អ្នកនាំពាក្យរដ្ឋាភិបាលក្រៅប្រទេស រិះគន់មេដឹកនាំកម្ពុជា ដែលអសមត្ថភាព ទប់ស្កាត់សកម្មភាពឈ្លានពានរបស់យោធាថៃ។ លោកអះអាងថា ទោះបីជាភាគីថៃប្រកាសចង់បានបទឈប់បាញ់អចិន្ត្រៃយ៍ នៅតាមព្រំដែនជាមួយកម្ពុជាក្តី ក៏យោធាថៃ នៅតែបន្តឈ្លានពាន យកទឹកដីខ្មែរជាបន្តបន្ទាប់ ប្រសិនបើគ្មានការទប់ស្កាត់ទេនោះ។ មកទល់ពេលនេះ រដ្ឋាភិបាលលោក ហ៊ុន ម៉ាណែត ហាក់យល់ព្រមតាមការចង់បានរបស់ថៃ ពីព្រោះលោក ហ៊ុន ម៉ាណែត បានដឹងខ្លួនឯងច្បាស់ថា ពុំមានលទ្ធភាពតតាំងជាមួយប្រទេសថៃ ក្រោយពីធ្វើសង្គ្រាមចំនួនពីរលើករួចមក។
ចាប់តាំងពីមានបទឈប់បាញ់ដែលបានចូលជាធរមាន កាលពីថ្ងៃទី២៧ ខែធ្នូ ឆ្នាំ២០២៥មក កងទ័ពថៃនៅតែបន្តចូលមករាយបន្លាលួស ដាក់ទូរកុងតឺន័រ ទន្ទ្រានយកទឹកដីខ្មែរជារៀងរាល់ថ្ងៃ ដែលធ្វើឱ្យទឹកដីខ្មែរថៃដណ្តើមកាន់កាប់បានកើនឡើងរហូតដល់៤៥ទីតាំង។ រីឯរដ្ឋាភិបាល លោក ហ៊ុន ម៉ាណែត មិនបានប្រើកម្លាំងទប់ស្កាត់ទៅនឹងការបន្តឈ្លានពានទឹកដីពីសំណាក់ភាគីថៃនោះទេ គឺបានត្រឹមតែអង្គុយធ្វើការថ្កោលទោសថៃ តែប៉ុណ្ណោះ។
អ្នកនាំពាក្យរដ្ឋាភិបាលឯករាជ្យកម្ពុជា ២៣ តុលា លោក គឹម សុខ បានប្រាប់ទូរទស្សន៍អាស៊ីសេរី ថា នៅក្នុងស្ថានភាពបច្ចុប្បន្ននេះ ភាគីថៃ គឺពិតជាចង់បានបទឈប់បាញ់យូរអង្វែងមួយនៅតាមព្រំដែនកម្ពុជា-ថៃ ពីព្រោះគេបានដណ្តើមយកទឹកដីខ្មែររាប់ម៉ឺនហិកតាររួចទៅហើយ ប៉ុន្តែថៃនឹងមិនប្រគល់ទឹកដីដែលគេបានទន្ទ្រានយកឲ្យកម្ពុជាវិញទេ។ លោកថា ប្រទេសថៃក៏ចង់ឲ្យកម្ពុជា ដោះស្រាយជម្លោះព្រំដែនទ្វេភាគីជានិច្ចដោយមិននាំគ្នាទៅប្តឹងតុលាការអន្តរជាតិរឺក៏សហគមន៍អន្តរជាតិនោះដែរ។
លោក គឹម សុខ បានបន្ថែមឲ្យដឹងទៀតថា រដ្ឋាភិបាលត្រកូល ហ៊ុន នឹងមិនមានអ្វី តបតជាមួយភាគីថៃនោះទេ ដោយសារខ្លាចភាគីថៃកកូរកកាយរឿងបទល្មើសឆបោកតាមអនឡាញ ហើយបើចង់តតាំងជាមួយថៃដោយកំលាំងប្រដាប់អាវុធក៏ទៅមិនរួច ពីព្រោះរដ្ឋាភិបាលត្រកូលហ៊ុន មិនដែលពង្រឹងកម្លាំងកងទ័ពការពារជាតិទេ។
លោក គឹម សុខ៖ «ដូច្នេះដំណើរសាច់រឿងគឺរដ្ឋាភិបាលក្រុមគ្រួសារហ៊ុន នៃលោក ហ៊ុន ម៉ាណែត ហ្នឹង សសៀរសម្របសម្រួលតាមការចង់បានរបស់ថៃហើយ ដែលខ្ញុំនិយាយតាំងពីដើមរៀងមកថា ប្រសិនបើប្រជាពលរដ្ឋខ្មែរនិងយុទ្ធជនខ្មែរមិននាំគ្នាប្តូរក្រុមគ្រួសារហ៊ុន ចេញពីអំណាចដឹកនាំកម្ពុជាទេ គឺជាកំហុសប្រវត្តិសាស្ត្រដ៏ធំនៅក្នុងកាលៈទេសៈនេះ»។
ការអះអាងរបស់អ្នកនាំពាក្យរួបនេះ បន្ទាប់ពីរដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) បានអះអាងប្រាប់សារព័ត៌មានថៃ Khaosod English កាលពីថ្ងៃទី១៣ ខែមីនាថា ភាគីថៃចង់បានបទឈប់បាញ់យូរអង្វែង នៅតាមព្រំដែនកម្ពុជា-ថៃ ហើយសង្ឃឹមថានឹងអាចកសាងទំនុកចិត្ត និងស្ដារទំនាក់ទំនងទ្វេភាគីជាមួយកម្ពុជាឡើងវិញ។
សារព័ត៌មានថៃ Khaosod English បានស្រង់សម្ដី លោក ស៊ីហាសាក់ ភួងកេតកែវ បន្ថែមទៀតថា លោកបានកត់សម្គាល់ថា កម្ពុជាបានលើកបញ្ហាជម្លោះព្រំដែនជាមួយថៃ នៅក្នុងវេទិកាអន្តរជាតិជាច្រើន រួមមានក្រុមប្រឹក្សាសន្តិសុខអង្គការសហប្រជាជាតិ អង្គការយូណេស្កូ និងតុលាការយុត្តិធម៌អន្តរជាតិ (ICJ) ដូច្នេះធ្វើឱ្យការដោះស្រាយបញ្ហាព្រំដែនរវាងប្រទេសទាំងពីរកាន់តែលំបាក។
ទាក់ទៅនឹងបញ្ហានេះ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានសរសេរលើទំព័រហ្វេសប៊ុករបស់លោក នៅថ្ងៃទី១៤ ខែមីនា ថា ការលើកឡើងរបស់លោក ស៊ីហាសាក់ ភួងកេតកែវ គឺ ជាការបោកបញ្ឆោតសហគមន៍អន្តរជាតិ ព្រោះថា ថៃបាន និងកំពុងធ្វើសកម្មភាពបំពានមកលើកម្ពុជា។
យោងតាម ប្រភពពីទាហានខ្មែរ បានអះអាងថា ទាហានថៃបានកំពុងធ្វើសកម្មភាពឈ្លានពានទឹកដីកម្ពុជា។ ជាក់ស្តែងនៅតំបន់អូរស្មាច់ពួកគេបានទន្ទ្រានយកអស់រយៈពេលជាច្រើនខែមកហើយ ដោយពួកគេបានដាក់ពង្រាយកម្លាំងនៅតាមអាគារកាស៊ីណូ និងទីតាំងមួយចំនួន ហើយនៅពេលមានទាហាន ឬប្រជាពលរដ្ឋខ្មែរដើរឆ្លងកាត់ ទាហានថៃនឹងស្រែកគំរាម រហូតដល់មានការបាញ់ប្រហារពីលើអាគារជាច្រើនគ្រាប់ មកលើកងកម្លាំង និងប្រជាពលរដ្ឋខ្មែរទៀតផង។
យ៉ាងណាក៏ដោយ គណបក្សប្រឆាំង បានរកឃើញថា ក្នុងសង្គ្រាម២១ថ្ងៃកន្លងទៅ គឺកម្ពុជា បានបាត់បង់ទឹកដីរហូតដល់ជាង ៤៥ទីតាំង ដែលបណ្តាលឱ្យប្រជាជនខ្មែរជាង ១១ម៉ឺននាក់ បាត់បង់ដីធ្លី ទ្រព្យសម្បត្តិ និងផ្ទះសម្បែង ជាច្រើនកន្លែង៕
