សកម្មជនសង្គមលោក ធី ថន និងសកម្មជននយោបាយ ២នាក់ទៀតស្នើឲ្យតុលាការទម្លាក់បទចោទ និងដោះលែងពួកគាត់ឲ្យមានសេរីភាពវិញ ដោយអះអាងថា ពួកគាត់មិនបានប្រព្រឹត្តបទល្មើស«រួមគំនិតក្បត់» ដូចការចោទប្រកាន់ឡើយ។ សង្គមស៊ីវិល សង្ឃឹមថា តុលាការ នឹងដោះលែងពួកគេឲ្យមានសេរីភាព ខណៈគម្រោងអភិវឌ្ឍន៍តំបន់ត្រីកោណ CLV-DTA ដែលជាដើមចមនាំឱ្យកើតមានបទចោទនោះ រដ្ឋាភិបាលក៏បានលុបចោលរួចហើយដែរ។
មេធាវីការពារក្ដីសកម្មជនសង្គម និងសកម្មជននយោបាយ សង្ឃឹមថា តុលាការនឹងពិចារណា ដោយលើកលែងការចោទប្រកាន់ និងដោះលែងកូនក្ដីឲ្យមានសេរីភាពវិញ។
ការលើកឡើងនេះ បន្ទាប់ពីសាលាដំបូងរាជធានីភ្នំពេញនៅថ្ងៃទី២៧ ខែឧសភា បានបើកសវនាការសំណុំរឿងសកម្មជនសង្គម លោក ធី ថន និងសកម្មជននយោបាយ លោក មាន ចាន់ថុន និងអ្នកស្រី ស៊ឹង គន្ធា ពីបទ «រួមគំនិតក្បត់» ពាក់ព័ន្ធ នឹងគម្រោងតំបន់ត្រីកោណ អភិវឌ្ឍន៍កម្ពុជា ឡាវ និងវៀតណាម។
លោកមេធាវី សឺន ជុំជួន ប្រាប់អ្នកសារព័ត៌មាន បន្ទាប់ពីបញ្ចប់សវនាការថា តុលាការមិនទាន់កំណត់ថ្ងៃប្រកាសសាលក្រមនៅឡើយ ដោយថា នឹងជូនដំណឹងនៅពេលក្រោយ។ លោកស្នើឲ្យ តុលាការទម្លាក់បទចោទប្រកាន់ពីព្រោះភស្តុតាង ដែលចោទប្រកាន់កូនក្ដីពីបទ«រួមគំនិតក្បត់» គឺមានគំលាតឆ្ងាយ មិនដូចការចោទប្រកាន់របស់តំណាងអយ្យការឡើយ។
លោកមេធាវី សឺន ជុំជួន៖ «តាមខ្ញុំជាមេធាវីដែលយើងស្ដាប់យ៉ាងប្រុងប្រយ័ត្ន ហើយមាន ការសួរដេញដោលគ្នាទៅវិញទៅមកហ្នឹង ឃើញថា សកម្មភាពដូចជាមានគម្លាតឆ្ងាយ ហើយហ្នឹង ភស្តុតាងដែលទាក់ទងនឹងបទចោទ។ អ៊ីចឹង វាមិនស្ថិតនៅក្នុងអ្វី ដែលជាបទចោទរបស់តំណាងអយ្យការទេ។ សម្រាប់ខ្ញុំជាមេធាវី ដែលពិចារណា វិភាគទៅលើសំណុំរឿងវិភាគទៅលើភស្តុតាង វិភាគទៅលើអង្គហេតុជាក់ស្ដែង។ អ៊ីចឹងហើយ បានយើងជាមេធាវីស្នើសុំឲ្យតុលាការពិចារណា ដើម្បីឲ្យពួកគាត់រួច ផុតពីបទចោទ…។ ប៉ុន្តែបើសិនពិចារណា អាចឃើញថា ពួកគាត់អាចស្ថិតនៅក្នុងបទល្មើសអ្វីផ្សេង មិនមែនជាបទល្មើសរួមគំនិតក្បត់ទេ សូមឲ្យពិចារណាទៅលើ ចំណុចនេះ ទី១ ស្នើសុំឲ្យពិចារណាទៅលើបទចោទ ទី២ ស្នើសុំឲ្យពិចារណាទៅ លើធាតុផ្សំនៃបទល្មើស»។
លោកមេធាវី សឺន ជុំជួន បន្តថា កូនក្ដីរបស់លោកម្នាក់ គឺលោកស្រី ស៊ឹង គន្ធា កំពុងមានជំងឺលើសឈាម អាចមានគ្រោះថ្នាក់ដល់អាយុជីវិត ពីព្រោះអំឡុងពេលសវនាការនៅថ្ងៃនេះ លោកស្រីឈរស្ទើរតែមិនកើត។
មេធាវី សឺន ជុំជួន៖ «កូនក្ដីខ្ញុំមានម្នាក់ឈ្មោះ ស៊ឹង គន្ធា ក៏គាត់មានវ័យចំណាស់គួរសមដែរ ហើយមានបញ្ហាសុខភាព នៅក្នុងសវនាការសឹងតែឈរមិនបានផង តុលាការអនុញ្ញាតឲ្យគាត់អង្គុយ ដើម្បីផ្ដល់ជាចម្លើយ ឬក៏សំណូមពរអីផ្សេងៗ ដោយសារតែគាត់មានជំងឺលើសឈាម ។ អ៊ីចឹងវាជាហានិភ័យមួយដែរ បើសិនជា យើងទប់ស្កាត់មិនបានទេ វាអាចហានិភ័យដល់ជីវិតរបស់គាត់»។
ឪពុករបស់លោក ធី ថន គឺលោក មឿន ធី លើកឡើងថា ការឃុំខ្លួនកូនប្រុសជិត ២ ឆ្នាំមកនេះ គឺដើម្បីជាការបំបិទសិទ្ធិសេរីភាព មិនឲ្យបញ្ចេញមតិតែប៉ុណ្ណោះ។
លោក មឿន ធី៖ «ការស្នើសុំច្រើនដងហើយ ឡើងសវនាការម្ដង ទៅស្នើសុំម្ដង អ៊ីចឹងទៅគេបដិសេធ ហើយនៅឃុំបន្តៗអ៊ីចឹងទៅ។ អ៊ីចឹងរឿងរ៉ាវ មិនដឹងរឿងអី មួយឲ្យពិតប្រាកដ រឿងអីមួយដែលកំបាំងក្នុងរឿងហ្នឹង អត់បានសម្ដែងថា រឿងនេះ ខុសបទនេះ ដែលពិតប្រាកដអត់មានទេ។ អ៊ីចឹងមានតែការឃុំឃាំងនេះ គ្រាន់តែ បិទមតិកុំឲ្យតវ៉ាតែប៉ុណ្ណឹង»។
លោក ធី ថន គឺជាប្រធានស្ដីទី នៃសមាគមសម្ពន្ធនិស្សិតបញ្ញវន្តខ្មែរ។ លោកត្រូវបានសមត្ថកិច្ចក្រុងភ្នំពេញចាប់ខ្លួន កាលពីខែសីហា ឆ្នាំ២០២៤ និងត្រូវបានចោទ ប្រកាន់ពីបទ «រួមគំនិតក្បត់»តាមមាត្រា៤៥៣នៃក្រមព្រហ្មទណ្ឌ ខណៈសកម្មជននយោបាយលោកស្រី ស៊ឹង គន្ធា និងលោក មាន ចាន់ថុន ត្រូវសមត្ថកិច្ចចាប់ខ្លួន និងបញ្ជូនពីប្រទេសថៃ មកកម្ពុជាកាលពីខែវិច្ឆិកា ឆ្នាំ២០២៤។ ពួកគាត់ ត្រូវបានតុលាការចោទប្រកាន់ពីបទ«រួមគំនិតក្បត់» ដោយសារការបញ្ចេញមតិរិះគន់ពីគម្រោងអភិវឌ្ឍន៍តំបន់ត្រីកោណកម្ពុជា-ឡាវ និងវៀតណាម CLV-DTA។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត ដែលតាមដានសវនាការនេះ លើកឡើងថា សវនាការសួរដេញដោលករណីលោក ធី ថន គឺមិនមានភស្តុតាងដាក់បន្ទុក ឬបានប្រព្រឹត្តដូចការចោទប្រកាន់ឡើយ។
លោក អំ សំអាត៖ «ក្នុងរឿងនេះ គឺយើងសង្ឃឹមថា លោកចៅក្រមនឹងពិនិត្យពិចារណាទៅលើអង្គហេតុ និងអង្គច្បាប់ ហើយនឹងគោលការណ៍ នៃច្បាប់អ្នក ដែលមិនបានប្រព្រឹត្តគឺត្រូវតែរួចខ្លួន។ ទាក់ទងរឿង CLV នេះ បើយើងមើលទៅ កន្លងមក គឺយើងឃើញមានមនុស្សជាច្រើន ដែលជាប់ពាក់ព័ន្ធនឹងរឿង CLVនេះ ត្រូវបានដោះលែងឲ្យមានសេរីភាពវិញហើយហើយបើយើងនិយាយរឿង CLVនេះ ទាំងរដ្ឋសភា រដ្ឋាភិបាល បានសម្រេចដកខ្លួនចេញពី CLVនេះរួច ទៅហើយ។ អ៊ីចឹង អ្នកដែលពាក់ព័ន្ធនឹងរឿង CLV នេះ គួរតែដោះលែងឲ្យមានសេរីភាពដូចគ្នា»។
ទោះបីជាអាជ្ញាធរ ចាប់ខ្លួនសកម្មជនសង្គម និងសកម្មជននយោបាយ ទាក់ទងនឹងគម្រោងអភិវឌ្ឍន៍តំបន់ត្រីកោណកម្ពុជា ឡាវ និងវៀតណាមក៏ដោយ ក្រោយការតវ៉ារបស់ពលរដ្ឋខ្មែរ ទាំងក្នុងនិងក្រៅប្រទេស រដ្ឋាភិបាលលោក ហ៊ុន ម៉ាណែត បានសម្រេច លុបចោលគម្រោងអភិវឌ្ឍន៍ត្រីភាគីនេះវិញ ប៉ុន្តែតុលាការមិនបានដោះលែង អ្នកដែលរិះគន់ពីគម្រោង CLV ឲ្យមានសេរីភាពវិញនោះទេ៕
