សារព័ត៌មានថៃ The Nation បានរាយការណ៍ថា កងទ័ពជើងអាកាសថៃបានប្រើយន្តហោះចម្បាំង វាយប្រហារទីតាំងកងទ័ពកម្ពុជានៅព្រឹកថ្ងៃទី០៨ ខែធ្នូនេះ។
ចំណែកអ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ក៏បានប្រកាសនៅព្រឹកនេះដែរថា កងទ័ពថៃបានប្រើទាំងរថក្រោះ បើកការវាយប្រហារនៅតំបន់អានសេះ រួមទាំងនៅតំបន់ប្រាសាទតាមាន់ធំ ប្រាសាទព្រះវិហារ និងចម្ការចេកជាដើម។
អ្នកនាំពាក្យក្រសួងការពារជាតិកម្ពុជាបានបញ្ជាក់ថា កម្ពុជាបានបន្តអនុវត្តតាមស្មារតីកិច្ចព្រមព្រៀងប្រទេសទាំងពីរ ដើម្បីដោះស្រាយជម្លោះដោយសន្ដិវិធី ស្របតាមច្បាប់អន្តរជាតិ ហើយកងទ័ពកម្ពុជាមិនបានតបតចំពោះការបាញ់ប្រហារពីភាគីកងទ័ពថៃនៅព្រឹកនេះឡើយ ប៉ុន្តែបានជូនដំណឹងទៅក្រុមអ្នកសង្កេតការណ៍អន្តរកាលអាស៊ាន៕
