ចលនាខ្មែរដើម្បីប្រជាធិបតេយ្យ អំពាវនាវដល់រដ្ឋាភិបាលសហរដ្ឋអាមេរិក អ៊ីស្រាអែល និងស៊ុយអែត ផ្អាកការគាំទ្រផ្នែកយោធាជាបន្ទាន់ដល់ប្រទេសថៃ ដើម្បីទប់ស្កាត់ គ្រោះថ្នាក់បន្ថែមទៀតដល់ជនស៊ីវិលស្លូតត្រង់ក្នុងពេលយោធាថៃកំពុងវាយប្រហារឈ្លានពានកម្ពុជា។ ពួកគេក៏ ជំរុញឱ្យប្រទេសទាំងនេះគាំទ្រការស៊ើបអង្កេតអន្តរជាតិឯករាជ្យលើការវាយប្រហាររបស់ថៃដែលបានបណ្តាលឱ្យពលរដ្ឋខ្មែរបាត់បង់ជីវិត រងរបួស និងខូចខាតទ្រព្យសម្បត្តិជាច្រើន។
ញត្តិរបស់ចលនាខ្មែរដើម្បីប្រជាធិបតេយ្យ ដែលចេញផ្សាយនៅថ្ងៃទី២៤ ខែធ្នូ នេះ អំពាវនាវដល់រដ្ឋាភិបាលសហរដ្ឋអាមេរិក អ៊ីស្រាអែល និងស៊ុយអែត ដែលបានផ្គត់ផ្គង់គ្រឿងសព្វាវុធសំខាន់ៗដល់ប្រទេសថៃនាពេលថ្មីៗនេះ ឱ្យចាត់វិធានការ ជាបន្ទាន់ដើម្បីទប់ស្កាត់គ្រោះថ្នាក់បន្ថែមទៀតដល់ជនស៊ីវិលស្លូតត្រង់ ដែលកើតចេញពីការទម្លាក់គ្រាប់បែកពីយន្តហោះចម្បាំងរបស់កងយោធាថៃ។
ចលនាខ្មែរដើម្បីប្រជាធិបតេយ្យ បានលើកឡើងថា រដ្ឋអ៊ីស្រាអែលក្នុងឆ្នាំ២០២៥ បានផ្គត់ផ្គង់ប្រព័ន្ធការពារដែនអាកាស និងមីស៊ីល Barak MX មានតម្លៃប្រហែល១០៧លានដុល្លារអាមេរិកដល់ប្រទេសថៃ ខណៈប្រទេសស៊ុយអែត ក្នុងឆ្នាំ២០២៤ បានផ្គត់ផ្គង់យន្តហោះចម្បាំង Saab Gripen E/F ចំនួនបួនគ្រឿង ដែលមានតម្លៃប្រមាណ ៦០០លានដុល្លារអាមេរិក។ រីឯសហរដ្ឋអាមេរិក ចាប់ពីឆ្នាំ២០០០មក បានអនុញ្ញាតឲ្យប្រទេសថៃធ្វើប្រតិបត្តិការយន្តហោះ ចម្បាំង F-16 ក្រោមកម្មវិធីលក់សព្វាវុធដល់យោធាបរទេស រួមទាំងឧទ្ធម្ភាគចក្រប្រយុទ្ធចំនួន១៦ គ្រឿងមានតម្លៃ១៣៦លានដុល្លារអាមេរិក បូករួមទាំងការធ្វើបច្ចុប្បន្នកម្ម និងការគាំទ្រជាប្រចាំរាប់ ទសវត្សរ៍តទៅមុខទៀត។
នៅក្នុងញត្តិដដែលបានលើកឡើងថា ចំពោះកាតព្វកិច្ចរបស់ប្រទេសផ្គត់ផ្គង់គ្រឿងសព្វាវុធ រដ្ឋអ៊ីស្រាអែល ប្រទេសស៊ុយអែត និង សហរដ្ឋអាមេរិក រួមនឹងប្រទេសផ្គត់ផ្គង់គ្រឿងសព្វាវុធផ្សេងៗទៀត ត្រូវមានការទទួលខុសត្រូវយ៉ាង ច្បាស់លាស់ក្រោមច្បាប់អន្តរជាតិក៏ដូចជាច្បាប់ក្នុងប្រទេសរបស់ខ្លួនក្នុងការបង្ការការប្រើប្រាស់គ្រឿង សព្វាវុធដែលខ្លួនបានផ្គត់ផ្គង់ដើម្បីប្រព្រឹត្ត ឬសម្របសម្រួលដល់ការរំលោភបំពានយ៉ាងស្រួចស្រាល់នានា។
ចលនាខ្មែរដើម្បីប្រជាធិបតេយ្យ ជំរុញឱ្យរដ្ឋាភិបាលប្រទេសទាំងនេះផ្អាកជាបន្ទាន់នូវការគាំទ្រផ្នែកយោធានៅតាមបណ្ដាប្រទេសដែលបង្កគ្រោះថ្នាក់ជាក់ ស្ដែងដល់ជនស៊ីវិលដោយពង្រឹងការអនុវត្តយ៉ាងតឹងរ៉ឹងទៅលើការប្រើប្រាស់ចុងក្រោយ និងការការពារសិទ្ធិមនុស្ស ពីការប្រើប្រាស់សព្វាវុធទាំងអស់ដែលប្រទេសរបស់ខ្លួនបានផ្គត់ផ្គង់។ លើសពីនេះ ពួកគេត្រូវចេញការព្រមានយ៉ាងច្បាស់ថា គ្រឿងសព្វាវុធដែលប្រទេសរបស់ខ្លួនបានផ្គត់ផ្គង់មិន ត្រូវប្រើប្រាស់ក្នុងប្រតិបត្តិការយោធាដែលបង្កគ្រោះថ្នាក់ដល់ជនស៊ីវិលឡើយព្រមទាំងគាំទ្រការស៊ើបអង្កេតអន្តរជាតិឯករាជ្យលើការវាយប្រហារដែលបានរាយការណ៍និងជំរុញឱ្យមានការបន្ធូរបន្ថយភាពតានតឹងជាបន្ទាន់ និងស្វែងរកដំណោះស្រាយដោយសន្តិវិធីតាមមធ្យោបាយការទូត។
ញត្តិដដែល លើកឡើងថា «ការខកខានមិនធ្វើសកម្មភាពដើម្បីទប់ស្កាត់ស្ថានភាពដ៏អាក្រក់នេះនឹងប្រឈមជាមួយនឹងហានិភ័យនៃការរងទុក្ខវេទនារបស់មនុស្សជាបន្តបន្ទាប់ បង្កឲ្យមានអស្ថិរភាពក្នុងតំបន់ និងជាការគប់គិតគ្នារំលោភច្បាប់អន្តរជាតិ»។
អាមេរិក នៅរាជធានីភ្នំពេញ នៅថ្ងៃទី២២ ខែធ្នូ ឆ្នាំ២០២៥។
ក្រៅពីសកម្មភាពរបស់ចលនាខ្មែរដើម្បីប្រជាធិបតេយ្យនៅក្រៅប្រទេស ក្រុមយុវជនខ្មែរនៅក្នុងស្រុក កាលពីថ្ងៃទី២២ ធ្នូ បានប្រមូលគ្នាដាក់ញត្តិទៅកាន់ស្ថានទូតសហរដ្ឋអាមេរិកនៅទីក្រុងភ្នំពេញដើម្បីទាមទារឱ្យអាមេរិករឹតបន្តឹងការប្រើប្រាស់សព្វាវុធរបស់អាមេរិកដោយយោធាថៃ។ យុវជនម្នាក់គឺលោក អ៊ុង សេរីវុទ្ធ ដែលបានចូលរួមដាក់ញត្តិទៅស្ថានទូតអាមេរិកបានឲ្យទូរទស្សន៍អាស៊ីសេរីដឹងនៅថ្ងៃទី២៤ ធ្នូ ថា មន្ត្រីស្ថានទូតអាមេរិកប្រចាំកម្ពុជា បានផ្ដល់ដំណឹងមកលោក នៅថ្ងៃនេះថា មន្ត្រីទូតបានទទួលញត្តិជាផ្លូវការហើយ ព្រមទាំងបានផ្ញើញត្តិនេះដល់រដ្ឋបាលសហរដ្ឋអាមេរិក នៅរដ្ឋធានីវ៉ាស៊ីនតោន ផងដែរ។ លោកសង្ឃឹមថា សំណើរបស់ពួកលោកនឹងបានដល់ដៃប្រធានាធិបតីអាមេរិកលោក ដូណាល់ ត្រាំ។
លោក អ៊ុង សេរីវុទ្ធ៖ «យើងចង់ផ្ញើរសារទាំងអស់នោះទៅកាន់ពិភពលោក ទៅកាន់អន្តរជាតិឲ្យដឹងថា ការពិតកម្ពុជាគឺជាប្រទេសរងគ្រោះពីការឈ្លានពាន ពីការទម្លាក់គ្រាប់ដោយមិនរើសទីតាំង សម្លាប់ពលរដ្ឋស៊ីវិលខ្មែរ»។
ទាក់ទងនឹងការឈ្លានពានរបស់ថៃមកលើកម្ពុជានេះដែរ ស្ថានទូតអូស្ត្រាលីប្រចាំនៅទីក្រុងភ្នំពេញនៅថ្ងៃនេះ បានបង្ហោះសារនៅលើហ្វេសប៊ុករបស់ខ្លួនថា រដ្ឋាភិបាលអូស្ត្រាលីនៅតែមានការព្រួយបារម្ភយ៉ាងខ្លាំងចំពោះការប៉ះទង្គិចយោធារវាងកម្ពុជានិងថៃ ដែលកំពុងបន្តកើតឡើង រួមទាំងការកើនឡើងយ៉ាងឆាប់រហ័សនៃទំហំនិងភាពតានតឹងនៃជម្លោះ ការប្រើប្រាស់អាវុធបំផ្លិចបំផ្លាញធុនធ្ងន់ និងផលប៉ះពាល់ផ្នែកមនុស្សធម៌ដែលកំពុងកើនឡើងចំពោះភាគីទាំងពីរ។
សារស្ថានទូតអូស្ត្រាលី៖ «រដ្ឋាភិបាលអូស្ត្រាលីជំរុញឱ្យភាគីទាំងពីរគោរពយ៉ាងម៉ឺងម៉ាត់នូវកាតព្វកិច្ចរបស់ខ្លួនស្របតាមច្បាប់អន្តរជាតិ កាត់បន្ថយភាពតានតឹង ចាត់វិធានការឱ្យបានឆាប់រហ័សនិងមានប្រសិទ្ធភាពដើម្បីបញ្ឈប់អរិភាព រួមទាំងអនុវត្តសេចក្តីថ្លែងការណ៍រួមទីក្រុងកូឡាឡាំពួរ។ យើងសូមលើកទឹកចិត្តឱ្យភាគីទាំងពីរចូលរួមក្នុងការចរចាដោយស្មារតីស្មោះត្រង់ក្នុងកិច្ចប្រជុំគណៈកម្មាធិការព្រំដែនទូទៅ ដើម្បីសម្រេចបាននូវដំណោះស្រាយយូរអង្វែងនិងសន្តិភាព»។
ក្រសួងការពារជាតិ បានឲ្យដឹងថា នៅថ្ងៃទី២៤ ខែធ្នូនេះ យោធាថៃ បន្តចូលឈ្លានពានកាន់តែជ្រៅ ក្នុងដែនអធិបតេយ្យភាពកម្ពុជា ដោយប្រើយន្តហោះចម្បាំងប្រភេទ T-50 ផលិតនៅប្រទេសកូរ៉េខាងត្បូង (South Korea) ទម្លាក់គ្រាប់បែក សរុប៩គ្រាប់ និងទម្លាក់គ្រាប់បែកចង្កោម នៅភូមិសាស្ត្រស្រុកបាណន់ ខេត្តបាត់ដំបង ស្រុកស្រីស្នំ ខេត្តសៀមរាប និងស្រុកស្វាយចេក ខេត្តបន្ទាយមានជ័យ ដែល មានប្រជាជនស៊ីវិលកំពុងរស់នៅ។ ចំណែកនៅភូមិសាស្ត្រឃុំសំពៅលូន ស្រុកសំពៅលូន រងការបាញ់ផ្លោងប្រមាណ ២៦គ្រាប់ផងដែរ៕
