ទាហានថៃបានបង្កសំឡេងផ្ទុះជាច្រើនគ្រាប់ នៅតំបន់អូរស្មាច់ និងអូរខ្លាឃ្មុំ ព្រំដែនខេត្តឧត្តរមានជ័យ បង្កការរំខានដល់ទាហានខ្មែរដែលកំពុងឈរជើង និងដើរល្បាតនៅក្នុងតំបន់នេះ។ ទាហានខ្មែរថា សំឡេងផ្ទុះនេះ ដូចគ្នាទៅនឹងសំឡេងបាញ់កាំភ្លើងវែងប្រភេទ M-16 ដែរ។ ទោះជាយ៉ាងណា ទាហានខ្មែរមិនបានផ្ទុះអាវុធ ឬបាញ់តបតទៅកាន់ភាគីថៃវិញនោះឡើយ។
បន្ទាប់ពីចូលកាន់កាប់តំបន់អូរស្មាច់ អស់រយៈពេលជិតមួយឆ្នាំ ទាហានថៃនៅតែបន្តគំរាមកំហែង និងបង្កើតហេតុការណ៍ផ្សេងៗ ដើម្បីបង្កជម្លោះជាមួយទាហានខ្មែរ គ្មានស្រាកស្រាន្តនោះឡើយ។
ទាហានខ្មែរមួយរូប ដែលកំពុងឈរជើងនៅព្រំដែនខេត្តឧត្តរមានជ័យ បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញឈ្មោះថា នៅរយៈកាលថ្មីៗនេះ ទាហានថៃបានបង្កសំឡេងផ្ទុះជាបន្តបន្ទាប់គ្នា ពោលគឺនៅយប់ថ្ងៃទី៦ ខែសីហា ទាហានថៃបានបង្កសំឡេងផ្ទុះចំនួនជាង២០គ្រាប់ ហើយនៅព្រឹកថ្ងៃបន្ទាប់ ទាហានថៃបានបង្កសំឡេងផ្ទុះប្រហែល១០គ្រាប់បន្ថែមទៀត នៅតំបន់អូរស្មាច់ និងតំបន់អូរខ្លាឃ្មុំ ដែលទាហានថៃបានដណ្ដើមកាន់កាប់ពីកម្ពុជា។ លោកបន្តថា សំឡេងផ្ទុះនេះដូចគ្នាទៅនឹងកាំភ្លើងវែងប្រភេទ M16 ក៏ប៉ុន្តែគិតមកដល់ពេលនេះ ភាគីថៃមិនទាន់ចេញមកបកស្រាយពីមូលហេតុ និងប្រភពនៃសំឡេងផ្ទុះនេះឡើយ។
ទាហានខ្មែររូបនេះបញ្ជាក់បន្ថែមថា នៅតំបន់អូរស្មាច់នេះ ជាញឹកញាប់ទាហានថៃតែងតែបង្ករឿង និងឆ្មក់បាញ់កាំភ្លើងមកលើទីតាំងរបស់ទាហានខ្មែរ ខណៈទាហានខ្មែរបានរក្សាការអត់ធ្មត់ និងគោរពតាមបញ្ជារបស់ថ្នាក់លើ ដើម្បីចៀសវាងការផ្ទុះអាវុធសាជាថ្មី។ លោកបន្ថែមថា ជាទូទៅការផ្ទុះអាវុធ និងបង្កភាពតានតឹងរបស់យោធាថៃ តែងតែកើតឡើងនៅពេលដែលកម្ពុជា បានដឹកនាំក្រុមអនុព័ន្ធយោធាបរទេសចុះទៅសង្កេតការណ៍ នៅទល់មុខទីតាំងរនាំងបន្លាលួសរបស់យោធាថៃ ដែលធ្វើឱ្យយោធាថៃមិនសប្បាយចិត្ត និងបង្កទំនាស់។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងការពារជាតិអ្នកស្រី ម៉ាលី សុជាតា ដើម្បីសុំការបកស្រាយជុំវិញរឿងនេះបានទេ នៅថ្ងៃទី៧ ខែសីហា។
កាលពីថ្ងៃទី២៩ ខែមេសា ក្រសួងការពារជាតិកម្ពុជាបានអះអាងថា ទាហានថៃបានបាញ់កាំភ្លើងប្រភេទ M79 និងប្រភេទ M16ចំនួន ៥លើក សរុបចំនួន៩គ្រាប់ ក្នុងអំឡុងពេលដែលក្រុមអនុព័ន្ធយោធាបរទេស (MACPP) ចុះសង្កេតការណ៍នៅច្រកអូរស្មាច់។ ក៏ប៉ុន្តែយោធាថៃបានអះអាងថា សំឡេងផ្ទុះនេះគឺជាសំឡេងផ្ទុះផាវ ដែលទាហានថៃបានដុតចំនួនបីគ្រាប់ ដើម្បីព្រមានកម្ពុជាកុំឱ្យចូលមកក្បែរតំបន់បន្លាលួសដែលយោធាថៃបានដាក់ពង្រាយ។ ក៏ប៉ុន្តែទាហានខ្មែរបានអះអាងថា ស្នូរផ្ទុះនេះ គឺជាសំឡេងបាញ់កាំភ្លើងវែង។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ជំរុញឱ្យក្រសួងការពារជាតិ ដាក់លិខិតតវ៉ាទៅកាន់យោធាថៃ ដើម្បីឱ្យភាគីថៃបកស្រាយពីមូលហេតុនៃសំឡេងផ្ទុះនេះ។ លោកបន្តថា ក្នុងអំឡុងពេលដែលកម្ពុជា និងថៃកំពុងអនុវត្តបទឈប់បាញ់ដ៏ផុយស្រួយ សំឡេងផ្ទុះនៅតំបន់ព្រំដែនអាចនឹងក្លាយដើមចមនៃការប្រឈមមុខដាក់គ្នា និងបង្កើនភាពតានតឹងនៅក្នុងតំបន់។
លោក ម៉ែន ណាត៖ «យើងជាភាគីរងគ្រោះ រឿងអីដែលយើងត្រូវលាក់ព័ត៌មាន យើងត្រូវតែបង្ហាញ ឱ្យសាធារណជនដឹង ឱ្យពិភពលោកបានដឹង ទាំងអ្នកការទូត ទាំងអង្គការអន្តរជាតិ ទាំងបណ្ដាញសារព័ត៌មានក្នុងស្រុកក្រៅស្រុកអី ត្រូវតែឱ្យដឹងឱ្យទូលំទូលាយ អាហ្នឹងបានអាចមានទឹកមាត់ប្រៃក្នុងការទប់ស្កាត់ថៃមួយចំណែក។ ហើយកាលណាលាក់ទៅវាធ្វើឱ្យយើងខាតបង់ វាបាត់ព័ត៌មាន»។
យោធាថៃបានចូលកាន់កាប់ក្នុងតំបន់ច្រកព្រំដែនអន្តរជាតិអូរស្មាច់ ដោយចូលជ្រៅក្នុងទឹកដីកម្ពុជាប្រមាណជាង៤រយម៉ែត្រ ក្រោយបទឈប់បាញ់កាលពីថ្ងៃទី២៧ ខែធ្នូ ២០២៥។ ក្រោយការចូលកាន់កាប់ខុសច្បាប់នេះយោធាថៃបានរាយបន្លាលួស ព័ទ្ធយកប៉ុស្តិ៍នគរបាល ការិយាល័យអន្តោប្រវេសន៍ អាគារកាស៊ីណូ និងទីប្រជុំជនរបស់កម្ពុជា ជាច្រើនទីតាំង។
បច្ចុប្បន្នទាហានថៃបានកាយប្រឡាយ និងរាយបន្លាលួសព័ទ្ធយកភូមិឋាន និងដីស្រែចម្ការ របស់ពលរដ្ឋខ្មែរជាច្រើនទីតាំងបន្ថែមទៀត មានដូចជា ភូមិអូរស្មាច់ ភូមិអូរខ្លាឃ្មុំ និងភូមិរួតចំប៉ី ជាដើម។ តាមការប្រកាសរបស់យោធាថៃនាពេលកន្លងមក បានអះអាងថា យោធាថៃនឹងដាក់ពង្រាយកម្លាំង ដើម្បីគ្រប់គ្រងតំបន់ទាំងនេះជាអចិន្ត្រៃយ៍ គឺមិនមែនកាន់កាប់តែក្នុងអំឡុងការអនុវត្តបទឈប់បាញ់ដែលភាគីថៃ បានឯកភាពគ្នាជាមួយកម្ពុជានៅលើក្រដាសនោះឡើយ។
អ្នកឃ្លាំមើលលើកឡើងថា សកម្មភាពរបស់យោធាថៃ ប្រៀបបានទៅនឹងការហែកចោលកិច្ចព្រមព្រៀងបទឈប់បាញ់ជាលើកទី២ និងជាការឈ្លានពានកម្ពុជា ដោយមិនចាំបាច់ធ្វើសង្គ្រាម៕
