សាលាដំបូងខេត្តកំពង់ចាម ឃុំខ្លួនបេក្ខជនឈរឈ្មោះការបោះឆ្នោតក្រុម ប្រឹក្សាឃុំ-សង្កាត់គណបក្សឆន្ទៈខ្មែរម្នាក់នៅពន្ធនាគារ ដោយចោទប្រកាន់ពី បទ «ញុះញង់» ករណីរិះគន់បក្សកាន់អំណាច ជុំវិញបញ្ហាព្រំដែនកម្ពុជា-ថៃ។ មន្ត្រីការពារសិទ្ធិមនុស្សព្រួយបារម្ភ ចំពោះការបន្តចាប់ខ្លួនសកម្មជនបក្សជំទាស់ករណីបញ្ចេញមតិ។
ទោះបីមេដឹកនាំគណបក្សកាន់អំណាច និងជាប្រមុខរដ្ឋស្ដីទីលោក ហ៊ុន សែន បាន លើកលែងទោសដល់លោក កឹម សុខា ឲ្យមានសេរីភាពខ្លះៗក៏ដោយ ប៉ុន្តែ សមត្ថកិច្ច និងតុលាការនៃរដ្ឋាភិបាលលោក ហ៊ុន ម៉ាណែត នៅតែបន្តចាប់ចោទប្រកាន់ និងឃុំខ្លួនសកម្មជនគណបក្សជំទាស់បន្តបន្ទាប់។
ជាក់ស្ដែង សាលាដំបូងខេត្តកំពង់ចាមកាលពីថ្ងៃទី៣០ ខែឧសភា បានចោទប្រកាន់បេក្ខជនឈរឈ្មោះមកពីគណបក្សឆន្ទៈខ្មែរ សម្រាប់ការបោះឆ្នោតក្រុមប្រឹក្សាឃុំ សង្កាត់ ឆ្នាំ២០២៧ លោក ជិន សេងឃាង ពីបទ«ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។
អង្គការលីកាដូ បានចេញផ្សាយនូវអត្ថបទខ្លីមួយថាលោក ជិន សេងឃាង ជាបេក្ខជនឈរឈ្មោះមកពីគណបក្សឆន្ទៈខ្មែរ សម្រាប់ការបោះឆ្នោតក្រុមប្រឹក្សាឃុំ សង្កាត់ ឆ្នាំ២០២៧ ខាងមុខនេះ ត្រូវបានសមត្ថកិច្ចចាប់ខ្លួនកាលពីថ្ងៃទី ៣០ ខែឧសភា ឆ្នាំ២០២៦ នៅផ្ទះរបស់លោកក្នុងភូមិចចក ឃុំត្រពាំងព្រះ ស្រុកព្រៃឈរ ខេត្តកំពង់ចាម ។ ការចាប់ខ្លួនលោក ជិន សេងឃាង នេះ ធ្វើឡើងបន្ទាប់ពីលោក បានបញ្ចេញមតិរិះគន់នៅលើទំព័រហ្វេសប៊ុករបស់គណបក្សកាន់អំណាច ជុំវិញបញ្ហាព្រំដែនកម្ពុជា-ថៃ។
អង្គការលីកាដូ បន្ថែមថា កន្លងមក លោក សេងឃាង ក៏ធ្លាប់ត្រូវបានរដ្ឋបាល ឃុំត្រពាំងព្រះ កោះហៅជួបពីរដងរួចមកហើយ ក្រោយពីលោកសកម្មក្នុងការ ចែករំលែក និងបញ្ចេញមតិរិះគន់រដ្ឋាភិបាល និងស្នើឲ្យចូលរួមជាមួយគណបក្សកាន់អំណាច។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ថា ការបន្តចាប់ខ្លួន ចោទប្រកាន់ និងឃុំសកម្មជន នយោបាយនិងអ្នកបញ្ចេញមតិនេះ នឹងបង្កើនការព្រួយបារម្ភបន្ថែមទៀត។
លោក អំ សំអាត៖ «ការបន្តចាប់ខ្លួន ឃុំខ្លួន និងចោទប្រកាន់តទៅទៀតហ្នឹង វាហាក់បីដូចជាបង្កើននៃការព្រួយបារម្ភ ហើយដូចជាមិនមានផលចំណេញច្រើន ឬ ចំណេញអ្វីសម្រាប់កម្ពុជាយើងទេ ផ្ទុយទៅវិញ យើងព្រួយបារម្ភថា ការរិះគន់អាច នឹងកើតមានបន្តទៅទៀត ទៅលើបញ្ហាទាំងអស់នេះ»។
លោក អំ សំអាត ទទូចឲ្យអាជ្ញាធរ និងតុលាការញែកឲ្យដាច់រវាង សេរីភាព បញ្ចេញមតិ និងបទល្មើស ដើម្បីជៀសវាងការចាប់ខ្លួន និងចោទ ប្រកាន់ពលរដ្ឋដែលនាំឲ្យមានការរិះគន់ពីសហគមន៍ជាតិ និងអន្តរជាតិ ទាក់ទងនឹងការរឹតត្បិតសេរីភាពបញ្ចេញមតិ៕
