សមត្ថកិច្ចមិនទាន់ឃាត់ខ្លួនមន្ត្រីតុលាការម្នាក់នៅខេត្តកោះកុងដែលរងការចោទប្រកាន់ថា ពាក់ព័ន្ធនឹងការជួលវិឡាឱ្យបណ្ដាញក្រុមឧក្រិដ្ឋជន ប្រតិបត្តិការឆបោកតាមអនឡាញនៅឡើយ។ អ្នកឃ្លាំមើល និងមន្ត្រីបក្សប្រឆាំង ស្នើដល់អាជ្ញាធរ និងស្ថាប័នតុលាការអនុវត្តច្បាប់ឱ្យបានម៉ឺងម៉ាត់លើមន្ត្រីអនុវត្តច្បាប់ និងអ្នកមានអំណាចដែលបន្តឃុបឃិតជាមួយឧក្រិដ្ឋជនជួលទីតាំងវិឡាឱ្យប្រតិបត្តិការឆបោកតាមអនឡាញ។
អ្នកឃ្លាំមើលសង្គម និងមន្ត្រីបក្សប្រឆាំង លើកឡើងថា ការណ៍ដែលរដ្ឋាភិបាលកម្ពុជាដោះស្រាយបញ្ហាឧក្រិដ្ឋកម្មឆបោកតាមអនឡាញគ្មានប្រសិទ្ធភាពគឺដោយសារតែមន្ត្រីអនុវត្តច្បាប់មួយប្រឡូកប្រឡាក់នឹងឧក្រិដ្ឋកម្មនេះ និងគ្មានឆន្ទៈបង្ក្រាបលើមេខ្លោងកំពូលៗដែលកាងបណ្ដាញក្រុមឧក្រិដ្ឋជន។ លើសពីនេះទៀត ពួកគាត់ថា បញ្ហាអំពើពុករលួយ និងប្រព័ន្ធដឹកនាំបែបគ្រួសារបក្ខពួកនិយម ក៏បានក្លាយជាឧបសគ្គធំដល់ការអនុវត្តច្បាប់ប្រកបដោយតម្លាភាព និងស្មើភាពរវាងអ្នកមានអំណាច និងប្រជាពលរដ្ឋក្រីក្រ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា ការណ៍ដែលគ្មានចំណាត់ការលើក្រុមឧកញ៉ា និងមន្ត្រីជាន់ខ្ពស់ក្នុងជួរគណបក្សប្រជាជនកម្ពុជាបានផ្ដល់ជាគំរូអាក្រក់ដល់មន្ត្រីតុលាការ និងអ្នកមានអំណាចមួយចំនួនមិនបានខ្លាចញញើតនឹងច្បាប់កម្ពុជាឡើយ ហើយពួកគេនៅតែបន្តឃុបឃិតជួលទីតាំង ឬវិឡារបស់ខ្លួនឱ្យបណ្ដាញឧក្រិដ្ឋជនសម្រាប់បន្តប្រតិបត្តិការឆបោកតាមអនឡាញ។ លោករិះគន់ថា ការបង្ក្រាបអំពើពុករលួយ ឬចាត់វិធានការលើមន្ត្រីដែលពាក់ព័ន្ធនឹងឧក្រិដ្ឋកម្មត្រឹមតែថ្នាក់ក្រោម ឬដោយដុំៗនេះ នឹងមិនអាចដោះស្រាយបញ្ហាឧក្រិដ្ឋកម្មឆបោកតាមអនឡាញបានប្រកបដោយប្រសិទ្ធភាពឡើយ។
លោក ស៊ឹង សែនករុណា៖ «ទាល់តែមានការចាត់វិធានការពីថ្នាក់លើមកក្រោម ទើបថ្នាក់ខាងក្រោមនេះមានការខ្លាចរអា មានការភ័យខ្លាចក្នុងការចាត់វិធានការ។ ប្រៀបដូចទៅនឹងការសម្អាតសំរាមអ៊ីចឹង បើសិនជាយើងសម្អាតពីលើផ្ទះមកក្រោម ច្បាស់ណាស់ អាខាងលើយើងមិនសម្អាតទេ ខាងលើនៅតែទម្លាក់សំរាមហ្នឹងចុះមកក្រោមអ៊ីចឹង។ អ៊ីចឹងវាអត់ស្អាតទេ វាដូចនឹងការបង្ក្រាបអំពើពុករលួយក៏ដូច្នេះដែរ។ បើថ្នាក់ដឹកនាំខាងលើអត់មានការចាត់វិធានការអំពើពុករលួយទេ ការមានបានដោយប្រើប្រាស់តួនាទីរបស់ខ្លួន កេងប្រវ័ញ្ចទ្រព្យសម្បត្តិជាតិ ពុករលួយ យកមកធ្វើមានធ្វើបានពីថ្នាក់លើមក ហើយអត់មានការចាត់វិធានការ បែរជាទៅចាត់វិធានការថ្នាក់តូចទាបអីក៏អ៊ីចឹងដែរ ក៏មិនអាចកម្ចាត់នូវអំពើពុករលួយបានដែរ»។
ប្រតិកម្មនេះធ្វើឡើងបន្ទាប់ពីកម្លាំងក្រុងខេមរភូមិន្ទកាលពីរសៀលទី៨ ខែកញ្ញា បានចូលបង្ក្រាបទីតាំងផ្ទះវិឡាមួយកន្លែងស្ថិតក្នុងភូមិស្ទឹងវែង សង្កាត់ស្ទឹងវែង ខេត្តកោះកុង។ ក្នុងប្រតិបត្តិការនេះសមត្ថកិច្ចបានឃាត់ខ្លួនជនជាតិចិន ៩នាក់សុទ្ធតែគ្មានលិខិតឆ្លងដែន និងបានរឹបអូសបានគ្រឿងញៀនមួយចំនួន រួមទាំងវត្ថុតាងទូរស័ព្ទដៃ និងកុំព្យូទ័រជាច្រើនគ្រឿងដែលសង្ស័យថា ប្រើប្រាស់សម្រាប់ប្រតិបត្តិការឆបោកតាមអនឡាញ។
ព្រះរាជអាជ្ញាខេត្តកោះកុង លោក អេង ច័ន្ទភារ៉ា បានបញ្ជាក់ប្រាប់អ្នកសារព័ត៌មានក្នុងស្រុកនៅថ្ងៃទី៩ ខែកញ្ញាថា ម្ចាស់វិឡាដែលជួលទីតាំងឱ្យបណ្ដាញក្រុមឆបោកតាមអនឡាញធ្វើសកម្មភាពនេះគឺលោក ពិន សេរីវិបុល ដែលជាមន្ត្រីរដ្ឋបាលនៃសាលាដំបូងខេត្តកោះកុង។ លោកបញ្ជាក់ថា កិច្ចព្រមព្រៀងការជួលវិឡារបស់មន្ត្រីសាលាដំបូងខេត្តរូបនេះមិនបានអនុវត្តតាមអនុក្រឹត្យរដ្ឋាភិបាល ឬភ្ជាប់ប្រព័ន្ធគ្រប់គ្រងវត្តមានជនបរទេសឡើយ។
អាជ្ញាធរខេត្តកោះកុងអះអាងថា ជនសង្ស័យជនជាតិចិនទាំង ៩នាក់ត្រូវបានសួរចម្លើយ និងឃុំខ្លួនបណ្ដោះអាសន្ននៅស្នងការដ្ឋាននគរបាលខេត្តកោះកុង។ ចំណែក ម្ចាស់វិឡាដែលជាមន្ត្រីតុលាការកំពុងស្ថិតក្នុងនីតិវិធីស្រាវជ្រាវ និងតាមឃាត់ខ្លួនរបស់កម្លាំងសមត្ថកិច្ច។
ទូរទស្សន៍អាស៊ីសេរីមិនអាចទាក់ទងព្រះរាជអាជ្ញាខេត្តកោះកុង លោក អេង ច័ន្ទភារ៉ា ដើម្បីសាកសួរជុំវិញរឿងនេះបាននៅឡើយនៅថ្ងៃទី៩ ខែកញ្ញា។
ជុំវិញរឿងនេះ អ្នកនាំពាក្យគណបក្សប្រជាធិបតេយ្យជឿនលឿនលោក ប៉ោ មករា ទាមទារដល់អាជ្ញាធរឲ្យបើកការស៊ើបអង្កេតស៊ីជម្រៅលើអ្នកសមគំនិត និងអ្នកមានពាក់ព័ន្ធទទួលផលប្រយោជន៍ពីក្រុមឆបោកផ្សេងទៀត ដើម្បីយកមកផ្ដន្ទាទោសឱ្យបានធ្ងន់ធ្ងរដោយគ្មានការលើកលែង។
លោក ប៉ោ មករា៖ «មួយវិញទៀត គួរតែចាប់ផ្ដើមពិនិត្យទៅលើអ្នកដែលពាក់ព័ន្ធធំៗ ឫសគល់ធំៗ ដែលអាចធ្វើឱ្យបញ្ហា (Scam) នេះវា នៅតែមានការរីករាលដាលនៅតាមតំបន់នីមួយៗ។ ដើម្បីឱ្យមានប្រសិទ្ធភាពកាន់តែប្រសើរហ្នឹង ប្រតិបត្តិការបង្ក្រាបបញ្ហាអំពើពុករលួយហ្នឹងក៏ជាបញ្ហាសំខាន់ដែរ។ អ៊ីចឹង គួរតែធ្វើរឿងនេះឱ្យទន្ទឹមគ្នា ដើម្បីវែកមុខអ្នកដែលពាក់ព័ន្ធសំខាន់ៗ ជាពិសេសអ្នកដែលមានឥទ្ធិពល មានអំណាចហ្នឹង កាងនៅពីក្រោយបញ្ហា (Scam) ហ្នឹង»។
បន្ទាប់ពីសមត្ថកិច្ចបានចុះបង្ក្រាបតាមអគារមជ្ឈមណ្ឌលឆបោកធំៗ ក្រុមជនបរទេស និងពលរដ្ឋខ្មែរមួយចំនួនបានបែកខ្ញែក និងត្រូវបានបណ្ដេញឆបោកណែនាំឱ្យបន្តលួចលាក់ប្រតិបត្តិការឆបោកតាមអនឡាញនៅតាមផ្ទះជួល មន្ទីរពេទ្យ ផ្ទះល្វែង និងវិឡារបស់អ្នកមានអំណាចជាដើម។ ទោះជាយ៉ាងណា ក្នុងប្រតិបត្តិការបង្ក្រាបលើទីតាំងដែលជាប់ពាក់ព័ន្ធនឹងវិឡារបស់មន្ត្រី ឬអ្នកមានអំណាចមួយចំនួនកន្លងទៅរងការរិះគន់ថា អាជ្ញាធរតែងរកល្បិចកល និងលេសផ្សេងៗ ដើម្បីការពារឱ្យម្ចាស់វិឡាដែលបានជួលទីតាំងឱ្យក្រុមឆបោកអាចរួចផុតពីការទទួលខុសត្រូវតាមផ្លូវច្បាប់។ ជាក់ស្ដែង កូនប្រុសមេបញ្ជាការយោធភូមិភាគទី៥ លោក ឯក សំអូន គឺលោក អូន សុខសិលា ដែលមានឋានន្តរសក្ដិជាមន្ត្រីយោធាផ្កាយ១ ត្រូវបានចោទប្រកាន់ថា បានជួលវិឡារបស់ខ្លួននៅខេត្តបាត់ដំបង ឱ្យក្រុមឆបោកតាមអនឡាញ។ ក្រោយករណីនេះបែកធ្លាយ លោក អូន សុខសិលា បានរត់គេចខ្លួនហើយរហូតមកដល់ពេលនេះ សមត្ថកិច្ចក៏មិនបានឃាត់ខ្លួន ឬបង្ហាញវិធានការផ្លូវច្បាប់លើកូនមន្ត្រីយោធាផ្កា ៣ រូបនេះជាសាធារណៈនៅឡើយ៕
