ចាងហ្វាងសារព័ត៌មាន «ស្រទាប់យុវជន» ទទួលបានសេរីភាពវិញនៅថ្ងៃទី១៤ ខែសីហា ក្រោយកងរាជអាវុធហត្ថខេត្តឧត្តរមានជ័យចាប់ខ្លួន និងឃុំមួយយប់ ជុំវិញការរាយការណ៍ពីបទល្មើសព្រៃឈើ។ មន្ត្រីសិទ្ធិមនុស្សយល់ថា ការចាប់ខ្លួនអ្នកសារព័ត៌មានរូបនេះ ជារូបភាពគំរាមកំហែងដល់អ្នកសារព័ត៌មានក្នុងការបំពេញការងារវិជ្ជាជីវៈរបស់ខ្លួន។
អ្នកសារព័ត៌មាន១រូប ទទួលបានសេរីភាពវិញ ក្រោយកងរាជអាវុធហត្ថខេត្តឧត្តរមានជ័យចាប់ខ្លួន កាលពីថ្ងៃទី១៣ ខែសីហា ពាក់ព័ន្ធការបង្ហោះរូបភាពថ្នាក់ដឹកនាំដូចជា អភិបាលខេត្តឧត្តរមានជ័យ លោក មាន ចាន់យ៉ាដា ស្នងការនគរបាលខេត្តលោក ខូវ លី នាយខណ្ឌរដ្ឋបាលព្រៃឈើខេត្តលោក អ៊ឹម សារិទ្ធ និង មេបញ្ជាការកងរាជអាវុធហត្ថខេត្ត លោក លី ដារិទ្ធ ជាដើម ភ្ជាប់ជាមួយបទល្មើសព្រៃឈើ។
កងកម្លាំងរាជអាវុធហត្ថខេត្ត បានចាប់ខ្លួន ចាងហ្វាងសារព័ត៌មាន «ស្រទាប់យុវជន» លោក ប៉ែន នួន ក្នុងថ្ងៃឈប់សម្រាក អំឡុងពេលលោកកំពុងធ្វើដំណើរមកពីធ្វើទ្រុងជ្រូក ត្រឡប់មកផ្ទះវិញ ដើម្បីបរិភោគអាហារថ្ងៃត្រង់ នៅភូមិ រំចេក ឃុំ អន្លង់វែង រួចបញ្ជូនទៅកាន់ទីបញ្ជាការដ្ឋានកងរាជាអាវុធហត្ថខេត្តឧត្ដរមានជ័យ។
ចាងហ្វាងសារព័ត៌មាន «ស្រទាប់យុវជន» លោក ប៉ែន នួន ប្រាប់ទូរទស្សន៍អាស៊ីសេរីថា ការដែលកងកម្លាំងរាជអាវុធហត្ថខេត្តចាប់ខ្លួនលោកនេះ គឺដើម្បីយកទៅសួរនាំពីដំណើររឿងជុំវិញ ការរាយការណ៍របស់លោកកាលពីថ្ងៃទី២៩ កក្កដា ពាក់ព័ន្ធយករូបភាពថ្នាក់ដឹកនាំភ្ជាប់ជាមួយបទល្មើសព្រៃឈើ។ លោកថា អាជ្ញាធរបានលើកឡើងថា ការភ្ជាប់រូបភាពថ្នាក់ដឹកនាំជាមួយបទល្មើសព្រៃឈើនេះ គឺអាចបង្កើតឲ្យមានការភ័ន្តច្រឡំ ប៉ះពាល់ដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំ។ លោកថា ការភ្ជាប់រូបភាពថ្នាក់ដឹកនាំនៅលើវីដេអូឃ្លីបរាយការណ៍ពីបទល្មើសព្រៃឈើនោះ គឺដើម្បីស្នើសុំឲ្យមន្ត្រីពាក់ព័ន្ធគ្រប់លំដាប់ថ្នាក់ ជួយពិនិត្យមើលលើការអនុវត្តកាតព្វកិច្ចរបស់មន្ត្រីមូលដ្ឋាន និងបទល្មើសព្រៃឈើដែលបានកើតឡើងនៅក្នុងតំបន់។ លោកថ្លែងការពារសេចក្តីរាយការណ៍របស់លោកថា ព័ត៌មានដែលលោកបានចុះផ្សាយនោះ គឺមានប្រភពច្បាស់លាស់ និងត្រឹមត្រូវប្រកបដោយក្រមសីលធម៌វិជ្ជាជីវៈជាអ្នកសារព័ត៌មាន។ លោក ប៉ែន នួន អះអាងថា អាជ្ញាធរបានលើកហេតុផលពីការចាប់ខ្លួនលោកទៅដាក់នៅទីបញ្ជាការដ្ឋានកងរាជអាវុធហត្ថខេត្តឧត្តរមានជ័យ១យប់នេះ គឺដោយសារមិនមានពេលវេលាសួរនាំគ្រប់គ្រាន់ក្នុងម៉ោងរដ្ឋបាល ទើបតម្រូវឲ្យលោកស្នាក់នៅទីនោះ១យប់។ អាជ្ញាធរ បានឲ្យលោកធ្វើកិច្ចសន្យាមុននឹងដោះលែងឲ្យលោកមានសេរីភាពវិញ។
លោក ប៉ែន នួន៖ «ជាទូទៅ ប្រាកដណាស់យើងធ្វើព័ត៌មានដែលអឺពាក់ព័ន្ធនឹងបទល្មើសផ្សេងៗ ពាក់ព័ន្ធនឹងថ្នាក់ដឹកនាំ វាជាហានិភ័យខ្ពស់សឹងតែ ៩០%។ រឿងតូចតាចមួយនេះមិនអាចធ្វើឱ្យខ្ញុំបោះបង់ ឬក៏ដួលទាំងជំហរបានទេ ខ្ញុំនឹងបន្តទៅទៀត ព្រោះខ្ញុំបានដើរលើវិស័យនេះអស់ចូល ២០ ឆ្នាំមកហើយ ហើយការប្ដឹងផ្ដល់ហ្នឹងក៏ស្ទើរតែគ្រប់រាល់ឆ្នាំដែរ គឺគេប្ដឹងជាប់រហូត។ អ្វីដែលយើងរួចផុតពីការចោទប្រកាន់ផ្នែកច្បាប់បាន ដោយសារតែយើងសរសេរព័ត៌មានណាដែលពិត ដែលច្បាស់ការណ៍។ អញ្ចឹងធ្វើឱ្យខ្ញុំឈរលើវិស័យមួយនេះបានច្រើនឆ្នាំ ព្រោះទោះជារងបណ្ដឹងច្រើនយ៉ាងណាក៏ដោយ»។
ទូរទស្សន៍អាស៊ីសេរី មិនអាចទាក់ទងមេបញ្ជាការកងរាជអាវុធហត្ថខេត្តឧត្តរមានជ័យ លោក លី ដារិទ្ធ ដើម្បីសួរនាំបន្ថែមជុំវិញករណីនេះបានទេ នៅថ្ងៃទី១៤ កញ្ញា ដោយលោករវល់ប្រជុំ។
កាលពីថ្ងៃទី១០ សីហា មុនឈានដល់ការចាប់ខ្លួននេះ លោក ប៉ែន នួន បានដាក់លិខិតសុំកិច្ចអន្តរាគមន៍ទៅរដ្ឋមន្ត្រីក្រសួងព័ត៌មាន លោក នេត្រ ភក្ត្រា ដើម្បីឲ្យលោកអន្តរាគមន៍ទៅកងរាជអាវុធហត្ថខេត្តឧត្តរមានជ័យ ដែលមានលោក វរសេនីយ៍ឯក ធិននី សុគន្ធា បានចេញលិខិតអញ្ជើញ ចំនួន ០២ លើក ឱ្យលោកចូលទៅការិយាល័យព្រហ្មទណ្ឌ ដើម្បីចូលខ្លួនបំភ្លឺ ជុំវិញការចុះផ្សាយរូបភាពថ្នាក់ដឹកនាំ ទៅបង្ហោះតាមបណ្តាញសង្គមហ្វេសប៊ុកជាសាធារណៈ ដោយលោកយល់ថា អាជ្ញាធរខេត្តមិនយកច្បាប់ក្នុងវិស័យព័ត៌មានមកអនុវត្ត ដែលជាការបំភិតបំភ័យក្នុងអាជីព ជាអ្នកសារព័ត៌មាន។
នៅក្នុងលិខិតសុំកិច្ចអន្តរាគមន៍លោក ប៉ែន នួន បានរៀបរាប់ថា នៅលើគេហទំព័រ និង នៅលើផេកហ្វេសប៊ុកដែលមានឈ្មោះថា «ស្រទាប់យុវវ័យ» បានចុះផ្សាយព័ត៌មាន រឿងការដឹកជញ្ជូនបទល្មើសព្រៃឈើនៅក្នុងស្រុកត្រពាំងប្រាសាទ ដែលបទល្មើសកើតឡើងកាលពីថ្ងៃទី ២៩ ខែកក្កដា ឆ្នាំ ២០២៦។ ក្រោយពីបានផ្សាយមិនដល់មួយថ្ងៃ ក៏មានការស្នើសុំឱ្យលោកលុបព័ត៌មានដែលបានផ្សាយនោះចេញ ហើយលោកក៏បានលុបចោលវិញទាំងអស់។
លោកអះអាងថា ព័ត៌មានដែលលោក បានចុះផ្សាយ គឺមានភស្តុតាងទាំងសម្លេង រូបភាព និង វីដេអូ ច្បាស់លាស់ និងមិនបានបំភ្លៃការពិតឡើយ។ ចំពោះរូបភាពដែលលោកបានប្រើក្នុងព័ត៌មានដែលចុះផ្សាយនោះ មានតែមន្ត្រីដែលមានតួនាទីភារកិច្ចក្នុងការបង្ក្រាបបទល្មើសព្រៃឈើតែប៉ុណ្ណោះ ដោយមិនបានយករូបភាពថ្នាក់ដឹកនាំផ្សេង មកធ្វើការផ្សព្វផ្សាយនោះទេ។ លោកថា ការចេញលិខិតកោះហៅឱ្យចូលបំភ្លឺនេះ ធ្វើឱ្យលោកភិតភ័យមិនហ៊ាននៅផ្ទះ មិនបានរស់ជួបជុំកូន ប្រពន្ធ និង មិនបានប្រកបមុខរបរអ្វីទាំងអស់។
អ្នកគ្រប់គ្រងការិយាល័យអង្គការលីកាដូ (LICADHO) ប្រចាំខេត្តបន្ទាយមានជ័យ លោក អ៊ិន គង់ជិត មានប្រសាសន៍ថា ការបង្ហោះរបស់ចាងហ្វាងសារព័ត៌មានរូបនេះ គឺដើម្បីឲ្យមន្ត្រីមានសមត្ថកិច្ចពាក់ព័ន្ធទាំងអស់បំពេញតួនាទីរបស់ខ្លួនក្នុងការបង្ក្រាបបទល្មើសព្រៃឈើ ប៉ុន្តែអាជ្ញាធរបែរជាយល់ថា ការបង្ហោះរូបថ្នាក់ដឹកនាំទាំងនេះ ជាការធ្វើឲ្យច្របូកច្របល់ទៅវិញ។ លោកបន្តថា នេះជារូបភាពគំរាមកំហែងដល់អ្នកសារព័ត៌មាន។ លោកថា ការប្រើរូបភាពកោះហៅដោយបង្ខិតបង្ខំនេះ ជាការរំលោភសិទ្ធិអ្នកសារព័ត៌មាន។
លោក អ៊ិន គង់ជិត៖ «យើងស្នើសុំអាជ្ញាធរ មានសមត្ថកិច្ច បើសិនជាអឺមើលទៅអត្ថបទហ្នឹងវាមានភាពមិនទាន់ជាក់លាក់ ឬក៏ព័ត៌មានខ្លះមិនទាន់ជាក់លាក់ ឬក៏ខ្វះអី គឺស្ថាប័នគាត់មានអ្នកនាំពាក្យ អាចចេញសេចក្តីបំភ្លឺ បញ្ជាក់តបតវិញបាន។ គឺប្រើសេចក្តីបំភ្លឺ បញ្ជាក់ បកស្រាយវិញ ហើយស្នើសុំឱ្យម្ចាស់អង្គភាពសារព័ត៌មានដែលផ្សព្វផ្សាយហ្នឹងឱ្យគាត់ផ្សាយកែតម្រូវវិញ អនុវត្តទៅតាមច្បាប់សារព័ត៌មាន។ សុំបញ្ឈប់នូវការប្រើរូបភាពនៃការប្រើកម្លាំងទៅចាប់អ្នកសារព័ត៌មានដល់ទីលំនៅណា វាជារូបភាពនៃការគំរាមកំហែងដល់របបសារព័ត៌មាន។ យើងមានច្បាប់ស្តីពីរបបសារព័ត៌មាន ដូច្នេះអាជ្ញាធរសមត្ថកិច្ចត្រូវតែប្រើឱ្យអស់លទ្ធភាពទៅតាមច្បាប់ហ្នឹងសិន មុននឹងមានការបង្ខំណាមួយ»។
ក្រៅពីករណីនេះ លោក ប៉ែន នួន ក៏ធ្លាប់រងពាក្យបណ្តឹងផ្សេងទៀតផងដែរ ដោយកាលពីអំឡុង ឆ្នាំ២០២៤ សាលាដំបូងខេត្តឧត្តរមានជ័យ បានផ្ដន្ទាទោសលោក ឲ្យជាប់ពន្ធនាគារ១ឆ្នាំ តែទោសត្រូវព្យួរ ពីបទ«ការចុះផ្សាយព័ត៌មាន ដែលបណ្តាលឲ្យប៉ះពាល់ដល់សន្តិសុខជាតិ និងស្ថិរភាពនយោបាយ និងការចុះផ្សាយព័ត៌មានដែលជាការជេរប្រមាថមើលងាយដល់ស្ថាប័នជាតិ និងញុះញង់ឲ្យប្រព្រឹត្តបទឧក្រឹដ្ឋ»ជាអាទិ៍ជាដើម។
ទោះជាធ្លាប់រងពាក្យបណ្តឹង ក្នុងអំឡុងពេលបំពេញតួនាទីជាអ្នកសារព័ត៌មានក្តី ក៏លោកប្ដេជ្ញាបន្តភារកិច្ចរបស់លោកដូចដើម ដើម្បីជាប្រយោជន៍ដល់សង្គមជាតិ៕
