សង្គមស៊ីវិល ពលរដ្ឋ ព្រះសង្ឃ និងមេធាវី ទទូចឱ្យសាលាដំបូងរាជធានីភ្នំពេញពន្លឿនសវនាការលើសកម្មជនកិច្ចព្រមព្រៀងសន្តិភាពទីក្រុងប៉ារីសឲ្យឆាប់ចប់ ពីព្រោះគិតចាប់ពីថ្ងៃចាប់ខ្លួនមកដល់ពេលនេះ ពួកគាត់ជាប់ពន្ធនាគារ ប្រមាណ ១៨ខែ ទៅហើយ ខណៈស្ថានទម្ងន់ទោស ដែលពួកគាត់ត្រូវជាប់ពន្ធនាគារ មានរយៈពេល ២៤ខែ ឬ ២ឆ្នាំ។ ការជំរុញនេះធ្វើឡើងបន្ទាប់ពីសាលាដំបូងរាជធានីភ្នំពេញ បានបើកសវនាការសំណុំរឿងសកម្មជន កញ្ញា ភឹង សោភា លោក សាន សិទ្ធ និងលោក ស្រ៊ុន ស្រ៊ន នៅថ្ងៃទី២១ ខែមករា ក្រោមបទ ចោទប្រកាន់«ញុះញង់បង្កឲ្យមាន ភាពវឹកវរធ្ងន់ធ្ងរដល់សន្តិសុខសង្គម»។
នៅក្នុងសវនាការសំណុំរឿងសកម្មជនកិច្ចព្រមព្រៀងទីក្រុងប៉ារីស នៅព្រឹកថ្ងៃទី២១ ខែមករានេះ ចៅក្រមសាលាដំបួងរាជធានីភ្នំពេញបានដាក់បង្ហាញឃ្លីបវីដេអូ ជាង ១១នាទី ដែលលោក ស្រ៊ុន ស្រ៊ន និយាយលើបណ្ដាញសង្គម និងសាកសួរសាក្សី ដោះបន្ទុក រួមទាំង អានសក្ខីកម្មកោសល្យវិច័យ ដែលប៉ូលិសស្រង់យកពីទូរស័ព្ទ របស់ជនជាប់ចោទ។
ក្រៅពីការចាក់បង្ហាញវីដេអូជាង ១១នាទី អំពីក្រុមការងាររបស់លោក ស្រ៊ុន ស្រ៊ន នោះ លោកមេធាវី អែម ចន្ថា ប្រាប់ទូរទស្សន៍អាស៊ីសេរីនៅថ្ងៃទី២១ ខែមករា ថា តុលាការបានកាត់សង្ខេបចម្លើយលោក ស្រ៊ុន ស្រ៊ន ដែលឆ្លើយតបនឹងសំណួរ អ្នកចូលរួម ពាក់ព័ន្ធនឹងគម្រោងអភិវឌ្ឍន៍តំបន់ត្រីកោណជាមួយប្រទេសឡាវ និងវៀតណាម(CLV-DTA) អំឡុងពេលលោកផ្សាយផ្ទាល់លើបណ្ដាញសង្គម។ លោកថា នៅក្នុងវីដេអូ កូនក្ដីរបស់លោកនិយាយទាក់ទងនឹងគុណវិបត្តិ គុណសម្បត្តិ និងដំណោះស្រាយ CLV-DTA។
លោកមេធាវីលើកឡើងថា កូនក្ដីរបស់លោកនៅតែរក្សាជំហរមិនបាន ប្រព្រឹត្តបទល្មើស ដូចការចោទប្រកាន់របស់តុលាការឡើយ ហើយលោកបានស្នើឲ្យចៅក្រមពន្លឿនសវនាការឲ្យបានឆាប់។ លោកថា តុលាការបានឃុំខ្លួនកូនក្ដី របស់លោក រយៈពេល ១៨ខែហើយ ខណៈស្ថានទម្ងន់ទោស ដែលពួកគាត់ត្រូវជាប់ពន្ធនាគារ មានរយៈពេល ២៤ខែ ឬស្មើនឹង ២ឆ្នាំ ហើយលោកអះអាងថា ការឃុំខ្លួនកម្រិតទោសខ្ពស់បំផុតនេះ គឺដូចសន្មតទុកជាមុនថា កូនក្ដីរបស់លោកមានទោសដែលនេះខុសពីគោលការណ៍ច្បាប់។
លោក អែម ចន្ថា៖ «គាត់មិនបានធ្វើការញុះញង់ ហើយបង្កើតជាក្រុមឲ្យចាំទទួលបញ្ជាពីគាត់ ដើម្បីញុះញង់ឬក៏បំផុសបំផុលអីទេ។ អ្វីដែលនៅអង្គហេតុ គឺគាត់ឆ្លើយ សំណួរគេសួរ ហើយគាត់គ្មានគម្រោងអីទេគឺគាត់ឆ្លើយនឹងគាត់ឲ្យមានការ ពិចារណាថាការចូលតំបន់ គម្រោងអភិវឌ្ឍន៍តំបន់ត្រីកោណវាមានផ្ដល់ផលប្រយោជន៍ វាមានផ្ដល់គុណសម្បត្តិ គុណវិបត្តិ ហើយគាត់ក៏ផ្ដល់ដំណោះស្រាយ ចំពោះគុណវិបត្តិដែរ។ គាត់បានបដិសេធថា ទាំងអស់នេះគាត់មិនបានពាក់ព័ន្ធ ទេ»។
អំឡុងពេលសវនាការ នៅខាងក្រៅរបងសាលាដំបូងរាជធានីភ្នំពេញវិញ មានពលរដ្ឋ និងព្រះសង្ឃ បានទៅប្រមូលផ្តុំគ្នាគាំទ្រ និងលើកទឹកចិត្តដល់សកម្មជនកិច្ចព្រមព្រៀងទីក្រុងប៉ារីស កញ្ញា ភឹង សោភា លោក សាន សិទ្ធ និង លោក ស្រ៊ុន ស្រ៊ន។
ព្រះតេជព្រះគុណ លោក រ៉ុន ជីវ៉ា ដែលបានចូលស្ដាប់សវនាការ មានថេរដីកាថា លោក ស្រ៊ុន ស្រ៊ន កញ្ញា ភឹង សោភា និង លោក សាន សិទ្ធិ មិនបានធ្វើខុសច្បាប់ ដូចតុលាការចោទប្រកាន់ឡើយ ពីព្រោះពួកគាត់ គឺជាអ្នកបង្រៀនពលរដ្ឋឲ្យយល់ដឹងពីច្បាប់ ជាពិសេសកិច្ចព្រមព្រៀងទីក្រុងប៉ារីស។ ព្រះតេជព្រះគុណ សំណូមពរឲ្យតុលាការទម្លាក់ចោលបទចោទប្រកាន់ និងដោះលែងពួកគាត់ ឲ្យមានសេរីភាពឡើងវិញ។
ព្រះតេជព្រះគុណ លោក រ៉ុន ជីវ៉ា៖ «សូមឲ្យចៅក្រមលើកលែងការចោទប្រកាន់គាត់ គាត់មិនមានទោសមិនមានអីទេ ក្នុងច្បាប់ គាត់ពន្យល់ទាក់ទងពីច្បាប់ ដំណោះស្រាយ ទាក់ទងនឹងគុណសម្បត្តិ គុណវិបត្តិ។ ទាក់ទងនឹងការបាត់បង់របស់លោកគ្រូ អ្នកគ្រូ វាមានផលប៉ះពាល់ ដើម្បីគាត់បានចេញមក ដើម្បីគាត់បានបង្រៀនច្បាប់ បន្តដើម្បីឲ្យប្រជាពលរដ្ឋមានភាពសកម្មទាំងសកម្មសកម្មភាព ទាំងភូមិឃុំពាណិជ្ជកម្មជាដើម»។
ពលរដ្ឋ លោក សៀប សែនរ៉ុង រៀបរាប់ថា ការឃុំខ្លួនសកម្មជនកិច្ចព្រមព្រៀងទីក្រុងប៉ារីស ធ្វើឲ្យពួកគាត់ជាពលរដ្ឋ មិនបានស្រូបយកចំណេះដឹង ដែលធ្លាប់បានរៀនសូត្រពីការបង្រៀនរបស់ក្រុមលោក ស្រ៊ុន ស្រ៊ន និងកញ្ញា ភឹង សោភា។
លោក សៀប សែនរ៉ុង៖ «កាលនៅគាត់ គាត់បានចែករំលែកខ្ញុំបានសិក្សាបន្ថែម ការផ្សាយរបស់គាត់គឺមួយថ្ងៃ ៣ដង ព្រឹកម៉ោង ៧កន្លះ ៨ កន្លះ ថ្ងៃត្រង់ម៉ោង ១១ ដល់ម៉ោង ១២ ដល់ម៉ោង ១កន្លះ ពេលល្ងាចចាប់ពីម៉ោង៥ ទៅដល់ម៉ោង ៧ ។ អ៊ីចឹងខ្ញុំជាប្រជាពលរដ្ឋខ្ញុំព្យាយាមតាមដាននៅការផ្សាយរបស់គាត់។ ផ្សាយជា ចេតនាឲ្យប្រជាពលរដ្ឋខ្មែរសិក្សាឆ្វេងយល់អំពីច្បាប់ធ្វើជាពលរដ្ឋឯកត្តនាម ពលរដ្ឋ នីតិរដ្ឋ ពលរដ្ឋសកម្ម ការធ្វើភូមិឃុំពាណិជ្ជកម្ម ដើម្បីពង្រឹងសេដ្ឋកិច្ចគ្រួសារ នឹងដែលខ្ញុំបានឆ្វេងយល់សិក្សាពីគាត់»។
សកម្មជនកិច្ចព្រមព្រៀងសន្តិភាពក្រុងប៉ារីសចំនួន ៣នាក់រួមមាន លោក ស្រ៊ុន ស្រ៊ន កញ្ញា ភឹង សោភា និង លោក សាន សិទ្ធិ ត្រូវបានសមត្ថកិច្ចនៃស្នងការដ្ឋាននគរបាល ខេត្តសៀមរាប ចាប់ឃាត់ខ្លួននៅថ្ងៃទី២៣ ខែកក្កដា ឆ្នាំ២០២៤។ ការចាប់ខ្លួននេះ ធ្វើឡើងបន្ទាប់ពីពួកគាត់បាននិយាយអំពីការបញ្ចូលខេត្តចំនួន ៤ របស់ប្រទេសកម្ពុជា ដូចជា ខេត្តរតនគិរី មណ្ឌលគិរី ក្រចេះ និង ខេត្តស្ទឹងត្រែង ទៅក្នុងគម្រោងអភិវឌ្ឍន៍តំបន់ត្រីកោណ ជាមួយប្រទេសឡាវ និង វៀតណាម (CLV-DTA)។ ទោះបីជាអាជ្ញាធរ ចាប់ខ្លួនសកម្មជនទាំង ៣នាក់ ទាក់ទងនឹងការអត្ថាធិប្បាយអំពីគម្រោងអភិវឌ្ឍន៍តំបន់ត្រីកោណនេះក៏ដោយ ក្រោយការតវ៉ារបស់ពលរដ្ឋខ្មែរ ទាំងក្នុងនិងក្រៅប្រទេស រដ្ឋាភិបាលលោក ហ៊ុន ម៉ាណែត បានសម្រេចលុបចោលគម្រោងអភិវឌ្ឍន៍ត្រីភាគីនេះវិញ។
មន្ត្រីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក (Adhoc) លោក គឹម ពិសិដ្ឋ ដែលឃ្លាំមើលសវនាការ បានជំរុញឲ្យតុលាការពន្លឿនសវនាការផ្ដល់យុត្តិធម៌ដល់ជនជាប់ចោទ ខណៈពួកគាត់កំពុងជាប់ពន្ធនាគារអស់រយៈពេល ១៨ខែហើយ។
លោក គឹម ពិសិដ្ឋ៖ «យើងក៏ព្រួយបារម្ភដែរ រយៈពេលនៃការឃុំខ្លួនគាត់ដល់ ១៨ខែទៅហើយ ហើយសេចក្ដីសម្រេចស្ថានទម្ងន់ទោសរបស់គាត់មានតែ ២៤ ខែ។ អ៊ីចឹងវាអាចប៉ះពាល់ដល់សិទ្ធិសេរីភាព។ យើងក៏កំពុងពិចារណាថា តើការជំនុំជម្រះរបស់គាត់ ពិតជាបានទទួលយុត្តិធម៌សម្រាប់គាត់មែនអត់ ពីព្រោះ ១៨ ខែ និង២៤ខែគឺវាកៀកគ្នាមែនទែន»។
អ្នកឃ្លាំមើលលើកឡើងថា រដ្ឋាភិបាលលោក ហ៊ុន ម៉ាណែត បានប្រើប្រាស់ប្រព័ន្ធតុលាការ ដើម្បីចាប់ខ្លួនពលរដ្ឋ សកម្មជនសង្គម និងសកម្មជនគណបក្សប្រឆាំង ដែលមានមតិផ្ទុយដាក់ពន្ធនាគារទាំងអយុត្តិធម៌។
ពួកគាត់ជំរុញឱ្យរដ្ឋាភិបាលត្រកូលហ៊ុន បញ្ឈប់ការធ្វើទុក្ខបុកម្នេញលើអ្នកដែលបញ្ចេញមតិពីបញ្ហាសង្គម នយោបាយ និង បូរណភាពទឹកដី ហើយដោះលែង ពួកគេឱ្យមានសេរីភាពឡើងវិញ ដើម្បីបង្ហាញពីឯកភាពជាតិ ដើម្បីទប់ទល់នឹងបរទេសកំពុងឈ្លានពានទឹកដីកម្ពុជា៕
