ពលរដ្ឋជាច្រើន រិះគន់អភិបាលខេត្តពោធិ៍សាត់ និងអាជ្ញាធរខេត្តនេះចំពោះការជួសជុលផ្លូវសំបុកមាន់ដែលរងការខូចខាតក្នុងរដូវភ្លៀងធ្លាក់ថា ធ្វើឲ្យតែរួចពីដៃ និងជាការជួបជុំដើម្បីថតរូបបង្អួតថ្នាក់ដឹកនាំ។ ពលរដ្ឋហួសចិត្ត ក្នុងនាមឋានៈជាអភិបាលខេត្ត ប៉ុន្តែចុះដឹកនាំកូនចៅធ្វើសកម្មភាពជួសជុលផ្លូវបន្តិចបន្តួច ដែលការងារនេះ មិនគួរចាំបាច់រហូតទាល់តែមន្ត្រី ឬអភិបាលខេត្តចុះនោះទេ ត្រឹមតែជួលឱ្យកម្មករធម្មតាក៏អាចធ្វើបានដោយរលូនបើមន្ត្រីចេះចាត់ចែង។
ពលរដ្ឋជាច្រើន រិះគន់ អភិបាលខេត្តពោធិ៍សាត់ អាជ្ញាធរ និងមន្ត្រីមូលដ្ឋាន ពីការជួសជុលផ្លូវជង្ហុកសំបុកមាន់មួយចំនួនដែលរងការខូចខាតក្រោយភ្លៀងធ្លាក់ ថា ជាការសម្ដែង គ្មានស្តង់ដារត្រឹមត្រូវ និងបោកយកសន្លឹកឆ្នោត ពីពលរដ្ឋប៉ុណ្ណោះ។ ពួកគាត់ស្នើឲ្យរដ្ឋាភិបាលគួរស្នើសុំកញ្ចប់ថវិកាជាតិមកធ្វើផ្លូវបេតុងដែលរឹងមាំតាមស្តង់មួយជាជាងការជួសជុលប្រើអំបោះ ប៉ែល និងស៊ីម៉ង់ចាក់លុបបំបាត់បែបនេះ។
ការរិះគន់នេះ គឺក្រោយពេលដែលអភិបាលខេត្តពោធិ៍សាត់ លោក ខូយ រីដា បានដឹកនាំមន្ត្រីមន្ទីរ-អង្គភាពជុំវិញខេត្ត កងកម្លាំងប្រដាប់អាវុធ និងអាជ្ញាធរមូលដ្ឋានគ្រប់ជាន់ថ្នាក់ ចុះទៅជួសជុលផ្លូវ ទីប្រជុំជន ដោយចាក់បេតុងបំពេញជង្ហុកសំបុកមាន់ ក្នុងគោលបំណងស្តារ និងសម្រួលដល់ការធ្វើដំណើររបស់ប្រជាពលរដ្ឋកាលពីថ្ងៃទី៣១ កក្កដា។ ផ្លូវដែលត្រូវជួលជុល មាន២ខ្សែ ប្រវែងជាង១០គីឡូម៉ែត្រ លើកំណាត់ផ្លូវកៅស៊ូ ត្រង់ចំណុចផ្សារបត់រំដួល ឆ្ពោះទៅបឹងព្រះពន្លាជ័យ ស្ថិតក្នុងឃុំផ្ទះរុង ស្រុកតាលោសែនជ័យ និងមួយខ្សែទៀត ភ្ជាប់ពីឃុំបឹងខ្នារឆ្ពោះទៅឃុំមេទឹក ស្រុកបាកាន នៅក្នុងខេត្តពោធិ៍សាត់។
ពលរដ្ឋរស់នៅភ្នំពេញម្នាក់លោក វិបុល លើកឡើងថា ការជួសជុលផ្លូវរបស់រដ្ឋបាលខេត្តពោធិ៍សាត់បែបនេះ គឺមិនត្រូវតាមស្តង់ដារបច្ចេកទេស ខាតពេលវេលា និងចំណាយថវិកាឥតប្រយោជន៍។ លោកបន្តថា ការប្រើប្រាស់ស៊ីម៉ង់ត៍ ទៅចាក់ផ្ទាល់បែបនេះ និងនៅលើគ្រលុកដែលដកទឹក គឺវានឹងមិនជាប់បានយូរនោះឡើយ ហើយវានឹងប្រេះឡើងវិញ។
លោក វិបុល៖ «របៀបនៃការលាយបេតុងរបស់គាត់ហ្នឹង គឺគាត់គ្រាន់តែជញ្ជាត់ដួសទឹក អាទឹកជ្រាំហ្នឹងចេញហើយគាត់ចាក់បេតុងចូលហ្មង អញ្ចឹងវាអត់ត្រូវស្តង់ដារទេ។ ទាក់ទងមួយបញ្ហាហេដ្ឋារចនាសម្ព័ន្ធវាក៏ដូច ទាក់ទងជាមួយហ្នឹង បញ្ហាជំនាញ តាំងពីប្រឡាយទឹកប្រព័ន្ធលូ អីផ្សេងៗទាំងអស់គួរតែថ្នាក់រដ្ឋបាល អភិបាលខេត្តហ្នឹង គួរតែឆ្លងទៅមន្ទីរដែលជាប់ពាក់ព័ន្ធទៅនឹងបច្ចេកទេស ជៀសវាងវាខុសឆ្គង ជៀសវាងធ្វើឲ្យរួចពីដៃ ជៀសវាងចំណាយលុយចំណាយពេលវេលាឥតប្រយោជន៍»។
ចំណែកគណនីហ្វេសប៊ុកមួយឈ្មោះ កូនខ្មែរ នៅកូរ៉េ បានបង្ហោះវីដេអូឃ្លីបរយៈពេល ជិត២នាទី ដោយរិះគន់ និងនិយាយចំអកថា ប្រទេសមហាអំណាចលើពិភពលោកដូចជាសហរដ្ឋអាមេរិកក៏តាមមិនទាន់ស្តង់ដារធ្វើផ្លូវរបស់កម្ពុជានោះទេ។ លោកចោទសួរថា រដ្ឋាភិបាលនៅបន្តធ្វើផ្លូវបណ្ដោះអាសន្នដល់ពេលណា ហើយហេតុអ្វីមិនធ្វើផ្លូវចាក់បេតុងឲ្យត្រូវតាមស្តង់ដារតែម្តង? លោកថា រដ្ឋាភិបាលគួរត្រួតពិនិត្យចំពោះប្រភេទឡានថា ប្រភេទឡានបែបណា គួរអនុញ្ញាតឲ្យបើកលើផ្លូវទាំងនោះ ដើម្បីការពារការខូចខាតជាថ្មី។ លោកបន្ថែមថា ការបាចស៊ីម៉ង់លើគ្រលុកតូចៗទាំងនោះ ហើយស្រោចទឹកពីលើបែបនេះ មិនអាចជាប់បានយូរឡើយ។
«ខ្ញុំឃើញបច្ចេកទេសធ្វើផ្លូវនេះ ខ្ញុំដេកគិតបងប្អូន សូម្បីតែប្រទេសមហាអំណាចលើពិភពលោកហាស៎ក៏តាមមិនទាន់ដែររបៀបធ្វើផ្លូវបែបនេះ។ ខ្ញុំអត់ចង់រិះគន់ទេបងប្អូន។ ខ្ញុំអត់ចង់និយាយទេ ប៉ុន្តែមើលទៅវាទើសភ្នែកពេក មើលទៅវាដូចជា ហើយខ្ញុំឃើញគេបង្ហោះគេថា ផ្លូវបណ្ដោះអាសន្ន ហើយបណ្ដោះអាសន្នដល់ពេលណាទៀតសម័យនេះហើយហ្នឹង? នៅធ្វើផ្លូវបណ្ដោះអាសន្នដល់ពេលណាទៀត ហើយចុះម៉េចមិនចាក់កៅស៊ូបាទ មិនចាក់អីដូចគេទៅ? ឲ្យផ្លូវហ្នឹងវាមានគុណភាពដូចគេទៅ ឲ្យវាប្រើបានយូរណាស់បាទ។ យើងត្រូវមានច្បាប់ទម្លាប់ដូចស្រុកគេណាស់ អាហ្នឹងទើបផ្លូវវាប្រើបានយូរបាទ តែបើអនាធិបតេយ្យអញ្ចឹងបងប្អូនអើយបាទសួរថា ផ្លូវហ្នឹងវាជាប់បានយូរទេបាទ។ ហើយទាំងដែលអាគុណភាពផ្លូវហ្នឹងធ្វើគឺវាអត់ល្អវាអត់ពេញលក្ខណៈទៀតបាទ ជិះអត់បានយូរប្រើអត់បានយូរទេណាស់បងប្អូនបាទ» ។
ចំណែកអភិបាលរងខេត្តពោធិ៍សាត់លោក កេង ចាន់ធឿន បានបង្ហោះលើគេហទំព័រហ្វេសប៊ុករបស់លោកកាលពីថ្ងៃទី០១ សីហា ថា យុទ្ធនាការ របស់មន្ត្រី និងអាជ្ញាធរខេត្តពោធិ៍សាត់ ចាក់បេតុងបំពេញជង្ហុក និងបំបាត់សំបុកមាន់នេះ គឺជាការជួសជុលបណ្ដោះអាសន្នប៉ុណ្ណោះ។ លោកបន្តថា ការជួសជុលនេះ គឺដើម្បីដោះស្រាយការលំបាកជាបន្ទាន់ជូនប្រជាពលរដ្ឋ និងជាសារដាស់តឿនក្រើនរំលឹកដល់អាជ្ញាធរដែនដីគ្រប់លំដាប់ថ្នាក់ ឱ្យចេះយកចិត្តទុកដាក់ខ្ពស់ លើការថែទាំផ្លូវថ្នល់ដែលមានស្រាប់ ជាជាងការរង់ចាំរហូតដល់ខូចខាតទ្រុឌទ្រោមខ្លាំង។
ទោះជាយ៉ាងណា ពលរដ្ឋជាច្រើនបានបញ្ចេញយោបល់នៅលើសាររបស់លោក កេង ចាន់ធឿន ដោយលេងសើចផង និងហួសចិត្តផង។
គណនីមួយឈ្មោះ Sotheany Meas បានសរសេរថា ស្រុកគេធ្វើផ្លូវ សុទ្ធតែគ្រឿងចក្រធំៗ ចំណែកកម្ពុជា ប្រើតែអំបោស ប៉េត្រូ ទុយោបាញ់ទឹក ក៏ជោគជ័យដែរ។
គណនីមួយឈ្មោះ ឥន្ត្រី ខ្មៅ បានសរសេរបែបឌឺដងថា កម្ពុជាកុំដើរលឿនពេក ខ្លាចប្រទេសជិតខាងដើរមិនទាន់ ព្រោះប្រទេសយើង ជាប្រទេសខ្លាសេដ្ឋកិច្ច។
គណនីមួយទៀតឈ្មោះ Bong Sen បានបញ្ចេញមតិថា សុទ្ធតែជាអ្នករៀនបានខ្ពង់ខ្ពស់ តែការងារដូចបាយឡុកបាយឡ។
ចំណែកគណនីមួយទៀតឈ្មោះ ឈុំ ឡនលី ថា ការបញ្ចេញស្នាដៃដ៏ធំធេង របស់មន្ត្រីខ្មែរដ៏មានបច្ចេកទេស និងឆ្លាតវាងវៃបែបនេះ គឺគ្មានប្រទេសណាដែលអាចធ្វើបាននោះទេ។
ជុំវិញរឿងនេះ អ្នកជំនាញភូមិសាស្ត្រនយោបាយ លោក សេង វណ្ណលី មានប្រសាសន៍ថា ព្រឹត្តិការណ៍ទាំងនេះ បានបង្ហាញយ៉ាងច្បាស់ថា អាជ្ញាធរ និងក្រុមហ៊ុនម៉ៅការ តែងតែប្រើប្រាស់ល្បិចកលបច្ចេកទេស ដើម្បីកាត់បន្ថយចំណាយដើម តែទារប្រាក់គម្រោងពេញលេញ ដែលនេះគឺជាទម្រង់នៃអំពើពុករលួយ។ លោកបន្តថា អំពើពុករលួយនៅក្នុងគម្រោងអភិវឌ្ឍន៍ និងការកសាងហេដ្ឋារចនាសម្ព័ន្ធ បានចាក់ឫសយ៉ាងជ្រៅតាមរយៈរូបភាពជាច្រើនដូចជា ការដេញថ្លៃគម្រោងជួសជុលផ្លូវជាច្រើនតែងតែប្រព្រឹត្តិទៅដោយខ្វះតម្លាភាព មានការបែងចែកផលប្រយោជន៍ក្រោមតុ និងការឃុបឃិតគ្នារវាងមន្ត្រីត្រួតពិនិត្យ និងក្រុមហ៊ុនម៉ៅការ។ នៅពេលដែលថវិកាគម្រោងត្រូវបានកាត់បន្ថយតាមផ្លូវងងឹត ថវិកាដែលនៅសល់សម្រាប់អនុវត្តការងារជាក់ស្តែងមានកម្រិតទាប នាំឱ្យអ្នកម៉ៅការត្រូវតែប្រើប្រាស់វិធីសាស្ត្រកៀបស៊ី ដោយចាក់បេតុងស្តើង ចាក់ស៊ីម៉ង់ត៍ពីលើភក់ ឬប្រើប្រាស់សម្ភារៈថោកៗដែលមិនគ្រប់ស្តង់ដារ។
អ្នកជំនាញរូបនេះ បន្តទៀតថា ប្រជាពលរដ្ឋ មិនបានរិះគន់លើចេតនានៃការចុះធ្វើការនោះទេ ប៉ុន្តែប្រជាពលរដ្ឋរិះគន់លើគុណភាព និងភាពត្រឹមត្រូវនៃការធ្វើ។ លោកថា ការយកលេសថា អ្នកធ្វើតែងតែខុស ដើម្បីមកលុបលាងការធ្វើខុសបច្ចេកទេស គឺជាការប្រមាថដល់ថវិកាជាតិដែលបានមកពីកម្លាំងញើសឈាមរបស់ប្រជាជន។ ប្រសិនបើអាជ្ញាធរនៅតែបន្តប្រើប្រាស់វិធីសាស្ត្រដោះស្រាយបញ្ហាចំពោះមុខដោយបំពានបច្ចេកទេសបែបនេះ វានឹងបង្កើតជាទម្លាប់អាក្រក់នៅក្នុងរដ្ឋបាលសាធារណៈ ដែលមន្ត្រីថ្នាក់ក្រោមនឹងធ្វើតាមដោយមិនខ្វល់ពីគុណភាព និងភាពជាប់គង់វង្សជាដើម។
លោក សេង វណ្ណលី៖ «មន្ត្រី ឬក៏អ្នកគាំទ្រគណបក្សប្រជាជនមួយចំនួន តែងតែលើកឡើងនូវពាក្យដោះសាបែបការពារនោះថា អឺអ្នកធ្វើតែងតែខុស អ្នកមិនធ្វើទើបមិនខុស ឬក៏ធ្វើបានប៉ុណ្ណឹងហើយនៅតែរិះគន់ទៀត ការលើកឡើងបែបនេះ គឺជាទស្សនៈគ្រោះថ្នាក់បំផុតដែលឆ្លុះបញ្ចាំង ពីការខ្វះការទទួលខុសត្រូវនិងការព្យាយាម បង្វែរដាន ដើម្បីបិទបាំងកំហុសឆ្គងផ្នែកបច្ចេកទេសរបស់ ខ្លួនពីផ្នែកបច្ចេកទេស ប៉ុន្តែវាជាកំហុសដែលត្រូវតែទទួលខុសត្រូវ និងត្រូវតែកែតម្រូវជាបន្ទាន់។ បន្ថែមពី នេះ ការធ្វើសកម្មភាពបែបសម្ដែងរបស់ថ្នាក់ដឹកនាំខេត្ត អឺដូចជាខេត្តពោធិ៍សាត់ថ្មីៗនេះក៏ដូច ឬក៏ដូចមន្ត្រីពាក់ព័ន្ធនានា ដោយចុះទៅកាន់ទីតាំងផ្ទាល់ដើម្បីដឹកនាំការចាក់ស៊ីម៉ង់ត៍លើភក់នៅឃុំបឹងខ្នារ ក៏ជះឥទ្ធិពលអវិជ្ជមានយ៉ាងខ្លាំងដល់ជំនឿទុកចិត្តរបស់ប្រជាពលរដ្ឋចំពោះរដ្ឋបាលសាធារណៈ»។
កន្លងមក ប្រជាពលរដ្ឋ និងអ្នកឃ្លាំមើល ក៏ធ្លាប់រិះគន់និងខកចិត្ត ពីបញ្ហាសាងសង់ផ្លូវបេតុង ស្ពាន លូបង្ហូរទឹកចេញ ដែលគ្មានស្តង់ដារត្រឹមត្រូវ គ្មានបច្ចេកទេស ថា សាងសង់ផ្លូវហើយ គាស់ដាក់លូ តាមក្រោយ រួចហើយធ្វើផ្លូវឡើងវិញ ហើយកាយផ្លូវធ្វើលូជាថ្មី ដែលជារូបភាពរៀបចំគម្រោងគ្មានការសម្របសម្រួល និងមានចរិតជាការបង្កើតគម្រោង ដើម្បីទាញយកប្រយោជន៍ពីថវិកាជាតិចូលហោប៉ៅខ្លួនជាដើម៕
