ក្រសួងកសិកម្មបានច្រានចោលការចោទប្រកាន់ដែលថា កម្ពុជាបម្រុងនាំចូលសត្វស្វាក្តាមពីប្រទេសថៃ។
អនុរដ្ឋលេខាធិការ និងជាអ្នកនាំពាក្យ ក្រសួងកសិកម្មរុក្ខាប្រមាញ់ និងនេសាទ លោក ឃឹម ហ្វីណង់ បានប្រាប់ទូរទស្សន៍អាស៊ីសេរី ជាសំណេរតាមបណ្ដាញតេឡេក្រាម កាលពីថ្ងៃទី៣ ខែធ្នូ ថា កម្ពុជាពុំមានតម្រូវការនាំចូលស្វាក្តាមព្រៃពីប្រទេសដទៃ ឬចាប់ស្វាក្តាមពីព្រៃមកជួញដូរឡើយ ព្រោះកម្ពុជាមានកសិដ្ឋានចិញ្ចឹម និងបង្កាត់ពូជស្របច្បាប់ជាច្រើន ដែលមានសមត្ថភាពគ្រប់គ្រាន់ សម្រាប់ផ្គត់ផ្គង់ និងបម្រើឱ្យការនាំចេញ។
លោក ឃឹម ហ្វីណង់ បញ្ជាក់ថា រាល់កសិដ្ឋានចិញ្ចឹមស្វាក្តាមទាំងអស់នៅកម្ពុជា សុទ្ធតែមានការចុះបញ្ជីទទួលស្គាល់ច្បាស់លាស់ និងមានការអនុញ្ញាតនាំចេញពីអាជ្ញាធរគ្រប់គ្រងសាយតេស (CITES) កម្ពុជា និងតម្រូវឱ្យគោរពយ៉ាងខ្ជាប់ខ្ជួនតាមបទដ្ឋានអនាម័យ និងវិធីសាស្ត្រចិញ្ចឹមត្រឹមត្រូវ។
ការចេញមកអះអាងរបស់មន្ត្រីក្រសួងកសិកម្ម រូបនេះ ធ្វើឡើងបន្ទាប់ពីប៉ូលិសផ្នែកបង្ក្រាបបទល្មើសធនធានធម្មជាតិ និងបរិស្ថានថៃ បានចាប់ខ្លួនបុរសម្នាក់ ដែលគេអះអាងថា ជាជនជាតិខ្មែរ កាលពីថ្ងៃទី២៧ ខែវិច្ឆិកា នៅខេត្តប្រាជីនបុរី (Prachin Buri) ពាក់ព័ន្ធនឹងការជួញដូរសត្វព្រៃអន្តរជាតិខុសច្បាប់ ដោយរឹបអូសបានសត្វស្វាក្ដាម ៦៣ក្បាល ដែលកំពុងរៀបចំនាំចេញទៅកម្ពុជា។ អាជ្ញាធរថៃ អះអាងថា យោងតាមចម្លើយសារភាពរបស់ជនសង្ស័យ សត្វស្វាក្ដាមទាំងនេះ ត្រូវបានដឹកជញ្ជូនពីខេត្តភាគខាងជើងប្រទេសថៃ និងបម្រុងនាំឆ្លងដែនមកប្រទេសកម្ពុជា ដោយមិនមានអាជ្ញាប័ណ្ណកាន់កាប់សត្វព្រៃការពារនោះឡើយ។
ទោះជាបែបនេះក្ដី មន្ត្រីជាន់ខ្ពស់ក្រសួងកសិកម្ម របស់កម្ពុជា លើកឡើងថា កម្ពុជាប្រកាន់ជំហរប្រឆាំងរាល់ការជួញដូរសត្វព្រៃខុសច្បាប់ ហើយសម្រាប់ករណីនៅប្រទេសថៃនេះ បើមានការនាំចូលដោយខុសច្បាប់មកកម្ពុជា អាជ្ញាធរកម្ពុជានឹងមានវិធានការតាមផ្លូវច្បាប់ ដើម្បីបង្ក្រាបរាល់បទល្មើសជួញដូរសត្វព្រៃឆ្លងដែនគ្រប់រូបភាព។
យ៉ាងណាក៏ដោយចុះ របាយការណ៍ស៊ើបអង្កេតរបស់សារព័ត៌មាន ម៉ុងហ្គាបេ (Mongabay) ដែលចុះផ្សាយកាលពីខែមេសា ឆ្នាំ២០២៥ បានបង្ហាញថា សត្វស្វាក្ដាម ឬស្វាកន្ទុយវែងជាច្រើនក្បាល ដែលនាំចូលទៅកាន់សហរដ្ឋអាមេរិក(USA) ពីតំបន់អាស៊ីអាគ្នេយ៍ អាចត្រូវបានប្រមាញ់ពីព្រៃ និងលក់ទៅឱ្យស្ថាប័នស្រាវជ្រាវវេជ្ជសាស្ត្រ។ ក្នុងនោះ ការនាំចេញសត្វស្វារបស់កម្ពុជា ត្រូវបានអង្គការ សាយតេស (CITES) ព្រមាន បន្ទាប់ពីរកឃើញថា កម្ពុជាមានជាប់ពាក់ព័ន្ធនឹងការនាំចេញសត្វស្វាក្ដាមដោយខុសច្បាប់ ដោយប្រមូលទិញសត្វស្វាពីក្នុងព្រៃ រាប់ម៉ឺនក្បាលសម្រាប់នាំចេញ ដើម្បីជំនួសសត្វស្វាបង្កាត់ពូជនៅក្នុងកសិដ្ឋាន ដែលមានចំនួនតិច៕
