រដ្ឋាភិបាលលោក ហ៊ុន ម៉ាណែត រងការរិះគន់ថា នៅតែគ្មានឆន្ទៈដោះស្រាយបញ្ហាលុយកាក់របស់អតិថិជនដែលជាប់គាំងនៅក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ បើទោះបីជាជនរងគ្រោះបានបន្តប្រមូលផ្តុំគ្នាតវ៉ា និងអំពាវនាវដង្ហោយរកកិច្ចអន្តរាគមន៍ជាបន្តបន្ទាប់ក្តី។ ជនរងគ្រោះព្រមានថា កេរ្តិ៍ឈ្មោះកម្ពុជានឹងកាន់តែរងភាពអាម៉ាស់លើឆាកអន្តរជាតិ ហើយអ្នកវិនិយោគក៏បាត់បង់ទំនុកចិត្តមិនហ៊ានដាក់ទុនរកស៊ីនៅកម្ពុជាឡើយ បើរដ្ឋាភិបាលនៃក្រុមគ្រួសារត្រកូលនៅតែ អនុញ្ញាតឱ្យក្រុមហ៊ុនសាច់ញាតិ និងបក្ខពួកខ្លួនបន្តប្លន់យកលុយពលរដ្ឋតាមទំនើងចិត្តដោយគ្មានច្បាប់ការពារ។
រដ្ឋាភិបាលនៃក្រុមគ្រួសារត្រកូល ហ៊ុន នៅតែទុកឱ្យជនរងគ្រោះក្រុមហ៊ុន ហួយវ័ន ផេ (Huione Pay) របស់លោក ហ៊ុន តូ ជាច្រើននាក់បន្តចេញស្វែងរកដំណោះស្រាយដោយខ្លួនឯង និងចេញតវ៉ាតាមដងផ្លូវ ដើម្បីទាមទារប្រាក់របស់ពួកគាត់ ដែលត្រូវបានក្រុមហ៊ុនបង្កកជិតមួយឆ្នាំមកហើយ។
ក្រុមជនរងគ្រោះនៃក្រុមហ៊ុន ហួយវ័ន ប្រមាណជាង ៤០នាក់កាលពីថ្ងៃទី១៦ ខែកញ្ញា បន្តប្រមូលផ្ដុំគ្នាឈរតវ៉ា និងលើកបដានៅខាងមុខស្ថានទូតចិន ដើម្បីទាមទារឱ្យក្មួយបង្កើតលោក ហ៊ុន សែន គឺលោក ហ៊ុន តូ សងលុយដែលពួកគាត់ខិតខំរកបានដោយលំបាក។
ក្រុមបាតុករភាគច្រើនជាជនជាតិចិនបញ្ជាក់ថា មកដល់ពេលនេះ ជនរងគ្រោះមិនត្រឹមតែមិនទទួលបានយុត្តិធម៌នោះទេ ប៉ុន្តែការចេញតវ៉ាដោយសន្តិវិធីការពារសិទ្ធិ ឬទាមទារលុយខ្លួនឯងក៏ត្រូវបានអាជ្ញាធរ និងជនស៊ីវិលតាមយាយីគំរាមកំហែងគ្រប់ទម្រង់។ ជនរងគ្រោះឱ្យដឹងទៀតថា មានជនស៊ីវិលមួយក្រុមដែលមានអត្តចរិតកោងកាចតែងតែឃ្លាំមើល និងចាប់ទាញបដា រូបថតគ្រួសារលោក ហ៊ុន សែន ព្រមទាំងឧបករណ៍បំពង់សំឡេង មិនឱ្យជនជាតិចិនស្រែកតវ៉ាឡើយ។
ជនរងគ្រោះជនជាតិចិនម្នាក់ថ្លែងប្រាប់ទូរទស្សន៍អាស៊ីសេរីសុំមិនបញ្ចេញអត្តសញ្ញាណថា ក្រុមជនស៊ីវិលទាំងនេះទំនងត្រូវបានលោក ហ៊ុន តូ បញ្ជាឱ្យមកធ្វើទុក្ខបុកម្នេញលើជនជាតិចិន និងខ្មែរដែលរងគ្រោះ និងបំភិតបំភ័យបំបាក់ស្មារតី កុំឱ្យជនរងគ្រោះចេញតវ៉ាទាមទារលុយរបស់ខ្លួនបន្តទៀត។
ជនរងគ្រោះរូបនេះសរសេរជាសាររិះគន់ថា កម្ពុជាក្រោមការដឹកនាំដោយរដ្ឋាភិបាលត្រកូល ហ៊ុន នឹងប្រឈមបញ្ហាវិបត្តិសេដ្ឋកិច្ច ព្រមទាំងមានកេរ្តិ៍ឈ្មោះកាន់តែអាក្រក់លើឆាកអន្តរជាតិដោយសារតែអនុវត្តច្បាប់មិនបានការពារពលរដ្ឋដែលរងគ្រោះ និងកាត់ទោសអ្នកដែលប្រព្រឹត្តបទល្មើស។
អាជ្ញាធរកម្ពុជាបានចាប់បញ្ជូនប្រធានក្រុមហ៊ុន ហួយវ័ន គ្រុប (Huione Group) លោក លី សុង (LI XIONG) ជាជនជាតិចិនមានសញ្ជាតិខ្មែរ ទៅកាន់ប្រទេសចិនកាលពីដើមឆ្នាំ២០២៦ ពាក់ព័ន្ធអំពើឆបោកតាមអនឡាញ និងការលាងលុយកខ្វក់។ ចំណែក លោក ហ៊ុន តូ ក្មួយប្រុសបង្កើតលោក ហ៊ុន សែន មកដល់ពេលនេះ គ្មានអាជ្ញាធរណាហ៊ានស៊ើបអង្កេតឡើយ បើទោះបីជាលោកបានសារភាពថា មានភាគហ៊ុន ៣០ភាគរយ និងជាសហប្រធានមួយរូបនៅក្នុងក្រុមហ៊ុន ហួយវ័ន ផេ ក៏ដោយ។
ទោះជាយ៉ាងណាក៏ដោយ លោក ហ៊ុន តូ ស្ថិតក្នុងចំណោមមន្ត្រីជាន់ខ្ពស់គ្រាក់ៗមួយចំនួនទៀតដែលអាមេរិកកំពុងពិចារណាដាក់ទណ្ឌកម្មដោយផ្ទាល់ ពាក់ព័ន្ធនឹងមជ្ឈមណ្ឌលឆបោក ការជួញដូរមនុស្ស ការធ្វើទារុណកម្ម អំពើពុករលួយធ្ងន់ធ្ងរ និងឧក្រិដ្ឋកម្មតាមប្រព័ន្ធអ៊ីនធឺណិត។
ប្រធានចលនាខ្មែរ ដើម្បីប្រជាធិបតេយ្យ (KDM) អ្នកស្រី មូរ សុខហួរ លើកទឹកចិត្ត និងគាំទ្រឱ្យជនរងគ្រោះទាំងអស់បន្តសកម្មភាពតវ៉ាទាមទារសិទ្ធិ និងលុយកាក់របស់ខ្លួនឱ្យកាន់តែសកម្ម។ អ្នកស្រីឱ្យដឹងថា ចលនាខ្មែរ ដើម្បីប្រជាធិបតេយ្យកំពុងធ្វើកិច្ចការងារជាមួយអ្នកជំនាញសេដ្ឋកិច្ច និងមេធាវីនៅសហរដ្ឋអាមេរិក ដើម្បីផ្ដល់កិច្ចគាំពារដល់ជនរងគ្រោះនៃក្រុមហ៊ុន ហួយវ័ន ផេ។
អ្នកស្រី មូរ សុខហួរ វាយតម្លៃថា លោក ហ៊ុន តូ និងមន្ត្រីជាន់ខ្ពស់ផ្សេងៗទំនងមិនអាចគេចផុតពីការដាក់ទណ្ឌកម្មរបស់អាមេរិកនៅពេលខាងមុខឡើយ ដោយសារតែរដ្ឋាភិបាលនៃក្រុមគ្រួសារត្រកូល ហ៊ុន គ្មានឆន្ទៈស៊ើបអង្កេត និងស្វែងរកមេខ្លោងពាក់ព័ន្ធអំពើជួញដូរមនុស្ស និងឧក្រិដ្ឋកម្មឆបោកតាមអនឡាញ។
អ្នកស្រី មូរ សុខហួរ៖«អ្នកដឹកនាំនៅប្រទេសកម្ពុជាយើងសព្វថ្ងៃនេះ មិនមានឆន្ទៈគ្រប់គ្រាន់ ឆន្ទៈមានលុះត្រាតែពលរដ្ឋហ៊ានតស៊ូមតិ ហ៊ានតវ៉ា ហ៊ានងើបឈរ ហ៊ានមិនសម្ដែងអ្វីដែលជាការពិត ហើយនិងទុកសន្លឹកឆ្នោតឱ្យអ្នកដែលអាចដោះស្រាយបញ្ហាជាតិបាន កុំទុកសន្លឹកឆ្នោតរបស់ខ្លួនទៅឱ្យរបបដដែលៗទៀត។ បញ្ហាដែលធំនៅប្រទេសកម្ពុជា គឺអំពើពុករលួយ វប្បធម៌និទ្ទណ្ឌភាព តុលាការមិនឯករាជ្យ ហ្នឹងហើយដែលគេនៅតែទាមទារឱ្យយកឈ្មោះថ្នាក់លើបំផុតមានទាំងលោក ហ៊ុន តូ គេសុំឱ្យសភាបន្តដាក់ទណ្ឌកម្ម បង្កកទ្រព្យសម្បត្តិ ។ល។ និងអាចឈានទៅដល់ការប្រឈមមុខនៅតុលាការនៅប្រទេសអាមេរិក»។
ក្រុមហ៊ុន ហួយវ័ន ផេ ជាផ្នែកមួយនៃក្រុមហ៊ុន ហួយវ័ន គ្រុប (Huione Pay) មានកម្មវិធីទូទាត់លុយតាមអនឡាញ និងកម្មវិធីលើទូរស័ព្ទដៃដែល លោក ហ៊ុន តូ ត្រូវជាក្មួយបង្កើតលោក ហ៊ុន សែន ជាសហប្រធានមួយរូប។ សហរដ្ឋអាមេរិក និងចក្រភពអង់គ្លេសបានដាក់ទណ្ឌកម្មក្រុមហ៊ុននេះដោយរកឃើញថា បានលាងលុយកខ្វក់ឱ្យក្រុមចោរព័ត៌មានវិទ្យាកូរ៉េខាងជើង និងក្រុមឧក្រិដ្ឋជនឆបោកតាមអនឡាញក្នុងទំហំទឹកប្រាក់ប្រមាណ ៤ពាន់លានដុល្លារអាមេរិក៕
