អ្នកតាមដានបញ្ហាសង្គមកម្ពុជា អះអាងថា ប្រធានគណបក្សប្រជាជនកម្ពុជា លោក ហ៊ុន សែន ប្រើប្រាស់យុទ្ធសាស្ត្រនយោបាយដដែលៗក្នុងការត្រៀមលក្ខណៈសម្រាប់ការបោះឆ្នោតដែលនឹងខិតជិតមកដល់ក្នុងពេលខាងមុខ ដោយបង្គាប់បញ្ជាឲ្យមន្ត្រីនៅមូលដ្ឋានធ្វើការតម្រូវចិត្តថ្នាក់លើ ដើម្បីរក្សាតំណែង ប៉ុន្តែគ្មានប្រព័ន្ធគណនេយ្យភាពសម្រាប់ដោះស្រាយបញ្ហាដល់ពលរដ្ឋនៅមូលដ្ឋាន។ ការអះអាងនេះបន្ទាប់ពីប្រមុខរដ្ឋស្តីទី លោក ហ៊ុន សែន បានចាប់ផ្តើមបេសកកម្មចុះជួបក្រុមប្រឹក្សា ខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានា នៅតាមមូលដ្ឋាន ក្នុងខេត្តកំពង់ចាម និង ខេត្តត្បូងឃ្មុំ កាលពីថ្ងៃទី២៥និង២៦ ខែមេសា។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី បានប្រាប់ទូរទស្សន៍អាស៊ីសេរី នៅថ្ងៃទី២៧ មេសាថា ការលើកឡើងរបស់លោក ហ៊ុន សែន គ្រាន់តែជាវោហារសព្ទនយោបាយដែលគ្មានប្រសិទ្ធភាពនិងដដែលៗទៅមន្ត្រីនៅមូលដ្ឋានរបស់គាត់ ដែលជាហេតុបង្កជាឧបសគ្គបង្កើតទៅជាអំពើពុករលួយជាប្រព័ន្ធ ពិបាកនឹងលុបបំបាត់បាន ពីព្រោះមន្ត្រីមូលដ្ឋាន ធ្វើការបម្រើបក្សមិនបម្រើរាស្ត្រ ដោយបិទបាំងនូវការពិតដែលប្រជាពលរដ្ឋនៅក្នុងមូលដ្ឋានកំពុងតែជួបប្រទះដូចជា វិបត្តិដីធ្លី ការធ្លាក់ចុះតម្លៃកសិផល និងភាពអយុត្តិធម៌ក្នុងប្រព័ន្ធតុលការជាដើម។
លោក សេង វណ្ណលី បន្ថែមទៀតថា រដ្ឋាភិបាលបង្ហាញការយកចិត្តទុកដាក់ខ្លាំងតែនៅពេលបោះឆ្នោតបានធ្វើឲ្យពលរដ្ឋលែងមានទំនុកចិត្តនូវភាពស្មោះត្រង់។ លោកថា ប្រសិទ្ធភាពពិតប្រាកដនឹងមិនកើតមានទេ ប្រសិនបើរដ្ឋាភិបាលមិនមានឆន្ទៈពិតប្រាកដក្នុងការកែទម្រង់រចនាសម្ព័ន្ធដឹកនាំឲ្យមានតម្លាភាព។
លោក សេង វណ្ណលី៖ «សរុបមកដរាបណាសិទ្ធិអំណាចសម្រេចចិត្តនៅតែលើដៃបុគ្គលម្នាក់ៗរឺក៏គណបក្សមួយ ហើយមន្ត្រីនៅតែខ្លាចអំណាចថ្នាក់លើជាងខ្លាចការបាត់បង់ទំនុកចិត្តពីពលរដ្ឋ នោះការណែនាំទាំងឡាយនឹងនៅតែជាសម្លេងដែលបន្លឺនៅក្នុងសាលប្រជុំ ហើយរលាយបាត់ទៅវិញនៅពេលដែលកម្មវិធីត្រូវបានបញ្ចប់»។
លោក សេង វណ្ណលី បន្ថែមទៀតថា កម្ពុជាត្រូវការការផ្លាស់ប្ដូរពីវប្បធម៌និយាយច្រើនជាងធ្វើ មកជាការកសាងស្ថាប័នរដ្ឋដែលរឹងមាំនិងមានច្បាប់ទម្លាប់ច្បាស់លាស់ដើម្បីធានាថា សេវាកម្មសាធារណៈត្រូវបានផ្តល់ជូនដោយស្មើភាពដោយគ្មានការរើសអើងផ្នែកនយោបាយណាមួយកើតមានឡើង។
ការអះអាងរបស់អ្នកតាមដានភូមិសាស្ត្រនយោបាយរូបនេះ គឺបន្ទាប់ពីប្រធានគណបក្សប្រជាជនកម្ពុជា លោក ហ៊ុន សែន ដែលពេលនេះកំពុងបំពេញតួនាទីជាប្រមុខរដ្ឋស្តីទី បានចុះជួបក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ចាម និងខេត្តត្បូងឃ្មុំ កាលពីថ្ងៃទី២៥និង២៦ ខែមេសា។
អ្នកនាំពាក្យលោក ហ៊ុន សែន គឺលោក ជា ធីរិទ្ធ បានសរសេរនៅលើទំព័រហ្វេសប៊ុករបស់លោកថា ការចុះជួបសំណេះ សំណាលរបស់ប្រធានព្រឹទ្ធសភាកម្ពុជា គឺដើម្បីផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយអាជ្ញាធរមូលដ្ឋាន ក្រើនរំឭក និងជំរុញដល់មន្ត្រីនៅមូលដ្ឋាន ឲ្យបង្កើនការយកចិត្តទុកដាក់លើភារកិច្ចរបស់ខ្លួនក្នុងការផ្តល់សេវាសាធារណៈជូនប្រជាពលរដ្ឋឲ្យបានល្អប្រសើរ រួមនឹងការដោះស្រាយបញ្ហានានា ដែលជាក្តីកង្វល់របស់ប្រជាពលរដ្ឋនៅមូលដ្ឋានឲ្យមានប្រសិទ្ធភាព និងទាន់ពេលវេលា។
កាលពីថ្ងៃទី២៥ និង ២៦ ខែមេសា លោក ហ៊ុន សែន បានចុះជួបក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ចាម ដែលមានចំនួនជិត ១ ២០០នាក់។ បន្ទាប់ពីបានជួបសំណេះសំណាលជាមួយមន្ត្រីនៅខេត្តកំពង់ចាម លោក ហ៊ុន សែន ក៏បានបន្តដំណើរទៅកាន់ខេត្តត្បូងឃ្មុំ បានជួបមន្ត្រីចំនួនជិត ៩០០នាក់ និងបានថ្លែងសារនយោបាយស្រដៀងគ្នានៅខេត្តកំពង់ចាមដែរ។
ក្រុមអ្នកឃ្លាំមើលសង្គមបានលើកឡើងថា មេដឹកនាំនៃគណបក្សកាន់អំណាច បានបង្ហាញពីការយកចិត្តទុកដាក់ដល់ប្រជាពលរដ្ឋ កម្មករ កម្មការិនី និងចែកអំណោយ តែនៅមុនពេលបោះឆ្នោតប៉ុណ្ណោះ។ ប៉ុន្តែ គេសង្កេតឃើញថា គណបក្សក្រៅរដ្ឋាភិបាល តែងតែរងនូវការធ្វើទុក្ខបុកម្នេញពីរដ្ឋាភិបាលបក្សកាន់អំណាចតាមរយៈការគំរាមកំហែងដោយហិង្សាលើករូបរាងកាយ និង ចាប់ឃុំខ្លួនដាក់ពន្ធនាគារជាដើម។
ប្រទេសកម្ពុជា ក្រោមការគ្រប់គ្រងរបស់រដ្ឋាភិបាលត្រកូលហ៊ុន ជាង៤ទសវត្សមកនេះ បានបង្កើតឲ្យមានអំពើពុករលួយនិងគ្រួសារនិយម បក្ខពួកនិយម នៅគ្រប់ក្រសួងស្ថាប័នរបស់រដ្ឋទាំងអស់ គឺគិតតែពីកសាងទ្រព្យសម្បត្តិផ្ទាល់ខ្លួន និងពង្រឹងអំណាចគ្រួសារដោយលើកបន្តុបកូនចៅនិងសាច់ញាតិរបស់ខ្លួនឲ្យកាន់តួនាទីសំខាន់ៗនៅក្នុងជួររដ្ឋាភិបាល៕
លោក ហ៊ុន សែន រងការរិះគន់ថា បញ្ជាឱ្យមន្ត្រីបម្រើគណបក្សដើម្បីរក្សាតំណែង ខណៈគ្មានប្រព័ន្ធគណនេយ្យភាព
អ្នកតាមដានបញ្ហាសង្គមកម្ពុជា អះអាងថា ប្រធានគណបក្សប្រជាជនកម្ពុជា លោក ហ៊ុន សែន ប្រើប្រាស់យុទ្ធសាស្ត្រនយោបាយដដែលៗក្នុងការត្រៀមលក្ខណៈសម្រាប់ការបោះឆ្នោតដែលនឹងខិតជិតមកដល់ក្នុងពេលខាងមុខ ដោយបង្គាប់បញ្ជាឲ្យមន្ត្រីនៅមូលដ្ឋានធ្វើការតម្រូវចិត្តថ្នាក់លើ ដើម្បីរក្សាតំណែង ប៉ុន្តែគ្មានប្រព័ន្ធគណនេយ្យភាពសម្រាប់ដោះស្រាយបញ្ហាដល់ពលរដ្ឋនៅមូលដ្ឋាន។ ការអះអាងនេះបន្ទាប់ពីប្រមុខរដ្ឋស្តីទី លោក ហ៊ុន សែន បានចាប់ផ្តើមបេសកកម្មចុះជួបក្រុមប្រឹក្សា ខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានា នៅតាមមូលដ្ឋាន ក្នុងខេត្តកំពង់ចាម និង ខេត្តត្បូងឃ្មុំ កាលពីថ្ងៃទី២៥និង២៦ ខែមេសា។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី បានប្រាប់ទូរទស្សន៍អាស៊ីសេរី នៅថ្ងៃទី២៧ មេសាថា ការលើកឡើងរបស់លោក ហ៊ុន សែន គ្រាន់តែជាវោហារសព្ទនយោបាយដែលគ្មានប្រសិទ្ធភាពនិងដដែលៗទៅមន្ត្រីនៅមូលដ្ឋានរបស់គាត់ ដែលជាហេតុបង្កជាឧបសគ្គបង្កើតទៅជាអំពើពុករលួយជាប្រព័ន្ធ ពិបាកនឹងលុបបំបាត់បាន ពីព្រោះមន្ត្រីមូលដ្ឋាន ធ្វើការបម្រើបក្សមិនបម្រើរាស្ត្រ ដោយបិទបាំងនូវការពិតដែលប្រជាពលរដ្ឋនៅក្នុងមូលដ្ឋានកំពុងតែជួបប្រទះដូចជា វិបត្តិដីធ្លី ការធ្លាក់ចុះតម្លៃកសិផល និងភាពអយុត្តិធម៌ក្នុងប្រព័ន្ធតុលការជាដើម។
លោក សេង វណ្ណលី បន្ថែមទៀតថា រដ្ឋាភិបាលបង្ហាញការយកចិត្តទុកដាក់ខ្លាំងតែនៅពេលបោះឆ្នោតបានធ្វើឲ្យពលរដ្ឋលែងមានទំនុកចិត្តនូវភាពស្មោះត្រង់។ លោកថា ប្រសិទ្ធភាពពិតប្រាកដនឹងមិនកើតមានទេ ប្រសិនបើរដ្ឋាភិបាលមិនមានឆន្ទៈពិតប្រាកដក្នុងការកែទម្រង់រចនាសម្ព័ន្ធដឹកនាំឲ្យមានតម្លាភាព។
លោក សេង វណ្ណលី៖ «សរុបមកដរាបណាសិទ្ធិអំណាចសម្រេចចិត្តនៅតែលើដៃបុគ្គលម្នាក់ៗរឺក៏គណបក្សមួយ ហើយមន្ត្រីនៅតែខ្លាចអំណាចថ្នាក់លើជាងខ្លាចការបាត់បង់ទំនុកចិត្តពីពលរដ្ឋ នោះការណែនាំទាំងឡាយនឹងនៅតែជាសម្លេងដែលបន្លឺនៅក្នុងសាលប្រជុំ ហើយរលាយបាត់ទៅវិញនៅពេលដែលកម្មវិធីត្រូវបានបញ្ចប់»។
លោក សេង វណ្ណលី បន្ថែមទៀតថា កម្ពុជាត្រូវការការផ្លាស់ប្ដូរពីវប្បធម៌និយាយច្រើនជាងធ្វើ មកជាការកសាងស្ថាប័នរដ្ឋដែលរឹងមាំនិងមានច្បាប់ទម្លាប់ច្បាស់លាស់ដើម្បីធានាថា សេវាកម្មសាធារណៈត្រូវបានផ្តល់ជូនដោយស្មើភាពដោយគ្មានការរើសអើងផ្នែកនយោបាយណាមួយកើតមានឡើង។
ការអះអាងរបស់អ្នកតាមដានភូមិសាស្ត្រនយោបាយរូបនេះ គឺបន្ទាប់ពីប្រធានគណបក្សប្រជាជនកម្ពុជា លោក ហ៊ុន សែន ដែលពេលនេះកំពុងបំពេញតួនាទីជាប្រមុខរដ្ឋស្តីទី បានចុះជួបក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ចាម និងខេត្តត្បូងឃ្មុំ កាលពីថ្ងៃទី២៥និង២៦ ខែមេសា។
អ្នកនាំពាក្យលោក ហ៊ុន សែន គឺលោក ជា ធីរិទ្ធ បានសរសេរនៅលើទំព័រហ្វេសប៊ុករបស់លោកថា ការចុះជួបសំណេះ សំណាលរបស់ប្រធានព្រឹទ្ធសភាកម្ពុជា គឺដើម្បីផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយអាជ្ញាធរមូលដ្ឋាន ក្រើនរំឭក និងជំរុញដល់មន្ត្រីនៅមូលដ្ឋាន ឲ្យបង្កើនការយកចិត្តទុកដាក់លើភារកិច្ចរបស់ខ្លួនក្នុងការផ្តល់សេវាសាធារណៈជូនប្រជាពលរដ្ឋឲ្យបានល្អប្រសើរ រួមនឹងការដោះស្រាយបញ្ហានានា ដែលជាក្តីកង្វល់របស់ប្រជាពលរដ្ឋនៅមូលដ្ឋានឲ្យមានប្រសិទ្ធភាព និងទាន់ពេលវេលា។
កាលពីថ្ងៃទី២៥ និង ២៦ ខែមេសា លោក ហ៊ុន សែន បានចុះជួបក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ចាម ដែលមានចំនួនជិត ១ ២០០នាក់។ បន្ទាប់ពីបានជួបសំណេះសំណាលជាមួយមន្ត្រីនៅខេត្តកំពង់ចាម លោក ហ៊ុន សែន ក៏បានបន្តដំណើរទៅកាន់ខេត្តត្បូងឃ្មុំ បានជួបមន្ត្រីចំនួនជិត ៩០០នាក់ និងបានថ្លែងសារនយោបាយស្រដៀងគ្នានៅខេត្តកំពង់ចាមដែរ។
ក្រុមអ្នកឃ្លាំមើលសង្គមបានលើកឡើងថា មេដឹកនាំនៃគណបក្សកាន់អំណាច បានបង្ហាញពីការយកចិត្តទុកដាក់ដល់ប្រជាពលរដ្ឋ កម្មករ កម្មការិនី និងចែកអំណោយ តែនៅមុនពេលបោះឆ្នោតប៉ុណ្ណោះ។ ប៉ុន្តែ គេសង្កេតឃើញថា គណបក្សក្រៅរដ្ឋាភិបាល តែងតែរងនូវការធ្វើទុក្ខបុកម្នេញពីរដ្ឋាភិបាលបក្សកាន់អំណាចតាមរយៈការគំរាមកំហែងដោយហិង្សាលើករូបរាងកាយ និង ចាប់ឃុំខ្លួនដាក់ពន្ធនាគារជាដើម។
ប្រទេសកម្ពុជា ក្រោមការគ្រប់គ្រងរបស់រដ្ឋាភិបាលត្រកូលហ៊ុន ជាង៤ទសវត្សមកនេះ បានបង្កើតឲ្យមានអំពើពុករលួយនិងគ្រួសារនិយម បក្ខពួកនិយម នៅគ្រប់ក្រសួងស្ថាប័នរបស់រដ្ឋទាំងអស់ គឺគិតតែពីកសាងទ្រព្យសម្បត្តិផ្ទាល់ខ្លួន និងពង្រឹងអំណាចគ្រួសារដោយលើកបន្តុបកូនចៅនិងសាច់ញាតិរបស់ខ្លួនឲ្យកាន់តួនាទីសំខាន់ៗនៅក្នុងជួររដ្ឋាភិបាល៕
