សហព័ន្ធខ្មែរកម្ពុជាក្រោមថ្កោលទោសអាជ្ញាធរវៀតណាម ដែលបានចាប់ឃុំខ្លួនស្ត្រីខ្មែរក្រោមអាយុ ៧២ឆ្នាំ គឺលោកស្រី ចៅ ធីទៀង ដាក់ពន្ធនាគារនៅក្រុងព្រែកឫស្សី ដោយគ្មានដីការបស់តុលាការ។ ក្នុងពេលចាប់ខ្លួន កាលពីថ្ងៃទី១៩ មិថុនា អាជ្ញាធរមិនបានបង្ហាញមូលហេតុ ឬបទចោទណាមួយឡើយ ប៉ុន្តែកន្លងទៅ លោកស្រី ចៅ ធីទៀង គឺជាពលរដ្ឋខ្មែរក្រោមដែលតែងចូលរួមយ៉ាងសកម្មក្នុងការតស៊ូមតិទាមទារសិទ្ធិជនជាតិដើមនៅកម្ពុជាក្រោម។
លោកស្រី ចៅ ធីទៀង គឺជាពលរដ្ឋខ្មែរក្រោមទី១៩ ដែលត្រូវបានអាជ្ញាធរ វៀតណាមបើកយុទ្ធនាការចាប់ឃុំខ្លួនចាប់តាំងពីឆ្នាំ២០២៣មក។ សហព័ន្ធខ្មែរកម្ពុជាក្រោមចាត់ទុកការចាប់ខ្លួនពលរដ្ឋខ្មែរក្រោមបន្ថែមទៀតនៅពេលនេះ ជាការរំលោភសិទ្ធិមនុស្សខ្មែរក្រោមធ្ងន់ធ្ងរ និងធ្វើឡើងតាមទំនើងចិត្ត។
តាមរយៈសេចក្តីថ្លែងការណ៍ពីសហរដ្ឋអាមេរិកនៅថ្ងៃទី២២ មិថុនា សហព័ន្ធខ្មែរ កម្ពុជាក្រោម ឱ្យដឹងថា លោកស្រី ចៅ ធីទៀង ត្រូវបាននគរបាលវៀតណាម កោះហៅកាលពីថ្ងៃទី១៩ ខែមិថុនា ហើយត្រូវបានចាប់ខ្លួន និងឃុំខ្លួនបណ្ដោះអាសន្ន ដោយមិនបានបង្ហាញដីការបស់តុលាការ និងមិនបានបង្ហាញជាបន្ទាន់ អំពីមូលដ្ឋានច្បាប់សម្រាប់ការឃុំខ្លួនលោកស្រីឡើយ។ ចំណែកឯ សេចក្តីជូនដំណឹងមួយពីទីភ្នាក់ងារស៊ើបអង្កេតសន្តិសុខនៃនគរបាលក្រុងព្រែកឫស្សី ឬវៀតណាមហៅថា កឹងថើ (Can Tho) ចុះថ្ងៃទី១៩ ខែមិថុនា ក៏មិនបានបញ្ជាក់ពីការចោទប្រកាន់ផ្នែកច្បាប់ប្រឆាំងនឹងលោកស្រីដែរ។
សេចក្ដីថ្លែងការណ៍ របស់សហព័ន្ធខ្មែរកម្ពុជាក្រោមអះអាងថា ការចាប់ខ្លួនស្ត្រី ខ្មែរក្រោម វ័យចំណាស់រូបនេះ គ្មានការចោទប្រកាន់ច្បាស់លាស់ឡើយ ដោយថា មូលដ្ឋាននៃការចាប់ខ្លួននេះ កើតឡើងបន្ទាប់ពីអាជ្ញាធរវៀតណាម បានឆែកឆេរផ្ទះ របស់លោកស្រី និងបានចេញកំណត់ត្រាដាច់ដោយឡែកមួយ អំពីទ្រព្យសម្បត្តិ ដែលរឹបអូសបាន ដូចជាទូរស័ព្ទដៃចំនួនពីរគ្រឿង និងសម្ភារៈទាក់ទងនឹងអត្តសញ្ញាណ ជនជាតិដើមខ្មែរក្រោមជាដើម។
សេចក្ដីថ្លែងការណ៍បញ្ជាក់ថា ការរឹបអូសយកវត្ថុទាំងនេះ ពីផ្ទះលោកស្រី ចៅ ធីទៀង បង្ហាញថា លោកស្រី ត្រូវរដ្ឋអំណាចវៀតណាមកំណត់គោលដៅរួចហើយ គឺមិនមែនដោយសារតែការប្រព្រឹត្តបទឧក្រិដ្ឋពិតប្រាកដនោះទេ ប៉ុន្តែដោយ សារតែការបង្ហាញអត្តសញ្ញាណរបស់លោកស្រី ជាខ្មែរក្រោម។ សេចក្ដីថ្លែងការណ៍ថា ជាទូទៅ រដ្ឋអំណាចវៀតណាមចោទប្រកាន់ទៅលើសកម្មជន ខ្មែរក្រោម ដោយភ្ជាប់ជាមួយនឹងមាត្រា ៣៣១ នៃក្រមព្រហ្មទណ្ឌវៀតណាម ដែលពាក់ព័ន្ធ នឹង ការរំលោភលើសិទ្ធិសេរីភាពនិងប្រជាធិបតេយ្យ។
សហព័ន្ធខ្មែរកម្ពុជាក្រោម ទាមទារឱ្យរដ្ឋាភិបាលវៀតណាមត្រូវដោះលែងលោកស្រី ជាបន្ទាន់ និងដោយគ្មានលក្ខខណ្ឌ។
អនុប្រធានសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍លោកបណ្ឌិត សឺន ជុំជួន ប្រាប់ទូរទស្សន៍អាស៊ីសេរី នៅថ្ងៃទី២៣ ខែមិថុនាថា លោកស្រី ចៅ ធីទៀង គឺជាស្ត្រីខ្មែរក្រោម ដែលសកម្មក្នុងការចូលរួមតស៊ូមតិ ការពារសិទ្ធិ ពលរដ្ឋខ្មែរក្រោម។ លោកកត់សម្គាល់ថា ការចាប់ខ្លួនលោកស្រី គឺជាសកម្មភាព គំរាមកំហែងរបស់អាជ្ញាធរវៀតណាម ទៅលើពលរដ្ឋខ្មែរក្រោមដែល សកម្ម និងឈឺ ឆ្អាលពីបញ្ហាសិទ្ធិមនុស្សខ្មែរក្រោម។ លោកថា ទង្វើរបស់អាជ្ញាធរវៀតណាមនេះ ជាការបំពានគោលការណ៍សិទ្ធិមនុស្ស របស់អង្គការសហប្រជាជាតិ។
ទោះជាយ៉ាងណា លោកបណ្ឌិត សឺន ជុំជួន អំពាវនាវឲ្យពលរដ្ឋខ្មែរក្រោម កុំខ្លាច ការបំភិតបំភ័យរបស់អាជ្ញាធរវៀតណាម ហើយត្រូវបន្តតស៊ូមតិឲ្យសកម្មស្របតាមច្បាប់ និងគោលការណ៍សិទ្ធិមនុស្សអន្តរជាតិ ដើម្បីប្រយោជន៍ សិទ្ធិសេរីភាព ខ្មែរកម្ពុជាក្រោម។
«»
សហព័ន្ធខ្មែរកម្ពុជាក្រោម បញ្ជាក់ថា កាលនៅមានសេរីភាព លោកស្រី ចៅ ធីទៀង តែងបានចូលរួមដោយសន្តិវិធីក្នុងសកម្មភាពតស៊ូមតិអហិង្សា ដូចជា ចូលរួមប្រារព្ធ ទិវានារីអន្តរជាតិជាដើម ព្រមទាំង បានគាំទ្រយ៉ាងសកម្ម ចំពោះកិច្ចខិតខំប្រឹង ប្រែងដើម្បីលើកកម្ពស់អត្តសញ្ញាណ វប្បធម៌ និងសិទ្ធិជនជាតិ ដើមខ្មែរក្រោម។
សហព័ន្ធខ្មែរកម្ពុជាក្រោមលើកឡើងថា សកម្មភាពទាំងនេះរបស់លោកស្រី ត្រូវបានការពារក្រោមច្បាប់សិទ្ធិមនុស្សអន្តរជាតិហើយការចូលរួមក្នុងសកម្មភាពសិទ្ធិស្ត្រីការផ្សព្វផ្សាយឯកសារស្ដីពីសិទ្ធិជនជាតិដើមការអភិរក្សនិមិត្តសញ្ញា វប្បធម៌ ខ្មែរក្រោម ឬការតស៊ូមតិដើម្បីសេចក្តីថ្លៃថ្នូររបស់ខ្មែរក្រោមមិនគួរត្រូវបានចាត់ទុកថា ជាបទឧក្រិដ្ឋឡើយ។
សហព័ន្ធខ្មែរក្រោម (KKF) សង្កត់ធ្ងន់ថា ខ្មែរកម្ពុជាក្រោម គឺជាជនជាតិដើម នៃតំបន់ដីសណ្តទន្លេមេគង្គ ដែលមានអត្តសញ្ញាណមូលដ្ឋានលើទឹកដីដូនតា ភាសាខ្មែរ ព្រះពុទ្ធសាសនាថេរវាទ និងប្រពៃណីសហគមន៍។ សិទ្ធិក្នុងការរក្សា និងបង្ហាញអត្តសញ្ញាណនេះ ត្រូវបានការពារក្រោមស្តង់ដារអន្តរជាតិ រួមទាំងសេចក្តីប្រកាសជាសកលស្ដីពីសិទ្ធិមនុស្ស កតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ អនុសញ្ញាស្តីពីការលុបបំបាត់ទម្រង់នៃការរើសអើងប្រឆាំងនឹងស្ត្រី និងសេចក្តីប្រកាសរបស់អង្គការសហប្រជាជាតិស្ដីពីសិទ្ធិជនជាតិដើម។
បូកទាំងការចាប់ខ្លួនលោកស្រី ចៅ ធីទៀង នៅពេលនេះ បច្ចុប្បន្ននៅមានព្រះសង្ឃខ្មែរក្រោមចំនួន៣អង្គ និងសកម្មជន និងពលរដ្ឋខ្មែរក្រោមចំនួន ៩ រូបផ្សេង ទៀតកំពុងជាប់ឃុំនៅក្នុងពន្ធនាគារនៅឡើយ។ ពួកគាត់សុទ្ធសឹងតែ ជាមនុស្ស ដែលសកម្មចូលរួមការតស៊ូមតិទាមទារសិទ្ធិជនជាតិដើមនៅកម្ពុជាក្រោមហើយធ្លាប់ ត្រូវបានអាជ្ញាធរវៀតណាមគំរាមកំហែងជាច្រើនដង នៅមុនពេល ចាប់ខ្លួន។
សហព័ន្ធខ្មែរកម្ពុជាក្រោម សង្កត់ធ្ងន់ថា ប្រទេសវៀតណាម ដែលជាសមាជិកនៃក្រុមប្រឹក្សាសិទ្ធិមនុស្សអង្គការសហប្រជាជាតិ គឺត្រូវមានកាតព្វកិច្ចលើកកម្ពស់សិទ្ធិមនុស្ស ជាជាងការបង្ក្រាបពលរដ្ឋខ្មែរក្រោម និង ថា ការចាប់ខ្លួនស្ត្រីក្រោម លោកស្រី ចៅ ធីទៀង និងពលរដ្ឋខ្មែរក្រោមផ្សេងទៀត គឺធ្វើឡើងផ្ទុយស្រឡះ នឹងការប្ដេជ្ញាចិត្តជាអន្តរជាតិរបស់ប្រទេសវៀតណាម ដែលបានប្រកាសថា ខ្លួនគោរពសមភាព សេរីភាពសាសនា និងសិទ្ធិជនជាតិដើម៕
