តុលាការប្រទេសសិង្ហបុរី (Singapore) បានចោទប្រកាន់ជនសង្ស័យជនជាតិសិង្ហបុរីម្នាក់ ពាក់ព័ន្ធនឹងការរៀបចំបណ្ដាញឧក្រិដ្ឋកម្មឆបោកតាមអនឡាញដែលមានមូលដ្ឋាននៅកម្ពុជា។ អាជ្ញាធរសិង្ហបុរីឱ្យដឹងថា ជនសង្ស័យរូបនេះ ស្ថិតក្នុងចំណោមជនត្រូវចោទចំនួន ៣៦នាក់ផ្សេងទៀតដែលពាក់ព័ន្ធនឹងបណ្ដាញក្រុមហ៊ុនលោក ចេន ហ្ស៊ី (Chen Zhi) ដែលរងការចោទប្រកាន់ពាក់ព័ន្ធនឹងប្រតិបត្តិការឆបោកលុយពីជនរងគ្រោះជនជាតិសិង្ហបុរីក្នុងទំហំទឹកប្រាក់រាប់លានដុល្លារអាមេរិក។
តុលាការប្រទេសសិង្ហបុរី (Singapore) កាលពីថ្ងៃទី៧ ខែវិច្ឆិកា បានសម្រេចចោទប្រកាន់ជនសង្ស័យជនជាតិសិង្ហបុរីម្នាក់ឈ្មោះ ឡាំ យ៉ុង យ៉ាន (Lam Yong Yan) អាយុ ២៧ឆ្នាំ ពាក់ព័ន្ធនឹងការជួយសម្រួលឱ្យមានការប្រព្រឹត្តបទល្មើសធ្ងន់ធ្ងរ និងបម្រើសកម្មភាពខុសច្បាប់របស់ក្រុមឧក្រិដ្ឋជនឆបោកតាមអនឡាញនៅកម្ពុជាដែលមានទំនាក់ទំនងជាមួយបណ្ដាញក្រុមឆបោកក្នុងប្រទេសសិង្ហបុរី។
អាជ្ញាធរសិង្ហបុរីបញ្ជាក់ថា លោក ឡាំ យ៉ុង យ៉ាន (Lam Yong Yan) គឺជាអ្នកឆបោកតាមទូរស័ព្ទ និងធ្វើការនៅមជ្ឈមណ្ឌលប្រតិបត្តិការឆបោកតាមអនឡាញនៅក្នុងរាជធានីភ្នំពេញចាប់តាំងពីខែកញ្ញា ឆ្នាំ២០២៥។ ក្រៅពីនេះ លោកក៏ជាបុគ្គលមួយរូបដែលកំណត់គោលដៅឆបោកលុយពីជនរងគ្រោះនៅប្រទេសសិង្ហបុរី និងសម្របសម្រួលការជួញដូរមនុស្ស ដើម្បីបង្ខំឱ្យមកធ្វើការនៅមជ្ឈមណ្ឌលឆបោកនៅកម្ពុជា។
កាសែតសិង្ហបុរី ដឹ ស្ត្រេតស៍ ថាមស៍ (The Straits Times) រាយការណ៍នៅថ្ងៃទី១០ ខែវិច្ឆិកាថា ប៉ូលិសសិង្ហបុរីបានសហការជាមួយអាជ្ញាធរវៀតណាមឃាត់ខ្លួន លោក ឡាំ យ៉ុង យ៉ាន (Lam Yong Yan) កាលពីខែវិច្ឆិកា ឆ្នាំ២០២៥ បន្ទាប់ពីរូបលោកបានរត់ចេញពីប្រទេសកម្ពុជា។ ក្រោយមកអាជ្ញាធរវៀតណាមបានធ្វើបត្យាប័នបញ្ជូនជនសង្ស័យរូបនេះមកប្រទេសសិង្ហបុរីវិញកាលពីថ្ងៃទី៦ ខែវិច្ឆិកា ឆ្នាំ២០២៦។
កាលពីថ្ងៃទី៥ ខែវិច្ឆិកា កម្លាំងសមត្ថកិច្ចសិង្ហបុរីក៏បានស្ទាក់ចាប់ខ្លួនជនសង្ស័យស្ត្រីជនជាតិសិង្ហបុរីម្នាក់គឺអ្នកស្រី ចេន សៀវលីង (Chen Xiuling) ឬ ការ៉េន ចេន (Karen Chen) នៅអាកាសយានដ្ឋានអន្តរជាតិសិង្ហបុរី ឆាងអ៊ី (Singapore Changi Airport)។ ការចាប់ខ្លួននេះធ្វើឡើងតាមដីកាតុលាការសិង្ហបុរីដែលបានចោទប្រកាន់ថា អ្នកស្រី ចេន សៀវលីង ពាក់ព័ន្ធនឹងការក្លែងបន្លំ និងគាំទ្រប្រតិបត្តិការឆបោក និងការលាងលុយកខ្វក់របស់បណ្ដាញអង្គការឧក្រិដ្ឋកម្មឆបោកឆ្លងដែនក្រុមហ៊ុន ព្រីនស៍ គ្រុប (Prince Holding Group TOC) របស់មេខ្លោងចេន ហ្ស៊ី។
ក្រុមបណ្ដាញឆបោកនេះជាប់ពាក់ព័ន្ធយ៉ាងសកម្មនឹងការឆបោកលុយពីជនរងគ្រោះតាមទម្រង់រូបភាពក្លែងបន្លំជាមន្ត្រីរដ្ឋាភិបាល ដើម្បីបោកប្រាស់ពលរដ្ឋនៅប្រទេសសិង្ហបុរី។ បណ្ដាញនេះក៏ត្រូវបានចោទប្រកាន់ទៅលើករណីឆបោកយ៉ាងហោចណាស់ជាង ៥រយករណី (៥២៨) ដែលបណ្ដាលឱ្យជនរងគ្រោះខាតបង់ប្រាក់ប្រមាណ ៥៣លានដុល្លារសិង្ហបុរី ឬស្មើប្រមាណជាង ៤០លានដុល្លារសហរដ្ឋអាមេរិក។
កាសែតសិង្ហបុរីដដែលឱ្យដឹងទៀតថា ក្រុមបណ្ដាញទាំងនេះត្រូវបានចោទប្រកាន់ថា ដឹកនាំដោយបុរស ៣នាក់ រួមមានបងប្អូនប្រុសជនជាតិសិង្ហបុរីពីរនាក់ គឺលោក ង៉ វៃ លៀង (Ng Wei Liang) និងលោក ង៉ វៃ កាង (Ng Wei Kang) និងបងប្អូនជីដូនមួយរបស់ពួកគេគឺ លោក ឡេស្ទើរ ង៉ ជីង ហៃ (Lester Ng Jing Hai) ។
ក្នុងចំណោមមេដឹកនាំបណ្ដាញឆបោកទាំង ៣នាក់ដែលប៉ូលិសសង្ស័យថា ជាអ្នករៀបចំប្រតិបត្តិការឆបោកនៅកម្ពុជា លោក ង៉ វៃ កាង និងលោក ឡេស្ទើរ ង៉ ជីង ហៃ ត្រូវបានចាប់ខ្លួនក្នុងប្រតិបត្តិការបង្ក្រាបកាលពីខែកញ្ញា ឆ្នាំ២០២៥ និងត្រូវបានចោទប្រកាន់ ក្រោមច្បាប់ស្ដីពីឧក្រិដ្ឋកម្មរៀបចំជាក្រុម។ ចំណែក លោក ង៉ វៃ លៀង ដែលត្រូវបានចោទថា ជាមេដឹកនាំបណ្ដាញនេះ នៅបន្តរត់គេចខ្លួន។
លោក ឡាំ យ៉ុង យ៉ាន (Lam Yong Yan) និងអ្នកស្រី ចេន សៀវលីង (Chen Xiuling) គឺនៅក្នុងចំណោមជនត្រូវចោទចំនួន ៣៦នាក់ទៀតដែលអាជ្ញាធរសិង្ហបុរីប្រកាសតាមប្រមាញ់កាលពីខែឧសភា ឆ្នាំ២០២៦ ពាក់ព័ន្ធនឹងការសម្របសម្រួល និងរៀបចំបណ្ដាញឧក្រិដ្ឋកម្មឆបោកតាមអនឡាញនៅកម្ពុជា។ ប៉ូលិសសិង្ហបុរីបញ្ជាក់ថា ក្នុងចំណោមមនុស្សដែលកំពុងតាមចាប់ទាំងនេះ អាជ្ញាធរចាប់បានជនសង្ស័យចំនួន ៧នាក់ហើយ គិតត្រឹមថ្ងៃទី៦ ខែវិច្ឆិកា ឆ្នាំ២០២៦ ចំណែកជនសង្ស័យពាក់ព័ន្ធផ្សេងទៀតកំពុងរត់គេចខ្លួន។
ជុំវិញរឿងនេះ អ្នកនាំពាក្យរដ្ឋាភិបាលកម្ពុជាឯករាជ្យ ២៣ តុលា លោក គឹម សុខ លើកឡើងថា ចំណាត់ការប្រឆាំងរបស់សិង្ហបុរី និងបណ្ដាប្រទេសលោកសេរីទៅលើបណ្ដាញក្រុមហ៊ុន ចេន ហ្ស៊ី គឺជាផ្នែកមួយបិទខ្ទប់ចរន្តលុយកខ្វក់ដែលឧក្រិដ្ឋជនតែងចាក់ចូលសេដ្ឋកិច្ចគណបក្សប្រជាជនកម្ពុជារបស់លោក ហ៊ុន សែន។ ទោះជាយ៉ាងណា លោកចោទថា រដ្ឋាភិបាលត្រកូល ហ៊ុន នៅសម្ដែងឆាកល្ខោនបង្ក្រាបអ្នកតូចតាច ដើម្បីធ្វើជាខែលបិទបាំងក្រុមមន្ត្រី និងឧកញ៉ាគ្រាក់ៗឱ្យបន្តប្រតិបត្តិការឆបោកតាមអនឡាញ ដើម្បីប្រមូលលុយមកចិញ្ចឹមអំណាចរដ្ឋាភិបាលត្រកូល ហ៊ុន ដដែល។
លោក គឹម សុខ៖ «ជំហររបស់សហគមន៍អន្តរជាតិមិនលើកលែងសោះឡើយចំពោះឧក្រិដ្ឋកម្មឆបោកអនឡាញនៅប្រទេសកម្ពុជាដែលមានក្រុមគ្រួសារ ហ៊ុនជាមេបណ្ដាញធ្វើឱ្យកម្ពុជារងនូវភាពអាម៉ាស់ពេញពិភពលោក។ កម្ពុជាងើបអត់រួចទេ។ រដ្ឋអំណាចនៅប្រទេសកម្ពុជាហ្នឹងប្រើឧក្រិដ្ឋកម្មហ្នឹង ដើម្បីបន្តអំណាចឧក្រិដ្ឋកម្មទៅមុខទៀត។ ដូច្នេះវាជាវិបត្តិដ៏ធំណាស់សម្រាប់កម្ពុជា។ ប្រសិនបើយើងទាំងអស់គ្នាហ៊ានលះបង់ ដើម្បីរកការផ្លាស់ប្ដូរបានគួរតែប្រើការឈឺចាប់នេះ ដើម្បីផ្លាស់ប្ដូរប្រទេសកម្ពុជារបស់យើងទៅកាន់ប្រជាធិបតេយ្យពិតប្រាកដ»។
បន្ទាប់ពីសហរដ្ឋអាមេរិក និងចក្រភពអង់គ្លេសដាក់ទណ្ឌកម្មបង្កកទ្រព្យសម្បត្តិលោក ចេន ហ្ស៊ី (Chen Zhi) និងបក្ខពួកពាក់ព័ន្ធនឹងបណ្ដាញក្រុមហ៊ុន ព្រីនស៍ គ្រុប (Prince Group) ក្នុងទំហំទឹកប្រាក់ប្រមាណ ១៥ពាន់លានដុល្លារកាលពីខែតុលា ឆ្នាំ២០២៥ អាជ្ញាធរសិង្ហបុរីក៏បានបង្កើនចំណាត់ការស៊ើបអង្កេត និងបង្ក្រាបរឹបអូសទ្រព្យសម្បត្តិបណ្ដាញឆបោកនេះជាបន្តបន្ទាប់។
កាលពីខែមីនា ឆ្នាំ២០២៦ ប៉ូលិសសិង្ហបុរីប្រកាសថា បានឃាត់ខ្លួនជនជាតិសិង្ហបុរី ៣នាក់ ដែលសង្ស័យពាក់ព័ន្ធបណ្ដាញលាងលុយកខ្វក់របស់មេខ្លោងឆបោក ចេន ហ្ស៊ី និងបង្កកទ្រព្យសម្បត្តិបន្ថែមប្រមាណ ២៧៤ លានដុល្លារអាមេរិក។ បន្ទាប់មកនៅខែមិថុនា ឆ្នាំ២០២៦ ប៉ូលិសសិង្ហបុរីក៏បានបន្តស៊ើបអង្កេតបុរសជនជាតិចិនពីរនាក់បន្ថែមទៀតគឺ លោក ហ៊ូ ស៊ាវវៃ (Hu Xiaowei) និងលោក ឈីវ វៃរ៉ិន (Qiu Wei Ren) មានសញ្ជាតិខ្មែរពាក់ព័ន្ធនឹងការសង្ស័យលាងលុយកខ្វក់ និងប្រតិបត្តិការឆបោកតាមអនឡាញ។ អាជ្ញាធរសិង្ហបុរីបញ្ជាក់ថា ត្រឹមខែមិថុនា ឆ្នាំ២០២៦ ទ្រព្យសម្បត្តិដែលត្រូវបានរឹបអូសក្នុងសំណុំរឿងឧក្រិដ្ឋកម្មឆបោកដែលមានទំនាក់ទំនងជាមួយបណ្ដាញក្រុមហ៊ុន ចេន ហ្ស៊ី បានកើនឡើងរហូតជាង ៤៦០ លានដុល្លារអាមេរិក៕
