អស់រយៈពេលប៉ុន្មានថ្ងៃនេះ មានរូបភាពមួយចំនួនក្នុងបណ្ដាញសង្គម បង្ហាញអំពីសំណង់ផ្លូវឆ្លងសមុទ្ររបស់វៀតណាម។ រូបភាពនោះហាក់បង្ហាញថាផ្លូវឆ្លងសមុទ្រនោះ តភ្ជាប់ខេត្តពាម ឬហាទៀង (Ha Tien) ខេត្តអានយ៉ាង (An Giang) នៃប្រទេសវៀតណាមទៅកាន់កោះត្រល់។
រូបភាពទាំងនេះបង្កឱ្យមានការបារម្ភថា វៀតណាមអាចកំពុងព្យាយាមបិទច្រកចេញចូលសមុទ្រអន្តរជាតិរបស់កម្ពុជា បន្ទាប់ពីកម្ពុជាសាងសង់ព្រែកជីកហ្វូណន។
ក៏ប៉ុន្តែថ្ងៃនេះ ក្រសួងការបរទេសកម្ពុជា ចេញមកបដិសេធព័ត៌មាននេះទាំងស្រុង។ ក្រសួងថា ពុំមានការសាងសង់ផ្លូវឆ្លងសមុទ្ររំលោភកិច្ចព្រមព្រៀងឆ្នាំ ១៩៨២ ឡើយ។ អាជ្ញាធរវៀតណាមក៏បានបញ្ជាក់ដូចគ្នា។
តាមការពន្យល់របស់ក្រសួង រូបភាពដែលកំពុងចែករំលែក គឺជាផ្លូវសាងសង់ពីដីគោកនៅសង្កាត់ហាទៀង ទៅកាន់កំពង់ផែពហុបំណងរបស់ទីក្រុងហាទៀង ដែលស្ថិតនៅក្នុងទឹកដីវៀតណាម។ ទោះជាយ៉ាងណា កម្រិតចម្ងាយពិតប្រាកដមិនទាន់បានបញ្ជាក់។
រូបភាពនេះប៉ុន្មានថ្ងៃមក ក៏ជំរុញការពិភាក្សាច្រើន ដោយអ្នកប្រើប្រាស់បណ្ដាញសង្គមខ្មែរមួយចំនួន សន្និដ្ឋានថា ប្រសិនបើវៀតណាមពិតជាសាងសង់ផ្លូវភ្ជាប់ទៅកោះត្រល់ នោះអាចជាការឆ្លើយតបនឹងគម្រោងព្រែកជីកហ្វូណនរបស់កម្ពុជា ដែលនឹងកាត់បន្ថយការពឹងផ្អែកលើកំពង់ផែវៀតណាម។
បច្ចុប្បន្ននេះ ក្រសួងការបរទេសបញ្ជាក់ថា ព័ត៌មានដែលចែករំលែកក្នុងបណ្ដាញសង្គម គឺមិនត្រឹមត្រូវ និងមិនមែនជាសំណង់បិទខ្ទប់ច្រកសមុទ្ររបស់កម្ពុជាឡើយ។
រដ្ឋាភិបាលកម្ពុជាបានចាប់ផ្តើមគម្រោងសាងសង់ព្រែកជីកហ្វូណនតេជោប្រវែង ១៨០ គីឡូម៉ែត្រចេញពីភ្នំពេញទៅកាន់ខេត្តកែប។ ទន្ទឹមនឹងនោះ មជ្ឈដ្ឋានមួយចំនួនរួមមាន អ្នកការពារបរិស្ថាន អ្នកប្រើប្រាស់បណ្ដាញសង្គម ព្រមទាំងប្រទេសវៀតណាមផង រិះគន់គំរោងព្រែកជីកនេះ។ ក៏ប៉ុន្តែរដ្ឋាភិបាលកម្ពុជាអះអាងថា គំរោងព្រែកជីកនេះ នឹងមិនប៉ះពាល់ធ្ងន់ធ្ងរដល់បរិស្ថាន ឬធ្វើឱ្យប្រែប្រួលបរិមាណទឹកទន្លេហូរចាក់ចូលទៅកាន់ប្រទេសវៀតណាមទេ។
អ្នកសេដ្ឋកិច្ចនៅកម្ពុជាមួយចំនួន ក៏ផ្តល់ទស្សនៈថា ព្រែកជីកហ្វូណនតេជោ នៅពេលសាងសង់រួច អាចនឹងជួយកាត់បន្ថយការចំណាយលើវិស័យដឹកជញ្ជូនផ្លូវទឹករបស់នាវាចេញពីភ្នំពេញទៅកាន់លំហសមុទ្រអន្តរជាតិដោយមិនបាច់ត្រូវឆ្លងកាត់ និងបង់កំរៃសេវាទៅឱ្យកំពង់ផែវៀតណាមនៅក្នុងទីក្រុងព្រៃនគរ ហើយកត្តានេះហើយ ដែលអាចធ្វើឱ្យភាគីវៀតណាមមិនសប្បាយចិត្ត៕
