សកម្មជនខ្មែរក្រោមម្នាក់ទៀត ត្រូវបានតុលាការវៀតណាម កាត់ទោសឲ្យ ជាប់ពន្ធនាគារ ជាង ៣ឆ្នាំ ពាក់ព័ន្ធនឹងការប្រើបណ្តាញសង្គម ដើម្បីផ្សព្វផ្សាយអំពី បញ្ហាសិទ្ធិមនុស្ស និងសិទ្ធិជនជាតិដើមខ្មែរក្រោម ព្រមទាំងបង្ហាញអត្តសញ្ញាណ ខ្មែរក្រោម។
ក្រោមចំណាត់ការក្ដៅរបស់អាជ្ញាធរកុម្មុយនីស្តវៀតណាម ក្នុងការព្យាយាមបំបិទ សេរីភាពបញ្ចេញមតិរបស់ពលរដ្ឋខ្មែរក្រោមជាបន្តបន្ទាប់នោះ សកម្មជនស្ត្រីខ្មែរ ក្រោមម្នាក់ទៀតហើយ គឺលោកស្រី ថាច់ ធីវ៉ារី អាយុ ៥៥ឆ្នាំ ត្រូវបានតុលាការខេត្ត លង់ហោរ (វិញឡុង) កាត់ទោសកាលពីព្រឹកថ្ងៃទី២២ ខែមេសា ឱ្យជាប់ពន្ធនាគារ រយៈពេល ៣ឆ្នាំ ៦ខែ។ ការចាប់ខ្លួនលោកស្រី ថាច់ ធីវ៉ារី ធ្វើឱ្យចំនួនសកម្មជនខ្មែរ ក្រោម ដែលត្រូវអាជ្ញាធរវៀតណាម ចាប់ដាក់ពន្ធធនាគារ កើនដល់ ១៨នាក់ហើយ មកដល់ពេលនេះ។
តុលាការវៀតណាមខេត្តលង់ហោរ បានកាត់ទោសសកម្មជនស្ត្រីខ្មែរកម្ពុជាក្រោម លោកស្រី ថាច់ ធីវ៉ារី ពីបទ «កេងចំណេញលើសិទ្ធិសេរីភាព និងលទ្ធិ ប្រជាធិបតេយ្យ» តាមមាត្រា ៣៣១ នៃក្រមព្រហ្មទណ្ឌវៀតណាម បន្ទាប់ពី លោកស្រីលើកឡើងអំពីបញ្ហាសិទ្ធិមនុស្ស សិទ្ធិជនជាតិដើមខ្មែរក្រោម និង អត្តសញ្ញាណខ្មែរកម្ពុជាក្រោម។
នៅមុនពេលត្រូវចាប់ខ្លួន លោកស្រី ថាច់ ធីវ៉ារី បានផ្សព្វផ្សាយព័ត៌មានទាក់ទង នឹងព្រឹត្តិការណ៍សាធារណៈមួយចំនួន ដូចជា ទិវាសិទ្ធិមនុស្សអន្តរជាតិ ទិវាសិទ្ធិនារី និងសេចក្ដីប្រកាសសកលរបស់អង្គការសហប្រជាជាតិ ស្ដីពីសិទ្ធិជនជាតិដើមជាដើម។ ប៉ុន្តែ អាជ្ញាធរកុម្មុយនីស្តវៀតណាម ចោទប្រកាន់លោកស្រីថា បានប្រើគណនីហ្វេសប៊ុករបស់លោកស្រី ចែករំលែកព័ត៌មានដែលអាជ្ញាធរវៀតណាម ចាត់ទុកថា មិនពិត និងប៉ះពាល់ស្ថាប័នរដ្ឋ ចាប់តាំងពីឆ្នាំ២០២១មក។
អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោកបណ្ឌិត សឺន ជុំជួន ប្រាប់ទូរទស្សន៍អាស៊ីសេរី នៅថ្ងៃទី២៣ ខែមេសានេះថា ការកាត់ ទោសសកម្មជនខ្មែរក្រោម លោកស្រី ថាច់ ធីវ៉ារី គឺជារឿងអយុត្តិធម៌ ដែលមានដំណើរផ្ទុយពីច្បាប់វៀតណាម និង នីតិសិទ្ធិមនុស្សអន្តរជាតិ ពីព្រោះការ ជំនុំជម្រះ នោះ ធ្វើឡើងដោយគ្មានមេធាវីការពារក្ដី សម្រាប់ជនជាប់ចោទ និងជាសវនាការ អសាធារណៈ។ លោកថា ករណីអយុត្តិធម៌បែបនេះ ក៏បានកើតមានលើសកម្មជន ខ្មែរក្រោមដទៃទៀតដែរ។
លោកបណ្ឌិត សឺន ជុំជួន ពន្យល់ថា ជាគោលការណ៍ សំណុំរឿងបែបនេះ ត្រូវធ្វើសវនាការសាធារណៈ ដើម្បីបើកឲ្យសាធារណជន ចូលស្ដាប់ និង សង្កេត ការណ៍។ លោកថា សកម្មជននិងពលរដ្ឋខ្មែរក្រោមជាច្រើន មានបំណងចូលស្ដាប់ សវនាការនោះ ប៉ុន្តែត្រូវបានរំខានដោយអាជ្ញាធរវៀតណាម មិនឲ្យធ្វើដំណើរ ទៅចូលរួមស្ដាប់សវនាការទេ។ លោកហៅចំណាត់ ការរបស់អាជ្ញាធរ វៀតណាម ថា ជាការរឹតបន្ដឹងសិទ្ធិសេរីភាពពលរដ្ឋខ្មែរក្រោម។
បណ្ឌិត សឺន ជុំជួន៖ «ហើយបើយើងផ្អែកទៅតាមច្បាប់សិទ្ធិមនុស្សអន្តរជាតិ បើយើង គិតអំពីការទទួលបានការជំនុំជម្រះដោយយុត្តិធម៌ហ្នឹង គឺសិទ្ធិហ្នឹង គឺមិនអាចទទួល បានទេក្នុងករណីសវនាការបែបនេះ គឺការបំពានសិទ្ធិយ៉ាងធ្ងន់ធ្ងរ ដែលមានចែង នៅក្នុងរដ្ឋធម្មនុញ្ញវៀតណាមផង មានចែងនៅក្នុងលិខិតុបករណ៍សិទ្ធិមនុស្សអង្គ ការសហប្រជាជាតិផង។ នេះយើងខ្ញុំសង្កេតឃើញមកអ៊ីចឹង ក៏ដូចជាសកម្មជនជាច្រើនផ្សេងទៀត ក៏មានសវនាការបែបហ្នឹងដែរ អ៊ីចឹងទង្វើទាំងអស់នេះ រដ្ឋាភិបាលវៀតណាមគួរតែមានការណែនាំទៅដល់សមត្ថកិច្ចតុលាការ ឲ្យអនុវត្តឲ្យបានត្រឹមត្រូវទៅតាមនីតិវិធីច្បាប់ដែលមានចែងនៅក្នុងច្បាប់ប្រទេសរបស់ខ្លួន»។
សកម្មជន និង អង្គការសមាគមខ្មែរក្រោម ប្ដេជ្ញាថា ពួកគេនៅតែបន្តស្មារតីនៃ ការ ធ្វើសកម្មភាពតស៊ូមតិ ទៅកាន់អង្គការសហប្រជាជាតិ អង្គការអន្តរជាតិនានា និង បណ្ដាប្រទេសដែលពាក់ព័ន្ធទំនាក់ទំនងការទូតជាមួយប្រទេសវៀតណាម ដើម្បី រកអន្តរាគមន៍ឲ្យរដ្ឋាភិបាលវៀតណាម ដោះលែងសកម្មជនខ្មែរក្រោម និង លុប បំបាត់ការបំពានសិទ្ធិសេរីភាពខ្មែរក្រោម។ អង្គការសមាគមខ្មែរក្រោម ក៏នឹង បន្ត អនុវត្តផែនការជំរុញឲ្យវៀតណាម ធ្វើវិសោធនកម្មច្បាប់អធម្មនុញ្ញភាពរបស់ខ្លួន ដែលផ្ទុយពីគោលការណ៍សិទ្ធិមនុស្សរបស់អង្គការសហប្រជាជាតិ ពីព្រោះច្បាប់ ទាំងនោះ ជារឿយៗ អាជ្ញាធរវៀតណាមយកមកប្រើជា ឧបករណ៍ចាប់សកម្មជន ខ្មែរក្រោមដាក់គុកទាំងបំពាន៕
