ទាហានថៃបានបើកការបាញ់ប្រហារមកលើទីតាំងយោធាខ្មែរ នៅតំបន់ច្រកអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ បណ្ដាលឱ្យកងទ័ពខ្មែរ២នាក់រងរបួស។ ទាហានខ្មែរ បានអះអាងថា ក្នុងការវាយប្រហារនេះ យោធាថៃ បានបាញ់កាំភ្លើងមកលើទីតាំងកម្ពុជា ជាច្រើនគ្រាប់ ក៏ប៉ុន្តែ ទាហានខ្មែរមិនបានបាញ់តដៃវិញនោះឡើយ។
យោធាខ្មែរ លើកឡើងថា ពេលនេះពួកគាត់ សឹងតែអត់ធ្មត់លែងបានទៀតហើយ ដោយសារយោធាថៃ បើកការបាញ់ប្រហារជាច្រើនលើក។
ទាហានខ្មែរម្នាក់ ដែលកំពុងឈរជើងនៅតំបន់អានសេះ បានអះអាងប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញឈ្មោះ ថា ទាហានថៃបានបើកការបាញ់ប្រហារមកលើទីតាំងយោធាខ្មែរ នៅតំបន់ច្រកអានសេះ លើភ្នំដងរែក កាលពីព្រឹកថ្ងៃទី២០ កុម្ភៈ នេះ បណ្ដាលឱ្យយោធិនខ្មែររងរបួស ២នាក់ ក្នុងនោះ ទាហានម្នាក់រងរបួសត្រូវគ្រាប់កាំភ្លើងនៅត្រង់ក្បាលជង្គង់ខាងស្ដាំ។ យោធិនរូបនេះ អះអាងថា គិតមកដល់ល្ងាចថ្ងៃនេះ យោធាថៃ នៅតែបន្តបាញ់ប្រហារមកលើទីតាំងរបស់យោធាខ្មែរ ដោយយោធាថៃ បានឆ្មក់បាញ់កាំភ្លើងដៃប្រភេទ M-16 ជាច្រើនលើក ពេលទាហានខ្មែរ ដើរល្បាត។
ទាហានខ្មែរ៖ «ថ្នាក់ដឹកនាំរដ្ឋាភិបាលលាក់បាំង ហើយយើងជាកងទ័ពមួយ ហើយព័ត៌មានហ្នឹងជាការពិត។ ថៃអត់ទាន់ឈប់បាញ់ទេ នៅឆ្មក់ យើងអត់តដៃទេ»។
យោធិនខ្មែរ អះអាងថា ទោះបីជាភាគីយោធាថៃ បើកការបាញ់រះ មកលើទីតាំងទាហានខ្មែរដោយបើកចំហយ៉ាងណាក្ដី ក៏ទាហានខ្មែរ មិនបានបាញ់ តដៃ សូម្បីតែមួយគ្រាប់នោះឡើយ ព្រោះគ្មានបញ្ជាពីមេបញ្ជាការ។ ទោះជាយ៉ាងណា ទាហានខ្មែរ បានត្រៀមខ្លួន និងបង្កើនការប្រុងប្រយ័ត្នខ្ពស់ ដើម្បីទប់ស្កាត់ការឈ្លានពានរបស់យោធាថៃ ចូលមកក្នុងទឹកដីកម្ពុជាបន្ថែមទៀត។
ប្រភពពីកងទ័ពខ្មែរ នៅតំបន់អានសេះជាច្រើននាក់ទៀត បានអះអាងដូចគ្នាថា កន្លងមក ទាហានថៃ បានបាញ់កាំភ្លើងមកលើទីតាំងទាហានខ្មែរជាច្រើនលើកមកហើយ ដោយពេលខ្លះ ពួកគេបាញ់ឡើងលើ និងពេលខ្លះ បាញ់តម្រង់មកកាន់ជំរំទាហានខ្មែរផ្ទាល់តែម្ដង ក៏ប៉ុន្តែករណីទាំងនេះ ត្រូវថ្នាក់លើបិទព័ត៌មាន មិនឱ្យផ្សព្វផ្សាយចេញមកក្រៅនោះឡើយ។
ការបាញ់ប្រហាររបស់យោធាថៃនេះ ធ្វើឡើងបន្ទាប់ពីនាយករដ្ឋមន្ត្រីកម្ពុជា លោក ហ៊ុន ម៉ាណែត បានប្រាប់សារព័ត៌មានអន្តរជាតិ ពីសកម្មភាពឈ្លានពានរបស់យោធាថៃលើទឹកដីកម្ពុជា តាមបណ្ដោយព្រំដែនជាច្រើនកន្លែង។
ទូរទស្សន៍អាស៊ីសេរី មិនអាចទាក់ទងមេបញ្ជាការយោធភូមិភាគទី៤ លោក ពៅ ហេង និងអ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ដើម្បីសុំការអត្ថាធិប្បាយអំពីករណីផ្ទុះអាវុធនេះបានទេ នៅថ្ងៃទី២០ ខែកុម្ភៈ។
គិតមកដល់ពេលនេះ ក្រសួងការពារជាតិកម្ពុជា មិនទាន់ផ្សព្វផ្សាយអំពីករណីបាញ់ប្រហារពីសំណាក់យោធាថៃ មកលើទាហានខ្មែរ នេះនៅឡើយ។ ចំណែកឯយោធាថៃ ក៏មិនបានចេញសេចក្ដីថ្លែងការណ៍អ្វីនោះដែរ។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត លើកឡើងថា ការអត់ធ្មត់របស់ទាហានខ្មែរ មិនបាញ់តដៃ គឺជារឿងត្រឹមត្រូវ ដែលអាចបញ្ចៀសពីការផ្ទុះអាវុធទ្រង់ទ្រាយធំ ដែលលោកយល់ថា គឺជាការចង់បានរបស់យោធាថៃ។ ទោះជាយ៉ាងណា លោកបន្តថា ការលាក់បាំងព័ត៌មាននេះ នឹងធ្វើឱ្យកម្ពុជា ចាញ់សង្គ្រាមផ្នែកការទូត និងសារព័ត៌មាន ដូចកាលករណីទាហានថៃ បានលូចឆ្មក់វាយប្រហារមកលើកងទ័ពខ្មែរ ដល់ទីតាំងលេណដ្ឋាន ក្នុងតំបន់មុំបី ដែលបណ្ដាលឱ្យទាហានខ្មែរម្នាក់ គឺលោកព្រឹន្ទបាលឯក សួន រ៉ោន បានពលី កាលពីថ្ងៃទី២៨ ខែឧសភា ឆ្នាំ២០២៥ ដោយកាលនោះ កម្ពុជាមិនបានផ្សព្វផ្សាយភ្លាមៗនោះឡើយ ដោយទុកឱ្យសារព័ត៌មានរបស់ថៃ ផ្សព្វផ្សាយបានមុន ហើយទម្លាក់កំហុស និងចោទប្រកាន់មកលើកម្ពុជា ដែលធ្វើឱ្យមតិអន្តរជាតិ មានការភ័ន្តច្រឡំ។
លោក ម៉ែន ណាត៖ «កាលណារដ្ឋាភិបាលលាក់កំបាំង ធ្វើឱ្យបាត់ព័ត៌មាន និងបាត់ដាន។ បើចង់រកយុត្តិធម៌ក៏ពិបាក។ អ៊ីចឹងអ្វីដែលខ្មែរត្រូវធ្វើហ្នឹង គឺត្រូវបន្តបកអាក្រាតថៃបន្តទៀត នៅលើឆាកអន្តរជាតិ ហើយនិងត្រូវរាយការណ៍ នូវហេតុការណ៍តាមបណ្ដោយព្រំដែនឱ្យបានលឿន ព្រមទាំងប្រមូលភស្តុតាង ប្ដឹងថៃទៅកាន់តុលាការយុត្តិធម៌អន្តរជាតិ»។
ពាក់ព័ន្ធនឹងករណីផ្ទុះអាវុធ នៅតំបន់មុំបី នេះដែរ កាលពីថ្ងៃទី៦ ខែមករា មានឧបទ្ទវហេតុផ្ទុះគ្រាប់ ១គ្រាប់ ដែលបណ្ដាលឱ្យទាហានខ្មែរ២នាក់រងរបួស ខណៈភាគីថៃបានរាយការណ៍ថា មានទាហានថៃម្នាក់ បានរងរបួស។ ក្រោយហេតុការណ៍នេះ ភាគីកម្ពុជា បានចេញសេចក្ដីថ្លែងការណ៍ ដោយបញ្ជាក់ពីមូលហេតុថា កើតឡើងដោយសារការដុតសំរាម។
ទោះជាបែបនេះក្ដី យោធាថៃ បានបន្តយកឧបទ្ទវហេតុនេះ មកដាក់សម្ពាធមកលើកម្ពុជា ដោយតម្រូវឱ្យកម្ពុជា ត្រូវសុំទោសជាសាធារណៈ និងធ្វើការស៊ើបអង្កេតបន្ថែម។ លើសពីនេះ យោធាថៃ ក៏បានលើកយកករណីនេះ មកចោទប្រកាន់ និងព្រមានរឿងផ្ទុះសង្គ្រាមមកគំរាមកម្ពុជា ថែមទៀតផង។
ចំណែកករណី ទាហានថៃ ដែលបានបើកការបាញ់ប្រហារមកលើទាហានខ្មែរ ដូចក្នុងពេលនេះវិញ ភាគីទាំងពីរ បែរជារក្សាភាពស្ងៀមស្ងាត់ទៅវិញ៕
