ទេសាភិបាលធនាគារជាតិនៃកម្ពុជា អ្នកស្រី ជា សិរី អះអាងប្រាប់សារព័ត៌មានអន្តរជាតិថា កម្ពុជាក៏ជាជនរងគ្រោះនៃឧក្រិដ្ឋកម្មឆ្លងដែន និងឧក្រិដ្ឋកម្មហិរញ្ញវត្ថុផងដែរ។ មេធនាគារជាតិកម្ពុជារូបនេះក៏បានច្រានចោលការចោទប្រកាន់ និងការរិះគន់នានាដែលថា រដ្ឋាភិបាលមិនបានខិតខំប្រឹងប្រែងគ្រប់គ្រាន់ក្នុងការបង្ក្រាបឧស្សាហកម្មឆបោកតាមអនឡាញនៅកម្ពុជា។
ទេសាភិបាលធនាគារជាតិនៃកម្ពុជា អ្នកស្រី ជា សិរី បានទទួលស្គាល់ថា បញ្ហាឧក្រិដ្ឋកម្មឆបោកតាមអនឡាញ និងឧក្រិដ្ឋកម្មហិរញ្ញវត្ថុពិតជាកំពុងកើតមាននៅកម្ពុជា។ អ្នកស្រីលើកឡើងថា មជ្ឈដ្ឋាននានាមិនគួរទម្លាក់កំហុស ឬដាក់សម្ពាធមកលើកម្ពុជាតែម្នាក់ឯងនោះទេ ព្រោះអ្នកស្រីថា ឧក្រិដ្ឋកម្មឆ្លងដែនទាំងនេះមានលក្ខណៈស្មុគស្មាញ និងជាបញ្ហារួមរបស់សហគមន៍អន្តរជាតិដែលទាមទារឱ្យមានកិច្ចសហប្រតិបត្តិការពីបណ្ដាប្រទេស និងស្ថាប័នពាក់ព័ន្ធជាច្រើន។
អ្នកស្រី ជា សិរី ថ្លែងបែបនេះក្នុងបទសម្ភាសន៍ជាមួយកាសែតជប៉ុន និកគី អេស៊ា (Nikkei Asia) អំឡុងពេលទៅចូលរួមវេទិកា និកគី ហ្វ័រឹម (Nikkei Forum ) ស្ដីពីអនាគតអាស៊ី (Future of Asia) នៅប្រទេសជប៉ុនកាលពីសប្ដាហ៍មុន។
ក្នុងបទសម្ភាសន៍ជាមួយកាសែតជប៉ុន និកគី អេស៊ា (Nikkei Asia) ដែលចុះផ្សាយនៅថ្ងៃទី១៧ ខែមិថុនា អ្នកស្រី ជា សិរី ទទួលស្គាល់ថា ស្ថាប័នធនាគារជាតិកម្ពុជានៅមានបញ្ហាប្រឈមក្នុងការតាមដានលំហូរហិរញ្ញវត្ថុដែលពាក់ព័ន្ធនឹងបណ្ដាញឧក្រិដ្ឋកម្មឆ្លងដែន។ អ្នកស្រីបកស្រាយថា ការប្រើប្រាស់រូបិយប័ណ្ណឌីជីថល (Cryptocurrency) និងបច្ចេកវិទ្យាប្លុកឆេន (Blockchain) បានធ្វើឱ្យប្រតិបត្តិការរបស់ក្រុមឧក្រិដ្ឋជនឆបោកតាមអនឡាញកាន់តែពិបាកតាមដាន និងត្រួតពិនិត្យ។ អ្នកស្រីថា កម្ពុជាចាំបាច់ត្រូវពង្រឹងសមត្ថភាពមន្ត្រីជំនាញ និងបង្កើនកិច្ចសហប្រតិបត្តិការជាមួយប្រទេសដៃគូដែលមានបទពិសោធន៍រួមមានសហរដ្ឋអាមេរិក និងជប៉ុន ដើម្បីបង្ការ និងបង្ក្រាបឧក្រិដ្ឋកម្មទាំងនេះ។
ពាក់ព័ន្ធនឹងរឿងនេះ មន្ត្រីតំណាងរដ្ឋាភិបាលក្រៅប្រទេសរិះគន់ថា ស្ថាប័នធនាគារជាតិនៃកម្ពុជាបានបរាជ័យក្នុងការទប់ស្កាត់ការលាងលុយកខ្វក់ដែលពាក់ព័ន្ធនឹងឧស្សាហកម្មឆបោកតាមអនឡាញ។
អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ ប្រាប់ទូរទស្សន៍អាស៊ីសេរីនៅថ្ងៃទី១៧ ខែមិថុនាថា ការបកស្រាយរបស់អ្នកស្រី ជា សិរី ហាក់ជាការព្យាយាមការពារក្រុមអ្នកមានអំណាច និងក្រុមឧក្រិដ្ឋជនដែលកាងឧស្សាហកម្មឆបោកតាមអនឡាញនៅកម្ពុជា។ លោកអះអាងថា ស្ថាប័នធនាគារជាតិបានដឹងអំពីប្រតិបត្តិការហិរញ្ញវត្ថុរបស់ក្រុមហ៊ុន និងបណ្ដាញមួយចំនួនពាក់ព័ន្ធនឹងការលាងលុយកខ្វក់ បានមកពីអំពើឆបោកតាមអនឡាញរួមទាំងក្រុមហ៊ុន ហួយវ័ន ផេ (Huione Pay) របស់ក្មួយប្រុសប្រធានព្រឹទ្ធសភាលោក ហ៊ុន សែន គឺលោក ហ៊ុន តូ ផងដែរ ប៉ុន្តែលោកថា អាជ្ញាធរពាក់ព័ន្ធមិនបានចាត់វិធានការឱ្យមានប្រសិទ្ធភាពនោះទេ។
លោក គឹម សុខ៖ «ប្រទេសនានានៅជុំវិញពិភពលោក គេមិនបានរើសអើងចំពោះ ប្រទេសណាមួយក្នុងវិធានការចាត់ការឧក្រិដ្ឋកម្មឆបោកអនឡាញជាអន្តរជាតិនោះទេ។ ពួកគេតែងតែ ស្វែងរកកិច្ចសហប្រតិបត្តិការ ដើម្បីកម្ចាត់ឧក្រិដ្ឋកម្មសកលលោកហ្នឹង។ ក៏ប៉ុន្តែនៅកម្ពុជា គេរកឃើញច្បាស់ថា មានឧកញ៉ានៅជុំវិញក្រុមគ្រួសារ ហ៊ុន សមាជិកព្រឹទ្ធសភា មានជាប់ពាក់ព័ន្ធ ទៅក្នុងបណ្ដាញឧក្រិដ្ឋកម្មឆបោកអនឡាញប្រមូលលុយទៅចិញ្ចឹមអំណាចក្រុមគ្រួសារ ហ៊ុន និង គណបក្សប្រជាជនកម្ពុជាទៅទៀត។ នៅពេលដែលគេរកឃើញបែបហ្នឹងគេទាមទារឱ្យមាន កិច្ចសហប្រតិបត្តិការ»។
ធនាគារជាតិនៃកម្ពុជាបានដកអាជ្ញាប័ណ្ណក្រុមហ៊ុន ហួយវ័ន ផេ (Huione Pay) កាលពីឆ្នាំ២០២៤។ ក្រុមហ៊ុននេះមានលោក ហ៊ុន តូ ដែលត្រូវជាក្មួយបង្កើតលោក ហ៊ុន សែន ជាសហប្រធាន។ សហរដ្ឋអាមេរិក និងចក្រភពអង់គ្លេសបានដាក់ទណ្ឌកម្មក្រុមហ៊ុននេះ ដោយសារតែរកឃើញថា ពាក់ព័ន្ធនឹងការលាងលុយកខ្វក់ឱ្យបណ្ដាញឧក្រិដ្ឋកម្មឆបោកតាមអនឡាញ និងក្រុមចោរព័ត៌មានវិទ្យាកូរ៉េខាងជើង ដែលមានទំហំទឹកប្រាក់ប្រមាណ ៤ពាន់លានដុល្លារអាមេរិក។ បច្ចុប្បន្នក៏មានជនរងគ្រោះរាប់រយនាក់បន្តប្រមូលផ្ដុំគ្នាតវ៉ាទាមទារលុយរបស់ខ្លួនមកវិញ បន្ទាប់ពីក្រុមហ៊ុនបានបង្កកយក។
ទេសាភិបាលធនាគារជាតិកម្ពុជាអ្នកស្រី ជា សិរី ប្រាប់កាសែតជប៉ុន និកគី អេស៊ា ថា ស្ថាប័នធនាគារ មិនមានសិទ្ធិអំណាចក្នុងការចុះបង្ក្រាប ឬស៊ើបអង្កេតដោយផ្ទាល់លើករណីឧក្រិដ្ឋកម្មតាមអនឡាញ និងឧក្រិដ្ឋកម្មហិរញ្ញវត្ថុនោះទេ។ អ្នកស្រីអំពាវនាវឱ្យសមត្ថកិច្ច និងអង្គភាពពាក់ព័ន្ធពង្រីកកិច្ចសហប្រតិបត្តិការជាមួយដៃគូអន្តរជាតិ ដើម្បីដោះស្រាយបញ្ហាឧក្រិដ្ឋកម្មឆ្លងដែន។ ជាមួយគ្នានេះ អ្នកស្រីថា ធនាគារជាតិកម្ពុជាក៏បានចាត់វិធានការរឹតបន្តឹងប្រព័ន្ធត្រួតពិនិត្យហិរញ្ញវត្ថុ ដើម្បីកាត់បន្ថយហានិភ័យនៃលំហូរប្រាក់ខុសច្បាប់។
តំណាងមន្ត្រីរដ្ឋាភិបាលក្រៅប្រទេស លោក គឹម សុខ ថ្លែងថា ធនាគារជាតិកម្ពុជាដែលដឹកនាំដោយអ្នកស្រី ជា សិរី មានសមត្ថភាពគ្រប់គ្រាន់ក្នុងការទប់ស្កាត់លំហូរសាច់ប្រាក់ងងឹតរបស់បណ្ដាញឧក្រិដ្ឋជន ប៉ុន្តែដោយសារតែស្ថិតក្រោមឥទ្ធិពលរបស់រដ្ឋាភិបាលត្រកូល ហ៊ុន បានធ្វើឱ្យស្ថាប័នធនាគារជាតិខកខាន ដើម្បីស្វែងរកកិច្ចសហប្រតិបត្តិការជាមួយបណ្ដាប្រទេសធំៗ ដើម្បីចាត់វិធានការមេខ្លោងសំខាន់ៗ រួមទាំងលោក ហ៊ុន តូ៕
