អតីតប្រធានគណបក្សកម្លាំងជាតិលោក ស៊ុន ចន្ធី ត្រូវបានដោះលែងឱ្យមានសេរីភាពហើយ នៅយប់ថ្ងៃទី២៤ កុម្ភៈ។ នេះបើតាមភរិយាលោក ស៊ុន ចន្ធី គឺអ្នកស្រី យាន ស្រីយ៉ាន ប្រាប់ទូរទស្សន៍អាស៊ីសេរី។
អ្នកស្រី យាន ស្រីយ៉ាន ឱ្យដឹងថា អ្នកស្រីទើបទទួលបានទូរស័ព្ទពីស្វាមីនៅម៉ោង ៨យប់នេះ។ អ្នកស្រីអះអាងថា លោក ស៊ុន ចន្ធី បានហៅទូរស័ព្ទមកអ្នកស្រីផ្ទាល់ ដោយបញ្ជាក់ថា ការដោះលែងនេះធ្វើឡើងតាមព្រះរាជក្រឹត្យលើកលែងទោសពីព្រះមហាក្សត្រ។
លោក ស៊ុន ចន្ធី ត្រូវសមត្ថកិច្ចចាប់ខ្លួន នៅព្រលានយន្តហោះអន្តរជាតិភ្នំពេញ កាលពីថ្ងៃទី៩ ខែឧសភា ឆ្នាំ២០២៤ បន្ទាប់ពីវិលត្រឡប់មកពីជួបអ្នកគាំទ្រ នៅប្រទេសជប៉ុន។ លោកត្រូវបានផ្ដន្ទាទោសឲ្យជាប់ពន្ធនាគារ២ឆ្នាំ និងដកហូតសិទ្ធិបោះឆ្នោត និងឈរឈ្មោះឱ្យគេបោះឆ្នោត ពីបទ«ញុះញង់» ពាក់ព័ន្ធនឹងការរិះគន់ លើការចែកប័ណ្ណក្រីក្រជូនពលរដ្ឋ ដែលលោកថា មានលក្ខណៈលម្អៀង និងរើសអើងនិន្នាការនយោបាយ។
លោក ស៊ុន ចន្ធី ទើបត្រូវនាំខ្លួនពីមណ្ឌលអប់រំកែប្រែទី៤ ខេត្តពោធិ៍សាត់ មកចូលរួមសវនាការនៅសាលាដំបូងរាជធានីភ្នំពេញ កាលពីថ្ងៃទី១២ ខែកុម្ភៈ ក្រោមបទចោទប្រកាន់ «រួមគំនិតក្បត់» ក្នុងសំណុំរឿងព្រហ្មទណ្ឌចុះថ្ងៃទី១០ ខែធ្នូ ឆ្នាំ ២០២៤ ដែលជាសំណុំរឿងថ្មីមួយទៀត៕
វីដេអូក្រោយលោកចេញពីពន្ធនាគារ
