ដីសមូហភាពរបស់ជនជាតិដើមភាគតិច នៅស្រុកអូររាំង ខេត្តមណ្ឌលគិរី រាប់សិបហិកតារ រងការរំលោភយកពីឈ្មួញមានលុយមានអំណាច ខណៈដីស្រែចម្ការទាំងនោះ ពលរដ្ឋបានចុះបញ្ជី និងប្រកាសថា ជាដីសមូហភាពរបស់ជនជាតិដើមភាពតិចអាស្រ័យផល បែបទំលៀមលំលាប់ប្រពៃណី។ មន្ត្រីសង្គមស៊ីវិល យល់ឃើញថា ក្រុមឈ្មួញ និងអាជ្ញាធរ មិនគួរនាំគ្នាធ្វើបាបពលរដ្ឋដែលជាជនជាតិដើមភាគតិចនោះឡើយ។
ពលរដ្ឋរស់នៅភូមិពូឡេះ ឃុំដាក់ដាំ ស្រុក អូររាំង ខេត្តមណ្ឌលគិរី អះអាងថា កាលពីថ្ងៃទី០៥ ខែកក្កដា កន្លងទៅ មានក្រុមឈ្មួញបានដាក់គ្រឿងច្រកឈូសឆាយ និងហ៊ុមព័ទ្ធ រំលោភយកដីរបស់ប្រជាពលរដ្ឋរាប់សិបហិកតារ ខណៈដីស្រែចម្ការទាំងនោះ ពលរដ្ឋបានចុះបញ្ជីជាដីសមូហភាព និងបានប្រកាសជាសាធារណៈ។ នៅពេលថ្មីៗស្រាប់តែមានក្រុមឈ្មួញបានហ៊ុមព័ទ្ធរបងយក ដោយសំអាងថា ពួកគេបានទិញដីទាំងនោះ និងមានអាជ្ញាធរមូលដ្ឋានដឹងឮទៅវិញ។
តំណាងពលរដ្ឋ និងម្ចាស់ដីម្នាក់សុំមិនបញ្ចេញឈ្មោះ ដោយបារម្ភពីសុវត្ថិភាព អះអាងប្រាប់ទូរទស្សន៍អាស៊ីសេរី នៅថ្ងៃទី៧ ខែកក្កដា ថា ក្រុមឈ្មួញទាំងនោះរំលោភយកដីរបស់សហគមន៍ទាំងបំពាន ខណៈពលរដ្ឋឲ្យបង្ហាញមុខអ្នកដែលឈរឈ្មោះ លក់ដីសមូហភាពរបស់ពលរដ្ឋ ប៉ុន្តែមិនក្រុមឈ្មួញទាំងនោះ មិនបង្ហាញអត្តសញ្ញាណនោះឡើយ។ តំណាងពលរដ្ឋរូបនេះ អះអាងទៀតថា ដីស្រែចម្ការដែលមានជម្លោះនេះ ពលរដ្ឋបានហាមឃាត់ឈ្មួញមិនឲ្យឈូសឆាយ និងព័ទ្ធរបងចំនួន៣លើកមកហើយ ប៉ុន្តែក្រុមឈ្មួញមិនស្ដាប់នោះទេ។ តែយ៉ាងណាលោកថា ពលរដ្ឋនឹងធ្វើតាមនីតិវិធីច្បាប់។
តំណាងពលរដ្ឋ និងម្ចាស់ដីម្នាក់សុំមិនបញ្ចេញឈ្មោះ៖ «គាត់ថា ដីនេះមានគេលក់ហើយ ប៉ុន្តែខ្ញុំថានរណាគេអ្នកលក់ ឈ្មោះអ្វី បុគ្គលមួយណា ប្រាប់គាត់ឲ្យហៅអ្នកលក់នោះ មកតទល់ គាត់មិនព្រមយកមកទៀត ឥឡូវគាត់មកដាក់របង អញ្ចឹងពួកខ្ញុំនៅតែតវ៉ា ឥឡូវពួកខ្ញុំទាំងអស់គ្នាធ្វើតាមនីតិវិធីច្បាប់ ដាក់ពាក្យបណ្ដឹងទៅសាលាឃុំ សាលាស្រុក ដើម្បីឲ្យពួកគាត់ជួយដោះស្រាយ មិនទាន់ដឹងលទ្ធផលទេ ចាំមើលបន្តទៀត»។
លោកបន្ថែមទៀតថា ក្រុមឈ្មួញទាំងនោះ ក៏បានលួងលោម ឲ្យពលរដ្ឋលក់ដីសមូហភាពទាំងនោះទៅឲ្យពួកគេ ប៉ុន្តែម្ចាស់ដីបានបដិសេធមិនព្រមលក់ ពីព្រោះដីស្រែចម្ការទាំងនោះ គឺជាកេរ្តិ៍ដែលពុកម្ដាយចែកឲ្យ ដើម្បីសម្រាប់បង្កបង្កើនផលចិត្តជីវិតទៅថ្ងៃខាងមុខ។ លោកថា នៅជុំវិញតំបន់នោះមានកន្លែងគោរពបូជារបស់ជនជាតិដើរភាគតិច តែងតែធ្វើពិធីសែនព្រេនជារៀងរាល់ឆ្នាំ។
លោករៀបរាប់ទៀតថា នៅមុនឆ្នាំ២០១០ សហគមន៍ស្រុះស្រួលគ្នាខិតខំការពារដីព្រៃ និងព្រៃជំនឿ និងនាំគ្នាធ្វើចម្ការវិលជុំ រស់នៅយ៉ាងមានក្ដីសុខ ប៉ុន្តែមួយរយៈចុងក្រោយនេះ មានពលរដ្ឋខ្លះលោភលន់ និងលុយកាក់ លក់ដីទាំងនោះទៅឲ្យក្រុមឈ្មួញ ប៉ុន្តែពលរដ្ឋមួយចំនួនទៀត មិនព្រមលក់ឡើយ។
ជុំវិញរឿងនេះទូរទស្សន៍អាស៊ីសេរី មិនអាចទាក់ទងអភិបាលខេត្តមណ្ឌលគិរី លោក គង់ គឹមនី ដើម្បីបកស្រាយបានទេ នៅថ្ងៃទី០៧ ខែកក្កដា។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថា ករណីនេះអាជ្ញាធរមូលដ្ឋានត្រូវតែ រកដំណោះស្រាយ ប្រសិនបើមិនមានផលវិជ្ជមាននោះទេ ត្រូវស្នើឲ្យមន្ត្រីជំនាញធ្វើការសម្របសម្រួល និងរកដំណោះស្រាយឲ្យពួកគាត់។ លោកថា អាជ្ញាធរមិនត្រូវអនុញ្ញាតឲ្យភាគីឈ្មួញមានអំណាចឈូសឆាយបំផ្លាញផលដំណាំរបស់ពលរដ្ឋនោះទេ ពីព្រោះអាចមានអំពើហិង្សាកើតឡើង ហើយបញ្ហាមិនអាចបញ្ចប់នោះឡើយ។
លោក យិន ម៉េងលី៖ «បញ្ហាមួយទៀត ប្រសិនបើមានឯកសារ ខាងសហគមន៍គាត់បានចុះបញ្ជីដីធ្លីនៅក្រសួងរៀបចំដែនដី ហើយភាគីម្ខាងទៀតមានប្លង់ ត្រូវធ្វើការស្រាវជ្រាវ ថាភាគីណាដែលចេញប្លង់ឲ្យបង្កឲ្យមានប្លង់ជាន់គ្នា តើប្លង់នេះត្រឹមត្រូវទេ ហើយប្លង់មួយណាត្រឹមត្រូវ ហើយការបង្កប្លង់ពីសូរិយោដីមានអំពើពុករលួយដែរទេ ត្រូវស្រាវជ្រាវឲ្យដល់ឬសគល់ដើម្បីបំបាត់អំពើទាំងអស់នេះ ទើបធ្វើឲ្យបញ្ហាជម្លោះដីធ្លីមានការថយចុះខ្លះដែរពាក់ព័ន្ធនឹងឯកសារនេះ»។
នេះមិនមែនជាករណីទីមួយនោះទេ ដែលក្រុមឈ្មួញមានលុយមានអំណាច រំលោភយកដីស្រែចម្ការរបស់ប្រជាពលរដ្ឋដែលជាជនជាតិដើមភាគតិច ហើយដីស្រែចម្ការទាំងនោះ ភាគច្រើនពលរដ្ឋនាំគ្នាធ្វើចម្ការវិលជុំបែបប្រពៃណីរបស់ជនជាតិដើមភាគតិច។ ក្រៅពីក្រុមឈ្មួញមានលុយមានអំណាចរំលោភយកដីព្រៃ ដីព្រៃជំនឿហើយនោះ បច្ចុប្បន្នក៏មានក្រុមហ៊ុនឯកជនកំពុងរំលោភបំពាន និងគំរាមពលរដ្ឋទាំងនោះមិនឲ្យចេញតវ៉ាថែមទៀត។
ជារៀងរាល់ឆ្នាំទាំងអង្គការជាតិ និងអន្តរជាតិ ដែលធ្វើការងារលើកស្ទួយសិទ្ធិជនជាតិដើមភាគតិច ទទូចឲ្យរដ្ឋាភិបាលយកចិត្តទុកដាក់ការពារទៅលើជនជាតិដើមភាគតិច ជាពិសេសការពារ និងថែរក្សា នូវទំលៀមទំលាប់របស់ពួកគាត់ ដើម្បីកុំឲ្យបាត់បង់ តាមរយៈការថែរក្សាព្រៃឈើ ព្រៃជំនឿ ដីព្រៃសហគមន៍ និងវប្បធម៌ជាដើម៕
