ក្រសួងការបរទេសកម្ពុជាប្រកាសទទួលស្គាល់ជាលើកដំបូងនៅថ្ងៃទី៣ មករា ថា យោធាថៃបានកាន់កាប់ទឹកដីខ្មែរជាច្រើនកន្លែងដោយខុសច្បាប់អន្តរជាតិ បន្ទាប់ពីរក្សាភាពស្ងៀមស្ងាត់ក្រោយយល់ព្រមទទួលយកបទឈប់បាញ់ជាលើកទី២ កាលពីថ្ងៃទី២៧ ធ្នូ។
លិខិតរបស់ក្រសួងការបរទេសកម្ពុជា បានអះអាងថា យោធាថៃបានវាយសម្រុកដោយគិតទុកជាមុនចូលទន្ទ្រាន កាន់កាប់ និងឈរជើង គ្រប់គ្រងជាក់ស្តែងលើតំបន់នានា ដែលស្ថិតយ៉ាងជាក់ច្បាស់ ក្នុងទឹកដីកម្ពុជា ក្នុងខេត្តចំនួន ៤ រួមមានខេត្តបន្ទាយមានជ័យ មានភូមិព្រៃចាន់ ភូមិជោគជ័យ ភូមិបឹងត្រកួន។ ខេត្តពោធិ៍សាត់ មានតំបន់ភ្លុកដំរី ច្រកអន្តរជាតិថ្មដា (ច្រកជ័យជំនះ)។ ខេត្តព្រះវិហារ មានតំបន់អានសេះ តំបន់តាថាវ និងតំបន់ភ្នំទ្រព្យ។ ចំណែកខេត្តឧត្តរមានជ័យ មានតំបន់អូរស្មាច់ ប្រាសាទខ្នា ប្រាសាទតាក្របី ប្រាសាទតាមាន់ធំ តំបន់ជប់អង្គញ និងតំបន់ចូកគ្រួស។
កម្ពុជាចាត់ទុកទង្វើរបស់យោធាថៃថា ជាសកម្មភាពគឃ្លើនរំលោភដែនអធិបតេយ្យភាពកម្ពុជា និងបំពានច្បាប់អន្តរជាតិ ជាពិសេសកិច្ចព្រមព្រៀងបទឈប់បាញ់ជាលើកទី២ កាលពីថ្ងៃទី២៧ ធ្នូ ២០២៥។
ទោះយ៉ាងណា កម្ពុជាបញ្ជាក់ជំហរថា ខ្លួននឹងមិនទទួលយកខ្សែកំណត់ព្រំដែនណាមួយដែលយោធាថៃ ឈ្លានពានរំលោភយកដោយខុសច្បាប់នោះទេ។ លើសពីនេះ កម្ពុជាក៏បង្ហាញជំហរថា បានប្ដេជ្ញាចិត្តយ៉ាងខ្ជាប់ខ្ជួន ស្វែងរកដំណោះស្រាយជាមួយភាគីថៃដោយសន្តិវិធី និងស្នើឱ្យយោធាថៃដកកម្លាំងចេញពីដែនអធិបតេយ្យកម្ពុជា ដែលទទួលស្គាល់ដោយច្បាប់អន្តរជាតិ។
ក្រោយបទឈប់បាញ់ទាំងពីរលើក ភាគីថៃបានយកលេសឈរជើងលើទឹកដីខ្មែរដែលពួកគេបានឈ្លានពានយ៉ាងកម្រោលដោយខុសច្បាប់។ លើសពីនេះយោធាថៃ តែងថតបង្ហោះរាល់សកម្មភាពនានារបស់ខ្លួន ដូចជា ព័ទ្ធបន្លាលួស ដាក់កុងទឺន័រ លួចទ្រព្យសម្បត្តិ និងដីភូមិ ផ្ទះពលរដ្ឋ និងឈូសឆាយដុតបំផ្លាញសម្ភារៈមួយចំនួន និងគំរាមបាញ់ពលរដ្ឋដែលចង់ចូលទៅផ្ទះរបស់ពួកគេថែមទៀតផង។
សង្គ្រាមឈ្លានពានរបស់យោធាថៃទាំងពីរលើករយៈពេល ២៦ថ្ងៃ បានសម្លាប់ពលរដ្ឋស៊ីវិលកម្ពុជាជាង ៣០នាក់ និងរបួសជិត ១០០នាក់ និងបំផ្លាញហេដ្ឋារចនាសម្ព័ន្ធកម្ពុជាជាច្រើនកន្លែង និងប្រាសាទបុរាណជាដើម៕
ផែនទីដែលក្រសួងការបរទេសបានបង្ហាញពីទីតាំងដែលយោធាថៃបានកាន់កាប់ដោយខុសច្បាប់លើដីខ្មែរ៖
