ប្រពន្ធសកម្មជនបក្សប្រឆាំងមួយចំនួនអះអាងថា ពួកគាត់ត្រូវរ៉ាប់រងបន្ទុកធ្ងន់ក្នុងគ្រួសារ នៅពេលប្ដីរបស់ពួកគាត់ជាប់ពន្ធនាគារទាំងអយុត្តិធម៌ជាច្រើនឆ្នាំ។ ការអះអាងនេះ បន្ទាប់ពីសកម្មជនខ្លះ ត្រូវជាប់ពន្ធនាគារ ១១ ឆ្នាំ និងខ្លះជាប់ពន្ធនាគារចំនួន ២ ដង ព្រោះតែការបញ្ចេញមតិលើបណ្ដាញសង្គម។
រដ្ឋាភិបាលលោក ហ៊ុន ម៉ាណែត នៅមិនទាន់បានបង្ហាញសញ្ញាបន្ធូរដៃដល់សេរីភាព នៃអ្នកទោសមនសិការ និង អ្នកទោសនយោបាយឡើយ ប៉ុន្តែ នៅតែបន្តគាបសង្កត់ និងចាប់ខ្លួនអ្នកមានមតិផ្ទុយដាក់ពន្ធធនាគារ ដោយគ្មានក្រែងច្បាប់។ ស្ថានភាពបែបនេះ ធ្វើឱ្យបន្ទុករ៉ាប់រងក្នុងគ្រួសារត្រូវធ្លាក់លើប្រពន្ធ ឬស្ត្រីជាម្ដាយ ហើយបន្ទុកគ្រួសារនោះ កាន់តែធំនិងធ្ងន់លើសពីទ្វេដងទៅទៀត ដែលស្ត្រីជាភរិយា ឬជាម្ដាយ ត្រូវពុះពារ ដោះស្រាយជីវភាពគ្រួសារទាំងលំបាក។
ប្រពន្ធលោក វឿង សំណាង គឺលោកស្រី ទៀង ចិន្តា ប្រាប់ទូរទស្សន៍អាស៊ីសេរីថា រយៈពេលជាង ៤ឆ្នាំមកនេះ ដែលប្ដីលោកស្រីជាប់ពន្ធនាគារ លោកស្រីត្រូវរកប្រាក់ដោះស្រាយជីវភាពគ្រួសារផង និងផ្គត់ផ្គង់ប្ដីនៅពន្ធនាគារផង។ លោកស្រីឲ្យដឹងថា សព្វថ្ងៃ លោកស្រីស៊ីឈ្នួលលក់ម្ហូបអាហារឲ្យគេ ហើយក្នុងមួយថ្ងៃរកបានប្រាក់តែ ៥ម៉ឺនរៀលប៉ុណ្ណោះ ហើយមិនបានទៀងទាត់រាល់ថ្ងៃទៅទៀត ព្រោះមួយសប្ដាហ៍ លក់បានតែម្ដង ឬពីរដង។
លោកស្រី ទៀង ចិន្តា មានប្រសាសន៍ថា កូនស្រីរបស់លោកស្រីវិញ ត្រូវខកខានរៀនសូត្រ ឬ រៀនសូត្រមិនបានជាប់លាប់ឡើយ ពីព្រោះលោកស្រី ត្រូវយកកូនទៅតាមពេលចេញទៅធ្វើការរកប្រាក់។ លោកស្រីថា មិនអាចទុកកូនស្រីចោលឲ្យនៅម្នាក់ឯង ដោយសារខ្លាចជួបហានិភ័យផ្សេងៗ ដែលធ្វើឲ្យលោកស្រីកាន់តែឈឺ ចាប់ ខណៈឈឺចាប់រឿងប្ដីជាប់ពន្ធនាគារយ៉ាងអយុត្តិធម៌រួចទៅហើយនោះ។
លោកស្រីថា គឺពិតជាពិបាកខ្លាំងណាស់ សម្រាប់លោកស្រី នៅពេលរែកបន្ទុកគ្រួសារយ៉ាងធ្ងន់បែបនេះតែម្នាក់ឯង អំឡុងពេលប្ដីជាប់ពន្ធនាគារយូរឆ្នាំទាំងគ្មានកំហុស។ លោកស្រីស្នើឲ្យតុលាការ និងរដ្ឋាភិបាលលោក ហ៊ុន ម៉ាណែត ដោះលែងប្ដីឲ្យមានសេរីភាពជួបជុំគ្រួសារវិញ ដោយលោកស្រីអះអាងថា ប្ដីលោកស្រីជាមនុស្សស្អាតស្អំ មិនបានក្បត់ជាតិ ដូចការចោទប្រកាន់ឡើយ។
លោកស្រី ទៀង ចិន្តា៖ «សម្រាប់ការបាត់បង់សេរីភាពរបស់ប្ដីខ្ញុំយូរនេះ ដល់ទៅ ១១ ឆ្នាំនេះ វាពិតជាប៉ះពាល់ផ្លូវចិត្តរបស់ខ្ញុំក៏ដូចជា ផ្លូវចិត្តរបស់ចិត្តកូនស្រីរបស់ខ្ញុំ ដែលគាត់បាត់បង់ឪពុក បាត់បង់ភាពកក់ក្ដៅ ហើយគាត់ត្រូវខាតពេលរៀនសូត្រ ដោយសារតែ ខ្ញុំត្រូវលក់ដូរនៅណា គាត់ត្រូវទៅហ្នឹងដែរ។ បើមិនយកគាត់ទៅ អត់មានអ្នកមើលអ៊ីចឹង វាប៉ះពាល់សព្វគ្រប់បែបយ៉ាង»។
ប្ដីលោកស្រី ទៀង ចិន្តា គឺលោក វឿង សំណាង ដែលជាមន្ត្រីគណបក្សសង្គ្រោះជាតិ ត្រូវតុលាការកាត់ឲ្យមានទោសជាប់ពន្ធនាគារ ១១ឆ្នាំ ពីបទ«រួមគំនិត ក្បត់និងញុះញង់» ពាក់ព័ន្ធការចោទប្រកាន់ភ្ជាប់នឹងការប្រកាសដំណើរមាតុភូមិនិវត្តន៍ របស់មេដឹកនាំប្រឆាំង លោក សម រង្ស៊ី កាលពីឆ្នាំ២០១៩។ កន្លងមក អ្នកទោសនយោបាយមួយចំនួនជ្រើសរើស យកវិធីសុំទោសលោក ហ៊ុន សែន និង លោក ហ៊ុន ម៉ាណែត ឬ ចុះចូលគណបក្សប្រជាជនកម្ពុជា ដើម្បីបានការដោះលែង ប៉ុន្តែលោក វឿង សំណាង មិនព្រមសុំទោសមេដឹកនាំរដ្ឋាភិបាលគ្រួសារហ៊ុន ឬមិនចុះចូលគណបក្សកាន់អំណាច ដើម្បីប្ដូរយកសេរីភាពនោះឡើយ។
លោកស្រី ទៀង ចិន្តា មានប្រសាសន៍ថា លោកស្រីគោរពនូវការសម្រេចចិត្តរបស់ប្ដី និងលើសពីនេះ គឺបន្តគាំទ្រប្ដី ទោះបីជាលោកស្រីត្រូវទទួលបន្ទុករ៉ាប់រងគ្រួសារតែម្នាក់ឯង ជំនួសប្ដីក៏ដោយ។
ទូរទស្សន៍អាស៊ីសេរី មិនអាចសុំការអត្ថាធិប្បាយពី អ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បានទេ នៅថ្ងៃទី៦ ខែឧសភា នេះ។
ក្រៅពីប្រពន្ធរបស់លោក វឿង សំណាង ក៏មានប្រពន្ធសកម្មជននយោបាយ និងសកម្មជនសង្គមដទៃទៀត ដូចជា ប្រពន្ធលោក ថាច់ សេដ្ឋា ប្រពន្ធលោក ខឿន វីរ៉ាត់ ប្រពន្ធលោក កាក់ កុម្ភារ ប្រពន្ធលោក សាន សិទ្ធ ព្រមទាំងប្រពន្ធជនមានពិការភាពលោក ភុន យុទ្ធ និងប្រពន្ធជនពិការលោក ហុក រ៉េន ជាដើម ដែលត្រូវទទួលបន្ទុករកប្រាក់ ដើម្បីដោះស្រាយបញ្ហាគ្រួសារ។ ស្ត្រីទាំងនេះ សុទ្ធតែនៅបង្ហាញជំហររឹងមាំ ក្នុងការគោរព និង គាំទ្រការតស៊ូរបស់ប្ដីពួកគាត់។
ចំណែកឯ ប្រពន្ធលោក ខឿន វីរ៉ាត់ គឺលោកស្រី ថាច់ ចន្ធូ តែងតែបង្ហោះរូបថត និងសារលើបណ្ដាញសង្គម ដោយទាមទារឲ្យតុលាការដោះលែងប្តីវិញ។ លោកស្រី រៀបរាប់ថា ជិតដល់បុណ្យខួប ៧៧ឆ្នាំ ទិវា ៤មិថុនា ដែលខ្មែរក្រោមហៅថា ជា ថ្ងៃអាណានិគមបារាំងកាត់ទឹកដីកម្ពុជាក្រោមឲ្យវៀតណាមត្រួតត្រា គឺធ្លាប់តែមានវត្តមានប្ដី ប៉ុន្តែចុងក្រោយនេះ ប្ដីលោកស្រីខកខានមិនបានចូលរួមទិវានេះ ព្រោះ ត្រូវបានសមត្ថកិច្ចចាប់ដាក់ពន្ធនាគារជាថ្មីទៀតទាំងអយុត្តិធម៌។
លោក ខឿន វីរ៉ាត់ មានដើមកំណើតជាខ្មែរក្រោម និង ជាអតីតចៅសង្កាត់រងទី១នៅ រាជធានីភ្នំពេញ របស់គណបក្សសង្គ្រោះជាតិ។ លោកត្រូវសមត្ថកិច្ចចាប់ខ្លួនលើកទី២ កាលពីដើមខែមេសា ដោយតុលាការក្រុងភ្នំពេញចោទប្រកាន់លោក ពីបទ«ញុះញង់ »និង«ជេរប្រមាថ» ពាក់ព័ន្ធនឹងការបញ្ចេញមតិ និងចែករំលែកព័ត៌មានលើបណ្ដាញសង្គមចាប់តាំងពីចុងឆ្នាំ២០២៥។
រីឯប្រពន្ធរបស់លោក ហុក រ៉េន គឺលោកស្រី កែវ សំអាន ប្រាប់ទូរទស្សន៍អាស៊ីសេរី នៅថ្ងៃទី០៦ ខែឧសភាថា ប្ដីលោកស្រីជាប់ពន្ធនាគារប្រមាណ ៦ ខែហើយ ដូច្នេះ ការរកប្រាក់ផ្គត់ផ្គងគ្រួសារទាំងអស់ ត្រូវលោកស្រីទទួលបន្ទុកទាំងអស់។ លោកស្រីចាត់ទុកការឃុំខ្លួនប្ដីលោកស្រី ដែលជាជនមានពិការភាពជាលើកទី២ ថា ជារឿងអយុត្តិធម៌។
លោកស្រី កែវ សំអាន៖ «ពិសេសលុយទៅមើលគាត់ចុះខ្លាំងបំផុត ព្រោះធ្វើដំណើរទៅ ឆ្ងាយ នៅត្រពាំងផ្លុង ពិបាកនិយាយមិនចេញទេ។ ពិបាកខ្លាំង ដោយសារគាត់ ឈឺផង ហើយគាត់ជនពិការផង គាត់លេបថ្នាំសរសៃប្រសាទរាល់ថ្ងៃ ពិបាកខ្លាំងណាស់ គ្រប់ទាំងអស់តាំងពីទិញអីវ៉ាន់ឲ្យគាត់ ។ គាត់នៅទៅគ្រាន់បានចំណូល១ ទៅ ២ ម៉ឺនរៀលទៅ វារាងធូរ ពេលអ៊ីចឹង វាលើខ្ញុំទាំងស្រុង លុយចាយមិនគ្រប់ ហើយធ្វើដំណើរទៅឆ្ងាយ។ ខ្ញុំចង់ឲ្យដោះលែងប្ដីខ្ញុំមកវិញ»។
លោក ហុក រ៉េន ដែលជាជនមានពិការភាព និងមានជំងឺប្រចាំកាយ ធ្លាប់ត្រូវបានសមត្ថកិច្ច ចាប់ដាក់ពន្ធនាគារ ១៨ខែម្ដងរួចហើយ កាលពីខែកក្កដា ឆ្នាំ២០២៣ ដល់ខែមករា ឆ្នាំ២០២៥ ដោយតុលាការចោទប្រកាន់លោកពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ទាក់ទងនឹងការបញ្ចេញមតិរិះគន់ថ្នាក់ដឹកនាំនៅអំឡុងពេលបោះឆ្នោតថ្នាក់ជាតិ ឆ្នាំ២០២៣។
អ្នកឃ្លាំមើលលើកឡើងថា វិធានការរបស់រដ្ឋាភិបាលគ្រួសារត្រូលហ៊ុន ដែលធ្វើបាប សកម្មជនប្រឆាំង ឬ សកម្មជនប្រជាធិបតេយ្យ ដោយមិនញញើតច្បាប់បែប នេះ គឺជាការបង្កើតវិបត្តិធ្វើឲ្យបែកបាក់ជាតិធ្ងន់ធ្ងរ ហើយបន្សល់ទុកតែការឈឺចាប់ ពិបាកផ្សះផ្សាគ្នាក្នុងសង្គមនៅថ្ងៃអនាគត ដែលធ្វើឱ្យប្រទេសជាតិកាន់តែធ្លាក់ចុះ ខ្សោយ ហើយបរទេសជិតខាងប្រមាថមើលងាយ៕
