នាយករដ្ឋមន្ត្រីថៃ លោក អានុទីន ចាន់វីរៈគុល (Anutin Charnvirakul) បានលើកឡើងថា រដ្ឋាភិបាលចាំផ្ទះរបស់លោកបានផ្ដល់ភ្លើងខៀវ ឱ្យក្រុមយោធាពង្រីកអានុភាព និងទិញអាវុធបន្ថែម ក្រោយពីធ្វើសង្គ្រាមឈ្លានពានកម្ពុជា តាមបណ្ដោយព្រំដែន។ អ្នកឃ្លាំមើល ជំរុញឱ្យមេដឹកនាំកម្ពុជា ប្រើយន្តការច្បាប់អន្តរជាតិ ជាជាងចរចាទ្វេភាគី ដែលជាយុទ្ធសាស្ត្រងាប់ក្រឡា ដើម្បីទប់ទល់ជាមួយថៃ។
មិនខុសពីការប៉ាន់ស្មាននោះឡើយ មេដឹកនាំថៃ ដែលជាក្រុមអភិរក្សនិយម និងស្និទ្ធជាមួយពួកយោធា ពេលនេះបានបើកដៃឱ្យក្រុមយោធា ប្រឆាំងនឹងកម្ពុជា កាន់តែខ្លាំងហើយ។
ថ្លែងប្រាប់អ្នកសារព័ត៌មាន នៅវិមានរដ្ឋាភិបាលថៃ នៅថ្ងៃទី១២ ខែកុម្ភៈ នាយករដ្ឋមន្ត្រីចាំផ្ទះរបស់ថៃ លោក អានុទីន ចាន់វីរៈគុល បានលើកឡើងថា លោកបានអនុម័តសម្រាប់ការទិញអាវុធ និងសម្ភារៈយោធា ដើម្បីពង្រឹងកងកម្លាំងប្រដាប់អាវុធរបស់ថៃ ក្នុងអំឡុងមានវិវាទព្រំដែនជាមួយកម្ពុជា។ ក្នុងនោះ លោកបានលើកឡើងអំពីគ្រោងសាងសង់របងតាមបណ្ដោយព្រំដែន ជាប់ជាមួយកម្ពុជា ជាឯកតោភាគីផងដែរ។
ប្រធានអ្នកឃ្លាំមើលកម្ពុជា លោក ម៉ែន ណាត យល់ឃើញថា ប្រទេសថៃ ហាក់បានត្រៀមលក្ខណៈបង្កជម្លោះជាមួយកម្ពុជា រយៈពេលយូរអង្វែង និងបើកការឈ្លានពានកម្ពុជា ជាចំហ។ លោកបន្តថា ក្នុងកាលៈទេសៈបែបនេះ កម្ពុជាមិនគួរប្រើប្រាស់យន្តការ ការទូតទ្វេភាគី ដែលលោកយល់ថា ជាយុទ្ធសាស្ត្រងាប់ក្រឡាបែបនេះឡើយ ដោយកម្ពុជាត្រូវប្រើប្រាស់យន្តការច្បាប់អន្តរជាតិ និងដំឡើងកម្រិតការទូត ជាមួយអន្តរជាតិ ដើម្បីដាក់សម្ពាធ និងប្រឆាំងសកម្មភាពឈ្លានពានរបស់ថៃមកលើកម្ពុជា។
លោក ម៉ែន ណាត៖ «កម្ពុជាមានឯកសាររឹងមាំណាស់ រឿងខ្សែបន្ទាត់ព្រំដែន ដែលមានស្រាប់បន្សល់ទុកពីសម័យអាណានិគមបារាំង។ កម្ពុជាមានប្រវត្តិសាស្ត្ររឹងមាំតាំងពីអតីតកាល។ ហើយកម្ពុជា មានភស្តុតាងជាច្រើនទៀត ដែលបញ្ជាក់ថា ជារបស់កម្ពុជា ហើយអ្វីដែលថៃកំពុងឈរជើង និងពង្រីកការឈ្លានពានហ្នឹង ជាការបង្ហាញថា ថៃរំលោភច្បាប់អន្តរជាតិធ្ងន់ធ្ងរ»។
ក្រៅពីនិយាយពីការពង្រីកកម្លាំងប្រដាប់អាវុធ លោក អានុទីន បានលើកឡើងបន្ថែម អំពីគម្រោងលុបចោល អនុស្សរណៈ នៃការយោគយល់គ្នា ឆ្នាំ២០០១ ស្ដីពីការរកស៊ីនៅក្នុងដែនសមុទ្រ ជាមួយកម្ពុជា ដោយលោកបានអះអាងថា កំពុងតែដំណើរការ ហើយបន្ទាប់ពីបង្កើតរដ្ឋាភិបាលថ្មីរួច អនុស្សរណៈនេះ នឹងត្រូវលុបចោលភ្លាមៗ តែម្ដង ដោយមិនចាំបាច់មានការអនុម័តពីសភានោះឡើយ។
ចំណែកគម្រោងលុបចោលអនុស្សរណៈ នៃការយោគយល់គ្នា ឆ្នាំ២០០០ ស្ដីពីការកំណត់ព្រំដែនគោកជាមួយកម្ពុជា វិញ លោក អានុទីន បានអះអាងថា កំពុងកែប្រែនូវខ្លឹមសារមួយចំនួន ដើម្បីយកទៅជជែកគ្នាសាជាថ្មី ខណៈភាគីកម្ពុជា និងថៃ កំពុងឈរជើងនៅលើទីតាំងបច្ចុប្បន្ន ទៅតាមសេចក្ដីថ្លែងការណ៍រួម នៃបទឈប់បាញ់។
ពាក់ព័ន្ធនឹងរឿងវិវាទខណ្ឌសីមារវាងកម្ពុជា និងថៃ នេះដែរ នៅថ្ងៃនេះ ស្ថានភាពនៅតាមតំបន់មួយចំនួន នៅតាមបណ្ដោយព្រំដែន នៅតែបន្តមានភាពតានតឹង ជាក់ស្ដែងនៅតំបន់ភូមិជោគជ័យ និងព្រៃចាន់ ទាហានខ្មែរ និងទាហានថៃ បានប្រឈមមុខដាក់គ្នា ខណៈទាហានថៃ កំពុងជីកលេណដ្ឋាននៅក្នុងតំបន់ ដែលដណ្ដើមបានពីកម្ពុជា។
ចំណែកនៅតំបន់ព្រំដែនថ្មដា ខេត្តពោធិ៍សាត់ វិញ ប្រជាពលរដ្ឋខ្មែរមួយក្រុម បាននាំគ្នារុះរើបារ៉ាស់របស់ទាហានថៃ យកទៅដុតចោល ខណៈយុវជនមួយក្រុមទៀត បានកាត់បន្លាលួសចេញពីផ្លូវ។
រីឯនៅតំបន់បឹងត្រកួន ទាហានថៃបានបញ្ជូនគ្រឿងចក្រមកកម្ទេចអាគារខ្ពស់ៗ សាធារណៈ និងផ្ទះសម្បែងរបស់ពលរដ្ឋ និងជីកប្រឡាយ សង់ផ្លូវ លុបស្រះ។ ភាគីកម្ពុជា បានចេញលិខិតប្ដឹងតវ៉ាថា សកម្មភាពទាំងនេះ គឺជាការឈ្លានពាន ដោយបំបាត់ភស្តុតាង តាមរយៈការកម្ទេចហេដ្ឋារចនាសម្ព័ន្ធចាស់ របស់កម្ពុជា និងជំនួសមកវិញ ដោយសំណង់របស់ថៃ។
ចំណែកនៅតំបន់ជាំតែ និងតំបន់ផ្សេងទៀត នៅខេត្តព្រះវិហារ ទាហានថៃ បានចូលរាយបន្លាលួស ចូលក្នុងទឹកដីកម្ពុជា ជាច្រើនកន្លែង ខណៈតំបន់មួយចំនួន ត្រូវទាហានខ្មែររើចេញ ក៏ប៉ុន្តែ កន្លែងខ្លះ ត្រូវទាហានថៃព័ទ្ធយកបានសម្រេច។
ដោយឡែក នៅឯតំបន់ភូមិអូរខ្លាឃ្មុំ ស្ថិតនៅសង្កាត់អូរស្មាច់ ខេត្តឧត្តរមានជ័យ វិញ ត្រូវទាហានថៃតម្រៀបទូកុងតឺន័រ កាយប្រឡាយធំៗ ដើម្បីធ្វើជាព្រំប្រទល់ និងរាយបន្លាលួសថែមមួយជាន់ទៀត ខណៈផ្ទះប្រជាពលរដ្ឋជាច្រើនខ្នង ត្រូវយោធាថៃ ឈូសកម្ទេចចោលរាបដល់ដី៕
