ប្រព័ន្ធផ្សព្វផ្សាយអន្តរជាតិបន្តរាយការណ៍អំពីទីតាំងមជ្ឈមណ្ឌលឆបោកតាមអនឡាញនៅតំបន់អូរស្មាច់ ខេត្តបន្ទាយមានជ័យ ដែលធ្លាប់ស្ថិតក្រោមការគ្រប់គ្រងរបស់ក្រុមអ្នកជំនួញឧកញ៉ាមានទំនាក់ទំនងជិតស្និទ្ធនឹងក្រុមគ្រួសារត្រកូល ហ៊ុន។ ស្របគ្នានេះ តំបន់អូរស្មាច់កម្ពុជាបច្ចុប្បន្ន ក៏ត្រូវបានយោធាថៃឈរជើងកាន់កាប់យ៉ាងរឹងមាំ បន្ទាប់ពីបើកការវាយប្រហារឈ្លានពានបានពីកម្ពុជា។ អ្នកឃ្លាំមើលរិះគន់ថា ការបរាជ័យរបស់រដ្ឋាភិបាលត្រកូល ហ៊ុន ក្នុងការបង្ក្រាបឧក្រិដ្ឋកម្មឆបោកអនឡាញបានធ្វើឱ្យប្រជាជនខ្មែរទាំងមូលរងភាពអាម៉ាស់លើឆាកអន្តរជាតិ និងថែមទាំងបង្កើតឱកាសឱ្យភាគីថៃប្រើលេស ដើម្បីឈ្លានពានទឹកដីកម្ពុជា។
ទីភ្នាក់ងារសាព័ត៌មានរ៉យទ័រ (Reuters) នៅថ្ងៃទី១៥ ខែកក្កដា បានចេញផ្សាយរបាយការណ៍ស៊ើបអង្កេតមួយដោយបង្ហាញពីទីតាំងអគារមជ្ឈមណ្ឌលឆបោកតាមអនឡាញនៅតំបន់អូរស្មាច់ដែលមានម្ចាស់កម្មសិទ្ធិគ្រប់គ្រងដោយអ្នកជំនួញខ្មែរមានងារជាអ្នកឧកញ្ញាគឺលោក លឹម ហេង។ របាយការណ៍នោះក៏បានរៀបរាប់ និងបង្ហាញភស្តុតាងទិដ្ឋភាពខាងក្នុងអគារនៃក្រុមហ៊ុន រ៉ូយ៉ាល់ ហៀល (Royal Hil) របស់លោក លឹម ហេង ដែលត្រូវបានកែប្រែជាជាស្ថានីយប៉ូលិសក្លែងក្លាយ ការិយាល័យធនាគារជាច្រើន និងបន្ទប់បុគ្គលិកអង្គុយធ្វើការងារឆបោកតាមអនឡាញទៅលើជនរងគ្រោះនៅជុំវិញពិភពលោក។
របាយការណ៍ស៊ើបអង្កេតរបស់ទីភ្នាក់ងារសារព័ត៌មាន រ៉យទ័រ (Reuters) បានរកឃើញថា ក្រុមហ៊ុន លឹម ហេង គ្រុប (Lim Heng Group) របស់អ្នកឧកញ៉ា លឹម ហេង បានចុះកិច្ចព្រមព្រៀងជួលអគារចំនួន ៣ ក្នុងនោះក៏មានអគារកាស៊ីណូ រ៉ូយ៉ាល់ ហៀល (Royal Hill Casino Resort) នៅតំបន់អូរស្មាច់ទៅឱ្យជនជាតិចិន តាំងពីខែមីនា ឆ្នាំ២០២៤ ក្នុងតម្លៃជួលចំនួន ២០ម៉ឺនដុល្លារអាមេរិកក្នុងមួយខែ។
ទោះជាយ៉ាងណា ទីភ្នាក់ងារសារព័ត៌មានរ៉យទ័រមិនបានរកឃើញភស្តុតាងណាមួយដែលបង្ហាញថា ក្រុមហ៊ុន លឹម ហេង គ្រុប (Lim Heng Group) ជាប់ពាក់ព័ន្ធដោយផ្ទាល់នៅក្នុងការជួញដូរមនុស្ស និងធ្វើប្រតិបត្តិការឆបោកតាមអនឡាញនៅតំបន់អូរស្មាច់ឡើយ។ យោធាថៃ បានហៅភ្នាក់ងារសារព័ត៌មានអន្តរជាតិមួយនេះចុះទៅថតទិដ្ឋភាពអគារនៅតំបន់អូរស្មាច់តាំងពីអំឡុងខែមីនា បន្ទាប់ពីបើកការវាយប្រហារឈ្លានពានបានកាលពីចុងឆ្នាំ២០២៥។
រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានប្រាប់ទីភ្នាក់ងារសារព័ត៌មានរ៉យទ័រថា របាយការណ៍កិច្ចសន្យាជួលអគារទាំងនោះគឺជារឿងមិនពិត និងថ្កោលទោសប្រទេសថៃចំពោះការវាយប្រហារឈ្លានពានលើហេដ្ឋារចនាសម្ពន្ធស៊ីវិលកម្ពុជា។
ទាក់ទងនឹងរឿងដែរ ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់ (CENTRAL) លោក ឌី ថេហូយ៉ា ចាត់ទុកការដឹកនាំរបស់ក្រុមយោធាថៃនាំអ្នកសារព័ត៌មានចូលដែនអធិបតេយ្យកម្ពុជានេះគឺជាទង្វើខុសច្បាប់។ លោកថា ថ្វីត្បិតទីតាំងអូរស្មាច់ធ្លាប់រងការចោទប្រកាន់ពាក់ព័ន្ធអំពើឆបោកតាមអនឡាញក៏ដោយ ប៉ុន្តែរាល់ភស្តុងដែលបង្ហាញចុងក្រោយគឺទំនងកើតចេញពីការរៀបចំដោយយោធាថៃ និងពុំមានការផ្ទៀងផ្ទាត់ជាក់ស្ដែងណាមួយនៅឡើយ។
លោក ឌី ថេហូយ៉ា ស្នើឱ្យរដ្ឋាភិបាលកម្ពុជាថ្កោលទោសចំពោះការបង្ហាញភស្ដុតាងដែលកើតចេញពីអំពើឈ្លានពានរបស់យោធាថៃ។ ទន្ទឹមគ្នានេះ លោកក៏ទាមទារឱ្យអាជ្ញាធរកម្ពុជាបើកការស៊ើបអង្កេតចំពោះអ្នកដែលពាក់ព័ន្ធជួលអគារឱ្យឧក្រិដ្ឋជនដំណើរការអំពើឆបោកតាមអនឡាញ ដើម្បីរួមចំណែកស្ដារមុខមាត់កម្ពុជាដែលកំពុងរងភាពអាម៉ាស់នៅលើឆាកអន្តរជាតិ។ «»
អគារកាស៊ីណូ រ៉ូយ៉ាល់ ហៀល (Royal Hill Casino Resort) របស់លោក លឹម ហេង នៅតំបន់អូរស្មាច់ ស្ថិតនៅមិនឆ្ងាយពីតំបន់រមណីយដ្ឋានអូរស្មាច់របស់លោក លី យ៉ុងផាត់ ឡើយ។ ផ្នែកខ្លះនៃសំណង់អគារកាស៊ីណូនៅតំបន់នោះត្រូវបានយោធាទម្លាក់គ្រាប់បែកកម្ចេចកាលពីអំឡុងសង្គ្រាមឈ្លានពានកម្ពុជាលើកទី២ ក្នុងខែធ្នូ ឆ្នាំ២០២៥។ មុនយោធាថៃទម្លាក់គ្រាប់បែកអគារកាស៊ីណូ រ៉ូយ៉ាល់ ហៀល របស់លោក លឹម ហេង និងតំបន់រមណីយដ្ឋានអូរស្មាច់របស់លោក លី យ៉ុងផាត់ ត្រូវបានរាយការណ៍ថា ជាសម្បុកឧក្រិដ្ឋជនឆបោកតាមអនឡាញ និងជាទីកន្លែងរំលោភសិទ្ធិមនុស្សដ៏អាក្រក់។ ក្រៅពីនេះ ក្រុមឧក្រិដ្ឋជនបានល្បួងបោកបញ្ឆោតជនរងគ្រោះ និងជួញដូរពួកគេពីកន្លែងមួយទៅកន្លែងមួយ និងបង្ខាំងធ្វើទារុណកម្ម ដើម្បីបង្ខំឱ្យធ្វើការឆបោកតាមអនឡាញ។
បច្ចុប្បន្នតំបន់អគារកាស៊ីណូ រ៉ូយ៉ាល់ ហៀល (Royal Hill Casino Resort) របស់លោក លឹម ហេង និងតំបន់រមណីយដ្ឋានអូរស្មាច់របស់លោក លី យ៉ុងផាត់ ត្រូវបានបោះបង់ចោល បន្ទាប់ពីយោធាថៃបានឈ្លានពានចូលកាន់កាប់។ ចាប់តាំងពីដើមឆ្នាំ២០២៦ មក ក្រុមយោធាថៃបានដឹកនាំក្រុមអ្នកសារព័ត៌មានអន្តរជាតិដោយឯកតោភាគីចូលដែនអធិបតេយ្យកម្ពុជាដោយខុសច្បាប់ ដើម្បីឱ្យចូលលុកលុយ និងលាតត្រដាងពីទីតាំងមជ្ឈមណ្ឌលឆបោកតាមអនឡាញនៅតំបន់អូរស្មាច់៕
