អង្គការសង្គមស៊ីវិលនៅកម្ពុជា គ្រោងរៀបចំវេទិកាប្រជាពលរដ្ឋកម្ពុជា (CPF) ឆ្នាំ២០២៦ ក្រោមប្រធានបទ “សំឡេងរបស់យើង តំបន់របស់យើង៖ ការកសាងផ្លូវឆ្ពោះទៅកាន់អាស៊ានដែលយកប្រជាជនជាស្នូល ប្រកបដោយយុត្តិធម៌ គណនេយ្យភាព បរិយាបន្ន និងអន្តរអត្តសញ្ញាណ” នៅថ្ងៃទី២៤ តុលា។ វេទិកាប្រជាពលរដ្ឋកម្ពុជា (CPF) រៀបចំឡើង ដើម្បីកំណត់បញ្ហាប្រឈមដែលកំពុងកើតមាននៅកម្ពុជា និងប្រមូលអនុសាសន៍រួមជាអាទិភាពមួយដើម្បីរួមចំណែកដល់ការតស៊ូមតិថ្នាក់ជាតិ និងថ្នាក់តំបន់ ជាពិសេសសម្រាប់សន្និសីទសង្គមស៊ីវិលអាស៊ាន (APF/ACSC) ឆ្នាំ ២០២៦ ដែលប្រទេសហ្វីលីពីនធ្វើជាម្ចាស់ផ្ទះ។
វេទិកាប្រជាពលរដ្ឋកម្ពុជា (CPF) ឆ្នាំ ២០២៦ ជាវេទិកាថ្នាក់ជាតិមួយ ដែលនឹងរៀបចំឡើងនៅសណ្ឋាគារកាំបូឌីយ៉ា រាជធានីភ្នំពេញ ចាប់ពីថ្ងៃទី២៤ ដលថ្ងៃទី២៦ តុលា។ វេទិកានេះ នឹងមានអ្នកចូលរួមប្រមាណ ២៥០នាក់ រួមមាន ជនជាតិដើមភាគតិច អង្គការស្ត្រីបណ្តាញយុវជន សហជីព ជនពិការ អង្គការមូលដ្ឋាន អង្គការសង្គមស៊ីវិល អ្នកស្រាវជ្រាវប្រព័ន្ធផ្សព្វផ្សាយឯករាជ្យជាដើម ដើមឲ្យពួកគេចែករំលែកបទពិសោធន៍ ពិភាក្សាអំពីបញ្ហាប្រឈមដែលប៉ះពាល់ដល់ជីវិតរបស់ពួកគេ និងការអភិវឌ្ឍអាទិភាពរួមមួយ។
វេទិកានេះទទួលស្គាល់ថា សិទ្ធិមនុស្ស ការចូលរួមតាមបែបប្រជាធិបតេយ្យ លំហពលរដ្ឋ សមភាពយេនឌ័រ យុត្តិធម៌បរិស្ថាននិងការប្រែប្រួលអាកាសធាតុ អភិបាលកិច្ចដីធ្លីនិងធនធានធម្មជាតិ សិទ្ធិពលករ ការផ្លាស់ប្តូរទីលំនៅ (ទេសន្តរប្រវេសន៍) អភិបាលកិច្ចឌីជីថល កិច្ចគាំពារសង្គម និងការទទួលបានសេវាសាធារណៈ គឺជាបញ្ហាដែលផ្សារភ្ជាប់គ្នា ហើយទាមទារឱ្យមានការចូលរួមយ៉ាងមានអត្ថន័យទាំងនៅក្នុងកម្រិតជាតិ និងកម្រិតតំបន់។
នាយិកាប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) អ្នកស្រី ឆន សុគន្ធា ប្រាប់អាស៊ីសេរីថា វេទិកាប្រជាពលរដ្ឋកម្ពុជា គឺជាវេទិកាប្រចាំឆ្នាំដ៏សំខាន់មួយ ដែលផ្តល់ឱ្យប្រជាពលរដ្ឋ អង្គការសង្គមស៊ីវិល សហជីព សហគមន៍ និងអ្នកតស៊ូមតិ នូវឱកាសដ៏មានតម្លៃក្នុងការប្រមូលផ្តុំគ្នាជជែកពីទស្សនៈ បញ្ហា និងចងក្រងសំឡេងរបស់ប្រជាពលរដ្ឋ និងពាំនាំទៅវេទិកាប្រជាពលរដ្ឋអាស៊ាន។ អ្នកស្រី ឆន សុគន្ធា អះអាងថា CCIM និងអង្គការដៃគូ នឹងប្រើប្រាស់លទ្ធផលទាំងនេះ ក្នុងការតស៊ូមតិជាមួយអង្គការអន្តរជាតិ ដៃគូអភិវឌ្ឍន៍ និងតំណាងអង្គទូត ដើម្បីទាមទារឱ្យរដ្ឋាភិបាលកម្ពុជាគោរព និងអនុវត្តការប្តេជ្ញាចិត្តផ្នែកសិទ្ធិមនុស្សរបស់ខ្លួន។
អ្នកស្រី ឆន សុគន្ធា៖ «វេទិកាប្រជាជនកម្ពុជា ឆ្នាំ ២០២៦ បម្រើគោលបំណងបំពេញបន្ថែមពីរ គឺជាវេទិកាជាតិ ដើម្បីកំណត់ និងប្រមូលអនុសាសន៍ជាអាទិភាពរបស់ប្រជាពលរដ្ឋសម្រាប់ការតស៊ូមតិនៅវេទិកាប្រជាពលរដ្ឋអាស៊ាន APF និងជាលំហសម្រាប់កិច្ចសន្ទនា និងការសម្រេចចិត្តរួមគ្នារវាងកម្ពុជាជាមួយអាស៊ានតាមរយៈយន្តការសម្របសម្រួលប្រកបដោយបរិយាបន្នដើម្បីពង្រឹងសាមគ្គីភាពពីគ្រប់ស្ថាប័នចម្រុះ និងរួមចំណែកដល់អាស៊ានឲ្យមានគណនេយ្យភាព និងយកប្រជាជនជាស្នូល»។
សហគមន៍ សហគមន៍មូលដ្ឋាន អង្គការសង្គមស៊ីវិល មើលឃើញថា ទោះបីជាអាស៊ានបានបង្កើតផ្លូវសម្រាប់កិច្ចសន្ទនារវាងរដ្ឋជាសមាជិកក៏ដោយ ក៏ការចូលរួមប្រកបដោយអត្ថន័យរបស់សហគមន៍ អង្គការសង្គមស៊ីវិលជាដើម នៅតែមានកម្រិត និងមិនទាន់មានភាពប្រាកដប្រជា។
ទោះជាយ៉ាងណា នៅក្នុងជំនួបរវាងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី និងនាយកអង្គការតស៊ូមតិសិទ្ធិមនុស្សនិងការងារអាស៊ី លោក ហ្វីល រ៉ូប៊ឺសុន កាលពីថ្ងៃទី២២ តុលា លោក កែវ រ៉េមី បានលើកឡើងថា ស្ថិរភាពជាតិ និងសណ្តាប់ធ្នាប់សង្គម ដែលរាជរដ្ឋាភិបាលកម្ពុជាបានថែរក្សា បានបង្កើតលក្ខខណ្ឌអំណោយផលសម្រាប់ការអភិវឌ្ឍជាតិ និងការលើកកម្ពស់សិទ្ធិមនុស្ស។
អង្គការជាតិ និងអន្តជាតិជាច្រើន នៅតែបង្ហាញក្តីបារម្ភខ្លាំងចំពោះបញ្ហាសិទ្ធិមនុស្សនៅកម្ពុជា ដែលពួកគេយល់ថា ការគោរពសិទ្ធិមនុស្សនៅកម្ពុជាបន្តធ្លាក់ចុះ និងរងការគំរាមកំហែង ធ្វើទុក្ខបុកម្នេញខ្លាំង។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ ថ្លែងប្រាប់ក្នុងអំឡុងពេលលោកកំពុងមានវត្តមាននៅប្រទេសហ្វីលីពីន ថា កម្មវិធីវេទិកាប្រជាពលរដ្ឋនៅថ្ងៃស្អែកនេះ ក្រុមការងាររបស់លោក នឹងទៅចូលរួម ដើម្បីរករបៀបវារៈ និងដំណោះស្រាយរួមមួយសម្រាប់កម្មករគ្រប់ផ្នែកទាំងអស់ ជាពិសេសកម្មករផ្នែកសេដ្ឋកិច្ចក្រៅប្រព័ន្ធ ដើម្បីដាក់ជូនទៅរដ្ឋាភិបាលអាស៊ាន ដោះស្រាយបញ្ហាកិច្ចគាំពារសង្គម ពាក់ព័ន្ធប័ណ្ណរបបសន្តិសុខសង្គម (ប.ស.ស) បម្រែបម្រួលអាកាសធាតុ បញ្ហាប្រាក់ចំណូលដែលកំពុងធ្លាក់ចុះ សុខភាពនិងសុវត្ថិភាពកន្លែងការងារ និងសេដ្ឋកិច្ចពលរដ្ឋជាដើម។ លោកថា អនុសាសន៍របស់កម្មករដែលផ្តល់ឲ្យទាំងនោះ នឹងត្រូវដាក់ចូលក្នុងកិច្ចប្រជុំថ្នាក់អាស៊ានដែលនឹងប្រព្រឹត្តទៅនាថ្ងៃទី២៧ដល់២៩ ខែតុលា នេះ។
លោក វន់ ពៅ បញ្ជាក់ថា ក្រៅពីបញ្ហាទាំងនេះ លោកក៏នឹងលើកយកបញ្ហាមួយចំនួនទៀតដូចជា ការរំលោភសិទ្ធិកម្មករ សេរីភាពនៃការជួបជុំរបស់សមាគម ការដាក់កម្រិតសេរីភាពសហជីព និងការចងក្រង ព្រមទាំងការរើសអើងខ្ពស់ពីសំណាក់អាជ្ញាធរកម្ពុជា។ «»
មិនតែប៉ុណ្ណោះ នៅក្នុងវេទិកាជាបន្តបន្ទាប់ទាំងថ្នាក់ជាតិ និងថ្នាក់តំបន់ ក៏នឹងមានការជជែក និងលើកយករបៀបវារៈពាក់ព័ន្ធការរំលោភសិទ្ធិមនុស្ស ការប្រើប្រាស់ប្រព័ន្ធតុលាការធ្វើទុកបុកម្នេញប្រជាពលរដ្ឋស្លូតត្រង់ជាដើម ដើម្បីឲ្យថ្នាក់ដឹកនាំអាស៊ានទាំងមូលជួយរកដំណោះស្រាយ ឬដាក់សម្ពាធមកលើរដ្ឋាភិបាលកម្ពុជាឲ្យបញ្ឈប់ទង្វើទាំងនោះ ដោយបើកលំហសេរីភាព ប្រជាធិបតេយ្យឡើងវិញផងដែរ៕
