មន្ត្រីសង្គមស៊ីវិលជំរុញឱ្យ តុលាការបន្តអនុវត្តច្បាប់ប្រឆាំងលើជនបង្កដែលបើកបររថយន្ត បុកមនុស្សស្លាប់ បើទោះបីគ្រួសារជនរងគ្រោះ បានដកពាក្យបណ្ដឹង ក្រោយពីទទួលបានសំណងក្ដី។ ការលើកឡើងនេះ ក្រោយពីមានករណីគ្រោះថ្នាក់ចរាចរណ៍ ដែលបង្កឡើង ដោយកូនស្រីឧកញ៉ា តុង ហុកសេង ឈានដល់កិច្ចព្រមព្រៀងបញ្ចប់រឿង បន្ទាប់ពីគ្រួសារ ជនរងគ្រោះ ទទួលសំណង ៦ម៉ឺន ដុល្លារ។
ស្របពេលដែល ជនបង្កឈ្មោះ សាម ម៉ីជូ ត្រូវបានតុលាការចោទប្រកាន់ និងបញ្ជូនទៅឃុំខ្លួននៅក្នុងពន្ធនាគារ PJ រាជធានីភ្នំពេញ ដោយសារតែ បើកបររថយន្តសេរីទំនើបទៅបុកមន្ត្រីរាជការម្នាក់ឈ្មោះ លោក គួច លឹមហាន ឱ្យស្លាប់នៅនឹងកន្លែង ពេលនេះមានការវិវត្តមួយទៀត គឺគ្រួសារជនរងគ្រោះបាន ដកពាក្យបណ្ដឹងវិញ ក្រោយ ពីចុះហត្ថលេខាលើកិច្ចព្រមព្រៀង និងផ្ដិតមេដៃ ទទួលយកថវិកាចំនួន ៦ម៉ឺនដុល្លារ ពីគ្រួសារជនបង្កដើម្បីបញ្ចប់រឿង។
អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី ប្រាប់ទូរទស្សន៍អាស៊ីសេរីនៅថ្ងៃទី០៧ ខែសីហាថា តាមគោលការណ៍ច្បាប់ការទទួលយកលុយ គឺមិនមែនន័យថាសំណុំរឿងនោះត្រូវបានបិទបញ្ចប់នោះទេ ព្រោះបណ្ដឹងអាជ្ញា នៅតែដំណើរការដដែល។ ដូច្នេះលោកថា សំណុំរឿងនេះ តុលាការត្រូវតែដំណើរការរហូត ទល់តែមាន ការបើកសវនាការ ហើយតុលាការសម្រេចចេញសាលក្រម ផ្ដន្ទាទោស ទៅតាមច្បាប់ឱ្យបានត្រឹមត្រូវ។
លោក យិន ម៉េងលី៖ «យើងចង់ឲ្យមនុស្សទាំងអស់នៅក្នុងសង្គម ដោយមិនគិតអំពីពណ៌សម្បុរ ឋានៈ បុណ្យស័ក្ដិ អ្វីទេ ត្រូវតែចូលរួមអនុវត្តច្បាប់ឲ្យបានស្មើៗគ្នា បាទ ដើម្បីសង្គមមួយជាសង្គមនីតិរដ្ឋ ហើយកុំឲ្យមានការលើកឡើងពីបញ្ហារឿងការអនុវត្តច្បាប់មានស្តង់ដារពីរអីនេះបាទ»។
នៅថ្ងៃទី០៧ ខែសីហា គ្រួសាររបស់ជនរងគ្រោះនៅក្នុងគ្រោះថ្នាក់ចរាចរណ៍ឈ្មោះ គួច លឹមហាន ដែលត្រូវបានជនបង្កឈ្មោះ សាម ម៉ីជូ បើករថយន្តបុកស្លាប់ និងរត់ចេញពីកន្លែងកើតហេតុ នៅតាមបណ្ដោយផ្លូវលេខ ១០០៣ ខណ្ឌសែនសុខ រាជធានីភ្នំពេញ នៅថ្ងៃទី ២៨ ខែ កក្កដា បានយល់ព្រមធ្វើកិច្ចព្រមព្រៀងសះជានិងដកពាក្យបណ្ដឹងប្រឆាំងមកលើជនបង្ក ឈ្មោះ សាម ម៉ីជូ បន្ទាប់ពីទទួលបានសំណងចំនួន៦ម៉ឺនដុល្លារ ពីក្រុមគ្រួសារជនបង្ក។
ជាមួយគ្នានោះ នៅក្នុង «កិច្ចព្រមព្រៀងសះជា» បានបង្ហាញថាភាគីទាំងពីរ គឺគ្រួសារជនបង្ក និងគ្រួសារជនរងគ្រោះ បាន ឯកភាពគ្នា មិនស្ថិតក្រោមការបង្ខិតបង្ខំណាមួយនោះឡើយ ហើយ មិនមានការប្ដឹងផ្ដល់គ្នា ឬទាមទារអ្វីផ្សេង លើសពីនេះទៀតឡើយ និងមិនត្រូវសើរើ ឬប្ដឹងតវ៉ា ដោយប្រការណាមួយទៀតនោះដែរ។ ទន្ទឹមគ្នានោះ កិច្ចព្រមព្រៀងនេះ ក៏បានសង្កត់ធ្ងន់ថា ប្រសិនបើមានភាគីណាមួយបំពាននូវកិច្ចព្រមព្រៀងនេះ នឹងត្រូវទទួលខុសត្រូវចំពោះមុខច្បាប់។
ទូរទស្សន៍អាស៊ីសេរីពុំអាចទាក់ទង ប្រពន្ធជនរងគ្រោះ គឺ លោកស្រី តឿន ប៉ុន្នី និងឪពុកជនបង្ក គឺឧកញ៉ា តុង ហុកសេង ដើម្បីបញ្ជាក់បន្ថែមជុំវិញរឿងនេះបានទេ នៅថ្ងៃទី៧ ខែសីហា។ ចំណែកអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ក៏មិនអាចទាក់ទងបានដែរ នៅថ្ងៃដដែលនេះ។
កាលពីថ្ងៃទី៣១ ខែកក្កដា សាលាដំបូងរាជធានីភ្នំពេញ បានចោទប្រកាន់ ជនបង្កឈ្មោះសាម ម៉ីជូ ពីបទ «បើកបរបង្កគ្រោះថ្នាក់ចរាចរណ៍បណ្ដាលឱ្យស្លាប់អ្នកដទៃ» និង បទ «រត់គេចខ្លួន» បន្ទាប់ពីបានបើករថយន្តសេរីទំនើបទៅបុកម៉ូតូ១គ្រឿង បណ្ដាលឱ្យជនរងគ្រោះម្នាក់ឈ្មោះ គួច លឹមហាន បានស្លាប់នៅនឹងកន្លែង។ បច្ចុប្បន្ន ជនបង្ក សាម ម៉ីជូ កំពុងតែស្ថិតនៅក្រោមការឃុំខ្លួន ក្នុងពន្ធនាគារ PJ រាជធានីភ្នំពេញជាបណ្ដោះអាសន្ន ដើម្បីបន្តនីតិវិធី។
ស្រដៀងនឹងករណីខាងលើនេះ នៅថ្ងៃទី២ ខែសីហា មានគ្រោះថ្នាក់ចរាចរណ៍មួយ ស្ថិតនៅក្រុងតាខ្មៅ ខេត្តកណ្ដាល ដោយជនបង្កឈ្មោះ អ៊ឹង ស៊ុនសេង បានបើករថយន្តសេរីទំនើបទៅបុក ម៉ូតូសណ្ដោងរ៉ឺម៉កដឹកអេតចាយ បណ្ដាលឲ្យកុមារអាយុ ១៣ឆ្នាំម្នាក់ ស្លាប់នៅនឹងកន្លែង ខណៈ មនុស្ស៤នាក់ផ្សេងទៀត រងរបួសធ្ងន់ និងស្រាល។ ប៉ុន្តែភ្លាមៗនោះ ជនបង្កឈ្មោះអ៊ឹង ស៊ុនសេង បានរត់គេចខ្លួន។ ទោះជាយ៉ាងណា ក្រោយមានការរិះគន់ច្រើនពីមហាជន លោក អ៊ឹង ស៊ុនសេង ក៏ចូលខ្លួនសារភាព និងយកថវិកា១ម៉ឺន ៨ពាន់៥រយដុល្លារ ទៅជូនគ្រួសារជនរងគ្រោះដើម្បីបញ្ចប់រឿង។
ប៉ុន្តែសំណុំរឿងនេះពុំទាន់បញ្ចប់ត្រឹមនេះទេ នៅថ្ងៃទី០៨ ខែសីហាសាលាដំបូងខេត្តកណ្ដាល បានចោទប្រកាន់ លោក អ៊ឹង ស៊ុនសេង ពីបទ «បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្ដាលឲ្យរបួសអ្នកដទៃ និងស្លាប់អ្នកដទៃ» និងបទ «រត់គេចខ្លួន» រួចហើយ បញ្ជូនទៅឃុំខ្លួននៅពន្ធនាគារ ជាបណ្ដោះអាសន្ន។
ជុំវិញរឿងនេះ អ្នកប្រឹក្សាយោបល់ផ្នែកផ្នត់គំនិត និងការស្រាវជ្រាវ លោក សេក សុជាតិ យល់ថាការផ្ដល់សំណង ដល់ជនរងគ្រោះ គឺជារឿងល្អ ដើម្បីបង្ហាញពីការទទួលខុសត្រូវរបស់ជនបង្ក ក៏ប៉ុន្តែ ករណីនេះពុំអាចបញ្ចប់ត្រឹមហ្នឹងបានទេ.។ ប៉ុន្តែលោកថា ជារឿងពិបាកក្នុងការតាមដានថាតើ ក្រោយពី ជនបង្កផ្ដល់សំណងដល់ជនរងគ្រោះហើយ តុលាការនឹងបន្តនីតិវិធីលើជនបង្កនោះ ប្រកបដោយតម្លាភាព និងត្រឹមត្រូវតាមច្បាប់ឬក៏យ៉ាងណានោះទេ ព្រោះលោកសង្កេតឃើញថា មកទល់ពេលនេះ តុលាការ នៅពុំទាន់បាន ផ្ដល់សំណុំរឿងណាមួយជាគំរូនៅឡើយ ដើម្បីឱ្យពលរដ្ឋអាចជឿទុកចិត្តបានលើវិធានការផ្លូវច្បាប់។
លោក សេក សុជាតិ៖ «បើសិនជាច្បាប់មានការធូររលុង ឬក៏មានបញ្ហាណាមួយដែលអាចលើកលែង នោះហើយគឺជាចំណុចដែលយើងអាចវាយតម្លៃថា ការអនុវត្តច្បាប់នៅក្នុងប្រទេសកម្ពុជា គឺវាមិនមានស្តង់ដារ ឬក៏វាមិនមានភាពច្បាស់លាស់ ដែលធ្វើឱ្យអ្នកដែលមានឥទ្ធិពល អ្នកដែលមានធនធាន និងទ្រព្យសម្បត្តិ គឺនៅតែអាចគ្រប់គ្រងស្ថានការណ៍បានដដែល»។
អ្នកឃ្លាំមើលចង់ឃើញ ការអនុវត្តច្បាប់ប្រកបដោយតម្លាភាព និងយុត្តិធម៌ មិនថាបុគ្គលនោះមានតួនាទីខ្ពង់ខ្ពស់ក្នុងសង្គម និងមានទ្រព្យសម្បត្តិច្រើនក៏ដោយ ព្រោះពួកគាត់យល់ថាការអនុវត្តច្បាប់ ឱ្យបានត្រឹមត្រូវ គឺជាការ ផ្ដល់នូវយុត្តិធម៌ដល់ពលរដ្ឋ ជនរងគ្រោះ និងស្ដារមុខមាត់ជាតិ៕
