ចៅក្រមសាលាដំបូងរាជធានីភ្នំពេញ បានផ្ដន្ទាទោសប្រធានស្ដីទី នៃសមាគមសម្ពន្ធនិស្សិតបញ្ញវន្តខ្មែរ លោក ធី ថន និងសកម្មជននយោបាយ ២នាក់ទៀត ដាក់ពន្ធនាគារ ម្នាក់ៗ ៧ឆ្នាំ ក្រោមបទចោទប្រកាន់ «រួមគំនិតក្បត់» ពាក់ព័ន្ធនឹងការបញ្ចេញមតិរិះគន់គម្រោងអភិវឌ្ឍន៍តំបន់ត្រីកោណ កម្ពុជា-ឡាវ- វៀតណាម CLV-DTA។ មេធាវី និងសង្គមស៊ីវិលខកចិត្ត និងចាត់ទុកការសម្រេចនេះ ថា ជាការរឹតត្បិតសេរីភាពបញ្ចេញមតិពលរដ្ឋ សកម្មជននយោបាយ និងសង្គមស៊ីវិល។
នៅទីបំផុតចៅក្រមសាលាដំបូងរាជធានីភ្នំពេញ នៅថ្ងៃទី០២ ខែកញ្ញា បានប្រកាសសាលក្រម ផ្តន្ទាទោសប្រធានស្ដីទីនៃសមាគមសម្ពន្ធនិស្សិតបញ្ញវន្តខ្មែរ លោក ធី ថន ឱ្យជាប់ពន្ធនាគារ រយៈពេល ៧ឆ្នាំ ពីបទ«រួមគំនិតក្បត់» ដោយសារការបញ្ចេញមតិរិះគន់គម្រោងអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម CLV-DTA។ ចំណែកសកម្មជននយោបាយពីរនាក់ទៀត គឺលោកស្រី ស៊ឹង គន្ធា និង លោក មាន ចាន់ថុន ក៏ត្រូវបានតុលាការកាត់ឱ្យមានទោសម្នាក់ៗ៧ ឆ្នាំដូចគ្នា នៅក្នុងសំណុំរឿងតែមួយនេះដែរ។
លោកស្រី ស៊ឹង គន្ធា និងលោក មាន ចាន់ថុន បាននិយាយនៅក្រោយការប្រកាសសាលក្រម ថា ពួកគាត់មិនអាចទទួលយកការសម្រេច របស់សាលាដំបូងរាជធានីភ្នំពេញបានទេ។
មេធាវីការពារក្ដីឱ្យលោកស្រី ស៊ឹង គន្ធា និង លោក មាន ចាន់ថុន គឺលោក សឺន ជុំជួន ប្រាប់ទូរទស្សន៍នៅថ្ងៃទី០២ ខែកញ្ញា ថា កូនក្ដីរបស់លោក មានគម្រោងប្ដឹង ទៅសាលាឧទ្ធរណ៍ ឱ្យពិចារណាឡើងវិញ ចំពោះសេចក្ដីសម្រេចរបស់សាលាដំបូង រាជធានីភ្នំពេញ។ លោកមេធាវីថា ការបញ្ចេញមតិរបស់កូនក្ដីលោកនៅលើបណ្ដាញសង្គមកន្លងមក គឺជាយោបល់ស្ថាបនាសុទ្ធសាធ ហើយមិនគួរមានកម្រិតទោសធ្ងន់ធ្ងរ រហូតដល់ត្រូវរងការចោទប្រកាន់ពីបទរួមគំនិតក្បត់នោះទេ។
លោក សឺន ជុំជួន៖ «អ៊ីចឹងនិយាយជាមួយរួមទៅបទហ្នឹង គឺវាធ្ងន់ធ្ងរ បើនិយាយអង្គ ហេតុ វាអត់ចូលនៅក្នុងបទចោទហ្នឹងទេ អង្គហេតុ តាមអ្វីដែលយើងសិក្សាសំណុំរឿងហើយការពិភាក្សាដេញដោលទៅ អង្គហេតុហ្នឹង វាអត់ស្ថិតនៅក្នុងបទចោទ នៃការរួមគំនិតក្បត់ វាអត់ពាក់ព័ន្ធ»។
សកម្មជននយោបាយ លោកស្រី ស៊ឹង គន្ធា និងលោក មាន ចាន់ថុន ត្រូវបានសមត្ថកិច្ចចាប់ខ្លួន និង បញ្ជូនពីប្រទេសថៃមកកម្ពុជា កាលពីខែវិច្ឆិកា ឆ្នាំ២០២៤។ រីឯ ប្រធានស្ដីទីនៃសមាគមសម្ពន្ធនិស្សិតបញ្ញវន្តខ្មែរ លោក ធី ថន ត្រូវបានសមត្ថកិច្ចចាប់ខ្លួននៅរាធានីភ្នំពេញ កាលពីខែសីហា ឆ្នាំ២០២៤។ តុលាការបាន ចោទប្រកាន់ពួកគាត់ពីបទ «រួមគំនិតក្បត់» តាមមាត្រា៤៥៣ នៃក្រមព្រហ្មទណ្ឌ បន្ទាប់ពីពួកគាត់រិះគន់រដ្ឋាភិបាលពីគម្រោងអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម CLV-DTA។
ដោយបារម្ភពីការបាត់បង់ទឹកដីកម្ពុជា ទៅកាន់ប្រទេសវៀតណាម ដោយសារតែគម្រោងអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម CLV-DTA ប្រជាពលរដ្ឋខ្មែរ ទាំងក្នុងនិងក្រៅប្រទេស កាលពីឆ្នាំ២០២៤ បាននាំគ្នារិះគន់ និងធ្វើបាតុកម្មតវ៉ាយ៉ាងផុសផុល ទាមទារឱ្យរដ្ឋាភិបាលលោក ហ៊ុន ម៉ាណែត ដកខ្លួនចេញពី គម្រោងនេះ។ ប្រជាពលរដ្ឋខ្មែរទូទៅបារម្ភថាគម្រោងនេះ ជាផែនការដើម្បីសម្រេចមហិច្ឆតារបស់អតីតបក្សកុម្មុយនិស្តឥណ្ឌូចិនរបស់វៀតណាម ដែលប្រើឧបាយកលលេបយកទឹកដីកម្ពុជាចំនួន ៤ខេត្តនៅភាគឦសាន ក្រោមរូបភាពគម្រោងអភិវឌ្ឍន៍ រួមមាន ខេត្តរតនគីរី មណ្ឌលគិរី ក្រចេះ និងខេត្តស្ទឹងត្រែង។
ក្រោយការតវ៉ារបស់ពលរដ្ឋខ្មែរ ទាំងក្នុង និង ក្រៅប្រទេសរដ្ឋាភិបាលលោក ហ៊ុន ម៉ាណែត បានសម្រេចលុបចោលគម្រោងអភិវឌ្ឍន៍ត្រីភាគីនេះវិញ ប៉ុន្តែតុលាការ មិនព្រមដោះលែងក្រុមអ្នក ដែលរិះគន់ពីគម្រោងអភិវឌ្ឍន៍តំបន់ត្រីកោណ CLV នោះទេ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ដែលតាមដានករណីនេះ ប្រាប់ទូរទស្សន៍អាស៊ីសេរី ថា ការកាត់ទោសពលរដ្ឋ ដែលសម្ដែងមតិ កែលម្អបញ្ហាសង្គម ឱ្យជាប់ពន្ធនាគារ ធ្វើឱ្យបាត់ធាតុផ្សំដ៏សំខាន់ ក្នុងការអភិវឌ្ឍសង្គម។
លោក អំ សំអាត កត់សម្គាល់ថា សកម្មជននយោបាយពីររូប គឺលោកស្រី ស៊ឹង គន្ធា និងលោក មាន ចាន់ថុន គ្រាន់តែឆ្លើយឆ្លងតាមបណ្ដាញសង្គម ដែលជាផ្នែកមួយនៃការបញ្ចេញមតិរបស់ប្រជាពលរដ្ឋ ស្របតាមរដ្ឋធម្មនុញ្ញប៉ុណ្ណោះ ដូច្នេះ ពុំគួរជាមូលហេតុ នៃការកាត់ទោសក្នុងបទ«រួមគំនិតក្បត់»ឡើយ។
រីឯការកាត់ទោស លោក ធី ថន វិញ លោក អំ សំអាត លើកឡើងថា ជាការរឹតត្បិតសេរីភាពមូលដ្ឋាននៃអង្គការសង្គមស៊ីវិល ពីព្រោះលោក ធី ថន ដែលជាប្រធានស្ដីទី នៃសមាគមសម្ពន្ធនិស្សិតបញ្ញវន្តខ្មែរ អនុវត្តគម្រោងការងាររបស់ខ្លួន តាមលក្ខន្តិកៈដែលទទួលស្គាល់ដោយក្រសួងមហាផ្ទៃ។
លោក អំ សំអាត៖ «បើយើងមើលទៅក្នុងការជជែកដេញដោល ក្នុងសវនាការកន្លងមកនេះ ចំពោះ ធី ថន វាហាក់ដូចជា មិនមានភស្តុតាង ឬក៏សកម្មភាពណាមួយ ដែលជាប់ពាក់ព័ន្ធជាមួយនឹងអ្នកទាំងពីរផ្សេងទៀត ក៏ដូចជា អ្នកដទៃសោះ ហើយហាក់ដូចជាមិនមានភស្តុតាងកន្លែងណាមួយ ដែលបង្ហាញថា ធី ថន បាន ប្រព្រឹត្តដូចការចោទប្រកាន់។ អ៊ីចឹងមានការសោកស្ដាយចំពោះការផ្ដន្ទាទោសទៅ លើលោក ធី ថន»។
អង្គការការពារសិទ្ធិមនុស្សលីកាដូបង្ហាញរបាយការណ៍ កាលពីខែសីហាថា ក្នុង រយៈពេល២ឆ្នាំចុងក្រោយនេះ មានព្រឹត្តិការណ៍ធំៗពីរ ដែលធ្វើឱ្យមានការចាប់ខ្លួន ចោទប្រកាន់ និងឃុំខ្លួនពលរដ្ឋដ៏ច្រើន។ ព្រឹត្តិការណ៍ធំៗទាំងពីរនោះ គឺការប៉ះទង្គិច ដោយអាវុធនៅតាមបណ្តោយព្រំដែន កម្ពុជា-ថៃ ដែលចាប់ផ្ដើមនៅពាក់កណ្តាល ឆ្នាំ២០២៥ និង ព្រឹត្តិការណ៍តវ៉ារបស់ប្រជាពលរដ្ឋខ្មែរ ជុំវិញគម្រោងតំបន់ ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) នៅក្នុងឆ្នាំ ២០២៤។
ព្រឹត្តិការណ៍នៃការតវ៉ារបស់ប្រជាពលរដ្ឋខ្មែរ ទាំងក្នុងនិងក្រៅប្រទេសទាមទារឱ្យរដ្ឋាភិបាលលោក ហ៊ុន ម៉ាណែត ដកកម្ពុជាចេញពីគម្រោងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) នៅក្នុងឆ្នាំ២០២៤នោះ បណ្ដាលឱ្យអាជ្ញាធររដ្ឋាភិបាល ប្រើកម្លាំងចាប់ខ្លួន និងឃុំខ្លួនប្រជាពលរដ្ឋជិត ១០០នាក់។
មនុស្សមួយចំនួនត្រូវបានអាជ្ញាធរដោះលែងវិញ ក្រោយពេលត្រូវបានឃាត់ខ្លួន និងឃុំខ្លួនមួយរយៈពេលខ្លី នៅក្នុងប៉ុស្តិ៍នគរបាល និងពន្ធនាគារក្រោយពួកគេសរសេរលិខិត ឬធ្វើវីដេអូសុំទោសអ្នកដឹកនាំប្រទេស ឬព្រមចុះចូលជាមួយគណបក្សប្រជាជនកម្ពុជា។ រីឯមនុស្សមួយចំនួន ទៀត ត្រូវបានតុលាការផ្ដន្ទាទោសដាក់ពន្ធនាគារក្នុង រយៈពេលដ៏យូរ ដូចជា ករណីប្រធានស្ដីទីនៃសមាគមសម្ពន្ធនិស្សិតបញ្ញវន្តខ្មែរ លោក ធី ថន ព្រមទាំង សកម្មជននយោបាយ លោកស្រី ស៊ឹង គន្ធា និងលោក មាន ចាន់ថុន នៅពេលនេះ ដោយសារតែពួកគេនៅតែប្រកាន់ជំហរថាមិនបានប្រព្រឹត្តកំហុស ក្បត់ជាតិដូចការចោទប្រកាន់របស់រដ្ឋាភិបាល៕
