អ្នកឃ្លាំមើលសង្គមកម្ពុជា អះអាងថា ការសម្រេចបញ្ចូល សមាជិកគ្រួសារ និងសាច់ញាតិកងទ័ពពលី និងរបួសធ្ងន់ចំនួន ៤១នាក់ ក្នុងក្របខ័ណ្ឌកងទ័ព គឺជារឿងមួយល្អ ប៉ុន្តែទាមទារឲ្យធ្វើឡើងដោយតម្លាភាព ដើម្បីចៀសវាងកុំឲ្យមន្ត្រីខិលខួចមួយចំនួនឆ្លៀតឱកាសប្រព្រឹត្តនូវអំពើពួករលួយ ដាក់បញ្ចូលសាច់ញាតិរបស់ពួកគេ។ ការអះអាងនេះ បន្ទាប់ពីលោកនាយករដ្ឋមន្ត្រី ហ៊ុន ម៉ាណែត សម្រេចបញ្ចូល សមាជិកគ្រួសារ និងសាច់ញាតិកងទ័ពពលី និងរបួសធ្ងន់ ក្នុងក្របខ័ណ្ឌកងទ័ព។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណាបានឲ្យដឹងថា ការបញ្ចូលក្រុមគ្រួសារកងទ័ពដែលបានពលីការពារជាតិ គឺជារឿងមួយល្អ ដែលនេះគឺជាការលើកទឹកចិត្តទៅដល់គ្រួសារកងទ័ព ប៉ុន្តែក៏ប្រាកដថា អ្នកទាំងអស់នោះគាត់បានចូលទៅបម្រើការងារ ជាមន្ត្រីយោធាឬជាទាហានដោយស្ម័គ្រចិត្ត ដោយមិនមានការបង្ខិតបង្ខំពីអ្នកណានោះទេ។
លោក ស៊ឹង សែនករុណា៖ «អ៊ីចឹងយើងចង់ឲ្យមានអ្វីដែលធ្វើកិច្ចការងារទាំងអស់នេះ គួរតែមានការធ្វើដោយភាពត្រឹមត្រូវ ដោយភាពច្បាស់លាស់ ដោយមានការត្រួតពិនិត្យជាក់លាក់ ចៀសវាងការបង្កើតនូវឱកាសនិយម ហើយលើកបន្តុបតែក្រុមគ្រួសារបក្ខពួកនិយមបែបហ្នឹង វាធ្វើឲ្យប៉ះពាល់នូវដំណើរការនៅក្នុងការជ្រើសរើស និងតម្លាភាពក្នុងការដាក់បញ្ចូល អ្នកដែលមានសមត្ថភាពពិតប្រាកដ ដើម្បីបម្រើជាតិ ហើយចៀសវាងគ្រាន់តែជាក្រុមគ្រួសារ បានតួនាទីហើយគ្មានសមត្ថភាព មានតែចំនួន ធ្វើឲ្យប៉ះពាល់ទាំង កិច្ចការងារជាតិ ដែលមិនអាចយកទៅបម្រើការក្នុងផ្នែកណាមួយបាន ហើយចាយថវិកាជាតិអត់ប្រយោជន៍ អាហ្នឹងគឺជារឿងមួយដែលមិនគួរធ្វើទេ»។
ការអះអាងរបស់ប្រធានអង្គការប្រធាធិបតេយ្យខ្មែររូបនេះ គឺបន្ទាប់ពី លោកនាយករដ្ឋមន្ត្រី ហ៊ុន ម៉ាណែត បានសម្រេចអនុញ្ញាតឲ្យក្រសួងការពារជាតិបញ្ចូលក្នុងក្របខ័ណ្ឌ និងប្រគល់ឋានន្តរស័ក្តិ ពលទោ ដល់សមាជិកគ្រួសារ សាច់ញាតិ វីរកងទ័ពពលី និងរបួសធ្ងន់នៅក្នុងសមរភូមិចំនួន ៤១នាក់ទៅតាមបណ្តាកងឯកភាពចំណុះឲ្យកងទ័ពជើងគោក។
កាលពីថ្ងៃទី២៩ ខែកក្កដា ឆ្នាំ២០២៥ លោកនាយករដ្ឋមន្ត្រី ហ៊ុន ម៉ាណែត បានលើកឡើងពីការរៀបចំ និងអនុវត្តនូវកញ្ចប់គោលនយោបាយសម្រាប់គ្រួសារយោធិនពលី រងរបួស ពិការ និងកងកម្លាំងនគរបាលជាតិ ដែលបានពលី ឬធ្លាក់ខ្លួនពិការមិនអាចបំពេញភារកិច្ចបន្តបាន រដ្ឋាភិបាលនឹងផ្ដល់ក្របខ័ណ្ឌឲ្យសាច់ញាតិបង្កើតរបស់ពួកគេមួយរូបបានចូលបម្រើប្រទេសជាតិនៅអង្គភាព។
ជុំវិញបញ្ហានេះ អ្នកឃ្លាំមើលសង្គម ជំរុញឲ្យរដ្ឋាភិបាលលោក ហ៊ុន ម៉ាណែត គិតគូរតបស្នងនឹងគុណបំណាច់របស់យុទ្ធជនខ្មែរ ដែលកាន់អាវុធប្រយុទ្ធការពារទឹកដីកម្ពុជានៅសមរភូមិមុខ ដោយរៀបចំដំឡើងប្រាក់ខែ បុណ្យស័ក្តិ និងសង់ផ្ទះជូនក្រុមគ្រួសាររបស់កងទ័ព ដែលបានពលី ការពារបូរណភាពទឹកដីនៅសមរភូមិ។
អ្នកឃ្លាំមើលសង្គម ក៏ទទូចដល់រដ្ឋាភិបាលកម្ពុជា ត្រូវតែយកចិត្តទុកដាក់ខ្ពស់ និងផ្តល់ឱកាសឲ្យកូនៗរបស់យុទ្ធជនទទួលបានការរៀនសូត្រខ្ពង់ខ្ពស់រហូតដល់បញ្ចប់ថ្នាក់ឧត្ដមសិក្សា ដោយឥតគិតថ្លៃព្រមទាំងឧបត្ថម្ភជីវភាពសិក្សាឲ្យបានគ្រប់គ្រាន់។
យ៉ាងណា អ្នកឃ្លាំមើលសង្គមអះអាងថា ប្រធានព្រឹទ្ធសភា និងជាអគ្គភស្តុភារកំពូលនៃកងយោធពលខេមរភូមិន្ទ លោក ហ៊ុន សែន ហាក់ពុំបានអើពើអំពីទុក្ខលំបាករបស់ពលរដ្ឋ និងកងទ័ព នោះឡើយ។ ចាប់តាំងពីកម្ពុជាត្រូវបានយោធាថៃឈ្លានពានទឹកដី និងបង្កសង្គ្រាមសម្លាប់ពលរដ្ឋខ្មែរ និងកងទ័ព នៅតាមព្រំដែន អស់ជាច្រើននាក់មក លោក ហ៊ុន សែន នៅមិនទាន់ចុះជួបសួរសុខទុក្ខគ្រួសារកងទ័ពពលី កងទ័ពដែលកំពុងសម្រាកព្យាបាលនៅតាមមន្ទីរពេទ្យ និងជនភៀសសឹកនោះទេ។ លោក ហ៊ុន សែន ហាក់ខ្វល់ តែពីរឿងបង្ហោះវីដេអូ និង បទចម្រៀងរៀបរាប់ ពីគ្រួសារត្រកូល«ហ៊ុន» បែបមនោសញ្ចេតនា ស្នេហា និងកោតសរសើរពីការដឹកនាំរបស់ខ្លួនប៉ុណ្ណោះ៕
