្តមណ្ឌលគិរី ប៉ុន្តែពលរដ្ឋមិនព្រមយកសំណងដែលក្រុមហ៊ុនផ្ដល់ឲ្យនេះឡើយ។
គម្រោងវារីអគ្គិសនីស្រែពកក្រោម៣ ដែលវិនិយោគដោយក្រុមហ៊ុន រ៉ូយ៉ាល់ គ្រុប មានទីតាំងស្ថិតនៅជាប់ព្រំប្រទល់ស្រុកលំផាត់ ខេត្តរតនគិរី និងស្រុកកោះញែក ខេត្តមណ្ឌលគិរី ។ គម្រោងនេះអាចផលិតថាមពលអគ្គិសនីបានជាង ៣០០មេហ្កាវ៉ាត់។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា អាជ្ញាធរ និងភាគីក្រុមហ៊ុនគួរស្ដាប់មតិរបស់ពលរដ្ឋ និងការចង់បានរបស់ពលរដ្ឋ ដើម្បីស្វែងរកដំណោះស្រាយ មិនគួរនាំគ្នាដើរគំរាមកំហែងពលរដ្ឋ និងបង្ខិតបង្ខំពលរដ្ឋឲ្យចាកចេញពីផ្ទះសម្បែង ដែលជាសកម្មភាពផ្ទុយពីគោលការណ៍របស់រដ្ឋាភិបាល និងច្បាប់នោះឡើយ។ លោកជំរុញឲ្យគ្រប់ភាគី ត្រូវជជែក និងរកដំណោះស្រាយឲ្យបានសមរម្យ។
លោក យិន ម៉េងលី៖ «សូមកុំឲ្យមានការគំរាមកំហែង សូមកុំឲ្យមានការបោះពាក្យសម្ដី ព្រមក៏យក មិនព្រមក៏យក ឬក៏ថាមិនព្រមនឹងចាប់ដាក់គុក យើងមិនចង់ឃើញ មិនចង់លឺពាក្យទាំងអស់នឹងទេ យើងចង់ឲ្យមានបន្តការចរចារដោយសន្តិវិធីពាក់ព័ន្ធរឿងដីធ្លី ពាក់ព័ន្ធនឹងការអភិវឌ្ឍន៍នេះ យើងគិតថាល្អប្រសើរជាង ព្រោះការប្រើប្រាស់នូវពាក្យទាំងនេះលេចចេញទ្បើងពុំមែនជារឿងល្អទេនៅក្នុងសង្គមនេះ»។
បច្ចុប្បន្ន ប្រទេសកម្ពុជាមានទំនប់វារីអគ្គិសនីជាង ១០កន្លែង ស្ថិតនៅខេត្តកោះកុង ពោធិ៍សាត់ កំពត កំពង់ស្ពឺ និងខេត្តស្ទឹងត្រែង ហើយកំពុងសាងសង់ចំនួន៣កន្លែងផ្សេងទៀត ក្នុងខេត្តកោះកុង និងពោធិ៍សាត់។ ចំណែកគម្រោងទំនប់វារីអគ្គិសនីចំនួន២ទៀត នៅតាមដងទន្លេសេសាន និងទន្លេស្រែពក ក្នុងខេត្តរតនគីរី កំពុងសិក្សា និងគ្រោងសាងសង់នៅពេលខាងមុខ។ ការសាងសង់ទំនប់វារីអគ្គិសនី កន្លងទៅតែងតែធ្វើឲ្យពលរដ្ឋរងផលប៉ះពាល់ពីទឹកលិចលំនៅឋាន ដីស្រែចម្ការ និងផលដំណាំ ដែលធ្វើឱ្យពលរដ្ឋទាំងនោះបង្ខំចិត្តផ្លាស់ប្ដូរទីលំនៅ ហើយទទួលយកសំណងមិនសមរម្យពីក្រុមហ៊ុន៕
