ពលរដ្ឋ អ្នកវិភាគ និងមន្ត្រីរដ្ឋាភិបាល បានបញ្ចេញទស្សនៈផ្សេងៗ ជុំវិញការតែងតាំងកូនស្រីច្បងរបស់មេបក្សប្រឆាំង លោក កឹម សុខា គឺកញ្ញា កឹម មនវិទ្យា ជាប្រេសិតពិសេស របស់លោកនាយករដ្ឋមន្ត្រីហ៊ុន ម៉ាណែត។ អ្នកខ្លះយល់ថានេះជារបត់នយោបាយថ្មី នៃការផ្សះផ្សាជាតិខណៈ អ្នកខ្លះទៀតថា ជាការបញ្ចប់ជីវិតនយោបាយរបស់លោក កឹម សុខា។
មហាជនបានលើកយកករណីកូនស្រីច្បងរបស់លោក កឹម សុខា កញ្ញា កឹម មនោវិទ្យា ទទួលបានតួនាទីជាប្រេសិតពិសេសរបស់លោក ហ៊ុន ម៉ាណែត មកជជែកវែកញែក ដោយអ្នកខ្លះសាទរ និងខ្លះទៀតខកចិត្ត។
អនុប្រធានស្ថាប័នព័ត៌មាន និងទំនាក់ទំនងសាធារណៈ នៃរដ្ឋាភិបាលកម្ពុជា ឯករាជ្យ ២៣តុលា លោក ទេព មនោរម្យ បានសរសេរសារនៅលើគណនីហ្វេសប៊ុក ថាជំនួបលោក ហ៊ុន សែន និងលោក កឹម សុខា និងការផ្ដល់តួនាទីដល់កូនស្រី លោក កឹម សុខា មិនអាចឈានទៅការផ្សះផ្សាជាតិ ដើម្បីទទួលបានការសាទរ ពីពលរដ្ឋខ្មែរ និងអន្តរជាតិឡើយ ព្រោះជំនួបនេះ ជាការរៀបចំសម្របសម្រួលផ្ដល់តួនាទីនិង ដើម្បីប្រយោជន៍ទៅវិញទៅមកក្នុងគ្រាអាសន្ន «ឯងជួយអញ អញជួយឯង»។
ស្រដៀងគ្នានេះ អតីតអ្នកទោសនយោបាយ លោក នង ធារ៉ា យល់ថា ការព្រមទទួលយកតួនាទី ជាប្រេសិតពិសេសរបស់កញ្ញា កឹម មនោវិទ្យា បង្ហាញថា ដំណើរនយោបាយលោក កឹម សុខា និងកូនស្រី កំពុងតែបំផ្លាញប្រជាប្រិយភាពខ្លួនឯង តាមរយៈការបន្ទាន់ឥរិយាបថដើម្បីដោះដូរ សេរីភាព បុគ្គល និងគ្រួសារ។ លោកយល់ថា នេះជាការបំបាក់ទឹកចិត្តអ្នកគាំទ្រ និង សកម្មជនដទៃទៀត ដែលបានតស៊ូ ដើម្បីប្រជាធិបតេយ្យ និងសិទ្ធិមនុស្ស។ «»
រីឯ មេធាវីការពារក្ដីឱ្យ លោក កឹម សុខា គឺ អ្នកស្រី ម៉េង សុធារី (Sopheary Meng)បានសរសេរ សារនៅលើហ្វេសប៊ុក ថាច្បាប់៣ក្នុងជីវិតគឺ បើគេស្រលាញ់អ្នក អ្នកកុំក្បត់គេ បើគេជឿអ្នក អ្នកកុំកុហកគេ ហើយបើគេជួយអ្នក អ្នកកុំភ្លេចគុណគេ។ ជាមួយគ្នានោះ អ្នកគាំទ្រលោក កឹម សុខា លោក មុត ចន្ថា បង្ហោះលើហ្វេសប៊ុកថា ទោះត្រូវស្លាប់ ក៏ត្រូវរក្សាតម្លៃមនសិការនិងឧត្ដមគតិ!» ។
ចំណែក មេធាវីការពារក្ដី លោក កឹម សុខា ម្នាក់ទៀត លោក ផេង ហេង បានចេញសារហាក់ចង់ការពារ លោក កឹម សុខា ដោយលើកយកករណីសម្ដេចក្រុមព្រះមកបកស្រាយ។ លោកថា កន្លងទៅសម្ដេចក្រុងព្រះមិនបានក្បត់សហការី និងប្រជារាស្ត្រខ្មែរទេ មានតែសហការី និងអតីតសហការី ដែលមិនស្មោះត្រង់ ហើយបង្កើតព័ត៌មានឲ្យមានការភាន់ច្រឡំ និងការរើសអើង។ ទន្ទឹមគ្នានោះ លោកហាក់សំដៅលើ ករណីលោក កឹម សុខា ថា អ្នកអាចមើលឃើញអាប៉ោងពេលនេះថាបើកគ្រប ប៉ុន្តែសម្រាប់លោក អាប៉ោងនេះ មិនទាន់ទាំងក្រឡុកនោះទេ ដូចនេះ អ្នកកុំប្រញាប់ចាក់។
ជាមួយគ្នានេះ នាយកប្រតិបត្តិនៃអង្គការPED លោក សាន់ ម៉ាឡា បានសរសេរនៅលើហ្វេសប៊ុកបែបឌឺដង ថា អ្នកខ្លះ នាំគ្នាទៅសោយសុខ នៅស្រុកប្រជាធិបតេយ្យអស់ រួចស្រែកខឹងលោក កឹម សុខា ថាធ្វើឱ្យខូចប្រជាធិបតេយ្យ។ លោកបន្តថា គេនាំគ្នារត់ចោលលោក កឹម សុខា ទុកឱ្យគាត់នៅប្រឈមក្នុងទ្រុងនយោបាយតែម្នាក់ឯង បន្ទាប់មកគេនាំគ្នាបន្ទោសគាត់ ថាបែបនេះឬបែបនោះ ដូចជា មិនយុត្តិធម៌ សម្រាប់គាត់ទេដឹង? លោកយល់ថា តួនាទី ប្រេសិតពិសេស គឺបានន័យថា អ្នកតំណាងពិសេស ដូច្នេះ តួនាទីរបស់កូនស្រី លោក កឹម សុខា ទំនងជានឹងចូលរួមដោះស្រាយបញ្ហាជាតិនៅលើឆាកអន្តរជាតិ ដែលយើងគួរតែសាទរ។
ចំណែក សកម្មជនសង្គម ដែលកំពុងរស់នៅប្រទេស អូស្ត្រាលីលោក អួត ឡាទីន យល់ឃើញថា ការដែល លោក កឹម សុខា បន្ទន់ឥរិយាបថ ជាមួយ លោក ហ៊ុន សែន ដើម្បីរកច្រកចេញផ្នែកនយោបាយ របស់ លោក កឹម សុខា នេះមិនទទួលបានផលចំណេញទេ បើទោះជាអនាគតលោកអាចបានការលើកលែងទោសក្ដី ក៏លោកបានបាត់បង់ទំនុកចិត្តពីអ្នកគាំទ្របក្សប្រឆាំង។
ជាមួយគ្នានោះ ពលករខ្មែរធ្វើការនៅប្រទេសកូរ៉េខាងត្បូង លោកស្រី វង់ សារ៉េម យល់ថា ការផ្ដល់តួនាទីឱ្យកូនស្រី លោក កឹម សុខា មិនមែនជាការផ្សះផ្សាជាតិនោះទេ ប៉ុន្តែជាការធ្វើឡើង ដើម្បីប្រយោជន៍បុគ្គល និងបក្សកាន់អំណាច។ «»
ជុំវិញរឿងនេះអ្នកនាំពាក្យគណបក្សប្រជាជនកម្ពុជា លោក ជា ធីរិទ្ធ ប្រាប់ទូរទស្សន៍អាស៊ីសេរីថា ការដែលរដ្ឋាភិបាល ផ្ដល់តួនាទីជាប្រេសិតពិសេសឱ្យ កូនស្រី លោកកឹម សុខា គឺបង្ហាញពីចេតនាដ៏ល្អរបស់លោកនាយករដ្ឋមន្ត្រី ហ៊ុន ម៉ាណែត ដើម្បីជាឱកាសជួយប្រទេសជាតិ ក្នុងនាមជានយោបាយជំនាន់ថ្មី។ «»
ជុំវិញរឿងនេះដែរ គណបក្សប្រជាធិបតេយ្យជឿនលឿន របស់លោក យ៉ែម បុញ្ញឫទ្ធិ ដែលជាអតីតសហការីជិតស្និទ្ធិរបស់លោក កឹម សុខា នៅថ្ងៃដដែលនេះបាន ចេញលិខិតអំពាវនាវ ដល់គណបក្សនយោបាយក្រៅរដ្ឋាភិបាលទាំងអស់ និងពលរដ្ឋ បញ្ញវន្ត និងយុវជន ឱ្យរួបរួមគ្នាជាធ្លុងមួយ ប្រកាន់ខ្ជាប់ នូវសុចរិតភាព និងឆន្ទៈរួម ដើម្បីចូលរួមជីវភាពនយោបាយជាមួយគ្នាដើម្បីត្រៀម ចូលរួមបោះឆ្នោតជ្រើសរើសក្រុមប្រឹក្សាឃុំ–សង្កាត់ នៅថ្ងៃទី០៦ ខែមិថុនា ឆ្នាំ២០២៧ ខាងមុខនេះ។
ចំណែកស្ថាបនិកវត្តភ្នំសេរី ព្រះតេជព្រះគុណ ប៊ុត ប៊ុនតិញ វិញ ព្រះអង្គបានបង្ហោះសារលើបណ្ដាញសង្គមថា ព្រះអង្គនៅជាមួយជាតិខ្មែរ មិនរត់តាមព្រឹត្តិការណ៍របស់គ្រួសារលោក កឹម សុខា និងលោក ហ៊ុន សែន ទេ។ ព្រះអង្គបន្តថា កុំថាឡើយប្រេសិតពិសេស ទោះជាកញ្ញា កឹម មនោវិទ្យា ត្រូវបានតែងតាំងជាឧបនាយករដ្ឋមន្ត្រីក៏ដោយ ក៏មិនអាចបង្រួបបង្រួមជាតិខ្មែរ និងទាមទារទឹកដីពីចោរបានមកវិញទេ។ ព្រះអង្គបញ្ចប់សំណេរមួយនេះថា សូមជនរួមជាតិខ្មែរ កុំរត់តាមត្រកូលកឹម និងត្រកូលហ៊ុន ដោយព្រះអង្គចោទថា ត្រកូលទាំងពីរនេះជាត្រកូលអ្នកទោសរួមគ្នាបំផ្លាញជាតិខ្មែរ។
ចំណែក ប្រមុខដឹកនាំរដ្ឋាភិបាលកម្ពុជាឯករាជ្យ ២៣ តុលា លោក សម រង្សី វិញ ក្រោយកូនស្រីលោក កឹម សុខា ទទួលបានតំណែងធំពីរបបដឹកនាំត្រកូលហ៊ុននេះ លោកបានបង្ហោះសារខ្លីមួយលើហ្វេសប៊ុករបស់លោកនៅថ្ងៃទី ១៨ សីហាថា ទោះជាឆ្ងាយយ៉ាងណាពីប្រទេសកំណើត ភក្ដីភាពចំពោះមាតុភូមិ និងសេចក្ដីថ្លៃថ្នូរផ្ទាល់ខ្លួន គឺជាគុណតម្លៃដ៏សំខាន់ពីរ ដែលយើងត្រូវតែថែរក្សាឱ្យបានជាដាច់ខាត៕
