ក្រុមអង្គការសង្គមស៊ីវិលទាមទារឱ្យភាគីថៃទទួលខុសត្រូវចំពោះទង្វើ ដែលក្រុមទាហានឈុតខ្មៅថៃ បានធ្វើទារុណកម្មមកលើពលករខ្មែរ និងប្រព្រឹត្តអំពើរំលោភបំពានផ្លូវភេទចំពោះនារីខ្មែរម្នាក់អាយុ ១៨ឆ្នាំ ដើម្បីនាំជនល្មើសទាំងនោះ មកផ្ដន្ទាទោសចំពោះមុខច្បាប់។ រីឯភាគីថៃ បានបដិសេធថា មិនមានករណីនេះកើតឡើយ។
រយៈពេលពីរថ្ងៃចុងក្រោយនេះ អ្នកប្រើប្រាស់បណ្ដាញសង្គមហ្វេសប៊ុក អង្គការសង្គមស៊ីវិល មន្ត្រីរដ្ឋាភិបាលកម្ពុជា រួមនឹងបណ្ដាញសារព័ត៌មានថៃមួយចំនួន បានលើកឡើងជាហូរហែ ជុំវិញករណី ទាហានថៃប្រមាណ៧នាក់ ត្រូវបានសង្ស័យថា បានប្រព្រឹត្តអំពើព្រៃផ្សៃមួយ គឺចាប់ ពលករខ្មែរចំនួន ១៣នាក់ ធ្វើទារុណកម្ម និង រំលោភបូកលើក្មេងស្រីខ្មែរម្នាក់ អាយុ១៨ឆ្នាំ អំឡុងពេលដែលពួកគាត់ធ្វើដំណើរត្រឡប់ពីប្រទេសថៃ ចូលកម្ពុជាវិញ កាលពីយប់ថ្ងៃទី១៥ ខែវិច្ឆិកា។
ភ្លាមៗបន្ទាប់ពីព័ត៌មានទាំងនេះ បានចែកចាយយ៉ាងព្រោងព្រាត លើបណ្ដាញសង្គមរួចមក អង្គការសង្គមស៊ីវិលជាង ២០០ស្ថាប័ន និង ក្រសួងពាក់ព័ន្ធ បានចេញសេចក្ដីថ្លែងការណ៍រួម ដោយបានថ្កោលទោស ចំពោះទង្វើដ៏ព្រៃផ្សៃ របស់ទាហានថៃ ហើយថា ករណីនេះ គឺជារឿងដ៏ឈឺចាប់ និងឃោរឃៅបំផុត ដែលទាហានថៃបានធ្វើមកលើពលករខ្មែរ។ ពួកគាត់បានស្នើឱ្យ រដ្ឋាភិបាលថៃ ត្រូវតែទទួលខុសត្រូវ នាំជនល្មើសទាំងនោះ មកផ្ដន្ទាទោស ចំពោះមុខច្បាប់។
ថ្ងៃទី១៧ ខែវិច្ឆិកា ក្រុមអង្គការសង្គមស៊ីវិលចំនួន២១៦ស្ថាប័ន ដែលកំពុងតែធ្វើការពារសិទ្ធិពលករ និងកម្មករទាំងក្នុង និងក្រៅប្រព័ន្ធ បានចេញសេចក្ដីថ្លែងការណ៍ ថ្កោលទោសយ៉ាងដាច់អហង្ការ ចំពោះអំពើហិង្សា និងការរំលោភបំពានផ្លូវភេទដ៏សាហាវទៅលើក្មេងស្រីខ្មែរម្នាក់ អាយុ១៨ឆ្នាំ ដោយក្រុមទាហានថៃ ដែលប្រព្រឹត្តនៅលើទឹកដីថៃជាប់ព្រំដែនខ្មែរ ស្ថិតនៅស្រុកកំរៀង ខេត្តបាត់ដំបង។
សេចក្ដីថ្លែងការណ៍ដដែលថា ការរំលោភបំពានរបស់ក្រុមទាហានថៃនេះ គឺជាការរំលោភបំពានយ៉ាងធ្ងន់ធ្ងរ លើសិទ្ធិមនុស្ស សិទ្ធិស្ត្រី និងសិទ្ធិពលករចំណាកស្រុក ដែលត្រូវបានការពារយ៉ាងខ្ជាប់ខ្ជួន ដោយច្បាប់ជាតិ ធម្មនុញ្ញ លិខិតុបករណ៍អាស៊ាន និងច្បាប់អន្តរជាតិ។
សេចក្ដីថ្លែងការណ៍ដដែលក៏បានអំពាវនាវដល់សហគមន៍អន្តរជាតិរួមមាន អង្គការសហប្រជាជាតិ (UN) គណៈកម្មការអន្តររដ្ឋាភិបាលអាស៊ានស្ដីពីសិទ្ធិមនុស្ស (AICHR) អង្គការសហប្រជាជាតិ ទទួលបន្ទុកផ្នែកស្ត្រី (UN Women) និងគណៈកម្មការទទួលបន្ទុកអនុសញ្ញា CEDAW ត្រូវតែមានវិធានការច្បាស់លាស់ និងបន្ទាន់ ទៅកាន់រដ្ឋាភិបាល និងទាហានថៃ ត្រូវតែបញ្ឈប់នូវអំពើដ៏ព្រៃផ្សៃមួយនេះ។
ជុំវិញរឿងនេះ នៅថ្ងៃទី១៨ ខែវិច្ឆិកា ក្រសួងកិច្ចការនារី ក៏បានចេញសេចក្ដីថ្លែងការណ៍ថ្កោលទោសទាហានថៃផងដែរ ដោយបង្ហាញការសោកស្ដាយយ៉ាងខ្លាំង និងថ្កោលទោសដាច់អហង្ការ ចំពោះទង្វើដ៏សាហាវព្រៃផ្សៃ អមនុស្សធម៌របស់ក្រុមទាហាន ដែលបានប្រើអំពើហិង្សា យ៉ាងសាហាវយង់ឃ្នង និងវាយដំ ទាត់ធាក់ ជំរិតទារប្រាក់ គំរាមកំហែងយកទ្រព្យសម្បត្តិ មកលើក្រុមពលករទេសន្តរប្រវេសក៍ខ្មែរចំនួន១៣នាក់។
ឆ្លើយតបនេះ នៅថ្ងៃទី១៧ ខែវិច្ឆិកា ក្រុមទាហានឈុតខ្មៅ ដែលជាក្រុមកងទ័ពជើងទឹក បានចេញសេចក្ដីបំភ្លឺ ហើយ ត្រូវបានសារព័ត៌មានថៃ ខាវសុត ( Khaosod English) យកមកផ្សាយដោយបញ្ជាក់ថា អ្វីដែលសារព័ត៌មានកម្ពុជា បានផ្សាយដោយចោទថា ទាហានថៃបានចាប់ ពលករខ្មែរ ធ្វើទារុណកម្ម និងរំលោភដល់នារីខ្មែរអាយុ១៨ឆ្នាំនោះ ជាព័ត៌មានមិនពិតនោះទេ។
ពួកគេបន្ថែមថា កងទ័ពជើងទឹកថៃ បានបំពេញកាតព្វកិច្ច ប្រកបដោយគុណភាព តម្លាភាព និង ការគោរពសិទ្ធិមនុស្សស្របទៅតាមគោលការណ៍អន្តរជាតិ។
រីឯ សារព័ត៌មានថៃមួយទៀតឈ្មោះ AmrinTV ដែលសរសេរជាភាសាថៃ ដោយដកស្រង់សម្ដី របស់កងទ័ពជើងទឹកម្នាក់ មកផ្សាយថា កងទ័ពជើងទឹកថៃចំនួន ៧នាក់ ដែលសារព័ត៌មានកម្ពុជាបានចោទប្រកាន់នោះគឺជា «ព័ត៌មានមិនពិតទាំងស្រុង និងជាព័ត៌មានក្លែងក្លាយ»។ ពួកគេថា កន្លងទៅកងទ័ពថៃ តែងតែគោរព និងរៀបចំម្ហូបអាហារជូនដល់ពលករខ្មែរខុសច្បាប់ ឱ្យពួកគេ បានបរិភោគអាហារគ្រប់គ្រាន់ មុនបញ្ជូនត្រឡប់ទៅកម្ពុជាវិញ។ បន្ថែមពីនោះ ពួកគេថា ការណ៍ដែលកម្ពុជាបន្តប្រឌិតរឿងមិនពិត ដើម្បីវាយប្រហារមកកាន់ភាគីថៃ អំឡុងប្រទេសទាំងពីរកំពុងមានជម្លោះព្រំដែនបែបនេះ នឹងធ្វើឱ្យទំនាក់ទំនងរវាងប្រទេសទាំងពីរកាន់តែអាក្រក់។
ទោះជាយ៉ាង ពលករខ្មែរ ដែលជនរងគ្រោះម្នាក់ ក្នុងចំណោមជនរងគ្រោះចំនួន១៣នាក់ ប្រាប់ទូរទស្សន៍អាស៊ីសេរី នៅថ្ងៃទី១៨ ខែវិច្ឆិកា ថា ករណីដែលទាហានថៃចាប់ពួកគាត់ធ្វើទារុណកម្ម និងរំលោភ មកលើនារីខ្មែរ ម្នាក់អាយុ១៨ឆ្នាំនោះ គឺជារឿងពិត ពុំមែនជារឿងប្រឌិត ដូចការលើកឡើងរបស់សារព័ត៌មានថៃនោះទេ។ រឿងដែលកញ្ញាចាំមិនភ្លេច ក្នុងព្រឹត្តិការណ៍នោះ គឺទាហានថៃបានស្រែកគំរាមបាញ់កញ្ញានឹងកាំភ្លើង និងការដែលទាហានថៃ បានទាក់ធាក់ឪពុករបស់កញ្ញានៅនឹងមុខស្ទើរសន្លប់បាត់ស្មារតី រហូតធ្លាក់ចូលក្នុងអូរ។
ពលការិនីរងគ្រោះ៖ «ពេលនោះភ័យខ្លាច ហើយគិតថា ប្រហែលមិនអាចរស់ផង ព្រោះលោតចុះទឹកអូរជ្រៅលិចក្បាល។ អូរនោះជ្រៅមែនទែន ប្រហែលប្រវែងជិតមួយឡូ។ ខ្ញុំមានអារម្មណ៍តក់ស្លុតនៅឡើយ ហើយ អ្វីដែលចង់ចាំជាងគេ គឺពេលវាទាត់ធ្វើបាបឪខ្ញុំ។ ខ្ញុំពីរនាក់ម្ដាយខំអង្វរ យំ សុំវាថាកុំឱ្យវាយ កុំឱ្យធ្វើបាប តែវាអត់ព្រមទេ។ វាទាត់ឪជិតតែសន្លប់»។
ចំណែក អ្នកនាំពាក្យរងក្រសួងមហាផ្ទៃ លោក ទូច សុឃៈ បានឆ្លើយតបភ្លាមៗ នៅលើគណនី ហ្វេសប៊ុក ផ្លូវការរបស់ក្រសួងមហាផ្ទៃ នៅថ្ងៃទី១៧ ខែវិច្ឆិកាថា ការផ្សព្វផ្សាយរបស់សារព័ត៌មានខាវសុត ( Khaosod English) និងសារព័ត៌មានផ្សេងទៀតរបស់ថៃ ដែលបដិសេធលើករណីខាងលើនេះថា ជារឿងមិនពិតនោះ គឺជារឿងដែលមិនត្រឹមត្រូវនោះទេ។ លោកបញ្ជាក់ថា ការពិតនឹងបង្ហាញក្នុងពេលខាងមុខដ៏ខ្លី នៅពេលដែល កម្ពុជារៀបចំបណ្ដឹង ប្ដឹងទៅកាន់ភាគីពាក់ព័ន្ធរួចរាល់។
លោក ទូច សុឃៈ៖ «អ្វីដែលការពិត វានឹងបង្ហាញបន្តិចទៀត ដែលក្រុមជំនាញចម្រុះក្រសួងមហាផ្ទៃ បន្តធ្វើនីតិវិធី ប្រមូលនូវព័ត៌មាន ប្រមូលនូវភស្តុតាង ធ្វើកោសល្យវិច័យគ្រប់បែបគ្រប់យ៉ាង តាមលក្ខណៈបច្ចេកទេស នគរបាលវិទ្យាសាស្ត្រ។ ហើយនឹងរៀបចំពាក្យប្ដឹងជាផ្លូវការទៅកាន់អគ្គស្នងការដ្ឋាននគរបាលជាតិថៃខ្លួនឯង និងតាមរយៈស្ថានទូតថៃខ្លួនឯង។»
ជុំវិញបញ្ហានេះ ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសក៍នៃអង្គការសង់ត្រាល់ (Central) លោក ឌី ថេហូយ៉ា ប្រាប់ទូរទស្សន៍អាស៊ីសេរី នៅថ្ងៃដដែលនេះថា ដើម្បីដោះស្រាយបញ្ហានេះ ប្រកបដោយប្រសិទ្ធភាព អាជ្ញាធរកម្ពុជាត្រូវដាក់ពាក្យបណ្ដឹង ប្ដឹងទៅស្ថាប័នពាក់ព័ន្ធ ហើយសហការជាមួយនឹងអង្គការក្រៅរដ្ឋាភិបាលទាំងក្នុង និងក្រៅប្រទេសដែលធ្វើការការពារសិទ្ធិនារី និងសិទ្ធិពលករ ដើម្បីបើកការស៊ើបអង្កេត ដោយឯករាជ្យ នោះទើបជារឿងដ៏ត្រឹមត្រូវ។
លោក ឌី ថេហូយ៉ា៖ «ធ្វើយ៉ាងណាជំរុញឱ្យមានការស៊ើបអង្កេតឯករាជ្យមួយ ហើយស្វែងរកការពិត ដើម្បីបញ្ជាក់ថាតើ ពិត ឬមិនពិត។ បើចង់ដឹងថាពិត ឬមិនពិត ទី១ សួរសាក្សីជនរងគ្រោះផ្ទាល់តែម្ដង ព្រោះជនរងគ្រោះមិនអាចកុហកបានទេ។ យើងអាចធ្វើអ្វីទៅតាមនីតិវិធី បច្ចេកទេសផ្លូវច្បាប់ បច្ចេកទេសផ្លូវពេទ្យជាដើម។ អ្នកបច្ចេកទេសគាត់ត្រូវធ្វើលើការងារហ្នឹងដើម្បីពិសោធ។ ទី២ រដ្ឋាភិបាលកម្ពុជាត្រូវជំរុញឱ្យរដ្ឋាភិបាលថៃធ្វើការស៊ើបអង្កេតលើរឿងហ្នឹងថាតើ ពិត ឬមិនពិត» ។
អ្នកការពារសិទ្ធិកម្មករលើកឡើងថា អាជ្ញាធរកម្ពុជាត្រូវប្រមូលភស្តុតាង ករណីទាហានថៃធ្វើបាបពលករខ្មែរឱ្យបានឆាប់រហ័ស និងម៉ឺងម៉ាត់ជាទីបំផុត ដើម្បីប្ដឹងទៅស្ថាប័នពាក់ព័ន្ធ ធ្វើយ៉ាងណា ចាប់ជនល្មើសមកផ្ដន្ទាទោសឱ្យទាល់តែបាន បើពុំដូច្នោះទេ ករណីបែបនេះ នឹងនៅតែបន្តមានជាបន្តបន្ទាប់ ខណៈពលករខ្មែរកំពុងតែធ្វើការនៅប្រទេសថៃ មានរាប់ម៉ឺននាក់ ហើយរាល់ថ្ងៃនេះ ក៏មានពលករខ្មែរ មិនក្រោម១០០នាក់នោះទេ ក្នុង១ថ្ងៃៗ បានលួចឆ្លងចូលប្រទេសថៃ ខុសច្បាប់ ដើម្បីរកការងារធ្វើ។ ដូចនេះ អ្នកការពារសិទ្ធិកម្មករ បារម្ភថា ពលករខ្មែរដែលជានារីៗ អាចប្រឈមនឹងហានិភ័យ ការរំលោភបំពានផ្លូវភេទ ពីសំណាក់ទាហានថៃតាមព្រំដែនគ្រប់ពេលវេលា៕
