យុវជនខ្មែរបញ្ចប់ការសិក្សាផ្នែកយោធានៅសហរដ្ឋអាមេរិកលោក មូន ពេជ្រ អំពាវនាវឲ្យពលរដ្ឋខ្មែរ-អាមេរិកាំងទាំងអស់ សរសេរលិខិត ឬញត្តិទៅកាន់សមាជិកសភា ព្រឹទ្ធសភា ដែលជាតំណាងរបស់ពួកគេនៅតាមរដ្ឋនីមួយៗនិងរដ្ឋាភិបាលអាមេរិក ដើម្បីជំរុញឱ្យពួកគេ ដាក់សម្ពាធភាគីថៃឱ្យគោរពកិច្ចព្រមព្រៀងសន្តិភាព។ ការអំពាវនាវនេះគឺ បន្ទាប់ពីលោក មូន ពេជ្រ បានដាក់លិខិត ជូនប្រធានាធិបតី អាមេរិកលោក ដូណាល់ ត្រាំ ជំរុញឱ្យប្រទេសថៃបញ្ឈប់សកម្មភាពអរិភាព ហើយវិលត្រឡប់មកគោរពសេចក្តីប្រកាសរួមសន្តិភាព ដើម្បីការពារស្ថិរភាពក្នុងតំបន់ និងធានាថា សន្តិភាពដែលលោក ដូណាល់ ត្រាំ បានជួយបង្កើតមិនបាត់បង់។
លោក មូន ពេជ្រ បានសរសេរនៅលើទំព័រហ្វេសប៊ុករបស់លោកនៅថ្ងៃនេះថា នៅក្នុងគ្រាដ៏លំបាកនេះ សូមឲ្យពលរដ្ឋខ្មែរ-អាមេរិកាំងទាំងអស់ បន្តសរសេរលិខិត ឬញត្តិទៅកាន់សមាជិកសភា ព្រឹទ្ធសភា ដែលជាតំណាងរបស់ពួកគេ ដើម្បីជំរុញឱ្យពួកគេយកចិត្តទុកដាក់ ជួយដោះស្រាយវិបត្តិដែលមាតុភូមិរបស់ពួកគេកំពុងប្រឈមមុខ និងដាក់សម្ពាធភាគីថៃឱ្យគោរពកិច្ចព្រមព្រៀងសន្តិភាព។ លោកថា នេះ ជាអ្វីដែលអាចធ្វើបានសម្រាប់មាតុភូមិកំណើត។ លោកថា ការលំបាករបស់បងប្អូនជនរួមជាតិនៅឯមាតុភូមិកំណើត ក៏ជាការលំបាករបស់ពួកលោកដែរ ព្រោះពួកលោកគឺជាខ្មែរ។
នៅក្នុងលិខិតដាក់ជូនប្រធានាធិបតី អាមេរិកលោក ដូណាល់ ត្រាំ លោក មូន ពេជ្រ ស្នើលោក ដូណាល់ ត្រាំ ជំរុញឱ្យប្រទេសថៃបញ្ឈប់សកម្មភាពអរិភាព ហើយវិលត្រឡប់មកគោរពសេចក្តីប្រកាសសន្តិភាព ដើម្បីការពារស្ថិរភាពក្នុងតំបន់ និងធានាថា សន្តិភាពដែលលោក ដូណាល់ ត្រាំ បានជួយបង្កើតមិនបាត់បង់។ លោកថា ប្រទេសកម្ពុជាគឺជាប្រទេសតូចមួយដែលបានស៊ូទ្រាំនឹងការលំបាកយ៉ាងខ្លាំងពេញមួយប្រវត្តិសាស្ត្ររបស់ខ្លួន។ ប្រជាជនកម្ពុជាចង់បានសន្តិភាព មិនមែនជម្លោះទេ។
អ្នកនាំពាក្យរដ្ឋាភិបាលកម្ពុជាឯករាជ្យ ២៣ តុលា លោក គឹម សុខ ប្រាប់ទូរទស្សន៍អាស៊ីសេរីថា ចំពោះពលរដ្ឋខ្មែរដែលស្នើសុំឲ្យសហរដ្ឋអាមេរិកជួយអន្តរាគមន៍ជារឿងមួយល្អ ទោះបីជាបានលទ្ធផលតិចក៏ដោយ តែយ៉ាងណា លោកថាដរាបណាកម្ពុជាបន្តស្ថិតនៅក្រោមការដឹកនាំរបស់គ្រួសារត្រកូលហ៊ុន គឺពិបាកនឹងរកយុត្តិធម៌ឲ្យកម្ពុជាណាស់។
លោក គឹម សុខ៖ «យ៉ាងណាខ្ញុំគិតថាដំណោះស្រាយដែលមានប្រសិទ្ធភាពជាងគេគឺប្រជាពលរដ្ឋខ្មែរទូរទាំងពិភពលោកគួរតែប្រម៉ែប្រមូលផ្តុំគ្នា ស្នើឲ្យរដ្ឋាភិបាលរបបក្រុងភ្នំពេញគ្រួសារហ៊ុន សរសេរលិខិតទៅសហប្រធានកិច្ចព្រមព្រៀងទីក្រុងប៉ារីស ស្នើឲ្យមានការកោះប្រជុំសន្និសីទប៉ារីសឡើងវិញ ដើម្បីដោះស្រាយបញ្ហាកម្ពុជា ហើយក៏ប្តឹងករណីព្រំដែនទៅកាន់តុលាការអន្តរជាតិ ធ្វើបែបហ្នឹងទើបជាការបើកច្រកឲ្យសហរដ្ឋអាមេរិករួមទាំងសហគមន៍អន្តរជាតិ ជារួមអាចជួយកម្ពុជាបានទូលំទូលាយជាង»។
ទាក់ទងនឹងការវាយប្រហារឈ្លានពានកម្ពុជាដោយយោធាថៃនេះ ប្រធានព្រឹទ្ធសភាកម្ពុជាលោក ហ៊ុន សែន និងជានាយឧត្តមសេនីយ៍ផុតលេខ សរសេរលើហ្វេសប៊ុកនៅព្រឹកថ្ងៃទី៩ ធ្នូ ថា ក្រោយការអត់ធ្មត់លើស២៤ម៉ោង ហើយគឺដើម្បីគោរពនូវបទឈប់ និងត្រូវការពេលវេលាដើម្បីជម្លៀសប្រជាជនចេញមកតំបន់មានសុវត្ថិភាព។ លោកអះអាងថា បានបញ្ជាកងកម្លាំងវាយបកគ្រប់ទីតាំងសមរភូមិដែលយោធាថៃឈ្លានពានកម្ពុជា។ លោកថា កម្ពុជាត្រូវការសន្តិភាព តែកម្ពុជាបង្ខំចិត្ត វាយតបតដើម្បីការពារទឹកដី។
គិតត្រឹមថ្ងៃទី៩ ធ្នូ នេះ ពលរដ្ឋសរុបចំនួនជាង ១៥០០គ្រួសារ ឬស្មើនឹង ៥៦០០នាក់ ក្នុងស្រុកជាំក្សាន្ត ខេត្តព្រះវិហារបានភៀសខ្លួនទៅរកកន្លែងមានសុវត្ថិភាព។ ចំណែកឯខេត្តឧត្តរមានជ័យវិញ មានពលរដ្ឋភៀសសឹកជិត ៣៥០០គ្រួសារ ឬស្មើនឹង ១១០៦០នាក់ ខណៈខេត្តបន្ទាយមានជ័យ មានពលរដ្ឋចំនួន ៤៥៦២នាក់ បានជម្លៀសទៅកាន់តំបន់មានសុវត្ថិភាព និងតាមផ្ទះសំបែងសាច់ញាតិ។ នេះបើតាមសេចក្តីថ្លែងការណ៍របស់ក្រសួងមហាផ្ទៃ៕
