កម្មកររោងចក្រកាត់ដេរសម្លៀកបំពាក់ ផ្លររីស ហ្គាម៉ិន (FLOURISH GARMENT (Cambodia) Co.,LTD ៤នាក់ ត្រូវថៅកែបញ្ឈប់ពីការងារ ដោយសារមិនព្រមធ្វើការបន្ថែមម៉ោងកាលពីថ្ងៃ២៥ ខែសីហា។ មន្ត្រីសិទ្ធិកម្មករយល់ថា កម្មករគួរយកករណីនេះ ប្តឹងទៅក្រសួងការងារ ដើម្បីឲ្យក្រសួងពិនិត្យ និងស៊ើបអង្កេតលើការអនុវត្តច្បាប់ការងាររបស់ក្រុមហ៊ុននេះ។
កម្មកររោងចក្រកាត់ដេរសម្លៀកបំពាក់ ៤នាក់ ដែលត្រូវបានក្រុមហ៊ុន ផ្លររីស ហ្គាម៉ិន ដែលមានថៅកែជាជនជាតិចិន ស្ថិតនៅឃុំដីឥដ្ឋ ស្រុកកៀនស្វាយ ខេត្តកណ្តាល បញ្ឈប់ពីការងារ បន្ទាប់ពីពួកគេបដិសេធធ្វើការបន្ថែមម៉ោងនោះ ត្អូញត្អែរថា ពួកគេរងភាពអយុត្តិធម៌។ ពួកគេយល់ថា ក្រុមហ៊ុននេះ គំរាមកំហែង និងបង្ខិតបង្ខំកម្មករធ្វើការហួសកម្លាំង។
កម្មកររោងចក្រផ្លររីស លោក នី សល់ ប្រាប់ទូរទស្សន៍អាស៊ីសេរីថា លោកធ្វើការនៅក្នុងក្រុមហ៊ុននេះរយៈពេលជិត៤ឆ្នាំ ហើយលោកមិនដែលសុំច្បាប់ឈប់សម្រាកសូម្បី១ថ្ងៃ ឬចេញមុនម៉ោងម្តងណាឡើយ។ លោកថា នេះជាលើកទី១សម្រាប់លោកដែលសុំចេញមុនម៉ោង ពោល គឺមិនធ្វើការបន្ថែមម៉ោង ដើម្បីយកពេលវេលា ជូនប្រពន្ធនិងកូនតូច ដើរកម្សាន្តម្តងក្នុងឳកាសបើកប្រាក់ខែ ប៉ុន្តែក្រុមហ៊ុននេះ បែរជាគំរាមលោកថា ប្រសិនបើលោកមិនធ្វើការបន្ថែមម៉ោងទេ ក្រុមហ៊ុននឹងបញ្ឈប់លោកពីការងារ។ លោកអះអាងថា ក្រុមហ៊ុនបានហៅលោកឲ្យបំពេញពាក្យលាឈប់ ប៉ុន្តែលោក មិនព្រមរួចហើយក្រុមហ៊ុនក៏បានបណ្តេញលោកចេញពីម៉ោងការងារនៅម៉ោង៣រសៀល។
លោក នី សល់ ថា លោករងភាពអយុត្តិធម៌ជាខ្លាំង ដែលក្រុមហ៊ុននេះ បង្ខិតបង្ខំកម្មករឲ្យធ្វើការបន្ថែមម៉ោងហួសកម្រិតបែបនេះ និងបញ្ឈប់កម្មករទាំងមិនសមហេតុផល។
លោក នី សល់៖ «គេចេញច្រើនគ្នាបងៗ…ប៉ុន្តែគឺលក្ខណៈគេគំរាមៗអ្នកទាំងអស់ហ្នឹងគេបញ្ឈប់ពួកខ្ញុំទាំង៤នាក់ហ្នឹងទេ។បង្ខិតបង្ខំកម្មករ ឲ្យធ្វើថែមម៉ោង។ ចង់កុំឱ្យមានអញ្ចឹងទៀតណា! កម្មករ កម្មការិនីយើង លំបាករកមានការងារធ្វើអញ្ចឹងណា បងណា… ហើយខ្ញុំមានកូនតូចត្រូវការចិញ្ចឹមដែរ… អញ្ចឹងចង់នៅធ្វើការដែរណា… មានកូនតូចម្នាក់ ទើបបាន ៧ ខែ បងឯងមើល… ហើយឥឡូវគេមកបញ្ឈប់អញ្ចឹងទៀត…»។
ចំណែកកម្មកររោងចក្រ ផ្លររីស ម្នាក់ទៀត វ័យ ១៨ឆ្នាំ លោក តារា ឧត្តម ថ្លែងថា ក្រុមហ៊ុននេះបានបង្ខំឲ្យកម្មករ ធ្វើការបន្ថែមម៉ោងហួសកម្រិតដោយមិនមានការស្ម័គ្រចិត្តពីកម្មករឡើយ។ លោកថា លោក ទ្រាំធ្វើការស្ទើរដួលសន្លប់ អស់កម្លាំង មិនបានសម្រាក និងទាំងខ្លួនឈឺ ក៏មិនហ៊ានឈប់សម្រាក ដោយសារខ្លាចត្រូវគេបញ្ឈប់ពីការងារ។ លោកអះអាងថា លោកធ្វើទាំងថ្ងៃសៅរ៍ និងអាទិត្យ ជួនកាលមួយយប់ទល់ភ្លឺ និងរហូតដល់យប់វិញ ដើម្បីបញ្ចេញការងារ ឲ្យទាន់តាមកំណត់របស់ក្រុមហ៊ុន។ លោកអះអាងថា ក្រុមហ៊ុននេះមិនបានគោរពសិទ្ធិកម្មករ និងអនុវត្តផ្ទុយសិទ្ធិការងារ។
លោក តារា ឧត្តម៖ «ខ្ញុំគិតថារឿងហ្នឹងអត់យុត្តិធម៌ទេ ដោយសារតែគេអត់មានឱ្យតម្លៃខ្ញុំសោះហ្មង! គាត់បង្ខំខ្ញុំមែន… បើខ្ញុំសុំគាត់ស្រួលបួល គាត់យកលេសមកថា ការងារប្រញាប់… ខ្ញុំទទួលស្គាល់ថាការងារប្រញាប់ ប៉ុន្តែខ្ញុំចង់បានពេលវេលាខ្លះសម្រាប់ការសម្រាកដែរ។ ខ្ញុំឈឺ… ខ្ញុំធ្វើការទាំងឈឺ… មិនហ៊ានឈប់ទេ ខ្លាចដាច់លុយអញ្ចឹងណា! អស់កម្លាំង អស់អី… ឬក៏ធ្វើការបណ្តើរ ងក់បណ្តើរក៏មាន… ពិបាកក្នុងខ្លួន»។
ទូរទស្សន៍អាស៊ីសេរីបានទាក់ទងទៅខាងក្រុមហ៊ុន ផ្លររីស ហ្គាម៉ិន ដើម្បីឆ្លើយបំភ្លឺចំពោះការលើកឡើងនេះ ប៉ុន្តែខាងក្រុមហ៊ុនបដិសេធមិនធ្វើការបកស្រាយអ្វីទាំងអស់ និងបានចុចបិទទូរស័ព្ទ។ ចំណែកអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា មិនបានលើកទូរស័ព្ទឡើយ។
ប្រធានសហព័ន្ធសហជីពកម្ពុជា (CATU) អ្នកស្រី យ៉ាង សុភណ្ឌ មានប្រសាសន៍ថា ប្រសិនបើមានករណីដូចការលើកឡើងរបស់កម្មករ នោះរោចក្រកាត់ដេរសម្លៀកបំពាក់នេះបានអនុវត្តផ្ទុយពីលក្ខខណ្ឌការងារ និងរំលោភលើសិទ្ធិកម្មករ។ អ្នកស្រីបន្តថា កម្មករមានសិទ្ធិក្នុងការសម្រេចចិត្តលើការធ្វើការបន្ថែមម៉ោងឬមិនធ្វើ តាមគោលការណ៍ស្ម័គ្រចិត្ត ហើយក្រុមហ៊ុនមិនមានសិទ្ធបញ្ឈប់កម្មករដោយគ្រាន់តែពួកគេមិនធ្វើការបន្ថែមម៉ោងនោះទេ។ លោកស្រីអះអាងថា ការបង្ខិតបង្ខំឲ្យកម្មករធ្វើការហួសកម្លាំងដោយគ្មានថ្ងៃឈប់សម្រាកត្រឹមត្រូវ គឺជាការរំលោភលើច្បាប់ធ្ងន់ធ្ងរ និងផ្ទុយទៅលើអនុសញ្ញាអន្តរជាតិ ដែលកម្ពុជាបានផ្តល់សច្ចាប័ននិងគាំទ្រលើសិទ្ធិរបស់កម្មករ។
អ្នកស្រី យ៉ាង សុភណ្ឌ៖ «ក្នុងករណីដែលមានកើតឡើងបែបហ្នឹង គឺខ្ញុំលើកទឹកចិត្តឱ្យកម្មករនិយោជិតរបស់យើង ត្រូវតែប្តឹងក្រុមហ៊ុន ដើម្បីឱ្យកម្មករនិយោជិតរបស់យើងទទួលបានយុត្តិធម៌ គាត់បានវិលទៅធ្វើការងារវិញ ហើយគាត់បាន… បើសិនជាក្នុងករណីដែលមិនយកគាត់ចូលធ្វើការងារទេ ខ្ញុំគិតថាអាហ្នឹងគឺក្រុមហ៊ុនត្រូវប្រឈមមុខចំពោះផ្លូវច្បាប់។ ចឹងខ្ញុំលើកទឹកចិត្តឱ្យកម្មករនិយោជិតរបស់យើង ទៅប្តឹងក្រុមហ៊ុនក្នុងករណីដែលក្រុមហ៊ុនបានរំលោភបំពានទៅលើច្បាប់ បញ្ឈប់គាត់មិនត្រឹមត្រូវបែបហ្នឹង… ចឹងណា!»។
កម្មកររោងចក្រផ្លររីស ដែលត្រូវក្រុមហ៊ុនបញ្ឈប់នោះ ទទូចស្នើសុំឲ្យក្រសួងការងារជួយពិនិត្យចំពោះករណីរោងចក្របញ្ឈប់កម្មករដោយមិនសមហេតុផល និងចាត់វិធានការចំពោះក្រុមហ៊ុននេះ ព្រមទាំងអនុញ្ញាតឱ្យពួកគាត់អាចត្រឡប់ចូលធ្វើការវិញ៕
