ប្រធានព្រឹទ្ធសភា លោក ហ៊ុន សែន រងការរិះគន់ថា ជាមេដឹកនាំ «គ្មានគុណធម៌» តាមរយៈការចេញមុខអន្តរាគមន៍ករណីបំណុលរបស់អ្នកជំនួញម្នាក់គឺលោក ហេង ឡុង ប៉ុន្តែមិនខ្វល់ខ្វាយជួយជនរងគ្រោះរាប់រយនាក់ដែលកំពុងរងទុក្ខវេទនាដោយសារតែក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ បានលួចលុយអតិថិជនពីគណនីធនាគារ។ អ្នកឃ្លាំមើលលើកឡើងថា មូលហេតុដែលជនរងគ្រោះមិនអាចទទួលបានពន្លឺយុត្តិធម៌ ឬទាមទារលុយរបស់ខ្លួនមកវិញគឺដោយសារតែរដ្ឋាភិបាលត្រកូល «ហ៊ុន» និងប្រព័ន្ធតុលាការបានជាន់ឈ្លីប្រព័ន្ធច្បាប់ ដើម្បីការពារផលប្រយោជន៍ឱ្យក្រុមសាច់ញាតិនៃសមាជិកត្រកូល ហ៊ុន។
ប្រធានព្រឹទ្ធសភាកម្ពុជាលោក ហ៊ុន សែន រួមទាំងរដ្ឋាភិបាលដឹកនាំដោយកូនប្រុសគឺនាយករដ្ឋមន្ត្រី ហ៊ុន ម៉ាណែត ហាក់បិទភ្នែកបិទត្រចៀក ធ្វើមើលមិនឃើញ ស្ដាប់មិនឮពីការឈឺចាប់របស់ជនរងគ្រោះដែលត្រូវក្រុមហ៊ុន ហួយវ័ន ផេ ដែលជាសាច់ញាតិរបស់ខ្លួនគឺលោក ហ៊ុន តូ បង្កកលុយ និងលួចពីគណនីធនាគារ។ ជាមួយគ្នានេះ លោក ហ៊ុន សែន បែរជាបង្ហាញសមានចិត្តអន្តរាគមន៍បំណុលអ្នកដែលមានភក្ដីភាពជាមួយលោកគឺលោក ហេង ឡុង ទៅវិញ។
អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ ប្រាប់ទូរទស្សន៍អាស៊ីសេរីនៅថ្ងៃទី៩ ខែមិថុនាថា ករណីរបស់លោក ហេង ឡុង គឺជាបទល្មើសឆបោកហើយមេខ្លោងដែលអាជ្ញាធរត្រូវតែស៊ើបអង្កេតនោះគឺលោក ហ៊ុន សែន ពីព្រោះបានចេញមុខដោយចំហសម្របសម្រួលឱ្យលោក ហេង ឡុង រួចផុតពីសំណាញ់ច្បាប់។
លោក គឹម សុខ៖ «ច្បាប់នៅប្រទេសកម្ពុជាគ្រប់គ្រាន់ក្នុងការចាត់ការលើលោក ហ៊ុន សែន។ ក៏ប៉ុន្តែអ្នកអនុវត្តច្បាប់ជាពិសេស លោក ហ៊ុន ម៉ាណែត ដែលជាតួអង្គសំខាន់នៅក្នុងការដឹកនាំប្រតិបត្តិអនុវត្តច្បាប់ហ្នឹងកូនប្រុសរបស់លោក ហ៊ុន សែន ហ្នឹងហើយលោក ហ៊ុន ម៉ាណែត ធ្វើជានាយករដ្ឋមន្ត្រី ដោយសារការបំពានច្បាប់ហ្នឹង។ ដូច្នេះ អត់មានអ្នកណាអនុវត្តច្បាប់ ដើម្បីចាត់ការលោក ហ៊ុន សែន ឡើយ។ ច្បាប់គ្រប់គ្រាន់សម្រាប់ចាត់ការលោក ហ៊ុន សែន តែអ្នកអនុវត្តច្បាប់ សុទ្ធតែជាអ្នកជាប់ពាក់ព័ន្ធទៅនឹងរឿងឧក្រិដ្ឋកម្ម។ វាមានតែប្តូររបបគ្រប់គ្រងហ្នឹងចេញទេ»។
លោកបន្ថែមទៀតថា លោក ហ៊ុន សែន គឺជាមេដឹកនាំអគុណធម៌បំផុតក្នុងគ្រាដែលជនរងគ្រោះរាប់សិបនាក់ត្រូវក្រុមហ៊ុននៃសមាជិកគ្រួសាររបស់ខ្លួនប្លន់យកលុយប្រជាពលរដ្ឋ ប៉ុន្តែបែរជាធ្វើមិនដឹងមិនឮ និងបង្ហាញអំណាចការពារជនសង្ស័យឆបោកទៅវិញ។
លោក ហ៊ុន សែន ថ្មីៗនេះបានចេញមុខអន្តរាគមន៍ជួយឱ្យលោក ហេង ឡុង ដែលមានងារជាឧកញ៉ា និងជាមនុស្សដែលមានភក្ដីភាពជាមួយលោកឱ្យរួចផុតពីសំណាញ់ច្បាប់។ ការចេញមុខអន្តរាគមន៍របស់លោក ហ៊ុន សែន នេះធ្វើឡើងបន្ទាប់ពីសមត្ថកិច្ចបានឃាត់ខ្លួនលោក ហេង ឡុង តាមដីកាតុលាការបញ្ជាឱ្យចូលខ្លួន ដើម្បីសាកសួរលើបណ្ដឹងព្រហ្មទណ្ឌពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន តាមពាក្យបណ្ដឹងរបស់ឈ្មោះ កែវ បូណ៍ភិរក្ស។ លោក ហ៊ុន សែន បញ្ជាក់ថា ការអន្តរាគមន៍នេះលោកមិនបានផ្ដល់លុយ ដើម្បីសងម្ចាស់បំណុលជំនួសលោក ហេង ឡុង ឡើយ។
ទន្ទឹមការចេញមុខអន្តរាគមន៍មនុស្សរបស់ខ្លួននេះ លោក ហ៊ុន សែន មិនបានអើពើជួយអន្តរាគមន៍ជនរងគ្រោះនៃក្រុមហ៊ុន ហួយវ័ន ផេ របស់លោក ហ៊ុន តូ ឡើយ ដោយទុកឱ្យពួកគាត់ជួបការលំបាក និងបន្តចេញតវ៉ាតាមដងផ្លូវ។ កាន់តែអាក្រក់ជាងនេះ អាជ្ញាធរថែមទាំងចាប់អតិថិជនទាមទារលុយរបស់ខ្លួនចំនួន ២នាក់ដាក់គុក និងគំរាមសាច់ញាតិគ្រួសារពួកគេមិនឱ្យនិយាយអ្វីទាំងអស់។
មកដល់ពេលនេះ មានរយៈពេលជាង កន្លងឆ្នាំមកហើយដែលជនរងគ្រោះនៃក្រុមហ៊ុន ហួយវ័ន ផេ របស់លោក ហ៊ុន តូ ត្រូវបានក្រុមហ៊ុនបង្កក និងបានលួចយកលុយពួកគាត់ពីគណនីធនាគារហួយវ័ន។ កាលពីថ្ងៃទី៨ ខែមិថុនា អតិថិជនចម្រុះជាតិសាសន៍ ជាពិសេសជនជាតិចិនក៏បានប្រមូលផ្ដុំគ្នាជាច្រើននាក់នៅខាងមុខស្ថានទូតចិន ដើម្បីទាមទារលុយរបស់ខ្លួនមកវិញ និងបានលើករូបថតលោក ហ៊ុន តូ ភ្ជាប់នឹងបដាសរសេរថា សង់លុយកម្លាំងញើសឈាមយើងវិញ។ អតិថិជនជនជាតិចិនមួយចំនួនក៏បានផ្ដល់បទសម្ភាសដល់កាសែតក្នុងស្រុកក្នុងអំឡុងពេលតវ៉ាថា ជនរងគ្រោះជាច្រើនកំពុងមានវិបត្តិផ្លូវចិត្ត និងជួបការលំបាកក្នុងជីវភាពប្រចាំថ្ងៃ ហើយបើរដ្ឋាភិបាល ឬស្ថាប័នពាក់ព័ន្ធនៅតែមិនអើពើជួយស្វែងរកដំណោះស្រាយ ជនរងគ្រោះមួយចំនួនអាចនឹងសម្រេចចិត្តបញ្ចប់ជីវិតខ្លួនឯង។
អតិថិជនឱ្យដឹងថា លុយជនរងគ្រោះខ្លះមានរហូតដល់ខ្ទង់លានដុល្លារត្រូវបានក្រុមហ៊ុន ហួយវ័ន លួចយកពីគណនី។ ពួកគាត់ថា នឹងបន្តចេញតវ៉ារហូតទទួលបានលុយរបស់ខ្លួនមកវិញ ខណៈជនរងគ្រោះខ្លះក៏បានស្វែងរកមេធាវីការពារក្ដីតាមការណែនាំរបស់ធនាគារជាតិកម្ពុជា ប៉ុន្តែពួកគាត់ថា គ្មានមេធាវីណាហ៊ានកាន់ក្ដីក្នុងសំណុំរឿងពួកគាត់ឡើយ។
ទូរទស្សន៍អាស៊ីសេរីមិនអាចទាក់ទងអគ្គទេសាភិបាលនៃធនាគារជាតិនៃកម្ពុជា អ្នកស្រី ជា សិរី ដើម្បីសាកសួរបន្ថែមជុំវិញបញ្ហានេះបានទេដោយសារទូរស័ព្ទហៅចូលគ្មានអ្នកទទួលនៅថ្ងៃទី៩ ខែមិថុនា។
ជុំវិញរឿងនេះ ប្រធានចលនាខ្មែរ ដើម្បីប្រជាធិបតេយ្យ (KMD) អ្នកស្រី មូរ សុខហួរ មានប្រសាសន៍ថា ជនរងគ្រោះនៃក្រុមហ៊ុន ហួយវ័ន ផេ របស់លោក ហ៊ុន តូ មិនអាចទទួលបានយុត្តិធម៌ ឬទទួលលុយកាក់របស់ខ្លួនមកវិញតាមរយៈយន្តការតុលាការបានឡើយ។ អ្នកស្រីថា តុលាការនៅកម្ពុជា រួមទាំងស្ថាប័នរដ្ឋសំខាន់ៗ និងអ្នកអនុវត្តច្បាប់កំពុងក្លាយជាឧបករណ៍បម្រើ និងការពារផលប្រយោជន៍ឱ្យរដ្ឋាភិបាលនៃក្រុមគ្រួសារត្រកូល ហ៊ុន។
ទោះជាយ៉ាងណា អ្នកស្រី មូរ សុខហួរ សង្កត់ធ្ងន់ថា ជនរងគ្រោះទាំងអស់មិនត្រូវអស់សង្ឃឹមឡើយ និងត្រូវតែរួមគ្នាជាធ្លុងមួយបន្តចេញតវ៉ា ដើម្បីទាមទារសិទ្ធិ និងលុយកាក់របស់ខ្លួនដែលបាត់បង់។
អ្នកស្រី មូរ សុខហួរ៖ «ខ្ញុំនៅតែគាំទ្រ នៅតែជំរុញឱ្យអតិថិជនទាំងអស់នោះបន្តក្នុងការតវ៉ា ទោះបីដល់ទីណាក៏ដោយ ហើយខ្ញុំតែងតែនិយាយហើយនិយាយទៀត កុំភ្លេចនៅមុខស្ថានទូតនៃប្រទេសអង់គ្លេស និងប្រទេសអាមេរិក។ គណបក្សប្រជាជនកម្ពុជានៅតែបន្តរម្លាយ អ្វីដែលជាប្រព័ន្ធច្បាប់ នៅតែបន្តធ្វើឱ្យប្រព័ន្ធច្បាប់យើងធូររលុងប្រទេសមួយទាំងមូលនឹងទទួលរងគ្រោះជានិច្ច។ អ៊ីចឹងហើយបានយើងទាមទារ យើងនៅតែនិយាយហើយនិយាយទៀតក្រោកឈរឡើងពលរដ្ឋខ្មែរ បញ្ចេញមតិទៅតាមរូបភាពណាក៏ដោយ ប៉ុន្តែដោយអហិង្សា ហ៊ាននិយាយ ហ៊ានតវ៉ា យើងមិនត្រឹមតែអាចការពារផលប្រយោជន៍ខ្លួនយើងទេ យើងការពារផលប្រយោជន៍ជាតិទាំងមូល»។
លោក ហ៊ុន តូ ធ្លាប់សារភាពថា លោកពិតជាមានភាគហ៊ុនចំនួន ៣០ភាគរយក្នុងក្រុមហ៊ុន ហួយវ័ន ផេ ប៉ុន្តែមកដល់ពេលនេះ គ្មានអាជ្ញាធរណាហ៊ានឃាត់ខ្លួនក្មួយប្រុសលោក ហ៊ុន សែន រូបនេះ ដើម្បីស៊ើបអង្កេត និងបំភ្លឺជុំវិញការចោទប្រកាន់ពាក់ព័ន្ធនឹងសំណុំរឿងបង្កកលុយអតិថិជននេះនៅឡើយ។ ក្រុមហ៊ុនហួយវ័ន ផេ របស់លោក ហ៊ុន តូ ចាប់ផ្ដើមបង្កកលុយអតិថិជនរួចកាត់លុយចេញពីគណនីតែម្ដង បន្ទាប់ពីសហរដ្ឋអាមេរិក (US) និងចក្រភពអង់គ្លេស (UK) ដាក់ទណ្ឌកម្មកាលពីចុងឆ្នាំ២០២៥ ដោយសារតែរកឃើញថា ក្រុមហ៊ុននេះពាក់ព័ន្ធយ៉ាងសកម្ម និងជាក្រុមហ៊ុនដ៏ធំសម្បើមជួយលាងលុយកខ្វក់ឱ្យក្រុមឧក្រិដ្ឋជនឆបោកតាមអនឡាញ និងក្រុមឧក្រិដ្ឋជនចោរព័ត៌មានវិទ្យា ឬហែកឃឺ (Hacker) របស់កូរ៉េខាងជើងក្នុងទំហំទឹកប្រាក់រាប់ពាន់លានដុល្លារ៕
