អ្នកឃ្លាំមើល បារម្ភពីការអនុវត្តច្បាប់គ្មានប្រសិទ្ធភាព ទើបបណ្ដាលឱ្យចំនួនអ្នកស្លាប់ដោយសារគ្រោះថ្នាក់ចរាចរណ៍នៅតែបន្តកើនឡើង។ រដ្ឋាភិបាលឱ្យដឹងថា គ្រោះថ្នាក់ចរាចរណ៍ធ្វើឱ្យកម្ពុជាខាតបង់ថវិកាជាតិប្រមាណ ៤៥០លានដុល្លារក្នុងមួយឆ្នាំ។
អ្នកឃ្លាំមើលជំរុញឱ្យរដ្ឋាភិបាលពង្រឹងការអនុវត្តច្បាប់ចរាចរណ៍ឱ្យមានប្រសិទ្ធ ភាព បើមិនដូច្នេះទេ បញ្ហាគ្រោះថ្នាក់ចរាចរណ៍នៅតែជាជំងឺរាំុរ៉ៃ ឬក្លាយជាវិបត្តិមិនអាចដោះស្រាយបាន។
ការជំរុញនេះ ធ្វើឡើងបន្ទាប់ពីរបាយការណ៍របស់ក្រសួងមហាផ្ទៃបង្ហាញថា ចំនួនអ្នកស្លាប់ ដោយសារគ្រោះថ្នាក់នេះក្នុងខែកក្កដាតែមួយ មានចំនួន រហូតដល់ ជាង ១៧០នាក់ ក្នុងនោះក៏មានករណីបុកហើយរត់មួយចំនួនដែរ។
អ្នកស្រាវជ្រាវការអភិវឌ្ឍសង្គមលោកបណ្ឌិត មាស នី បង្ហាញការបារម្ភលើកំណើន គ្រោះថ្នាក់ចរាចរណ៍នេះ ដោយលោកកត់សម្គាល់ថា គ្រាន់តែក្នុងខែកក្កដាតែមួយ ចំនួនអ្នកស្លាប់ដោយសារតែគ្រោះថ្នាក់ចរាចរណ៍មានចំនួនយ៉ាងច្រើន។
លោកបណ្ឌិត មាស នី ប្រាប់ទូរទស្សន៍អាស៊ីសេរី ថា រដ្ឋាភិបាលបោះបង់ការអនុវត្តច្បាប់ចរាចរណ៍នៅពេលកម្ពុជាមានសង្គ្រាមជាមួយថៃនៅពេលកន្លងទៅ និងការអនុវត្តមិនទៀងទាត់នៅពេលបច្ចុប្បុន្ន គឺជាកំហុសឆ្គងមួយ ដែលបណ្ដាលឱ្យចំនួនករណីគ្រោះថ្នាក់ចរាចរណ៍កើន ឡើងយ៉ាងលឿន។ លោកយល់ថាការកើនឡើងនៃគ្រោះថ្នាក់ចរាចរណ៍ដូចសព្វថ្ងៃ អាចបណ្តាលមកពីការអនុវត្តច្បាប់ធូររលុង និងអាចពាក់ព័ន្ធនឹងអំពើពុករលួយជាដើម។
បណ្ឌិត មាស នី៖ «វាច្រើនជាង ហើយស្លាប់រាល់ថ្ងៃ ឥឡូវវាឡើងដល់ ៦ទៅ៧ នាក់ក្នុងមួយថ្ងៃហើយ បើសិនជាយើងយកមកគុណនឹងខែមក វាស្មើនឹងយុទ្ធជន យើងស្លាប់មួយពេលប្រយុទ្ធគ្នាលើកមុន។ អាហ្នឹងជារឿងសំខាន់ ដូច្នេះ រឿងនេះ យើងមិនអាចបន្ទោសទៅលើតែគ្រឿងស្រវឹងមួយមុខទេ។ ខ្ញុំទទួលស្គាល់ថា មកដល់ពេលនេះ ការគ្រប់គ្រងគ្រឿងស្រវឹងការផ្សព្វផ្សាយអី ហាក់ដូចជាមិនទាន់ ធ្វើឱ្យវាមានប្រសិទ្ធភាពមួយរយភាគទេ វានៅតែមានបញ្ហាអ៊ីចឹងដដែល។ ទី២ទៀត យើងក៏ត្រូវពិនិត្យ ដែលពីរឿងអ្នកបើករបរទាំងអស់មានការរៀនសូត្រត្រឹមត្រូវទេ ឬក៏គ្រាន់ តែនាំគ្នា ចេះតែទិញ«licence» សម្រាប់បើកឡានបានទៅ»។
រដ្ឋមន្ត្រីក្រសួងមហាផ្ទៃ លោក ស សុខា ថ្លែងកាលពីថ្ងៃទី០១ ខែ សីហា ពីខេត្តព្រះសីហនុ ថា នៅក្នុងខែកក្កដា ឆ្នាំ២០២៦ អ្នកបាត់បង់ជីវិត ដោយសារ គ្រោះថ្នាក់ចរាចរណ៍ មានចំនួនរហូតដល់ ១៧២នាក់ ហើយក្រសួងបានឱ្យដឹងដែរ ថា អ្នករបួសធ្ងន់ស្រាល ក៏កើនខ្ពស់ដល់ ២៤៥នាក់ ពីចំនួនគ្រោះថ្នាក់ ២០៨ករណី នៅទូទាំងប្រទេស។ លោករដ្ឋមន្ត្រីបានហៅ កំណើនចំនួនអ្នកស្លាប់ដ៏ខ្ពស់នេះ ថា ជាសម្ពាធដ៏គួរឱ្យព្រួយបារម្ភ នៃគ្រោះថ្នាក់ចរាចរណ៍នៅកម្ពុជា។
លោក ស សុខា៖ «គ្រោះថ្នាក់ចរាចរណ៍ ខ្ញុំសុំលើកតែក្នងខែ៧ ទេ មាន ១៧២នាក់ ទូទាំងប្រទេស ដែលជាចំនួនមួយខ្ពស់ ដែលជាមធ្យមភាគ១៣៥ នាក់ទៅ១៤០នាក់ ទេ ប៉ុន្តែខែ៧ នេះ ឡើងដល់១៧២ នាក់ជាង អីចឹងខ្ពស់មែនទែន»។
របាយការណ៍ របស់ក្រសួងមហាផ្ទៃ កាលពីថ្ងៃទី០៣ ខែសីហា រៀបរាប់ថា គ្រោះថ្នាក់ចរាចរណ៍ ភាគច្រើន បណ្តាលមកពីការបើកបរលើសល្បឿនកំណត់ ការមិនគោរពសិទ្ធិអាទិភាព ការបើកបរមិនប្រកាន់ស្តាំ ការវ៉ាជែង ការបត់មិនប្រុងប្រយ័ត្ន និងការបើកបរក្រោមឥទ្ធិពលគ្រឿងស្រវឹង ការមិនគោរពសញ្ញាចរាចរណ៍ និងកត្តាយានយន្ត។ល។
ទោះជាយ៉ាងណា នៅក្នុងមួយរយៈពេលចុងក្រោយនេះ ក្រៅពីករណីគ្រោះថ្នាក់ចរាចរណ៍ទូទៅ មហាជនក៏សម្តែងការបារម្ភ មិនពេញចិត្តចំពោះគ្រោះថ្នាក់ចរាចរណ៍បង្កឡើងដោយអ្នកមានលុយ មានអំណាចដែលបើកបរបុកមនុស្សឱ្យ ស្លាប់ ហើយបើករត់គេចខ្លួន រួចទើបរកវិធីចូលសារភាពតាមក្រោយ។ មហាជនយល់ថា បញ្ហានេះ ក៏ជាមូលហេតុដ៏ សំខាន់មួយ ដែលបណ្ដាលឱ្យមានការកើនឡើង នៃគ្រោះថ្នាក់ចរាចរណ៍ដែរ។
ជាក់ស្តែង ករណីចុងក្រោយនៃការបង្កគ្រោះថ្នាក់បើកបុកស្លាប់ ហើយគេចចេញពីកន្លែងកើតហេតុ បានកើតឡើងនៅយប់ថ្ងៃទី២ សីហា។ ហ្វេសប៊ុកឈ្មោះ ទេព ប៉ុន បានបង្ហោះសារ នៅថ្ងៃទី០៣ ខែសីហា ថា មានរថយន្តទំនើបម៉ាក Mercedes AMG S65 ស្លាកលេខ “កម្ពុជា JEC.SENG” បានបើកទៅបុកម៉ូតូសណ្ដោងរ៉ឺម៉កដឹកអេតចាយ ប៉ើងខ្ទាតក្រឡាប់ផ្ងារជើងម្ខាង បណ្តាលឱ្យស្លាប់ស្ត្រីម្នាក់ជនបង្កហេតុ ដែលបើកបរក្នុងស្ថានភាពស្រវឹង បានទុករថយន្តចោល ហើយមានរថយន្តទំនើប២គ្រឿងទៀត មកដឹកចេញទៅបាត់ទៅ។
ហេតុការណ៍នេះ កើតឡើងនៅយប់ ថ្ងៃទី០២ ខែសីហា ត្រង់ចំណុចមុខផ្សារទំនើបឡាក់គី (LUCKY) ផ្លូវជាតិលេខ២១ ក្នុងសង្កាត់តាខ្មៅ ក្រុងតាខ្មៅ ខេត្តកណ្តាល។ ទោះជាយ៉ាងណា ស្នងការដ្ឋាននគរបាលខេត្តកណ្តាល ឱ្យដឹងថា នៅថ្ងៃទី៤ សីហា ជនបង្កឈ្មោះ អ៊ឹង ស៊ុនសេង អាយុ ៣៥ឆ្នាំ បានចូលខ្លួនមកអធិការដ្ឋាននគរបាលក្រុងតាខ្មៅ ហើយសមត្ថកិច្ចបានបញ្ចូលជនបង្ករូបនេះ ទៅកាន់ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាលដើម្បីបន្តនីតិវិធី។
ស្រដៀងគ្នានេះដែរ កាលពីចុងខែកក្កដាថ្មីៗនេះ នារីឈ្មោះ សាម ម៉ីជូ ដែលជាកូនស្រីរបស់ ឧកញ៉ា តុង ហុក សេង បានបើករថយន្តទំនើបមួយគ្រឿងបុកម៉ូតូមួយគ្រឿង បណ្តាលឲ្យលោក គួច លឹមហាន ដែលមន្ត្រីនៅក្រសួងសាធារណការនិងដឹកជញ្ជូន ស្លាប់នៅនឹងកន្លែង។ ជនបង្ក សាម ម៉ីជូ រត់គេច ខ្លួនបាត់ទៅ រហូតទាល់តែស្នងការនគរបាលរាជធានីភ្នំពេញ លោក ជួន ណារិន្ទ ស្នើឲ្យចូលសារភាព ទើបឃើញលេចមុខនារីរូបនេះ នៅទីស្នាក់ការរបស់នគរបាល។
ក្រៅពីនេះ នៅមានករណីស្រដៀងៗគ្នានេះជាច្រើនទៀត ជាពិសេសករណីដែលគេមិនអាចបំភ្លេចបាននោះគឺ ករណីគ្រោះថ្នាក់ ដែលបង្កឡើងដោយរថយន្តរបស់លោក ជាម យៀប មន្ត្រីជាន់ខ្ពស់របស់គណបក្សប្រជាជនកម្ពុជា និងបច្ចុប្បន្នជាអនុប្រធានរដ្ឋសភា។ កាលពីឆ្នាំ២០១៣ រថយន្តរបស់លោកបានបង្កគ្រោះថ្នាក់ចរាចរណ៍នៅស្រុកកៀនស្វាយ ខេត្តកណ្តាល បណ្តាលឱ្យស្ត្រី មានផ្ទៃពោះម្នាក់ស្លាប់ និង ប្ដីរងរបួសធ្ងន់។ ប៉ុន្តែលោក ជាម យៀប បានផ្តល់សំណងដល់គ្រួសារជនរងគ្រោះតែជាង៣ពាន់ដុល្លារអាមេិរក ហើយរឿងរ៉ាវត្រូវបានបិទបញ្ចប់រហូតដល់សព្វថ្ងៃ។
អ្នកប្រឹក្សាយោបល់ផ្នែកផ្នត់គំនិត និងការស្រាវជ្រាវ លោក សេក សុជាតិ ប្រាប់ ទូរទស្សន៍អាស៊ីសេរីថា រដ្ឋាភិបាល មិនអាច ដោះស្រាយបញ្ហាគ្រោះថ្នាក់ចរាចរណ៍ បានទេ ទោះបីជាក្រសួងមហាផ្ទៃ ព្យាយាមលើកឡើងពីការខិតខំប្រឹងប្រែងរបស់ខ្លួនក៏ដោយ ប្រសិនបើក្រសួង នៅតែបន្តវិធីផាកពិន័យជាធំ ហើយមិនយកចិត្តទុកដាក់ដល់ការអប់រំ និង យុត្តិធម៌តាមផ្លូវច្បាប់ ជាចម្បង។
លោក សេក សុជាតិ ពន្យល់ថា ពេលរដ្ឋាភិបាលអនុវត្តយន្តការផាកពិន័យ មន្ត្រីនគរបាលចរាចរណ៍ក៏ធ្វើការសកម្ម ប៉ុន្តែនៅពេលរដ្ឋាភិបាលមិនដាក់ចេញការ ផាកពិន័យ ដូចមួយរយៈកន្លងមក មន្ត្រីនគរបាលចរាចរណ៍ ក៏ខ្វះភាពសកម្មក្នុងការបំពេញការងាររបស់ខ្លួន។ លោកថា វិធានការផ្ដោតតែទៅលើការពិន័យមួយមុខ ហើយខ្វះការអប់រំ និង មិនអនុវត្តច្បាប់ឱ្យតឹងរ៉ឹង ងាយធ្លាក់ទៅក្នុងអំពើពុករលួយ ហើយជនបង្កគ្រោះថ្នាក់ អាចប្រើលុយ ដើម្បីដោះខ្លួនពីការប្រព្រឹត្តល្មើស ដោយមិន ញញើតច្បាប់ និងសមត្ថកិច្ច។
លោក សេក សុជាតិ៖ «ជាទូទៅគ្រោះថ្នាក់ចរាចរណ៍នេះ វាមានភាពលម្អៀងខ្លាំង ណាស់ ពីព្រោះអ្នកដែលមានលុយគឺអាចដោះស្រាយបញ្ហាហ្នឹងបាន ហើយបើគ្មាន ការអន្តរាគមន៍ គ្មានការបញ្ចេញមតិជាសាធារណៈលើបណ្ដាញសង្គមចោទប្រកាន់ ទៅលើការអនុវត្តច្បាប់ មានភាពលម្អៀង ឬក៏មានស្តង់ដារពីហ្នឹង។ អាជ្ញាធរ និងភាគី ដែលពាក់ព័ន្ធនឹង តែងតែបិទបាំង និងលើកលែងដោយ ទទួលនូវសំណង ឬក៏ផលប្រយោជន៍មួយចំនួន ដែលយើងអាចនិយាយថា វាស្ថិតនៅក្នុងរូបភាពមួយ ដែលត្រូវធ្វើការស៊ើបអង្កេត ពីព្រោះវាហាក់បីដូចជាពាក់ព័ន្ធនឹង អំពើពុករលួយអី អ៊ីចឹងជាដើម»។
របាយការណ៍ របស់ក្រសួងមហាផ្ទៃ ឱ្យដឹងថា ក្នុងរយៈពេល ៦ខែដើមឆ្នាំ២០២៦ គ្រោះថ្នាក់ចរាចរណ៍បានកើនឡើង បើធៀបនឹងឆ្នាំ២០២៥ ក្នុងនោះ ករណីគ្រោះថ្នាក់ មានកំណើន ២១៣លើកចំនួនអ្នកស្លាប់មានកំណើន ៧៩នាក់ និងចំនួនអ្នករបួស មានកំណើន ៤៦៨នាក់។
រដ្ឋលេខាធិការក្រសួងសាធារណការ និង ដឹកជញ្ជូន និង ជាអគ្គលេខាធិការ នៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ ផ្លូវគោក អ្នកស្រី មឹន មាណវី បាននិយាយថា ក្រៅពីធ្វើឱ្យបាត់បង់ជីវិតមនុស្ស គ្រោះថ្នាក់ចរាចរណ៍ បង្កឱ្យកម្ពុជា ខាតបង់ថវិកាជាតិ ប្រមាណ ៤៥០លានដុល្លារ ក្នុងមួយឆ្នាំ៕
