ក្រុមអ្នកឃ្លាំមើលថា សាររំលែកទុក្ខរបស់ប្រធានព្រឹទ្ធសភា ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ចំពោះមរណភាពម្ដាយរបស់ លោក កឹម សុខា គ្រាន់តែជាការធ្វើបំពេញកិច្ចផ្នែកសីលធម៌ប៉ុណ្ណោះ ប៉ុន្តែ មិនពាក់ព័ន្ធនឹងការបំពេញ តួនាទីនយោបាយដោះស្រាយវិបត្តិនយោបាយជាតិកម្ពុជាទេ ពីព្រោះ លោក ហ៊ុន សែន កំពុងឃុំសេរីភាព នយោបាយរបស់លោក កឹម សុខា ក្នុងពេលលោក កឹម សុខា បាត់បង់ម្ដាយហើយប្រជាពលរដ្ឋ រងការគាបសង្កត់សេរីភាពគ្រប់ទម្រង់។
នៅក្រោយម្ដាយ របស់លោក កឹម សុខា គឺឧបាសិកា សៅ ង៉ែត បានទទួលមរណភាព កាលពីយប់ថ្ងៃទី៨ ខែកក្កដា សាររំលែកទុក្ខជាហូរហែ ផ្ញើជូនចំពោះ ប្រធានគណបក្សសង្គ្រោះជាតិ និង ក្រុមគ្រួសារ។ សាររំលែកទុក្ខទាំងនោះ មកពីមន្ត្រីនិងសកម្មជនគណបក្សសង្គ្រោះជាតិ ប្រជាពលរដ្ឋទូទៅ និង ពីលោក ហ៊ុន សែន ប្រធានព្រឹទ្ធសភា រួមទាំងលោកនាយករដ្ឋមន្ត្រី ហ៊ុន ម៉ាណែត ដែរ។
ក្រុមអ្នកឃ្លាំមើល ពុំមានការសង្ស័យអំពីទឹកចិត្តរំលែកទុក្ខរបស់មជ្ឈដ្ឋានទូទៅ នោះទេ និងថា ពួកគេអាចបង្ហាញសមានទុក្ខពិតប្រាកដ ពីព្រោះ លោក កឹម សុខា ជាជនរងគ្រោះដ៏ធំក្នុងនយោបាយកម្ពុជា ហើយមានទុក្ខបាត់បង់ម្ដាយថែមទៀត ក្នុងពេលលោកមិនទាន់ទទួលបានសេរីភាពនយោបាយនៅឡើយ។ ដោយឡែក អ្នកឃ្លាំមើលថា សាររំលែកទុក្ខរបស់ប្រធានព្រឹទ្ធសភា ហ៊ុន សែន និងលោក នាយករដ្ឋមន្ត្រី ហ៊ុន ម៉ាណែត វិញ គ្រាន់តែជាការបំពេញកិច្ចសីលធម៌ប៉ុណ្ណោះ ប៉ុន្តែ មិនពាក់ព័ន្ធនឹងការបំពេញតួនាទីនយោបាយ សម្រាប់ប្រទេសជាតិនោះទេ ពីព្រោះប្រធានគណបក្សប្រជាជនកម្ពុជា លោក ហ៊ុន សែន កំពុងឃុំសេរីភាព នយោបាយរបស់លោក កឹម សុខា ក្នុងពេលលោក កឹម សុខា បាត់បង់ម្ដាយ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា ប្រាប់ទូរទស្សន៍អាស៊ី សេរី នៅថ្ងៃទី៩ ខែកក្កដា ថា ការផ្ញើសាររំលែកទុក្ខគ្នាទៅវិញទៅមក គឺជាទម្លាប់ល្អ ក្នុងវប្បធម៌ប្រពៃណីខ្មែរ និង ម្យ៉ាងទៀត លោក កឹម សុខា ក៏ធ្លាប់ចូលរួមពិធីបុណ្យ សព លោក ហ៊ុន ណេង ដែលជាបងប្រុសរបស់លោក ហ៊ុន សែន ដែរ ។ យ៉ាងណា លោក ឯម សុវណ្ណារ៉ា ថា ដោយសារលោក ហ៊ុន សែន មានតួនាទីជាប្រធាន ព្រឹទ្ធសភា ដែលជាស្ថាប័នកំពូលរបស់ជាតិ នោះសាររំលែកទុក្ខពីលោក ហ៊ុន សែន ធ្វើប្រជាពលរដ្ឋខ្មែរ ចង់ដឹង ថាតើបានត្រឹមតែចូលរួមរំលែកទុក្ខបាត់បង់ម្ដាយ របស់ លោក កឹម សុខា ឬក៏អាចដោះទុក្ខនយោបាយប្រធានគណបក្សប្រឆាំងដែរ?
លោក ឯម សុវណ្ណារ៉ា៖ «សារំលែកទុក្ខរបស់ប្រធានព្រឹទ្ធសភានេះ ជាតម្លៃមួយធំ ធេងណាស់ ដែលឥទ្ធិពលទៅអ្នកនយោបាយដែលឈរនៅក្រៅរដ្ឋាភិបាល ហើយ ដែលមានសិទ្ធិធ្វើនយោបាយ។ អ៊ីចឹងជាការពញ្ញាក់អារម្មណ៍របស់ពលរដ្ឋខ្មែរដែរថា តើការចែករំលែកទុក្ខហ្នឹង អាចរំលែកបានត្រឹមតែទុក្ខនេះទេ ឬមួយអាចរំលែកទៅ ដល់គេហៅទុក្ខនយោបាយបានដែរ? នេះជាចម្ងល់សម្រាប់ពលរដ្ឋខ្មែរទូទៅ»។
លោក ហ៊ុន សែន និង លោក ហ៊ុន ម៉ាណែត ផ្ញើលិខិតរំលែកទុក្ខជូនលោក កឹម សុខា នៅថ្ងៃទី៩ ខែកក្កដានេះ ដោយបង្ហាញសេចក្ដីក្ដុកក្ដួល និងសោកស្តាយជា ពន់ពេក បន្ទាប់ពីបានទទួលដំណឹងដ៏ក្រៀមក្រំ ពីមរណភាព របស់ឧបាសិកា សៅ ង៉ែត ដែលត្រូវជាម្តាយបង្កើតរបស់លោក កឹម សុខា។ លោក ហ៊ុន សែន សរសេរថា ក្នុងឱកាសប្រកបដោយសមានទុក្ខដ៏ក្រៀមក្រំនេះ លោក និងភរិយា សូមចូលរួមរំលែកទុក្ខ និងសោកស្តាយស្រណោះ អាឡោះអាល័យជាអនេក ជាមួយលោក កឹម សុខា និង ក្រុមគ្រួសារ។
ជាងនេះទៅទៀត លោក ហ៊ុន សែន ថា មរណភាពឧបាសិកា សៅ ង៉ែត គឺជាការបាត់បង់នូវពុទ្ធសាសនិកមួយរូប ដែលមានសទ្ធាជ្រះថ្លាក្រៃលែង ដែលបាន បូជាអស់កម្លាំងកាយចិត្ត ពេលវេលា និង ថវិកា ចូលរួមចំណែកក្នុងការទ្រទ្រង់ និងលើកស្ទួយវិស័យព្រះពុទ្ធសាសនានៅប្រទេសកម្ពុជា។
ប្រធានអង្គការប្រជាធិបតេយ្យខ្មែរ នៅប្រទេសអូស្ត្រាលី លោក ស៊ឹង សែនករុណា លើកឡើងថា ជាការល្អ ដែលក្រុមអ្នកនយោបាយខ្មែរ ក្នុងគណបក្សផ្សេងគ្នា ចេះចែករំលែកទុក្ខគ្នា ហើយសាររបស់លោក ហ៊ុន សែន មានខ្លឹមសារល្អ។ លើសពី នេះ លោក ស៊ឹង សែនករុណា ថា កាន់តែប្រសើរបំផុត ប្រសិនបើលោក ហ៊ុន សែន រំលែកទុក្ខវិបត្តិនយោបាយកម្ពុជា ពីព្រោះ ទាំងលោក ហ៊ុន សែន និង លោក កឹម សុខា សុទ្ធតែជាមេដឹកនាំនយោបាយកំពូលៗរបស់ប្រទេស ដូច្នេះ ការដោះស្រាយបញ្ហាទុក្ខសោករបស់ជាតិ ជារឿងអាទិភាព។
លោក ស៊ឹង សែន ករុណា ប្រាប់ទូរទស្សន៍អាស៊ីសេរី នៅថ្ងៃទី៩ ខែកក្កដា ថា ការដោះស្រាយវិបត្តិនយោបាយរបស់ជាតិ នឹងធ្វើឲ្យប្រជាពលរដ្ឋខ្មែរ មានឱកាស រួចចាកទុក្ខ ហើយប្រទេសជាតិមានកិត្តិយសលើឆាកអន្តរជាតិ ដែលនាំឲ្យកម្ពុជា អាចផ្សះផ្សាបង្រួបបង្រួមសាមគ្គីគ្នា មានសក្ដានុពលកសាងសេដ្ឋកិច្ច និង ពង្រឹង វិស័យការពារជាតិ ដើម្បីថែរក្សាការពារជាតិយើងរួមគ្នា។ លោកថា នេះជាសេចក្ដី ប្រាថ្នាដ៏ទទូចបំផុត របស់ប្រជាពលរដ្ឋខ្មែរ ទាំងក្នុង និងក្រៅប្រទេស។
លោក ស៊ឹង សែនករុណា៖ «អ៊ីចឹងបើសិនជាចេតនាគាត់ចង់បើកនូវលំហ លទ្ធិប្រជាធិបតេយ្យ គាត់មានឱកាសគ្រប់ពេល មិនមែនមានតែត្រឹមឱកាស ក្នុង ពេលបុណ្យសពម្ដាយរបស់លោក កឹម សុខា ហើយយកពេលនឹងមកធ្វើទេ ប៉ុន្តែ បើសិនធ្វើពេលហ្នឹង ក៏ជារឿងមួយ ដែលទាំងប្រជាពលរដ្ឋ និងសហគមន៍អន្តរជាតិគេសាទរ។ ទោះបីក្នុងពេលវេលាណាមួយក៏ដោយ ទាំងរឿងបើកសិទ្ធិសេរីភាព លោក កឹម សុខា ធ្វើនយោបាយ ទាំងរឿងដោះលែងរាល់សកម្មជន នយោបាយ ទាំងអស់ហ្នឹង។ យើងឃើញថា វាជារឿងដែលត្រូវធ្វើ»។
កាលពីថ្ងៃទី២៥ ខែឧសភា លោក កឹម សុខា ត្រូវបានប្រមុខរដ្ឋស្ដីទី លោក ហ៊ុន សែន លើកលែងទោស ឲ្យរួចផុតពីការជាប់ពន្ធនាគារ និង ការជាប់ឃុំក្នុងផ្ទះ ប៉ុន្តែ បន្តបំបិទសិទ្ធិនយោបាយ បន្ទាប់ពីប្រធានគណបក្សសង្គ្រោះជាតិ ជាប់ឃុំឃាំងបាត់ សេរីភាពទាំងស្រុង អស់រយៈពេលជិត ១០ឆ្នាំ ចាប់តាំងពីឆ្នាំ២០១៧មក។ លោក កឹម សុខា កាលនោះ ត្រូវបានលោក ហ៊ុន សែន ដោះលែងជាប់លក្ខខណ្ឌបែបនេះ បន្ទាប់ពីលោក កឹម សុខា បង្ហាញពីភាពក្ដុកក្ដួលប្រាថ្នាទៅមើលថែទាំម្ដាយ ដែល ជរាសម្រាន្តលើកន្ទេល និងមានសុខភាពមិនល្អ។
អ្នកឃ្លាំមើល និងប្រជាពលរដ្ឋខ្មែរ នៅតែចង់ឃើញប្រធានព្រឹទ្ធសភា លោក ហ៊ុន សែន ផ្ដល់សេរីភាពពេញលេញ ដល់លោក កឹម សុខា អ្នកទោសនយោបាយ និងអ្នកទោសមនសិការទាំងអស់ ដើម្បីបើកផ្លូវឲ្យមានការស្ដារស្ថានភាពនយោបាយ កម្ពុជា ឲ្យប្រសើរឡើងវិញ ឆ្ពោះទៅរកការផ្សះផ្សាជាតិ ស្ដារប្រជាធិបតេយ្យ និង កែលម្អការគោរពសិទ្ធិមនុស្ស ឲ្យប្រទេសកម្ពុជាមានកិត្តិយសលើឆាកអន្តរជាតិ និង កសាងកម្លាំងជាតិរួមឲ្យខ្លាំង៕
