កម្លាំងសមត្ថកិច្ចចម្រុះបានបាញ់រះជាច្រើនគ្រាប់កាលពីយប់រំលងអធ្រាត្រថ្ងៃទី១៥ ខែមករា នៅក្នុងប្រតិបត្តិការបង្ក្រាបមជ្ឈមណ្ឌលឆបោកតាមអនឡាញដ៏ធំមួយកន្លែងស្ថិតនៅក្នុងស្រុកកំរៀង ខេត្តបាត់ដំបង ដែលបណ្ដាលឱ្យមានមនុស្សរងរបួស។ ក្នុងប្រតិបត្តិការនេះបានធ្វើឱ្យប្រជាពលរដ្ឋរស់នៅក្បែរៗនេះភ័យខ្លាច ហើយជនបរទេសដែលរងការបង្ខាំងខាងក្នុងអគាររាប់រយនាក់ក៏នាំគ្នាសម្រុកចេញទាំងកណ្ដាលយប់។
ស្នូរគ្រាប់កាំភ្លើងរបស់កម្លាំងសមត្ថកិច្ចកាលពីយប់រំលងអធ្រាត្រចូលដល់ថ្ងៃទី១៥ ខែមករា ក្នុងការឆ្មក់ចូលបង្ក្រាបអគារឆបោកតាមអនឡាញស្ថិតនៅស្រុកកំរៀង បានធ្វើឱ្យមេការជនជាតិចិនមួយចំនួនភ័យស្លន់ស្លោបើកឡានទម្លុះរបងអគារដើម្បីរត់គេច។ ទន្ទឹមគ្នានេះ ជនបរទេសចម្រុះជាតិសាសន៍ដែលរងការបង្ខាំងក្នុងអគាររាប់សិបនាក់ក៏នាំគ្នាទម្លុះទ្វារ និងសម្រុកចេញពីទីតាំងនៃមជ្ឈមណ្ឌលអគារអនឡាញទាំងកណ្ដាលអធ្រាត្រ។
ពលរដ្ឋម្នាក់ដែលលក់ដូរនៅទល់មុខអគារអនឡាញចិនគឺលោកស្រី ផាត ណាង ប្រាប់វិទ្យុអាស៊ីសេរីនៅថ្ងៃទី១៥ ខែមករាថា ពេលមានស្នូរគ្រាប់កាំភ្លើងផ្ទុះភ្លាមៗនោះ ជនបរទេសរាប់រយនាក់នាំគ្នាសម្រុកចេញពីអគារទាំងទឹកមុខភ័យខ្លាច ហើយជនជាតិវៀតណាមខ្លះរត់ចេញមកទាំងក្នុងដៃកាន់ដំបង និងដុំថ្ម។ ពលរដ្ឋរូបនេះបញ្ជក់ថា មជ្ឈមណ្ឌលដែលសមត្ថកិច្ចចុះបង្ក្រាបនេះគឺជាអគារឆបោកតាមអនឡាញដែលមានជនបរទេសជាច្រើនធ្វើការនៅខាងអគារដោយមានការយាមកាមយ៉ាងរ៉ឹងតឹងពីសន្តិសុខ ហើយរបងនៅជុំវិញនៃអគារហ៊ុមព័ទ្ធដោយលួសបន្លា។
លោកស្រី ផាត ណាង៖ «គេបាញ់ ៣ដងយប់មិញបានពួកគេសម្រុកចេញមក មានវៀតណាម មានចិន វារត់នៅតាមព្រៃខ្លះ ផ្លូវតូចខ្លះ រត់តាមផ្លូវធំខ្លះ រត់ប្រសាចហ្នឹងឯង។ ខ្លះភ័យខ្លះដើរ ប៉ុន្តែអ្នកខ្លះដូចកាចកាន់ដុំថ្ម តែអ្នកខ្លះភ័យលើកដៃទូលក្បាល។ ខ្ញុំវិញភ័យហ្នឹងឯងឃើញវៀតណាមមានស្រែក វៀតណាមៗកាន់ដុំថ្ម ខ្ញុំភ័យខ្លាចមានបញ្ហាដល់យើងនៅជាប់ផ្លូវ។ អ្នកខ្លះភ័យអ្នកខ្លះខ្លាចកាន់ដៃគ្នារត់ ឃើញគ្នាគាត់ច្រើនពេកភ័យហ្នឹងឯង»។
ពលរដ្ឋឱ្យដឹងទៀតថា កាលពីអំឡុងសង្គ្រាមថៃប្រហារវាយឈ្លានពានកម្ពុជាជនបរទេសទាំងនោះត្រូវបានគេដឹកចេញតាមរថយន្តក្រុងទៅទីកន្លែងថ្មី ប៉ុន្តែក្រោយស្ថានការណ៍ស្ងប់ស្ងាត់ពួកគេក៏ត្រូវបានបញ្ជូនមកបង្ខាំងនៅខាងក្នុងអគារវិញ។ ពលរដ្ឋបញ្ជាក់ទៀតថា ក្នុងប្រតិបត្តិការនេះគឺអាចបណ្ដាលឱ្យមានមនុស្សជាច្រើនរងរបួសដែរ ហើយនៅរសៀលថ្ងៃទី១៥ ខែមករានេះ កម្លាំងសមត្ថកិច្ចក៏បានបញ្ជូនរថយន្តសង្គ្រោះបន្ទន់ចំនួន ៤គ្រឿងចូលក្នុងបរិវេណនៃអគារអនឡាញ។
មជ្ឈមណ្ឌលអគារឆបោកតាមអនឡាញស្ថិតក្នុងភូមិសាស្ត្រស្រុកកំរៀង ខេត្តបាត់ដំបង គឺមានទំហំផ្ទៃដីជាច្រើនហិកតារដែលគេដឹងថា ជាកម្មសិទ្ធិរបស់ជនជាតិចិនដែលបានទិញដីពីអ្នកស្រុក។ ពលរដ្ឋឱ្យដឹងទៀតថា អគារនៅតំបន់នោះចាប់ផ្ដើមសាងសង់ជាបន្តបន្ទាប់ដែលមានកម្ពស់ខ្ពស់ៗ មានបន្លាលួសព័ទ្ធជុំវិញ ហើយថៅកែចិនបានបញ្ជូនជនបរទេសចម្រុះជាតិសាសន៍ឱ្យមកធ្វើការនៅខាងក្នុងអគារតាំងពីដើមឆ្នាំ២០២៥។
ទាក់ទងនឹងរឿងនេះ ស្នងការនគរបាលខេត្តបាត់ដំបងលោក ដាញ់ អេងប៊ុនចាន់ បដិសេធអត្ថាធិប្បាយជុំវិញបញ្ហានេះ ដោយលោកអះអាងថា សមត្ថកិច្ចកំពុងបន្តស៊ើបអង្កេត និងប្រមូលព័ត៌មាន។
ជុំវិញរឿងនេះ អ្នកឃ្លាំមើលលើកឡើងថា ជនបរទេសដែលសម្រុកចេញពីអគារអនឡាញនៅខេត្តបាត់ដំបងនេះ គឺឆ្លុះបញ្ចាំងឱ្យឃើញថា កម្ពុជាបានក្លាយជាជម្រកឧក្រិដ្ឋជនដែលពួកគេបានពង្រីកការកសាងអគារសម្រាប់បង្ខាំងមនុស្ស ដើម្បីបង្ខំឱ្យធ្វើការខុសច្បាប់ស្ទើរតែទូទាំងប្រទេសកម្ពុជា។
អ្នកគ្រប់គ្រងប្រចាំការិយាល័យអង្គការលីកាដូ (LICADHO) នៅខេត្តបន្ទាយមានជ័យលោក អ៊ិន គង់ជិត លើកឡើងថា ជនបរទេសដែលរត់ចេញពីការបង្ខាំងក្នុងអគារអាចជាជនរងគ្រោះនៃអំពើឆបោកតាមអនឡាញ ដោយសារតែឧក្រិដ្ឋជនបានលក់ពួកគេពីមួយកន្លែងទៅមួយកន្លែង។ លោកក៏ស្នើដល់សមត្ថកិច្ចជួយសង្គ្រោះជនរងគ្រោះពិតប្រាកដដោយសារឧក្រិដ្ឋកម្មនេះ និងទាមទារឱ្យចាត់វិធានការតាមផ្លូវច្បាប់លើអ្នកដែលពាក់ព័ន្ធនឹងអំពើឆបោកតាមអនឡាញ។
លោក អ៊ិន គង់ជិត៖ «យើងសុំឱ្យរាជរដ្ឋាភិបាល និងសមត្ថកិច្ចអនុវត្តតាមការប្ដេជ្ញាចិត្តដោយត្រូវបង្ក្រាបអំពើឆបោកតាមអនឡាញ (Scam Online) ឱ្យអស់ហើយត្រូវចាប់មេខ្លោងដែលជាអ្នកបង្កើតមជ្ឈមណ្ឌល ដែលជាអ្នកបង្កហ្នឹងចាប់យកមកផ្ដន្ទាទោសតាមច្បាប់ ហើយប្រសិនជាមិនបានធ្វើឱ្យម៉ឺងម៉ាត់ និងម៉ត់ចត់ទេ បញ្ហាអំពើឆបោកតាមអនឡាញ (Scam Online) វានៅតែកើតមានហើយវាអត់បាត់ទេ»។
រដ្ឋាភិបាលលោក ហ៊ុន ម៉ាណែត អះអាងថា នឹងសម្អាតឧក្រិដ្ឋកម្មអនឡាញក្រោយពេលចាប់បញ្ជូនឧក្រិដ្ឋជន ចេន ហ្ស៊ី (Chen Zhi) ត្រឡប់ទៅប្រទេសចិនវិញកាលពីពេលថ្មីៗនេះ។ យុទ្ធនាការនេះបានធ្វើឱ្យជនបរទេសជាច្រើនបាននាំគ្នាចាកចេញពីតំបន់អគារអនឡាញជាបន្តបន្ទាប់ដូចជានៅតាមតំបន់អគារ ជ្រៃធំខេត្តកណ្ដាល ក្រុងព្រះសីហនុ រាជធានីភ្នំពេញ និងក្រុងប៉ោយប៉ែតជាដើម។ ទោះជាយ៉ាងណា អ្នកធ្វើការអនឡាញឱ្យដឹងថា ជនបរទេសនៅតំបន់ខ្លះត្រូវបានថៅកែចិនជម្លៀសឱ្យទៅធ្វើការនៅកន្លែងផ្សេងដូចជានៅតាមព្រំដែនកម្ពុជាវៀតណាម និងនៅក្រុងបាវិតជាដើម។
យុទ្ធនាការសម្អាតឧក្រិដ្ឋកម្មឆបោកតាមអនឡាញរបស់លោក ហ៊ុន ម៉ាណែត ក៏ត្រូវបានអ្នកឃ្លាំមើលរិះគន់ថា ធ្វើឡើងមិនខុសពីឪពុករបស់លោកគឺលោក ហ៊ុន សែន នោះទេដែលបញ្ជូនសមត្ថកិច្ចទៅបង្ក្រាបនៅតាមទីតាំងអគារអនឡាញ និងចាប់ជនល្មើសតូចតាច ប៉ុន្តែបុគ្គលអ្នកមានអំណាចធំៗដែលពាក់ព័ន្ធនឹងឧក្រិដ្ឋកម្មនេះគឺនៅតែបន្តរស់នៅក្រៅសំណាញ់ច្បាប់ដដែល ដែលអាចឱ្យពួកគេមានឱកាសពង្រីកឧក្រិដ្ឋកម្មឆបោកតាមអនឡាញបន្តទៀតនៅកម្ពុជា៕
