ទាំងមន្ត្រីការបរទេស និងកងទ័ពថៃ បានចេញមកគំរាមកម្ពុជាព្រមគ្នា នៅមុនការបោះឆ្នោតសភា ក្នុងប្រទេសថៃ ដោយពួកគេបានព្រមាន និងចោទថា ប្រសិនបើកម្ពុជា នៅតែផ្ទុះអាវុធនៅតាមព្រំដែន និងជ្រៀតជ្រែកក្នុងរឿងនយោបាយរបស់ថៃទៀត នោះថៃនឹងធ្វើការឆ្លើយតបដោយប្រើកម្លាំងយោធា។ អ្នកឃ្លាំមើលកម្ពុជាយល់ថា កម្ពុជាគួរបង្កើនការប្រុងប្រយ័ត្ន ដោយយោធាថៃ អាចប្រើលេសនេះ ដើម្បីឈ្លានពានកម្ពុជា ជាលើកទី៣។
មន្ត្រីការបរទេស និងយោធាថៃ បានចេញមកអះអាងប្រាប់ប្រជាពលរដ្ឋថៃ មិនចាំបាច់បារម្ភអំពីអសន្តិសុខ និងបញ្ហាជម្លោះព្រំដែន ជាមួយកម្ពុជានៅមុនថ្ងៃបោះឆ្នោតអ្វីនោះឡើយ។
រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) បានប្រាប់អ្នកសារព័ត៌មាន នៅវិមានរដ្ឋសភា កាលពីថ្ងៃទី២ ខែកុម្ភៈ ថា ប្រទេសថៃបានត្រៀមខ្លួនរួចជាស្រេច ដើម្បីការពារខ្លួន ប្រសិនបើកម្ពុជាបាញ់ប្រហារដោយចេតនាបង្កហេតុ នៅមុនការបោះឆ្នោតក្នុងប្រទេសថៃ ដែលប្រព្រឹត្តិទៅនៅថ្ងៃទី៨ ខែកុម្ភៈ ខាងមុខនេះ។
លោក ស៊ីហាសាក់ ចោទថា កាលពីថ្ងៃទី៣០ ខែមករា ទាហានខ្មែរ បានបាញ់កាំភ្លើងគ្រាប់បែកដៃ ម៉ាក M79 ចូលក្នុងទឹកដីថៃ ក្នុងខេត្តស៊ីសាកេត (Si Sa Ket) ជាប់នឹងតំបន់មុំបី ក្នុងខេត្តព្រះវិហារ របស់កម្ពុជា ដោយហេតុការណ៍នេះ បានក្លាយជាក្ដីបារម្ភ ចំពោះប្រទេសថៃ ដែលគំរាមកំហែងដល់សន្តិសុខជាតិ នៅមុនការបោះឆ្នោតសភា។ លោកបន្តថា ក្នុងករណីនេះ កម្ពុជា និងថៃអាចដោះស្រាយនៅថ្នាក់តំបន់បាន ក៏ប៉ុន្តែ បើហេតុការណ៍ផ្ទុះអាវុធនេះ នៅតែកើតឡើងបន្តទៀត នោះប្រទេសថៃ នឹងចាត់ការដោយប្រើកម្លាំងយោធា។
ក្រៅពីព្រមានផ្នែកយោធា លោក ស៊ីហាសាក់ អះអាងថា លោកបានប្រាប់តំណាងរបស់កម្ពុជា ក្នុងអំឡុងពេលកិច្ចប្រជុំរដ្ឋមន្ត្រីការបរទេសនៅទីក្រុងសេប៊ូ ប្រទេសហ្វីលីពីន (Philippine) ឱ្យភាគីកម្ពុជាត្រូវប្រុងប្រយ័ត្នជាមួយនឹងសេចក្ដីថ្លែងការណ៍ផ្សេងៗ និងជៀសវាងនូវអ្វី ដែលលោកចោទថា ជាការជ្រៀតជ្រែកក្នុងរឿងនយោបាយថៃ។
ងាកមកខាងយោធាវិញ អ្នកនាំពាក្យកងទ័ពអាកាសថៃ លោក ចាក់គ្រីត ថាំវិឆៃ (Chakrit Thammavichai) បានអះអាង កាលពីម្សិលមិញថា កងទ័ពអាកាសថៃ នៅតែធ្វើប្រតិបត្តិការយោធា នៅតំបន់ព្រំដែន ដើម្បីការពារដែនអាកាស ដោយលោកចោទថា ដោយសារតែកម្ពុជាបានបង្កើតសកម្មភាពញុះញង់ជាច្រើនដង។
លោក ចាក់គ្រីត បញ្ជាក់ថា កងទ័ពអាកាសបានត្រៀមយុទ្ធោបករណ៍រួចជាស្រេច សម្រាប់ប្រតិបត្តិការយោធារយៈពេលយូរ ចន្លោះពី ២ ទៅ ៣ឆ្នាំ ដោយមានការសហការគ្នាគ្រប់វិស័យ រវាងកងកម្លាំងប្រដាប់អាវុធ និងរដ្ឋាភិបាលស៊ីវិល ដើម្បីគាំទ្រគ្នាទៅវិញទៅមក។
ជុំវិញរឿងនេះ អង្គភាពអ្នកនាំពាក្យរដ្ឋាភិបាលកម្ពុជា បានចេញសេចក្ដីថ្លែងការណ៍ នៅថ្ងៃនេះថា នៅក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅប្រទេសហ្វីលីពីន កាលពីចុងខែមករា រដ្ឋមន្ត្រីការបរទេសកម្ពុជា បានថ្លែងប្រាប់អង្គប្រជុំថា ទោះបីជាកម្ពុជាបានអនុវត្តបទឈប់បាញ់ក្ដី ក៏នៅតែមានសកម្មភាពមួយចំនួន ដែលរំលោភលើកិច្ចព្រមព្រៀងនេះ ជាពិសេសទាក់ទងទៅនឹងការគោរពអធិបតេយ្យ និងបូរណភាពទឹកដី ដែលសកម្មភាពបែបនេះ នឹងបង្កើនភាពតានតឹង និងធ្វើឱ្យប៉ះពាល់ដល់ការស្ដារសន្តិភាពឡើងវិញ។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត យល់ឃើញថា ស្ថិតក្នុងស្ថានភាពគំរាមកំហែងបែបនេះ កម្ពុជាគួរតែបង្កើនការប្រុងប្រយ័ត្ន ទាំងផ្នែកនយោបាយការទូត និងយោធា ដោយភាគីថៃ អាចនឹងប្រើលេស ដើម្បីឈ្លានពានកម្ពុជា ជាលើកទី៣។ លោកព្យាករណ៍ថា នៅក្រោយថៃបោះឆ្នោតរួច ស្ថានការណ៍រឿងព្រំដែន នឹងគ្មានការប្រែប្រួលសំខាន់នោះទេ ដោយភាគីថៃ នៅតែរកលេស បិទផ្លូវចរចាទ្វេភាគីជាមួយកម្ពុជា។
លោក ម៉ែន ណាត៖ «ជំហរកម្ពុជាគ្មានរឿងអ្វី ទៅបង្កហានិភ័យជុំវិញការបោះឆ្នោតនៅថៃនោះទេ។ តាមស្ដាប់មើលទៅ លោក ហ៊ុន ម៉ាណែត ត្រូវការសន្តិភាព ហើយលេសហ្នឹង នៅតែដដែល។ មហិច្ឆតាគេ(ថៃ) កន្លែងណាគ្រប់គ្រងបាន គេនៅបន្តគ្រប់គ្រង ហើយបើកម្ពុជាមិនយល់ព្រមទេ គេនឹងមិនចរចាជាមួយទេ។ អ្វីដែលគេចង់បានពីកម្ពុជា គឺចង់ឱ្យកម្ពុជា ចូលរួមអនុវត្តការប្រើប្រាស់ផែនទីខុសច្បាប់របស់គេ ខ្នាត ១:៥០.០០០ ដើម្បីត្រួតត្រាទឹកដីកម្ពុជាមួយផ្នែក ដែលគេចង់បានហ្នឹង»។
ខណៈថៃកំពុងយកសង្គ្រាមគំរាមកម្ពុជានោះ ថ្ងៃទី៣ ខែកុម្ភៈ នេះ ទាហានថៃ បានដាក់តម្រៀបទូកុងទឺន័រ និងរាយបន្លាលួសខាងមុខខ្លោងទ្វារវត្តបឹងត្រកួន ដោយព័ទ្ធយកទាំងវត្តអារាម ទាំងអស់តែម្ដង ខណៈ ផ្ទះ៣ខ្នងនៅតំបន់អូរភ្លុកដំរី ខេត្តពោធិ៍សាត់ វិញ យោធាថៃបានបើកឱ្យប្រជាពលរដ្ឋមកទស្សនាកម្សាន្ត ប្រៀបបានទៅនឹងរមណីយដ្ឋានមួយទៅហើយ។
ចំណែកពីខាងព្រំដែនខេត្តព្រះវិហារវិញ យោធិនខ្មែរដែលកំពុងឈរជើងនៅតំបន់ជួរមុខក្នុងខេត្តនេះ បានប្រាប់ទូរទស្សន៍អាស៊ីសេរីថា ស្ថានភាពនៅតាមព្រំដែនមិនសូវល្អនោះទេ ដោយកងទ័ពខ្មែរ និងកងទ័ពថៃ បានឈ្លោះប្រកែក និងជេរគ្នាស្ទើរតែរាល់ថ្ងៃ ដោយសារតែយោធាថៃ នៅតែព្យាយាមចូលរាយបន្លាលួស នៅក្នុងទីតាំងរបស់យោធាខ្មែរ៕
