គ្រួសារជនរងគ្រោះ ដោយសារ កងទ័ពជើងទឹកថៃ ចាប់ខ្លួន តាំងពីខែកុម្ភៈ នៅលើដែនសមុទ្រកម្ពុជា ក្នុងតំបន់កោះយ៉រ ខេត្តកោះកុង ស្នើឱ្យរដ្ឋាភិបាល លោក ហ៊ុន ម៉ាណែត ជួយអន្តរាគមន៍ទាមទារឱ្យថៃ ដោះលែង ពលរដ្ឋខ្មែរ៣នាក់ ឱ្យមានសេរីភាពឡើងវិញ។ ការទាមទារជាថ្មីនេះ ក្រោយពីអាជ្ញាធរកម្ពុជា ធ្លាប់បានអះអាងថា អ្នកទាំង៣រូបនោះ នឹងត្រូវបាន អាជ្ញាធរថៃ ដោះលែងនៅថ្ងៃទី៣០ខែ កក្កដា ប៉ុន្តែមកទល់ពេលនេះ នៅតែគ្មានដំណឹង។
រយៈពេលជិត៧ខែហើយ ដែលប្រជានេសាទខ្មែរ៣រូប ត្រូវបានអាជ្ញាធរថៃចាប់ខ្លួនយកទៅឃុំឃាំងនៅប្រទេសថៃ ដោយចោទថា ចូលនេសាទលើដែនសមុទ្រថៃ ប៉ុន្តែក្រសួងការបរទេសកម្ពុជា បំភ្លឺថា ភាគីថៃទេ ដែលរំលោភដែនសមុទ្រកម្ពុជា និងចាប់ខ្លួនពលរដ្ឋខ្មែរដោយខុសច្បាប់។
ប្អូនស្រីជនរងគ្រោះ ឈ្មោះ ងឹម រដ្ឋ គឺកញ្ញា ងឹម គឹមឡាយ ប្រាប់ទូរទស្សន៍អាស៊ីសេរីនៅថ្ងៃទី១៣ ខែសីហាថា កញ្ញាសោកស្ដាយ និងអាណិតស្រណោះ បងប្រុសជាខ្លាំង ត្រូវបានថៃ ចាប់ខ្លួន យកទៅដាក់ពន្ធនាគារនៅឯប្រទេសថៃ ដោយពុំបានដំណឹង ពីសុខទុក្ខសោះ។ បងប្រុស កញ្ញា ជាកម្មករ នេសាទឱ្យថៅកែ ម្នាក់នៅខេត្តកោះកុងឈ្មោះ យ៉ន មុត អស់រយៈពេលជាច្រើនឆ្នាំមកហើយ ដើម្បីរកលុយផ្គត់ផ្គង់គ្រួសារ និងឧបត្ថម្ភ ឱ្យកញ្ញាទៅរៀន។
ប៉ុន្តែចាប់តាំងពីបងប្រុសត្រូវបាន ថៃចាប់ខ្លួនមកគ្រួសារ កញ្ញា ជួបការលំបាក ព្រោះគ្មានអ្នករកចំណូល ខណៈដែលឪពុកម្ដាយក៏ចាស់ៗអស់ទៅហើយ។ កញ្ញារំលឹកថា កាលពីខែកក្កដា គ្រួសារកញ្ញាសប្បាយចិត្តជាខ្លាំង នៅពេលដែល មានសារព័ត៌មានក្នុងស្រុកផ្សព្វផ្សាយអំពីការដោះលែងបងប្រុសកញ្ញា និងសមាជិក២នាក់ទៀត នៅថ្ងៃទី៣០ ខែកក្កដា ប៉ុន្តែមកទល់ពេលនេះហើយ នៅតែគ្មាន ដំណឹងសោះ ពីការដោះលែងនេះ។ កញ្ញាស្នើឱ្យរដ្ឋាភិបាល និងអាជ្ញាធរជួយអន្តរាគមន៍ ទាមទារឱ្យភាគីថៃដោះលែងអ្នកទាំង៣រូប ឱ្យមានសេរីភាពវិញដើម្បីជួបជុំគ្រួសារ។
កញ្ញា ងឹម គឹមឡាយ៖ «សូមឲ្យខាងអាជ្ញាធរខ្មែរយើងជួយដោះស្រាយរឿងហ្នឹង ឲ្យបងប្រុសខ្ញុំគាត់ឆាប់ត្រឡប់មកផ្ទះវិញឆាប់ៗមក ព្រោះថាអី គ្រួសារបាត់បង់គាត់ចូលជិតច្រើនខែដែរហើយបង ហើយមានការព្រួយបារម្ភពីសុខទុក្ខគាត់ សុខភាពគាត់ មិនដឹងម៉េចម៉ា ព្រោះអីយើងអត់បានទទួលព័ត៌មានពីគាត់បន្តិចសោះ។ បានតែសំបុត្រម្ដងហ្នឹង ហើយយើងអត់ច្បាស់ដូចដែលយើងបាននិយាយជាមួយគាត់ផ្ទាល់មាត់។ ចង់ឲ្យគាត់ជួយដោះស្រាយបញ្ហាហ្នឹងឲ្យបានបងប្រុសខ្ញុំត្រឡប់មកផ្ទះឆាប់ៗណា៎បង..»។
ប្រជានេសាទខ្មែរ ទាំង៣រូប ដែលថៃចាប់ខ្លួន កាលពីថ្ងៃទី២២ ខែកុម្ភៈ មានឈ្មោះ ភាព ងឹម រដ្ឋ និង ចាន់នា។ អាជ្ញាធរថៃ បានចោទអ្នកទាំង៣ ថា «ចូលដែនទឹកថៃ និងនេសាទខុសច្បាប់»។ ភ្លាមៗនោះ ក្រសួងការបរទេសកម្ពុជា ថ្កោលទោស ភាគីថៃ ដែលចាប់ ពលរដ្ឋខ្មែរ៣នាក់ លើដែនអធិបតេយ្យកម្ពុជា និងទាមទារឱ្យថៃ ដោះលែងជាបន្ទាន់។ ប៉ុន្តែ ចាប់តាំងពីកម្ពុជាបានចេញសេចក្ដីប្រកាស ជាផ្លូវការរួចមក គេហាក់ពុំសូវឮរដ្ឋាភិបាល និងអាជ្ញាធរនិយាយអំពីករណីទាំងនេះនៅលើឆាក់អន្តរជាតិ និង តាមបណ្ដាញសង្គមនានានោះទេ ដែលធ្វើឱ្យគ្រួសារ ជនរងគ្រោះ ព្រួយបារម្ភ ពីសុវត្ថិភាព និងមានអារម្មណ៍ថា ពលរដ្ឋខ្មែរទាំងនោះ ត្រូវបានរដ្ឋាភិបាលទុកចោល។
កាលពីថ្ងៃទី១៤ ខែកក្កដា អ្នកនាំពាក្យស្ដីទីនៃក្រសួងការបរទេសកម្ពុជា លោក ចាន់ រតនា បានប្រាប់សារព័ត៌មានក្នុងស្រុកថា តុលាការខេត្តត្រាត ប្រទេសថៃ បានកាត់ទោសអ្នកនេសាទខ្មែរ២នាក់ ឱ្យជាប់ពន្ធនាគារ ៤ខែ ពិន័យជាប្រាក់ក្នុងម្នាក់ ៩ម៉ឺនបាត ឬស្មើ១០លានរៀល និងអ្នកបើកទូកនេសាទម្នាក់ ឱ្យជាប់ពន្ធនាគារ ១ឆ្នាំ ៤ខែ និងពិន័យជាប្រាក់ជាង ១២ម៉ឺនបាត ឬស្មើ១៤លានរៀល ក្រោមបទចោទ «ចូលដែនទឹកថៃ និងនេសាទខុសច្បាប់។
ទន្ទឹមគ្នានោះលោក ចាន់ រតនា ក៏បានបញ្ជាក់ថា អាជ្ញាធរថៃនឹងដោះលែងពលរដ្ឋខ្មែរទាំង ៣រូប នៅថ្ងៃទី៣០ ខែកក្កដា បន្ទាប់ពីមន្ត្រីកុងស៊ុលកម្ពុជា បានចូលសួរសុខទុក្ខ និងស្នើសុំឱ្យមានការដោះលែង។ ប៉ុន្តែមកទល់ពេលនេះ អាជ្ញាធរថៃពុំបាន ដោះលែងនោះឡើយ។
ទូរទស្សន៍អាស៊ីសេរី បានទាក់ទងអ្នកនាំពាក្យស្ដីទីនៃក្រសួងការបរទេសកម្ពុជា លោក ចាន់ រតនា ដើម្បីបញ្ជាក់បន្ថែម ជុំវិញរឿងនេះដែរ នៅថ្ងៃទី១៣ ខែសីហា ប៉ុន្តែលោកបដិសេធមិនឆ្លើយ ដោយថា ជាប់រវល់។
ជុំវិញរឿងនេះ អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្ស អាដហុក (ADHOC) លោក យិន ម៉េងលី យល់ថា នៅក្នុងច្បាប់ ពលរដ្ឋខ្មែរ មិនថាទៅទីណានោះទេរដ្ឋាភិបាលត្រូវតែយកចិត្តទុកដាក់ និងតាមដានលើករណីពួកគាត់ឱ្យបានដិតដល់ នៅពេលដែលពួកគាត់មានបញ្ហាមួយចំនួន ដូចជា ករណីពលរដ្ឋខ្មែរ៣នាក់ត្រូវបានកងទ័ពថៃចាប់ខ្លួននៅខេត្តកោះកុង យកទៅឃុំខ្លួននៅប្រទេសថៃជាដើម។
លោកបញ្ជាក់ថាករណីនេះ អាជ្ញាធរ និងមន្ត្រីកុងស៊ុលខ្មែរ ប្រចាំនៅប្រទេសថៃ ត្រូវតាមដាន និងធ្វើបច្ចុប្បន្នភាព ជូនដល់គ្រួសារ និងមហាជនឱ្យបានញឹកញាប់។ ទន្ទឹមគ្នានោះ លោកជំរុញឱ្យអាជ្ញាធរតវ៉ា និងធ្វើកិច្ចអន្តរាគមន៍ ទៅកាន់ភាគីថៃ ដើម្បីទាមទារឱ្យដោះលែង ព្រោះ ក្រសួងការបរទេសក៏បានបញ្ជាក់ហើយថា ការចាប់ខ្លួនពលរដ្ឋខ្មែរនោះ លើដែនសមុទ្រកម្ពុជា ដូច្នេះពួកគាត់គ្មានកំហុស ដូចការចោទប្រកាន់ របស់អាជ្ញាធរថៃនោះទេ។
លោក យិន ម៉េងលី៖ «រដ្ឋាភិបាលត្រូវតែផ្ដល់ព័ត៌មានត្រឡប់ បាទ មកដល់ក្រុមគ្រួសារជនរងគ្រោះ ដើម្បីឲ្យពួកគាត់ដឹង ទោះបីជាលទ្ធផលវិជ្ជមានក្តី អវិជ្ជមានក្ដី ព្រោះកាលណាក្រុមគ្រួសារ ទទួលព័ត៌មានពីការដោះលែង ហើយមិនឃើញការដោះលែង គាត់តែងតែបារម្ភ នេះជារឿងធម្មតាទេ បាទ។ អ៊ីចឹង ត្រូវតែផ្ដល់ព័ត៌មានត្រឡប់ ហើយបើសិនជាមានបញ្ហាអ្វី ត្រូវតែជំរុញបន្ថែមទៀត ឬក៏សាកសួរទៅខាងរដ្ឋាភិបាលថៃ ដើម្បីឲ្យបំភ្លឺបញ្ហានេះត្រឡប់មកវិញ បាទ»។
ករណីថៃចូលចាប់ពលរដ្ឋខ្មែរនៅលើដែនសមុទ្រកម្ពុជា ទៅឃុំនៅប្រទេសថៃ តាមអំពើចិត្តនេះ គឺស្របពេលកម្ពុជា និងថៃ កំពុងមានជម្លោះតាមព្រំដែន អស់ជាង១ឆ្នាំហើយ។ អ្នកឃ្លាំមើលយល់ថា ទង្វើឈ្លានពាន និងរំលោភបំពានរបស់ថៃនេះ ជាការឆ្លុះបញ្ចាំង ឱ្យឃើញពីភាពកម្សោយលើវិស័យការពារជាតិ និងអសមត្ថភាពនៃ ការដឹកនាំរបស់រដ្ឋាភិបាល លោក ហ៊ុន ម៉ាណែត ដែលមិនអាចការពារ សុវត្ថិភាពជូនពលរដ្ឋ និង ថែមទាំងទុកពលរដ្ឋចោលឱ្យជាប់ពន្ធនាគារ នៅក្រៅប្រទេស។
បន្ថែមពីលើនោះ ពលរដ្ឋ និងអ្នកឃ្លាំមើល ជំរុញឱ្យរដ្ឋាភិបាលត្រូវតែប្រើយន្តការច្បាប់ ឱ្យបានម៉ឺងម៉ាត់ និងច្បាស់លាស់ និងត្រូវប្រមូលភស្តុតាងដើម្បីបង្ហាញដល់ សហគមន៍អន្តរជាតិចំពោះទង្វើខុសច្បាប់របស់ថៃ ដូចជាការ ចាប់ជនស៊ីវិលខ្មែរ ដាក់គុកជាដើម។ ពួកគាត់បារម្ភថា ប្រសិនបើ រដ្ឋាភិបាល មិនប្រឹងប្រែង ការពារសុវត្ថិភាពពលរដ្ឋ និងអធិបតេយ្យ ឱ្យបានត្រឹមត្រូវទេនោះ ភាគីថៃនឹងបន្តគំរាមកំហែង និងចូលឈ្លានពានទឹកដីកម្ពុជាតាមអំពើចិត្តដូចបច្ចុប្បន្ន៕
