កូនចៅជំនិតរបស់ឧក្រិដ្ឋជន ចេន ហ្ស៊ី (Chen Zhi) ម្នាក់ទៀត គឺលោក លីវ រ៉េន (Liu Ren) ត្រូវបានធ្វើបត្យាប័នបញ្ជូនទៅដល់ចិនហើយ បន្ទាប់ពីអាជ្ញាធរកម្ពុជាបានឃាត់ខ្លួនពាក់ព័ន្ធឧក្រិដ្ឋកម្មឆបោកតាមអនឡាញ។ មនុស្សជំនិតរបស់ឧក្រិដ្ឋជន ចេន ហ្ស៊ី រូបនេះ ត្រូវបានអាជ្ញាធរចិនតាមចាប់ខ្លួនជាយូរមកហើយ ពាក់ព័ន្ធនឹងអំពើឆបោកតាមអនឡាញ និងការបង្ខាំងមនុស្សដោយខុសច្បាប់ មុននឹងមកបង្កើតក្រុមហ៊ុន ជីនប៉ី គ្រុប (Jin Bei Group) នៅកម្ពុជាកាលពីឆ្នាំ២០១៦ ដែលរងការចោទប្រកាន់ថា ជាមជ្ឈមណ្ឌលឆបោកតាមអនឡាញដ៏ធំមួយស្ថិតក្រោមការគ្រប់គ្រងដោយមេខ្លោងឧក្រិដ្ឋជន ចេន ហ្ស៊ី។
ក្រសួងសន្តិសុខសាធារណៈចិនចេញសេចក្ដីថ្លែងការណ៍កាលពីថ្ងៃទី១៧ ខែមិថុនាថា អាជ្ញាធរកម្ពុជាបានគាំទ្រពេញទំហឹងចំពោះការចាប់ខ្លួន និងធ្វើបត្យាប័នបញ្ជូនមេខ្លោងឆបោកតាមអនឡាញលោក លីវ រ៉េន ដែលជាសមាជិកសំខាន់មួយរបស់ឧក្រិដ្ឋជនចេន ហ្ស៊ី។ ភាគីចិនចាត់ទុកការចាប់ខ្លួនមនុស្សជំនិតឧក្រិដ្ឋជន ចេន ហ្ស៊ី រូបនេះ ជាជោគជ័យថ្មីមួយទៀតនៃកិច្ចសហប្រតិបត្តិការអនុវត្តច្បាប់រវាងចិន និងកម្ពុជា។
ក្រសួងសន្តិសុខសាធារណៈចិនឱ្យដឹងទៀតថា កាលពីឆ្នាំ២០១៦ ឧក្រិដ្ឋជន ចេន ហ្ស៊ី បានដឹកនាំ និងបញ្ជាឱ្យលោក លីវ រ៉េន និងអ្នកដទៃទៀតឱ្យបង្កើតក្រុមហ៊ុន ជីនប៉ី គ្រុប (Jinbei Group) ក្នុងខេត្តព្រះសីហនុនៃប្រទេសកម្ពុជា ដើម្បីបង្កើតជាវេទិកាល្បែងស៊ីសងតាមអ៊ីនធឺណិតជាច្រើន និងអូសទាក់ទាញពលរដ្ឋចិនឱ្យចូលលេងល្បែងស៊ីសងយ៉ាងសកម្ម។ រហូតចាប់តាំងពីឆ្នាំ២០២០ រដ្ឋាភិបាលចិនរកឃើញថា ក្រុមហ៊ុន ជីនប៉ី គ្រុប បានដំណើរការមជ្ឈមណ្ឌលឧស្សាហកម្មក្លែងបន្លំទូរគមនាគមន៍នៅកម្ពុជា ដោយបានប្រព្រឹត្តបទឧក្រិដ្ឋពាក់ព័ន្ធនឹងការឆបោកតាមអនឡាញទ្រង់ទ្រាយធំក្នុងទំហំទឹកប្រាក់ច្រើនសន្ធឹកសន្ធាប់។ ក្រសួងសន្តិសុខសាធារណៈចិនឱ្យដឹងទៀតថា កូនចៅជំនិតរបស់ឧក្រិដ្ឋជន ចេន ហ្ស៊ី គឺលោក លីវ រ៉េន ក៏ត្រូវបានជាប់សង្ស័យពីបទឧក្រិដ្ឋហិង្សាជាច្រើនករណីរួមមាន ការបង្ខាំង និងឃុំខ្លួនមនុស្សខុសច្បាប់ និងការប្រើអំពើហិង្សាធ្ងន់ធ្ងរដោយចេតនា។
លោក លីវ រ៉េន ក៏ជាប្រធានសភាពាណិជ្ជកម្មខេត្តអានហ៊ុយ (Anhui) ប្រចាំកម្ពុជា។ ប្រព័ន្ធផ្សព្វផ្សាយចិនមួយចំនួនបានរាយការណ៍ថា លោក លីវ រ៉េន គឺជាមេខ្លោង និងជាសមាជិកជាន់ខ្ពស់មួយរូបនៃក្រុមឧក្រិដ្ឋជនឆបោកតាមអនឡាញនៅកម្ពុជាដែលមានប្រធានក្រុមហ៊ុន ព្រីនស៍ គ្រុប (Prince Group) គឺឧក្រិដ្ឋជន ចេន ហ្ស៊ី ជាមេខ្លោងធំ។ លើសពីនេះ លោកក៏ត្រូវបានអាជ្ញាធរចិនតាមចាប់ខ្លួនតាំងពីឆ្នាំ២០១៦ មកម្ល៉េះពាក់ព័ន្ធនឹងការបើកបនល្បែងស៊ីសងតាមអនឡាញឆ្លងដែនខុសច្បាប់ និងការឆបោកតាមអនឡាញ។
ទូរទស្សន៍អាស៊ីសេរីមិនទាន់អាចទាក់ទងអ្នកនាំពាក្យរងនៃក្រសួងមហាផ្ទៃលោក ទូច សុឃៈ ដើម្បីអត្ថាធិប្បាយជុំវិញរឿងនេះបាននៅឡើយនៅថ្ងៃទី១៨ ខែមិថុនា។
ទោះបីជារដ្ឋាភិបាលនៃក្រុមគ្រួសារត្រកូល ហ៊ុន បានចាប់មេខ្លោងឧក្រិដ្ឋជនចិន និងឃាត់ខ្លួនមន្ត្រីអាជ្ញាធរ មួយចំនួនដែលពាក់ព័ន្ធនឹងឧក្រិដ្ឋកម្មឆបោកតាមអនឡាញក៏បណ្ដាញឧក្រិដ្ឋជននៅតែបន្តដំណើរការឧស្សាហកម្មឆបោកតាមអនឡាញក្នុងប្រទេសកម្ពុជាដដែល។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ប្រាប់ទូរទស្សន៍អាស៊ីសេរីថា មេខ្លោងឧក្រិដ្ឋជនចិន មិនអាចមកបើកមជ្ឈមណ្ឌលឆបោកតាមអនឡាញនៅកម្ពុជាបានឡើយ ប្រសិនបើគ្មានការអនុញ្ញាត និងការកាងការពារពីរដ្ឋាភិបាល និងមន្ត្រីអ្នកមានលុយមានអំណាច។
លោក ស៊ឹង សែនករុណា៖ «អ៊ីចឹងហើយ បើមិនមានការពាក់ព័ន្ធទៅនឹងឧកញ៉ាធំៗ អ្នកមានអំណាចតួនាទីកាង ការពារពីក្រោយទេ ជនទាំងអស់នោះ មិនអាចប្រព្រឹត្តនូវបទល្មើសនៅលើទឹកដីកម្ពុជាបានទេ អ៊ីចឹងទោះបីបង្ក្រាបទៅលើជនជាតិចិននេះ ពីមួយទៅមួយ ក៏អត់ទាន់ស្រាកស្រាន្ត ក៏អត់ទាន់បិទបញ្ចប់បានដែរ។ អ៊ីចឹងខ្ញុំគ្មានការជឿជាក់ចំពោះការចាប់ខ្លួនលោក លីវ រ៉េន ចុងក្រោយនេះថា ជាការបិទបញ្ចប់នូវករណីស្កេមអនឡាញ (Scam online) ទេ បើមិនចាត់វិធានការទៅលើបុគ្គលដែលពាក់ព័ន្ធដែលមានឥទ្ធិពលមួយចំនួនជាឧកញ៉ា និងមានតួនាទីដែលជាអ្នកកាង ការពារអ្នកទាំងអស់ហ្នឹងប្រព្រឹត្តបទល្មើស»។
លោក ស៊ឹង សែនករុណា កត់សម្គាល់ថា ទោះបីមានចំណាត់ការបង្ក្រាប ប៉ុន្តែបណ្ដាញឧក្រិដ្ឋជននៅតែបន្តធ្វើសកម្មភាពឥតស្រាកស្រាន្ត ហើយបណ្ដាញឧក្រិដ្ឋជនបន្តផ្លាស់ប្ដូរទីតាំងពីកន្លែងមួយទៅមួយកន្លែងមួយ។ លោកថា រូបភាពនេះឆ្លុះបញ្ចាំងពីកម្សោយដឹកនាំរបស់រដ្ឋាភិបាលត្រកូល ហ៊ុន និងបញ្ហាអំពើពុករលួយដែលកើតចេញពីការដឹកនាំបែបគ្រួសារបក្ខពួកនិយម។ ជាមួយគ្នានេះ លោក ស៊ឹង សែនករុណា ក៏ចង់ឃើញរដ្ឋាភិបាលរឹតបន្តឹងការអនុវត្តច្បាប់ ដោយបើកការស៊ើបអង្កេតឱ្យបានស៊ីជម្រៅ និងផ្ដន្ទាទោសជនសង្ស័យជាជនជាតិចិននៅក្នុងប្រព័ន្ធតុលាការកម្ពុជាជាមុនសិន មុននឹងបញ្ជូនទៅប្រទេសចិន ដើម្បីធានាថា បណ្ដាញអ្នកសមគំនិត មេខ្លោង និងមន្ត្រីដែលអាចជាប់ពាក់ព័ន្ធនៅក្នុងប្រទេស មិនអាចគេចផុតពីសំណាញ់ច្បាប់៕
