អ្នកឃ្លាំមើលរិះគន់អាជ្ញាធរខេត្តព្រៃវែងរឿង ផ្ដល់តួនាទីឱ្យអតីតអធិការរងស្រុកព្រះស្ដេចលោក ជឹម រតនៈ ដែលធ្លាប់ប្រព្រឹត្តបទល្មើស ឃាតកម្ម ឱ្យធ្វើជាសមាជិកក្រុមប្រឹក្សាស្រុកព្រះស្ដេច និងជាអនុប្រធានសភាយុវពាណិជ្ជកម្ម កម្ពុជាខេត្ត ព្រៃវែង ក្រោយពី បុគ្គលរូបនេះត្រូវបានដោះលែង ចេញពីពន្ធនាគារ ។ អ្នកឃ្លាំមើលចាត់ទុកករណីជានេះជាវិបត្តិប្រព័ន្ធយុត្តិធម៌ និង អភិបាលកិច្ច នៅកម្ពុជា ដែលជះឥទ្ធិពលអវិជ្ជមាន ដល់សង្គមជាតិទាំងមូល។
ក្រោយពី ស្ងប់ស្ងាត់មួយរយៈ លើករណីឃាតកម្មដ៏ឃោរឃៅនៅខេត្តព្រៃវែងកាលពីឆ្នាំ២០១៩ ពាក់ព័ន្ធអតីតអធិការរងស្រុកព្រះស្ដេចលោក ជឹម រតនៈ និងបក្ខពួក ពេលនេះ មានពលរដ្ឋ និង អ្នកប្រើប្រាស់បណ្ដាញសង្គមជាច្រើនចាប់អារម្មណ៍ជាថ្មី ក្រោយពីលោក ជឹម រតនៈ ត្រូវបានតែងតាំង ជាសមាជិកក្រុមប្រឹក្សាស្រុក និង ជាអនុប្រធានសភាយុវពាណិជ្ជកម្មកម្ពុជាខេត្តព្រៃវែង។
អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរីនៅថ្ងៃទី០៣ ខែសីហាថា ការតែងតាំងបុគ្គលដែលមានប្រវត្តិប្រព្រឹត្តបទឧក្រិដ្ឋកម្ម និងមានអំពើពុករលួយ ឬបក្ខពួកនិយមនេះ បង្កើតឱ្យមានទម្លាប់មិនល្អ។ លោកថា ករណីនេះ បានឆ្លុះបញ្ចាំងយ៉ាងច្បាស់ពីវិបត្តិប្រព័ន្ធយុត្តិធម៌ និងអភិបាលកិច្ចនៅកម្ពុជា។
ជាមួយគ្នានោះលោកអះអាងថា ករណីនេះកំពុងបំផ្លាញទំនុកចិត្តរពលរដ្ឋទៅលើប្រព័ន្ធតុលាការ និងស្ថាប័នរដ្ឋ ព្រោះប្រជាជនមានអារម្មណ៍ថា ច្បាប់ត្រូវអនុវត្តតែលើអ្នកក្រ និងអ្នកគ្មានខ្នងបង្អែកប៉ុណ្ណោះ។ លើសពីនេះ លោកសង្កត់ធ្ងន់ថា ជារឿងគួរឱ្យតក់ស្លុត និងអយុត្តិធម៌បំផុតសម្រាប់គ្រួសារជនរងគ្រោះ នៅពេលឃើញឃាតកដើរដោយសេរី និងទទួលបានបុណ្យស័ក្ដិ និងតំណែងខ្ពង់ខ្ពស់ថែមទៀត។
លោក សេង វណ្ណលី៖ «សង្គមកម្ពុជាបច្ចុប្បន្នកំពុងវិវត្តទៅរកទិសដៅមួយដែលតម្លៃនៃគុណធម៌ សមត្ថភាព និងស្នាដៃពិតប្រាកដត្រូវគេមើលរំលង ហើយជំនួសមកវិញដោយទំនាក់ទំនងបក្ខពួក អំណាចសាច់ប្រាក់ និងបណ្ដាញផ្ទៃក្នុង។ នៅពេលដែលជនល្មើស ឬអ្នកគ្មានស្នាដៃអាចទទួលបានតំណែងក្នុងស្ថាប័នរដ្ឋ និងអង្គការសង្គម វានឹងធ្វើឱ្យមន្ត្រីរាជការដែលមានសមត្ថភាព និងស្មោះត្រង់បាត់បង់ទឹកចិត្តក្នុងការបម្រើជាតិ។ ស្ថានភាពនេះស្ដែងឱ្យឃើញពីការធ្លាក់ចុះនៃសីលធម៌សង្គម និងការបង្កើតគំរូអាក្រក់ដល់យុវជនជំនាន់ក្រោយ ថាការមានខ្នងបង្អែក ឬអំណាច គឺខុសទៅជាត្រូវ និងអាចឈរលើច្បាប់បាន»។
ការលើកឡើងនេះ ក្រោយពីពលរដ្ឋ និងមន្ត្រីបក្សប្រឆាំង មួយចំនួនបានបញ្ចេញមតិ ដោយបង្ហាញក្ដីបារម្ភជុំវិញ ករណីអភិបាលស្រុកព្រះស្ដេច លោក ភុន សម្ផស្ស បានតែងតាំង លោក ជឹម រតនៈ ឱ្យកាន់តួនាទីជាសមាជិកក្រុមប្រឹក្សាស្រុកព្រះស្ដេច និងជាអនុប្រធានយុវពាណិជ្ជកម្មកម្ពុជា បើទោះបីជា បុគ្គលរូបនេះមានប្រវត្តិមិនល្អ ពាក់ព័ន្ធ អំពើឃាតកម្ម និងការប្រើប្រាស់កាំភ្លើងដោយខុសច្បាប់ ក៏ដោយ។
លោក ជឹម រតនៈ គឺជាកូនប្រុសរបស់ឧកញ៉ា ជឹម សុខ ដែលជាអ្នកជំនួញនាំចេញគោ-ក្របីប្រចាំច្រកព្រំដែនចក្រីដ៏មានឥទ្ធិពលម្នាក់ ក្នុងការនាំទៅកាន់ប្រទេសវៀតណាម។ កាលពីឆ្នាំ២០១៩ អធិការដ្ឋាននគរបាលស្រុកបាភ្នំ ខេត្តព្រៃវែង បានសន្និដ្ឋានថា លោក ជឹម រតនៈ និងបក្ខពួក បានជាប់ពាក់ព័ន្ធ បទបទល្មើស «ឃាតកម្មដោយចេតនា» និង «ប្រើប្រាស់អាវុធខុសច្បាប់» ក្រោយពីចុះប្រតិបត្តិការបង្ក្រាបករណីចោរកម្ម ដោយគ្មានភស្តុតាង ត្រឹមត្រូវ រួចហើយ បានបាញ់ស្រោចមកលើជនរងគ្រោះឈ្មោះ យ៉ន រ៉ាវុទ្ធ ដែលកំពុង បើកឡាននៅតាមដងផ្លូវ។
ក្នុងនោះមានមន្ត្រីនគរបាលពីរនាក់ គឺ លោក ជឹម រតនៈ ជាអ្នកបាញ់ជនរងគ្រោះ ដែលកាលនោះមានតួនាទីជានាយផ្នែកអន្តោប្រវេសន៍ នៃអធិការដ្ឋាននគរបាល ស្រុកព្រះស្ដេច និងមន្ត្រីនគរបាលម្នាក់ទៀត ឈ្មោះ ជឹម វិន ជាអ្នកបាញ់ជនរងគ្រោះផងដែរ ដែលមានតួនាទីជា មន្ត្រីនគរបាលប៉ុស្តិ៍កំពង់សឹង្ហ នៃអធិការដ្ឋាននគរបាលស្រុកព្រះស្ដេច។ លោក ជឹម រតនៈ គឺជាកូនបង្កើតរបស់ ឧកញ៉ា ជឹម សុខ ហើយ ជឹម វិន គឺជាក្មួយរបស់ ឧកញ៉ា ជឹម សុខ។
ការបាញ់ស្រោចលើជនរងគ្រោះនេះ ក្រោយពីមន្ត្រីនគរបាលខាងលើ ទទួលបណ្ដឹងពីពលរដ្ឋ ពីរនាក់ ឈ្មោះ សេង ឈិន និង ឈុន ឡាយ ដែលមានជម្លោះជាមួយជនរងគ្រោះរួចហើយ ក៏ឃុបឃិតគ្នា ផ្ដល់ព័ត៌មាន មិនពិតដល់ មន្ត្រីនគរបាល ដែលជាហេតុធ្វើឱ្យមន្ត្រីនគរបាលចុះធ្វើប្រតិបត្តិការបាញ់ស្រោចមកលើជនរងគ្រោះទាំងកម្រោល។ អ្នកឃ្លាំមើលយល់ថា ការបាញ់ស្រោចមកលើឡានជនរងគ្រោះ ទាំងដែលជនរងគ្រោះគ្មានអាវុធតបតផងនោះ គឺជាចេតនាពិតប្រាកដ ដែលមន្ត្រីនគរបាល រូបនោះ បានប្រព្រឹត្ត ដោយគ្មានបារម្ភពីអាយុជីវិតពលរដ្ឋ។
ទំនងជាធ្វើតាមអង្គហេតុបែបនេះហើយ សាលាដំបូងខេត្តព្រៃវែង កាលពីឆ្នាំ២០១៩បានចេញសាលក្រមចោទប្រកាន់លោក ជឹម រតនៈ និងបក្ខពួក ពីបទចោទ «មនុស្សឃាតដោយអចេតនា»ដែលតម្រូវឱ្យជាប់ពន្ធនាគារ២ឆ្នាំ១០ខែនិងពិន័យ ជាប្រាក់ ៦លានរៀល។ ក្រោយពី អនុវត្តទោសរួច នៅខែមករាឆ្នាំ២០២២ លោក ក៏ត្រូវបាន ដោះលែងឱ្យមានសេរីភាពឡើងវិញ។ ទោះជាយ៉ាងណាពលរដ្ឋ និងអ្នកឃ្លាំមើល ចាត់ទុក ការផ្ដន្ទាទោសនេះ មិនសមហេតុផល ព្រោះសង្ស័យថា មានជាប់ព័ន្ធអំពើពុករលួយ ខណៈដែលបុគ្គលរូបនេះចេញពីពន្ធនាគាររួច ក៏ទទួលបានតួនាទីជាសមាជិកក្រុមប្រឹក្សាស្រុក និងជាអនុប្រធានយុវពាណិជ្ជកម្មកម្ពុជាប្រចាំខេត្តព្រៃវែង។
ទូរទស្សន៍អាស៊ីសេរីពុំអាចទាក់ទង លោក ជឹម រតនៈ និងអភិបាលស្រុកព្រះស្ដេច លោក ភុន សម្ផស្ស ដើម្បីបញ្ជាក់បន្ថែមជុំវិញរឿងនេះបានទេនៅថ្ងៃទី៣ ខែសីហា។
ទោះជាយ៉ាងណា ការតែងតាំង បុគ្គលដែលមានរឿងអាស្រូវបែបនេះ ឱ្យចូលបម្រើការក្នុងស្ថាប័នរដ្ឋតែងតែឃើញមានជាបន្តបន្ទាប់ ដែលធ្វើឡើងតាមរយៈបក្ខពួក និងសែស្រឡាយ។ ករណីនេះ ត្រូវបានពលរដ្ឋរិះគន់ថា រដ្ឋាភិបាល ដឹកនាំដោយ គណបក្សប្រជាជនកម្ពុជា បានប្រើប្រាស់ស្ថាប័នរដ្ឋ គឺជាកន្លែង រកស៊ី តាមរយៈការប្រព្រឹត្តអំពើពុករលួយ ដើម្បីពង្រីកតែអំណាចដោយមិនខ្វល់លើ បុគ្គលនោះ មានស្នាដៃបម្រើជាតិ និងសមត្ថភាពនោះទេ។
ជាក់ស្ដែង កងអង្គរក្សរបស់អតីតនាយករដ្ឋមន្ត្រីលោកហ៊ុន សែនចំនួន៣នាក់ ដែលបានវាយតំណាងរាស្ត្រគណបក្សប្រឆាំង ឱ្យរងរបួសធ្ងន់កាលពីចុងឆ្នាំ២០១៥ ត្រូវបានដំឡើងឋានៈពីថ្នាក់វរសេនីយ៍ទោ សក្ដិ៤កន្លះ ទៅជាវរសេនីយ៍ឯក សក្តិ៥ និង ពីវរសេនីយ៍ឯក សក្តិ៥ ទៅជាឧត្ដមសេនីយ៍ត្រី ផ្កាយមួយ ជាដើម បើទោះបីបុគ្គលទាំងនោះ ត្រូវបានតុលាការកាត់ទោសឱ្យជាប់ពន្ធនាគារម្នាក់៤ឆ្នាំក្ដី ក៏ពុំបានអនុវត្តទោសបានពេញលេញនោះឡើយ ហើយថែមទាំងទទួលបានតំណែងតួនាទីថែមទៀត៕
