ចលនាមាតាធម្មជាតិ បានចោទអាជ្ញាធរពាក់ព័ន្ធនៅខេត្តរតនគិរីថា កំពុងបិទបាំងព័ត៌មានពលរដ្ឋ អំពីអាជីវកម្មរ៉ែមាសរបស់កូនលោក ទ្រី ភាព គឺលោក ទ្រី ដាលុច នៅក្នុងតំបន់ឧទ្យានជាតិវិរៈជ័យ។ ការលើកឡើងនេះ ធ្វើឡើងបន្ទាប់ពីអាជ្ញាធរខេត្តរតនគិរី បានចេញលិខិតបដិសេធ ដោយអះអាងថា ការផ្សព្វផ្សាយព័ត៌មានរបស់ក្រុមចលនាមាតាធម្មជាតិ ជាព័ត៌មានមិនពិត ដោយសាររដ្ឋាភិបាលមិនបានចេញប័ណ្ណកម្មសិទ្ធិឲ្យក្រុមហ៊ុនឯកជនធ្វើអាជីវកម្មរ៉ែមាសនៅតំបន់នេះឡើយ។
ក្រុមចលនាមាតាធម្មជាតិ អះអាងថា អាជ្ញាធរខេត្តរតនគិរី កំពុងកុហកបោកប្រាស់ និងលាក់បាំងព័ត៌មាន ពាក់ព័ន្ធនឹងការធ្វើអាជីវកម្មរ៉ែមាសខុសច្បាប់របស់ក្រុមហ៊ុន លោក ទ្រី ដាលុច ដែលកំពុងធ្វើអាជីវកម្មក្នុងតំបន់ឧទ្យានជាតិវិរៈជ័យ ស្ថិតនៅស្រុកតាវែង ខេត្តរតនគិរី។
អង្គការចលនាមាតាធម្មជាតិ បានបង្ហោះសារឆ្លើយតបនៅលើបណ្ដាញសង្គមហ្វេសប៊ុក កាលពីថ្ងៃទី២០ ខែមករាថា អាជ្ញាធរថ្នាក់ជាតិ និងអាជ្ញាធរមូលដ្ឋាននិយាយខុសគ្នាទាំងស្រុង ពាក់ព័ន្ធអាជីវកម្មរ៉ែមាសនៅក្នុងឧទ្យានជាតិវិរៈជ័យ។ ចលនាមាតាធម្មជាតិ ចាត់ទុកការឆ្លើយតបបដិសេធ របស់អាជ្ញាធរខេត្តរតនគិរី មានភាពលឿនជ្រុល និងមិនបានបញ្ជូនមន្ត្រីទៅចុះសិក្សា និងជជែកពិភាក្សាជាមួយពលរដ្ឋនៅមូលដ្ឋានឲ្យបានច្បាស់លាស់ជាមុន ហើយរបៀបធ្វើការងាររបស់មន្ត្រីទាំងនោះ ជារឿងអាម៉ាស់បំផុត សម្រាប់មន្ត្រីក្នុងជួររដ្ឋាភិបាលរបស់លោក ហ៊ុន ម៉ាណែត។
កាលពីថ្ងៃទី២០ ខែមករា អាជ្ញាធរខេត្តរតនគិរី បានចេញលិខិតច្រានចោលព័ត៌មាន ដែលចលនាមាតាធម្មជាតិ បានផ្សព្វផ្សាយថា ក្រុមហ៊ុនរបស់កូនលោក ទ្រី ភាព កំពុងអនុវត្តសកម្មភាពជីកយករ៉ែមាសនៅក្នុងឧទ្យានជាតិវិរៈជ័យ ហើយបានបំពុលប្រភពទឹកសំខាន់ៗ និងគំរាមកំហែងដល់ជីវិតសហគមន៍មូលដ្ឋាន ជាពិសេសប្រជាពលរដ្ឋ ជនជាតិដើមភាគតិចព្រៅ ក្នុងភូមិតាបូក ស្រុកតាវែង ឃុំតាវែងលើ ខេត្តរតនគិរី ។ ដោយអាជ្ញាធរខេត្តរតនគិរីចាត់ទុកថា ជាព័ត៌មានមិនពិត។
ទោះជាបែបនេះក្ដី ក្រុមចលនាមាតាធម្មជាតិ បានបញ្ជាក់ថា កូនរបស់លោក ទ្រី ភាព ចំនួន៣នាក់ គឺលោក ទ្រី ដាលុច ទ្រី ដាភ័ស្ស និងកញ្ញា ទ្រី ដាលីន ធ្លាប់ជានាយកក្រុមហ៊ុនឈ្មោះ គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (Global Green (Cambodia) Energy Development) ក្រោយមកនៅឆ្នាំ២០២១ ទើបដូរឲ្យឈ្មោះ ហាក់ ស៊ីណាត ចូលកាន់តំណែងជាប្រធានក្រុមប្រឹក្សាភិបាលវិញ។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទង អភិបាលខេត្តរតនគិរី លោក ញ៉ែម សំអឿន និងប្រធានមន្ទីររ៉ែ និងថាមពលខេត្តរតនគិរី លោក អ៊ុង ហួរ ដើម្បីសុំការអត្ថាធិប្បាយបន្ថែមបានទេនៅថ្ងៃទី២០ ខែមករា។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី មានប្រសាសន៍ថា អាជ្ញាធរគួរតែចុះសិក្សាស្រាវជ្រាវឲ្យបានច្បាស់លាស់ និងបើកទូលាយឲ្យអ្នកពាក់ព័ន្ធបានចូលរួម ដើម្បីប្រមូលព័ត៌មានបង្ហាញជាសាធារណៈ កុំឲ្យមានមន្ទិលសង្ស័យ និងកុំឲ្យចោទគ្នាទៅវិញទៅមកពាក់ព័ន្ធបញ្ហាទាំងអស់នេះតទៅទៀត។
លោក យិន ម៉េងលី៖ «ជារឿងមួយដ៏ល្អដែលជួយអាជ្ញាធរ ជួយទៅដល់រដ្ឋាភិបាលថា អ្វីទៅដែលសារព័ត៌មាន អ្វីដែលពលរដ្ឋផ្ដល់ឲ្យនោះជាព័ត៌មានពិត វាជាការលើកមុខមាត់របស់អាជ្ញាធរទៅវិញ ក្នុងការគ្រប់គ្រងថានៅតំបន់នោះហើយមានបញ្ហាកើតឡើង ការគ្រប់គ្រងយើងខ្វះចន្លោះហើយចេះតែឆ្លើយដោះសា ហើយអត់ព្រមស្វែងរកដោះស្រាយបញ្ហានេះ»។
កាលពីថ្ងៃទី២៤ ខែវិច្ឆិកា ឆ្នាំ២០២៥ កាសែតម៉ុងហ្កាបេ (Mongabay) បានចុះផ្សាយព័ត៌មាន ដោយបានសម្ភាសន៍ពលរដ្ឋ និងមន្ត្រីមូលដ្ឋាននៅស្រុកតាវែងថា ការជីកយករ៉ែមាសនៅឧទ្យានជាតិវិរៈជ័យ បានចាប់ផ្ដើមតាំងពីពាក់កណ្ដាលឆ្នាំ២០២៣ ហើយធ្វើឲ្យទឹកអូរតាបូក និងទន្លេសេសានប្រែពណ៌ និងមានសារធាតុពុល។ លើសពីនេះ មន្ត្រីមូលដ្ឋានក៏បានបញ្ជាក់ថា ក្រុមហ៊ុន គ្លូប៊ល ហ្គ្រីន ដែលមានសន្តិសុខឯកជន រារាំងមិនឲ្យប៉ូលិស និងមន្ត្រីឧទ្យានុរក្ស ចូលទៅត្រួតពិនិត្យទីតាំងធ្វើអាជីវកម្មរ៉ែមាសនោះឡើយ។
កាលពីឆ្នាំ២០១១ ក្រុមហ៊ុនរបស់លោក ទ្រី ភាព ចំនួន២ គឺក្រុមហ៊ុន ទ្រី ភាព អ៊ីមផត អិចផត (Try Pheab Import Export) និងក្រុមហ៊ុន អ៊ឹម ដី អេស (MDS) ទទួលបានដីសម្បទានសេដ្ឋកិច្ចពីរដ្ឋាភិបាល ដើម្បីធ្វើការវិនិយោគដាំដំណាំកៅស៊ូ លើផ្ទៃដីជិត២ម៉ឺន (១៨.៧៣៥)ហិកតារ ប៉ុន្តែរហូតមកដល់ពេលនេះក្រុមហ៊ុនទាំងនេះ មិនបានដាំដុះតាមការសន្យានោះទេ ក្រៅពីការកាប់ឈើធ្វើអាជីវកម្មលក់ទៅក្រៅប្រទេស និងកំពុងសង្ស័យជាប់ពាក់ព័ន្ធធ្វើអាជីវកម្មរ៉ែមាសដោយខុសច្បាប់ក្នុងតំបន់ការពារធម្មជាតិ៕
