ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ចេញសេចក្តីថ្លែងការណ៍ព្រួយបារម្ភអំពីការតម្កល់សេចក្តីសម្រេចផ្តន្ទាទោសប្រធានគណបក្សសង្គ្រោះជាតិ លោក កឹម សុខា ឲ្យជាប់ពន្ធនាគារ២៧ឆ្នាំ និងបន្ថែមទោសមិនឲ្យចេញពីប្រទេសកម្ពុជា៥ឆ្នាំទៀតពីបទក្បត់ជាតិ។
ក្រៅពីនេះ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ក៏ព្រួយបារម្ភការកាត់ទោសបុគ្គល៣៣នាក់ផ្សេងទៀត ដែលជាសកម្មជនកិច្ចព្រមព្រៀងសន្តិភាពទីក្រុងប៉ារី សកម្មជននយោបាយ សកម្មជនសង្គម និងអ្នកប្រើប្រាស់បណ្ដាញសង្គម ឲ្យជាប់ទោសពី១៨ខែដល់២ឆ្នាំ ពីបទញុះញង់ឲ្យមានភាពវឹកវរដល់សន្តិសុខសង្គម។ ការដាក់ទោសទណ្ឌលើមនុស្សទាំង៣៣នាក់នេះ គឺជាប់ពាក់ពន្ធនឹងការបញ្ចេញមតិរឿងគម្រោងអភិវឌ្ឍតំបន់ត្រីកោណកម្ពុជា ឡាវ និងវៀតណាម ឬហៅថា គម្រោងCLV។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក វ៉ូលគើ ធើក (Volker Türk) លើកឡើងក្នុងសេចក្តីថ្លែងការណ៍ចុះថ្ងៃទី១ ឧសភាថា ការផ្តន្ទាទោស និងការកាត់ទោសនេះ មិនអនុលោមទៅតាមច្បាប់អន្តរជាតិស្ដីពីសិទ្ធិមនុស្ស និងមានហានិភ័យធ្វើឲ្យប៉ះពាល់បន្ថែមទៀតទៅលើផលប៉ះពាល់ដែលទទួលរងធ្ងន់ធ្ងររួចទៅហើយ ដោយសារច្បាប់ព្រហ្មទណ្ឌដែលចែងបែបទូលំទូលាយ មិនច្បាស់លាស់ និងការអនុវត្តតាមអំពើចិត្តនៃច្បាប់នេះទៅលើសង្គមស៊ីវិល អ្នកសារព័ត៌មាន និងប្រជាជនទូទៅនៅកម្ពុជា។ បន្ថែមពីនេះ លោក វ៉ូលគើ ធើក លើកឡើងថា លោក កឹម សុខា និងបុគ្គល៣៣នាក់ផ្សេងទៀត គ្រាន់តែអនុវត្តសិទ្ធិសេរីភាពនៃការបញ្ចេញមតិរបស់ពួកគេ។ ការជំនុំជម្រះករណីរបស់ពួកគេ ក៏បង្ហាញឲ្យមានការព្រួយបារម្ភអំពីការរំលោភសិទ្ធិទទួលបាននីតិវិធីត្រឹមត្រូវតាមផ្លូវច្បាប់ និងសិទ្ធិទទួលបានការជំនុំជម្រះដោយយុត្តិធម៌។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ជំរុញឲ្យរដ្ឋាភិបាលកម្ពុជា ធានាថា ការរិះគន់ និងការបញ្ចេញមតិដែលស្របច្បាប់ ត្រូវទទួលបានការការពារ ជាជាងត្រូវបានកំណត់ជាបទល្មើស ដើម្បីធានាដល់លំហសង្គមស៊ីវិល ធានាឯករាជ្យភាពរបស់តុលាការ និងលើកកម្ពស់ការធានាដល់សិទ្ធិទទួលបានការជំនុំជម្រះដោយយុត្តិធម៌។
ជាមួយគ្នានេះ ឧត្តមស្នងការ ក៏អំពាវនាវឲ្យអាជ្ញាធរកម្ពុជា លុបចោលភ្លាមៗនៅសាលដីកាផ្ដន្ទាទោសលោក កឹម សុខា និងត្រូវដោះលែងលោក ព្រមទាំងបុគ្គលផ្សេងទៀតដែលត្រូវបានឃុំខ្លួនតាមអំពើចិត្ត ដោយគ្មានលក្ខខណ្ឌ។
នៅថ្ងៃដដែលនេះ ក្រសួងអឺរ៉ុប និងការបរទេសបារាំង ក៏បានចេញសេចក្តីថ្លែងការណ៍ដោយបង្ហាញការសោកស្តាយចំពោះការសម្រេចតម្កល់សាលក្រមផ្ដន្ទាទោសដាក់ពន្ធនាគាររយៈពេល ២៧ ឆ្នាំ លើលោក កឹម សុខា ដែលជាសកម្មជនការពារសិទ្ធិមនុស្ស និងជាឥស្សរជនឆ្នើមម្នាក់នៃគណបក្សប្រឆាំង នៅក្នុងសវនាការជំនុំជម្រះដំណាក់កាលឧទ្ធរណ៍របស់លោក។
ប្រទេសបារាំង អំពាវនាវដល់អាជ្ញាធរកម្ពុជា ឱ្យគោរពសិទ្ធិមូលដ្ឋានឱ្យស្របទៅតាមការប្តេជ្ញាចិត្តជាអន្តរជាតិរបស់ខ្លួន និងលើកទឹកចិត្តឱ្យមានការពិចារណាលើវិធានការអនុគ្រោះនានា ចំពោះបុគ្គលទាំងឡាយណាដែលកំពុងជាប់ឃុំឃាំងដោយសារតែការអនុវត្តសិទ្ធិមូលដ្ឋានរបស់ពួកគេ ក៏ដូចជាដើម្បីពង្រឹងនីតិរដ្ឋនៅក្នុងប្រទេស។
ដោយឡែក កាលពីម្សិលមិញវិញ ក្រុមអង្គការក្នុងស្រុក អង្គការអន្តរជាតិ ព្រមទាំងស្ថានទូតប្រទេសប្រជាធិបតេយ្យធំៗ ដូចជាអូស្ត្រាលី អង់គ្លេស សហភាពអឺរ៉ុប កាណាដា និងអាល្លឺម៉ង់ជាដើម បានបង្ហាញការខកចិត្តដូចៗគ្នាចំពោះការសម្រេចឲ្យលោក កឹម សុខា បន្តជាប់ទោសទាំងគ្មានកំហុស ព្រមទាំងទាមទារឲ្យលុបចោលការចោទប្រកាន់ និងដោះលែងលោក កឹម សុខា វិញ ដើម្បីផលប្រយោជន៍សេដ្ឋកិច្ច ការវិនិយោគ និងដំណើរការប្រជាធិបតេយ្យពេញលេញ៕
