នៅព្រឹកថ្ងៃទី៦ ខែសីហា សាលាដំបូងរាជធានីភ្នំពេញបានបើកសវនាការលើសំណុំរឿងលោក ជា វុទ្ធី។ ក្នុងអំឡុងសវនាការ ក្រឡាបញ្ជីបានអានចម្លើយរបស់សមត្ថកិច្ច។ ទោះជាយ៉ាងណា ខ្លឹមសារមួយចំនួនដែលត្រូវបានអាន ត្រូវបានលើកឡើងថា មិនពាក់ព័ន្ធនឹងលោក ជា វុទ្ធី ទេ ប៉ុន្តែជាអង្គហេតុដែលទាក់ទងនឹងលោក ធូ វ៉ាឃីម ជាសមាជិកក្នុងក្រុមជជែកពិភាក្សាឯកជន ដែលបានបង្ហោះសារលើបណ្ដាញសង្គម។
ចំពោះលោក ជា វុទ្ធី វិញ លោកគ្រាន់តែជាសមាជិកក្នុងក្រុមពិភាក្សា ឯកជននោះ ហើយមិនបានបញ្ចេញមតិអ្វីឡើយ។ នៅចំពោះមុខអង្គសវនាការ លោកបានបញ្ជាក់ថា ភស្តុតាងដែលតុលាការយកមកប្រើ គឺដកស្រង់ចេញពីការសន្ទនាក្នុងក្រុមពិភាក្សាឯកជន ដែលមានសមាជិកត្រឹមតែបីនាក់ប៉ុណ្ណោះ។ ក្រុមនេះមានអ្នកគ្រប់គ្រង (Admin) ហើយមានតែអ្នកដែលទទួលការអនុញ្ញាតប៉ុណ្ណោះ ទើបអាចចូលរួមបាន។ លោកអះអាងថា នេះជាការសន្ទនាផ្ទៃក្នុង មិនបើកចំហជាសាធារណៈឡើយ។
បន្ទាប់ពីសមត្ថកិច្ចចាប់ខ្លួនលោក ធូ វ៉ាឃីម ទើបការសន្ទនាក្នុងក្រុមពិភាក្សានោះត្រូវបានរកឃើញ។ ក្នុងការសន្ទនានោះ មានឈ្មោះ និងរូបភាពគណនីរបស់លោក ជា វុទ្ធី ផងដែរ ប៉ុន្តែលោកបាននិយាយត្រឹមពីរប្រយោគប៉ុណ្ណោះ គឺថា៖ «អំបិលវាមានរសជាតិប្រៃ។ បើរដ្ឋាភិបាលមិនចង់ពិបាក ឈឺក្បាល ឬវិលមុខទេ ខាងកើតកាត់ឱ្យខាងកើតទៅ ខាងលិចកាត់ឱ្យខាងលិច ចប់បាត់ហើយ»។
លោក ជា វុទ្ធី បានសួរទៅកាន់អង្គសវនាការថា តើលោកបានប្រព្រឹត្តអ្វីខុស? លោកថា ក្នុងនាមជាប្រជាពលរដ្ឋខ្មែរម្នាក់ លោកក៏មានការឈឺចាប់ដូចប្រជាពលរដ្ឋដទៃទៀត នៅពេលប្រទេសថៃឈ្លានពានទឹកដីកម្ពុជា។ លោកគ្រាន់តែបញ្ចេញមតិក្នុងនាមជាពលរដ្ឋម្នាក់ប៉ុណ្ណោះ ហើយយល់ថា រដ្ឋាភិបាលគួរតែលើកទឹកចិត្តដល់ការបង្ហាញទឹកចិត្តស្រឡាញ់ជាតិ មិនមែនបង្ក្រាបប្រជាពលរដ្ឋដែលបង្ហាញការឈឺចាប់ចំពោះការឈ្លានពាននោះទេ។
នៅចុងបញ្ចប់សវនាការ លោក ជា វុទ្ធី បានស្នើសុំឱ្យតុលាការទម្លាក់បទចោទប្រកាន់លើរូបលោក ដើម្បីឱ្យលោកមានសេរីភាព បានត្រឡប់ទៅជួបជុំក្រុមគ្រួសារ និងថែទាំឪពុកម្តាយដែលមានវ័យចាស់ជរា។
ពាក់ព័ន្ធនឹងសំណុំរឿងនេះ លោក យី សុខសាន្ត មន្ត្រីអង្គការសង្គមស៊ីវិល បានលើកឡើងថា បទចោទប្រកាន់លើលោក ជា វុទ្ធី មិនមានធាតុផ្សំនៃបទល្មើសគ្រប់គ្រាន់តាមច្បាប់នោះទេ។ លោកថា មិនមានមាត្រាច្បាប់ណាមួយចែងថា ការនិយាយក្នុងក្រុម Messenger ឯកជនជាបទល្មើសនោះឡើយ។
លោក យី សុខសាន្ត ក៏បានកត់សម្គាល់ថា សមត្ថកិច្ចដែលចូលមកផ្តល់សក្ខីកម្មនៅថ្ងៃសវនាការ មិនបានស្លៀកពាក់ឯកសណ្ឋានទេ ដោយពាក់តែអាវយឺតធម្មតា។ លោកថា សក្ខីកម្មរបស់សមត្ថកិច្ចមានលក្ខណៈរដិបរដុប មិនចាំច្បាស់ទាំងអង្គហេតុ និងអង្គច្បាប់ ហើយហាក់ដូចជាមានការជួយសម្របសម្រួលពីព្រះរាជអាជ្ញា។ នៅពេលខ្លះ ព្រះរាជអាជ្ញាថែមទាំងនិយាយកាត់ និងសួរសំណួរជំនួសសមត្ថកិច្ចទៀតផង។
លោកយល់ថា តុលាការគួរតែជាស្ថាប័នឯករាជ្យសម្រាប់ស្វែងរកយុត្តិធម៌ជូនប្រជាពលរដ្ឋ មិនមែនជាស្ថាប័នដែលផ្តោតតែលើការចោទប្រកាន់នោះទេ។ លោកក៏បានអំពាវនាវកុំឱ្យពង្រីកអង្គហេតុ ឬពង្រីកការចាប់ខ្លួន បើបុគ្គលមិនមានការពាក់ព័ន្ធពិតប្រាកដ។ លោកបន្ថែមថា ការយកការសន្ទនាពីក្រុមពិភាក្សាឯកជនមកធ្វើជាភស្តុតាងសម្រាប់ការចោទប្រកាន់ អាចជាការរំលោភសិទ្ធិឯកជន និងផ្ទុយនឹងគោលការណ៍ច្បាប់។ ប្រសិនបើភស្តុតាងត្រូវបានទទួលដោយរំលោភសិទ្ធិឯកជន ការកាត់សេចក្តីបែបនេះនឹងមិនអាចចាត់ទុកថាមានយុត្តិធម៌បានឡើយ។
សាលាដំបូងរាជធានីភ្នំពេញ គ្រោងនឹងប្រកាសសាលក្រមលើសំណុំរឿងលោក ជា វុទ្ធី នៅថ្ងៃទី១៩ ខែសីហា វេលាម៉ោង ៨:០០ ព្រឹក។
សូមរង់ចាំតានដានព័ត៌មានពិស្ដារក្នុងកម្មវិធីផ្សាយនារាត្រីនេះ…
