អាមេរិក​ដាក់​ទណ្ឌកម្ម​អ្នក​ជំនួញ​ខ្មែរ​ដើម​កំណើត​ចិន​ម្នាក់​ទៀត​ពាក់ព័ន្ធឧក្រិដ្ឋកម្ម​ឆបោក​អនឡាញ

0
33
អ្នក​ជំនួញ​ខ្មែរ​ដើម​កំណើត​ចិន​ម្នាក់​ទៀត​គឺ​លោក ចាវ ហួយ (Zhao Hui)។ រូប៖ ក្រសួងរតនាគារអាមេរិក
អ្នក​ជំនួញ​ខ្មែរ​ដើម​កំណើត​ចិន​ម្នាក់​ទៀត​គឺ​លោក ចាវ ហួយ (Zhao Hui)។ រូប៖ ក្រសួងរតនាគារអាមេរិក

សហរដ្ឋអាមេរិក​ប្រកាស​ដាក់​ទណ្ឌកម្ម​បង្កក​ទ្រព្យ​សម្បត្តិ​អ្នក​ជំនួញ​ខ្មែរ​ដើម​កំណើត​ចិន​ម្នាក់​ទៀត​គឺ​លោក ចាវ ហួយ (Zhao Hui) និង​ក្រុមហ៊ុន​ចំនួន ២របស់​លោក​នៅ​កម្ពុជា​ដោយសារ​តែ​ជាប់​ពាក់ព័ន្ធ​នឹង​ឧក្រិដ្ឋកម្ម​ឆបោក​តាម​អនឡាញ និង​បង្ខាំង​មនុស្ស​ដោយ​ខុស​ច្បាប់។ អាមេរិក​បញ្ជាក់​ថា លោក ចាវ ហួយ បាន​ជួល​អគារ​ពី​មេខ្លោង ចេន ហ្ស៊ី (Chen Zhi) និង​បាន​បង្កើត​មជ្ឈមណ្ឌល​ឆបោក​ដោយ​ខ្លួន​ឯង​ជាច្រើន​ទៀត​នៅ​កម្ពុជា ដើម្បី​ប្រតិបត្តិការ​ឆបោក​លុយ​ពី​ពលរដ្ឋ​អាមេរិក និង​ពលរដ្ឋ​តំបន់​អឺរ៉ុប។

សន្ទុះ​នៃ​ចំណាត់​ការ​ដាក់​ទណ្ឌកម្ម​របស់​សហរដ្ឋអាមេរិក​លើ​បណ្ដាញ​មេខ្លោង​ដែល​ជាប់​ពាក់ព័ន្ធ​នឹង​ការ​បង្កើត និង​ដំណើរការ​មជ្ឈមណ្ឌល​ឆបោក​តាម​អនឡាញ​នៅ​កម្ពុជា​នៅ​តែ​បន្ត​កើត​មាន​ជា​បន្តបន្ទាប់។

ក្រសួង​រតនាគារ​សហរដ្ឋអាមេរិក​កាល​ពី​ថ្ងៃ​ទី១៩ ខែវិច្ឆិកា បាន​ប្រកាស​ពង្រីក​ទណ្ឌកម្ម​បន្ថែម​លើ​បុគ្គល ៣នាក់ និង​ក្រុមហ៊ុន​ចំនួន ២នៅ​កម្ពុជា​ដែល​ប្រតិបត្តិការ​ឆបោក​លុយ​ជនរងគ្រោះ​នៅ​ជុំវិញ​ពិភព​លោក។

ក្នុង​ចំណោម​បុគ្គល​រង​ទណ្ឌកម្ម​នេះ​គឺ​អ្នក​ជំនួញ​ចិន​ដែល​មាន​សញ្ជាតិ​ខ្មែរ​លោក ចាវ ហួយ និង​ក្រុមហ៊ុន​ចំនួន ២ របស់​លោក​នៅ​កម្ពុជា គឺ​ក្រុមហ៊ុន ប៉ី ហ្វាង ប៉ូ លីន (Bei Fang Bo Lin) និង​ក្រុមហ៊ុន ហ្សេត អេច ហ្សេត អ៊ីនវេសមិន (ZHZ Investment)។

សហរដ្ឋអាមេរិក​ចោទ​ប្រកាន់​ថា លោក ចាវ ហួយ គឺ​ជា​អ្នក​ប្រតិបត្តិការ​ដោយ​ផ្ទាល់​នៅ​ក្នុង​មជ្ឈមណ្ឌល​ឆបោក​នៅ​កម្ពុជា និង​នៅ​ក្រុមហ៊ុន​ចំនួន​ពីរ​ដែល​ស្ថិត​ក្រោម​ការ​គ្រប់គ្រង​របស់​លោក។ អាមេរិក​រក​ឃើញ​ថា លោក ចាវ ហួយ បាន​ជួល​អគារ​ពាណិជ្ជកម្ម​របស់​អង្គការ​ឧក្រិដ្ឋកម្ម​ឆ្លងដែន ព្រីនស៍ គ្រុប (Prince Group TCO) និង​បាន​បង់​ថ្លៃ​ការពារ​ទៅ​ឱ្យ​មេខ្លោង​ដែល​ជា​អ្នក​ដឹកនាំ​អង្គការ​ឧក្រិដ្ឋកម្ម​នេះ​គឺ​លោក ចេន ហ្ស៊ី ដែល​ជា​ទីប្រឹក្សា​លោក ហ៊ុន សែន និង​លោក ហ៊ុន ម៉ាណែត។ ក្រៅ​ពី​នេះ លោក​ក៏​បាន​ពង្រីក​មជ្ឈមណ្ឌល​ឆបោក​ដោយ​ខ្លួន​ឯង​ជា​ច្រើន​ទៀត​នៅ​តាម​តំបន់​ព្រំដែន នៅ​រាជធានី​ភ្នំពេញ និង​ខេត្ត​ព្រះសីហនុ​ជាដើម ដើម្បី​ប្រតិបត្តិការ​ឆបោក​លើ​ជនជាតិ​អាមេរិក និង​អឺរ៉ុប ក្នុង​គម្រោង​បោកប្រាស់​វិនិយោគ​រូបិយប័ណ្ណ​និម្មិត។

ក្រៅ​ពី​បុគ្គល និង​ក្រុមហ៊ុន​នៅ​កម្ពុជា អាមេរិក​ក៏​បាន​ដាក់​ទណ្ឌកម្ម​លើ​មេដឹកនាំ​ជាន់​ខ្ពស់​ពីរ​រូប​នៃ​កងទ័ព​ប្រជាធិបតេយ្យ​សប្បុរសធម៌​ការ៉ែន (DKBA) នៅ​ប្រទេស​មីយ៉ាន់ម៉ា ឬ​ភូមា គឺ​មេបញ្ជាការ​កំពូល​ឧត្ដមសេនីយ៍ សៅ ស្វេ វ៉ា (Saw Shwe Wah) និង​វរសេនីយ៍ឯក សៅ អាវ័ន (Saw A One)។ ក្រសួង​រតនាគារ​អាមេរិក​ចោទ​ថា មេដឹកនាំ​យោធា​ទាំង​ពីរ​រូប​នេះ​មាន​តួនាទី​ស្នួល​ជួយ​ការពារ និង​សម្រួល​ដល់​ប្រតិបត្តិការ​ក្នុង​មជ្ឈមណ្ឌល​ឆបោក​ព្រម​ទាំង​ពាក់ព័ន្ធ​ដោយ​ផ្ទាល់​នឹង​អំពើ​ហិង្សា ការ​ធ្វើ​ទារុណកម្ម​លើ​ជនរងគ្រោះ និង​ការ​ជួញដូរ​មនុស្ស​យក​មក​បង្ខាំង​នៅ​ក្នុង​មជ្ឈមណ្ឌល​ឆបោក​នៅ​ក្នុង​ប្រទេស​មីយ៉ាន់ម៉ា។

ក្រសួង​រតនាគារ​អាមេរិក​បាន​អនុវត្ត​វិធានការ​នេះ ដោយ​សហការ​ជាមួយ​ក្រុម​ការងារ​បង្ក្រាប​មជ្ឈមណ្ឌល​ឆបោក​របស់​ក្រសួង​យុត្តិធម៌​អាមេរិក ក្រុម​ការងារ និង​មជ្ឈមណ្ឌល​សម្របសម្រួល​ជាតិ​ផ្នែក​សន្តិសុខ​មាតុភូមិ ការិយាល័យ​ស៊ើបអង្កេត​សហព័ន្ធ FBI និង​រដ្ឋបាល​ប្រយុទ្ធ​ប្រឆាំង​គ្រឿងញៀន (DEA)។

ចំណាត់​ការ​ដាក់​ទណ្ឌកម្ម​លើ​បុគ្គល និង​អង្គភាព​ទាំង​នេះ​គឺ​ជា​ផ្នែក​មួយ​ប្រឆាំង​ឧក្រិដ្ឋកម្ម​ឆបោក​ឆ្លង​ដែន និង​កាត់​ផ្ដាច់​លំហូរ​ហិរញ្ញវត្ថុ​របស់​ក្រុម​ឧក្រិដ្ឋជន។

រដ្ឋមន្ត្រី​ក្រសួង​រតនាគារ​អាមេរិក លោក ស្កុត បេសសិន (Scott Bessent) មាន​ប្រសាសន៍​ថា សហរដ្ឋ​អាមេរិក​នឹង​បន្ត​ចាត់​វិធានការ ដោយ​ប្រើប្រាស់​គ្រប់​មធ្យោបាយ ដើម្បី​តាម​កម្ទេច និង​រុះរើ​មជ្ឈមណ្ឌល​ឆបោក​តាម​អនឡាញ​មិន​ឱ្យ​ក្រុម​អ្នក​បណ្ដាញ​ឆបោក​អាច​ដំណើរ​ការ​ដោយ​រលូន​ឡើយ។

ជុំវិញ​រឿង​នេះ អ្នកនាំពាក្យ​រដ្ឋាភិបាល​កម្ពុជា​ឯករាជ្យ ២៣ តុលា លោក គឹម សុខ លើកឡើង​ថា សហរដ្ឋ​អាមេរិក​នឹង​មិន​ដក​ដៃ​ក្នុង​ការ​ចាត់​វិធានការ​ដាក់​ទណ្ឌកម្ម​លើ​បណ្ដាញ​ឧក្រិដ្ឋកម្ម​ឆបោក​នៅ​កម្ពុជា​ឡើយ។ លោក​ជឿជាក់​ថា សហរដ្ឋ​អាមេរិក​នឹង​បន្ត​ដាក់​ទណ្ឌកម្ម​លើ​ក្រុម​ឧកញ៉ា និង​មន្ត្រី​ជាន់​ខ្ពស់​សំខាន់ៗ​ជា​ច្រើន​ទៀត​ដរាបណា​រដ្ឋាភិបាល​លោក ហ៊ុន ម៉ាណែត នៅ​តែ​ព្យាយាម​កាង​ការពារ​ឱ្យ​ពួកគេ​រួច​ផុត​ពី​សំណាញ់​ច្បាប់។

«មុខមាត់​របស់​កម្ពុជា​ក្រោម​ការ​ដឹកនាំ​របស់​រដ្ឋាភិបាល​លោក ហ៊ុន ម៉ាណែត លែង​អាច​កែខៃ​ឱ្យ​ល្អ​ប្រសើរ​សម​ទំនង​ដែល​សហគមន៍​អន្តរជាតិ​សេរី ប្រជាធិបតេយ្យ អាច​រាប់​អាន​បាន​ទៀត​ហើយ។ ទណ្ឌកម្ម​របស់​សហរដ្ឋអាមេរិក​នៅ​ពេល​នេះ គឺ​រុញ​ខ្ទប់​ឱ្យ​រដ្ឋាភិបាល​លោក ហ៊ុន ម៉ាណែត ហ្នឹង​ត្រូវ​តែ​ខ្ជាក់​ចេញ​ឱ្យ​បាន​ពួក​អ្នក​ពាក់ព័ន្ធ​ទាំងឡាយ​នៅ​កម្ពុជា​ក្នុង​រឿង​ឧក្រិដ្ឋកម្ម​ឆបោក​អនឡាញ ជាពិសេស​ពួក​ឧកញ៉ា​នៅ​ជុំវិញ​លោក ហ៊ុន សែន និង​ពួក​មន្ត្រី​ជាន់​ខ្ពស់​នៅ​ជុំវិញ​លោក ហ៊ុន ម៉ាណែត ជាពិសេស​ពួកគេ​ទាំង​អស់​ហ្នឹង នៅ​ជុំវិញ​ក្រុម​គ្រួសារ​ត្រកូល ហ៊ុន​តែ​ម្ដង។ បំណង​របស់​សហរដ្ឋអាមេរិក និង​សហគមន៍​អន្តរជាតិ គឺ​ត្រូវ​ឱ្យ​លោក ហ៊ុន ម៉ាណែត ទទួល​ខុសត្រូវ នាំ​ពួក​អ្នក​ទាំង​នោះ​ឱ្យ​ទៅ​ប្រឈម​ចំពោះ​មុខ​ច្បាប់»។

លោក គឹម សុខ

ចំណាត់​ការ​ដាក់​ទណ្ឌកម្ម​របស់​សហរដ្ឋអាមេរិក​លើ​បណ្ដាញ​ឆបោក​នៅ​កម្ពុជា និង​ភូមា ធ្វើ​ឡើង​ក្នុង​រយៈពេល​មិន​ដល់​មួយ​ខែ​ផង បន្ទាប់​ពី​ក្រសួង​រតនាគារ​អាមេរិក កាល​ពី​ដើម​ខែវិច្ឆិកា បាន​ប្រកាស​ពង្រីក​ទណ្ឌកម្ម​លើ​បុគ្គល​ចំនួន ៤នាក់ និង​ក្រុមហ៊ុន ៤១ផ្សេង​ទៀត ដែល​អាមេរិក​រក​ឃើញ​ថា មាន​ទំនាក់ទំនង​ជាមួយ​អង្គការ​ឧក្រិដ្ឋកម្ម​ឆ្លងដែន ព្រីនស៍ គ្រុប របស់​ឧក្រិដ្ឋជន ចេន ហ្ស៊ី នៅ​កម្ពុជា។ អាមេរិក​បញ្ជាក់​ថា បុគ្គល​ដែល​ភាគច្រើន​គឺ​ជា​ជនជាតិ​ចិន​មាន​សញ្ជាតិ​ខ្មែរ និង​ក្រុមហ៊ុន​រង​ទណ្ឌកម្ម​ទាំង​នេះ បាន​ដើរ​តួនាទី​យ៉ាង​សកម្ម ដើម្បី​សម្របសម្រួល​ដល់​អំពើ​ជួញដូរ​មនុស្ស ការ​លាង​លុយ​កខ្វក់ និង​ប្រតិបត្តិការ​ឆបោក​តាម​អនឡាញ​ដែល​ដាក់​គោលដៅ​ឆបោក​លុយ​ពី​ពលរដ្ឋ​អាមេរិក។

ក្រសួង​រតនាគារ​អាមេរិក​ឱ្យ​ដឹង​ថា មជ្ឈមណ្ឌល​ឆបោក​នៅ​អាស៊ីអាគ្នេយ៍ ដែល​ភាគ​ច្រើន​គ្រប់គ្រង​ដោយ​ក្រុម​អង្គការ​ឧក្រិដ្ឋកម្ម​ចិន បាន​ឆបោក​លុយ​ពី​ពលរដ្ឋ​អាមេរិក​ជាង ១៨ពាន់​លាន​ដុល្លារ​កាល​ពី​ឆ្នាំ២០២៥។ អាមេរិក​បញ្ជាក់​ទៀត​ថា សកម្មភាព​របស់​ក្រុម​បណ្ដាញ​ឆបោក​មិនមែន​ត្រឹមតែ​ធ្វើ​ឱ្យ​ជនរងគ្រោះ​បាត់បង់​ប្រាក់​ប៉ុណ្ណោះ​ទេ ថែម​ទាំង​ជំរុញ​ការ​ជួញដូរ​មនុស្ស និង​ប៉ះពាល់​ដល់​សន្តិសុខ និង​ស្ថិរភាព​ក្នុង​តំបន់។

សហរដ្ឋអាមេរិក​អំពាវនាវ​ឱ្យ​រដ្ឋាភិបាល​ក្នុង​តំបន់​ចាត់​វិធានការ​បិទ​ខ្ទប់​មជ្ឈមណ្ឌល​ឆបោក តាមរយៈ​ការ​ចាប់​ខ្លួន​មេខ្លោង អ្នក​ដឹកនាំ​ម្ចាស់​អគារ និង​អ្នក​ដែល​ផ្ដល់​ការ​ការពារ​ដល់​បណ្ដាញ​ឧក្រិដ្ឋកម្ម​ទាំង​នេះ យក​មក​ផ្ដន្ទាទោស​តាម​ច្បាប់ ព្រម​ទាំង​ចាត់​វិធានការ​ជួយ​សង្គ្រោះ​ជនរងគ្រោះ​ដោយ​អំពើ​ជួញដូរ​មនុស្ស។

សហរដ្ឋអាមេរិក​បញ្ជាក់​ថា ខ្លួន​នឹង​បន្ត​សហការ​ជាមួយ​ប្រទេស​ក្នុង​តំបន់ និង​ដៃគូ​អន្តរជាតិ ដើម្បី​តាម​បង្ក្រាប​បណ្ដាញ​ឧក្រិដ្ឋកម្ម​ឆ្លងដែន​ទាំង​នេះ​នៅ​គ្រប់​ទី​កន្លែង និង​ធានា​ថា គ្មាន​ទីជម្រក​សុវត្ថិភាព​ណា​មួយ​សម្រាប់​ឧក្រិដ្ឋជន​បន្ត​ប្រព្រឹត្ត​អំពើ​ឆបោក​លើ​ជនរងគ្រោះ​នៅ​ជុំវិញ​ពិភព​លោក​ឡើយ៕

ទុក​ឱ្យ​ឆ្លើយ​តប​មួយ

សូមបញ្ចូលមតិយោបល់របស់អ្នក!
សូមបញ្ចូលឈ្មោះរបស់អ្នកនៅទីនេះ