អ្នកនយោបាយបក្សប្រឆាំង និងអ្នកឃ្លាំមើលសង្គម ជំរុញឱ្យមេដឹកនាំកម្ពុជាបច្ចុប្បន្នអនុវត្តតាមព្រះរាជបណ្តាំរបស់ អតីតព្រះមហាក្សត្រ ព្រះបាទសម្តេចព្រះនរោត្តម សីហនុ ដែលព្រះអង្គតែងចង់ឃើញអ្នកនយោបាយខ្មែរចេះបង្រួបបង្រួមជាតិ និងការការពារផលប្រយោជន៍ប្រជាពលរដ្ឋ។ ការជំរុញនេះធ្វើឡើងក្នុងឱកាសខួប ១៤ឆ្នាំនៃការសោយព្រះទិវង្គតរបស់ព្រះបាទ នរោត្តម សីហនុ ដែលត្រូវបានប្រារព្ធឡើងនៅថ្ងៃទី១៥ ខែតុលា ឆ្នាំ២០២៦។
ស្របពេលដែលថ្នាក់ដឹកនាំ មន្ត្រីរាជការ និងតំណាងក្រសួង-ស្ថាប័នរដ្ឋ វិស័យឯកជន អង្គការ និងសមាគម នាំគ្នាដាក់កម្រងផ្កាថ្វាយព្រះវិញ្ញាណក្ខន្ធ នៅមណ្ឌបព្រះបរមរូប ព្រះករុណាព្រះបាទសម្ដេចព្រះ នរោត្តម សីហនុ ព្រះបរមរតនកោដ្ឋ ក្នុងឱកាសខួបលើកទី១៤ នៃការយាងចូលព្រះទិវង្គតរបស់ព្រះអង្គ មន្រ្តីបក្សប្រឆាំង និងអ្នកឃ្លាំមើលនៅក្រៅប្រទេស ដែលមិនមានឱកាសចូលរួមគោរពព្រះវិញ្ញាណក្ខន្ធដោយផ្ទាល់ បានទទូចឱ្យថ្នាក់ដឹកនាំកម្ពុជានៃគ្រួសារត្រកូលហ៊ុន គោរពតាមព្រះរាជបណ្តាំរបស់អតីតព្រះមហាក្សត្រ ដែលមុនពេលព្រះអង្គយាងចូលព្រះទិវង្គត ព្រះអង្គចង់ឱ្យអ្នកនយោបាយខ្មែរចេះរួបរួមគ្នាជាធ្លុងមួយដើម្បីឱ្យខ្មែរខ្លាំង។
អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ បានប្រាប់ទូរទស្សន៍អាស៊ីសេរីថា ព្រះបាទ នរោត្តម សីហនុ ជាព្រះមហាក្សត្រដែលបានបំពេញព្រះរាជកិច្ចដើម្បីផលប្រយោជន៍ប្រជាជាតិខ្មែរ ហើយព្រះរាជស្នាព្រះហស្តរបស់ព្រះអង្គនៅតែមានសារៈសំខាន់សម្រាប់ប្រទេសជាតិ។
លោក គឹម សុខ អះអាងថា ព្រះអង្គបានបង្ហាញពីការគោរពរដ្ឋធម្មនុញ្ញ ការយកព្រះទ័យទុកដាក់ចំពោះបញ្ហារបស់ប្រជាពលរដ្ឋ និងការលើកកម្ពស់សាមគ្គីភាពជាតិ។ លោកក៏បានលើកឡើងពីតួនាទីរបស់ព្រះអង្គក្នុងការសម្របសម្រួលឱ្យមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលជាមូលដ្ឋានសំខាន់សម្រាប់ការបង្កើតរដ្ឋធម្មនុញ្ញ និងការស្តារសន្តិភាពនៅកម្ពុជា។ លោក គឹម សុខ បានជំរុញឱ្យអ្នកកាន់អំណាចបច្ចុប្បន្នយកគំរូតាមអតីតព្រះមហាក្សត្រដើម្បីបម្រើផលប្រយោជន៍ប្រទេសជាតិ និងប្រជាពលរដ្ឋ។
លោក គឹម សុខ៖ «ព្រះអង្គក៏បានដើរតួនាទីយ៉ាងសំខាន់ក្នុងការសម្របសម្រួលឲ្យមានកិច្ចព្រមព្រៀងសន្តិភាពទីក្រុងប៉ារីស ដែលជាមូលដ្ឋាន ផលិតរដ្ឋធម្មនុញ្ញ ប្រជាធិបតេយ្យ និងការគោរពសិទ្ធិមនុស្សនៅកម្ពុជា។ ព្រះអង្គក៏បានបង្ហាញជំហររឹងមាំរបស់ទ្រង់ក្នុងកាលៈទេសៈ ក្នុងការការពារទឹកដីកម្ពុជា ដែលជាមូលដ្ឋាន តទល់និងការឈ្លានពានគ្រប់ទម្រង់របស់ពួកអ្នកជិតខាង។ ព្រះអង្គ ក៏ ប្រកាន់នូវជំហរ ក្នុងការផ្សះផ្សាបង្រួបបង្រួបជាតិហើយធ្វើការដឹកនាំផ្សះផ្សាបង្រួបបង្រួបជាតិដោយផ្ទាល់ក្នុងពេលដែលទ្រង់នៅមានព្រះជន្មដែលនេះជាមូលដ្ឋានធ្វើឱ្យជាតិរឹងមាំ»។
នៅព្រឹកថ្ងៃទី១៥ ខែតុលា ថ្នាក់ដឹកនាំស្ថាប័នជាតិមួយចំនួនបានចូលរួមដាក់កម្រងផ្កាគោរពព្រះវិញ្ញាណក្ខន្ធព្រះបរមរតនកោដ្ឋ នៅស្តូបក្បែរវិមានឯករាជ្យក្នុងរាជធានីភ្នំពេញ ខណៈអ្នកនយោបាយ និងគណបក្សនយោបាយមួយចំនួនក៏បានបង្ហោះសាររំឭកពីព្រះរាជស្នាព្រះហស្តរបស់ព្រះអង្គតាមបណ្ដាញសង្គមផងដែរ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានប្រាប់ទូរទស្សន៍អាស៊ីសេរីថា ព្រះបាទ នរោត្តម សីហនុ បានបំពេញព្រះរាជតួនាទីសំខាន់ក្នុងការដឹកនាំប្រទេសក្នុងសម័យសង្គមរាស្ត្រនិយម និងការបង្រួបបង្រួមជាតិ។
លោក ស៊ឹង សែនករុណា បានលើកឡើងថា កិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ គឺជាស្នាព្រះហស្តប្រវត្តិសាស្ត្រដ៏សំខាន់មួយរបស់ព្រះអង្គ ដែលបានរួមចំណែកបើកផ្លូវឱ្យកម្ពុជាស្តារសន្តិភាព និងបង្កើតរដ្ឋធម្មនុញ្ញដែលចែងពីការគោរពសិទ្ធិមនុស្ស និងគោលការណ៍ប្រជាធិបតេយ្យសេរីពហុបក្ស។
លោក ស៊ឹង សែនករុណា ក៏បានរិះគន់ស្ថានភាពនយោបាយកម្ពុជាក្រោយការសោយទិវង្គតរបស់ព្រះអង្គ ដោយអះអាងថា សេរីភាពនយោបាយ សេរីភាពសារព័ត៌មាន និងសិទ្ធិរបស់សង្គមស៊ីវិលបានរងការរឹតត្បិត។ លោកបានលើកឧទាហរណ៍ពីការរំលាយគណបក្សសង្គ្រោះជាតិនៅឆ្នាំ២០១៧ និងការចាប់ខ្លួនសកម្មជននយោបាយ និងសង្គមមួយចំនួន។
លោក ស៊ឹង សែនករុណា៖ «ព្រះអង្គមានគុណសម្បត្តិដ៏ធំធេងនោះគឺព្រះអង្គបានធ្វើការបង្រួបបង្រួមជាតិដែលព្រះអង្គបានដឹកនាំនូវក្រុមត្រីភាគីមក ចូលរួមជាមួយនឹងខាង មួយភាគីរបស់លោក ហ៊ុន សែន ហេង សំរិន អី ទាំងអស់នេះយើងឃើញថា បានលេចចេញនូវកិច្ចព្រមព្រៀងបញ្ចប់ជម្លោះកម្ពុជាមួយ គឺ កិច្ចព្រមព្រៀងក្រុងប៉ារីស»។
លោក ស៊ឹង សែនករុណា យល់ថា ការបាត់បង់ព្រះអង្គបានធ្វើឱ្យប្រទេសខ្វះឥទ្ធិពលដែលលោកជឿថា អាចជួយទប់ស្កាត់អំណាចនយោបាយ របស់លោក ហ៊ុន សែន មិនអាចឲ្យលោក ហ៊ុន សែន ជិះសេះលែងដៃ ធ្វើអ្វីៗតាមអំពើចិត្តដូចបច្ចុប្បន្ននោះទេ ពីព្រោះកាលពីពេលព្រះអង្គនៅមានព្រះជន្មលោក ហ៊ុន សែន ដែលជាជនមានអំណាចហាក់មិនហ៊ាន ប៉ះទង្គិចជាមួយព្រះអង្គធ្ងន់ធ្ងរនោះទេ។
ព្រះបាទ សម្តេចព្រះ នរោត្តម សីហនុ ប្រសូតនៅថ្ងៃទី៣១ ខែតុលា ឆ្នាំ១៩២២ នៅរាជធានីភ្នំពេញ និងបានឡើងគ្រងរាជសម្បត្តិនៅថ្ងៃទី២៨ ខែតុលា ឆ្នាំ១៩៤១។
ព្រះអង្គបានដើរតួនាទីសំខាន់ក្នុងចលនាទាមទារឯករាជ្យពីអាណានិគមបារាំង ដែលកម្ពុជាទទួលបានឯករាជ្យពេញលេញនៅថ្ងៃទី៩ ខែវិច្ឆិកា ឆ្នាំ១៩៥៣។ នៅថ្ងៃទី១៤ ខែកញ្ញា ឆ្នាំ១៩៥៥ កម្ពុជាបានចូលជាសមាជិកអង្គការសហប្រជាជាតិ។
ព្រះអង្គក៏បានចូលរួមក្នុងការតស៊ូផ្នែកការទូតជុំវិញប្រាសាទព្រះវិហារ ដែលតុលាការយុត្តិធម៌អន្តរជាតិនៅទីក្រុងឡាអេ បានសម្រេចនៅឆ្នាំ១៩៦២ ថាប្រាសាទនេះស្ថិតនៅក្រោមអធិបតេយ្យភាពរបស់កម្ពុជា។
ព្រះបាទ នរោត្តម សីហនុ បានសោយព្រះទិវង្គតនៅថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា នៅទីក្រុងប៉េកាំង ប្រទេសចិន។ ខួបនៃការសោយទិវង្គតរបស់ព្រះអង្គត្រូវបានរំឭកជារៀងរាល់ឆ្នាំ ដោយមានការលើកឡើងពីព្រះរាជស្នាព្រះហស្តក្នុងការទាមទារឯករាជ្យ ការដឹកនាំប្រទេស និងការស្វែងរកសន្តិភាពសម្រាប់កម្ពុជា៕
