ប្រធានការិយាល័យស៊ើបអង្កេតសហព័ន្ធ (FBI) សហរដ្ឋអាមេរិកប្រកាសថា នឹងបន្តតាមប្រមាញ់មេខ្លោងបណ្ដាញឧក្រិដ្ឋកម្មឆបោកតាមអនឡាញនៅគ្រប់ទីកន្លែងក្នុងពិភពលោក ដើម្បីនាំខ្លួនមកប្រឈមមុខនឹងច្បាប់របស់សហរដ្ឋអាមេរិក។ នាយក FBI លោក កាស ប៉ាទែល (Kash Patel) សង្កត់ធ្ងន់ថា គ្មានទីកន្លែងណាមួយនៅលើពិភពលោកអាចក្លាយជាជម្រកសុវត្ថិភាពសម្រាប់ក្រុមឧក្រិដ្ឋជនឆបោកតាមអនឡាញបានឡើយ។ ការប្រកាសនេះធ្វើឡើង បន្ទាប់ពីលោកបានបំពេញទស្សនកិច្ចនៅតំបន់អាស៊ីអាគ្នេយ៍កាលពីចុងខែកក្កដា ដើម្បីជួបពិភាក្សាជាមួយមេដឹកនាំប្រទេសមួយចំនួន រួមទាំងថ្នាក់ដឹកនាំកម្ពុជា ស្ដីពីការពង្រឹងកិច្ចសហប្រតិបត្តិការសន្តិសុខ និងជំរុញការបង្ក្រាប ព្រមទាំងចាប់ខ្លួនមេខ្លោងសំខាន់ៗដែលពាក់ព័ន្ធនឹងបណ្ដាញឆបោកតាមអនឡាញ។
នាយកទីភ្នាក់ងារស៊ើបអង្កេតសហព័ន្ធ (FBI) សហរដ្ឋអាមេរិក លោក កាស ប៉ាទែល ប្រកាសថា សហរដ្ឋអាមេរិកនឹងមិនអនុញ្ញាតឱ្យក្រុមឧក្រិដ្ឋជនឆបោកតាមអនឡាញមានទីជម្រកសុវត្ថិភាពនៅកន្លែងណាមួយឡើយ។ លោកបញ្ជាក់ថា រដ្ឋាភិបាលអាមេរិកនឹងបន្តសហការជាមួយរដ្ឋាភិបាលបរទេស ដើម្បីចាប់ខ្លួន និងបញ្ជូនជនសង្ស័យពីក្រៅប្រទេសមកប្រឈមមុខនឹងប្រព័ន្ធយុត្តិធម៌របស់សហរដ្ឋអាមេរិក។ លោកថ្លែងបែបនេះក្នុងសន្និសីទសារព័ត៌មានមួយនៅក្រសួងយុត្តិធម៌សហរដ្ឋអាមេរិក កាលពីថ្ងៃទី៥ ខែសីហា។
លោក កាស ប៉ាទែល៖ «ដូច្នេះ អ្វីដែលខ្ញុំចង់ប្រាប់ទៅកាន់ជនទាំងអស់ដែលកំពុងរត់គេចខ្លួននៅពេលនេះ គឺថា អ្នកនឹងមិនអាចរត់គេចបានយូរទៀតទេ។ យើងនឹងតាមប្រមាញ់អ្នកគ្រប់ជ្រុងជ្រោយនៃពិភពលោក ហើយនាំត្រឡប់មកទីនេះ ដើម្បីប្រឈមមុខនឹងប្រព័ន្ធយុត្តិធម៌របស់សហរដ្ឋអាមេរិក»។
លោក កាស ប៉ាទែល ឱ្យដឹងទៀតថា ក្នុងខែកក្កដា កន្លងទៅទីភ្នាក់ងារ FBI បានអនុវត្តការផ្ទេរជនសង្ស័យជិត ៣០ករណីពីប្រទេសចំនួន ១៥ មកកាន់សហរដ្ឋអាមេរិក ដែលជាចំនួនខ្ពស់បំផុតមិនធ្លាប់មានក្នុងប្រវត្តិសាស្ត្ររបស់ស្ថាប័ន FBI។ លោកបញ្ជាក់ថា លទ្ធផលនេះកើតចេញពីកិច្ចសហប្រតិបត្តិការអន្តរជាតិ និងទំនាក់ទំនងរវាងរដ្ឋបាលប្រធានាធិបតី ដូណាល់ ត្រាំ (Donald Trump) ជាមួយរដ្ឋាភិបាលបរទេស។ លោកបន្ថែមថា អាជ្ញាធរអាមេរិកនឹងបន្តរឹបអូសទ្រព្យសម្បត្តិដែលបានមកពីបណ្ដាញឆបោក ដើម្បីប្រគល់ប្រាក់ឱ្យទៅជនរងគ្រោះ ជាពិសេសមនុស្សវ័យចំណាស់ដែលរងគ្រោះពីការឆបោកតាមអនឡាញវិញ។
នាយកទីភ្នាក់ងារស៊ើបអង្កេតសហព័ន្ធ (FBI) លោក កាស ប៉ាទែល បញ្ជាក់ថា ការបង្ក្រាបបណ្ដាញឧក្រិដ្ឋកម្មឆបោកតាមអនឡាញ គឺជាបេសកកម្មរួមរបស់ស្ថាប័នអនុវត្តច្បាប់ជាច្រើន រួមមាន FBI ក្រសួងយុត្តិធម៌អាមេរិក និងសេតវិមាន ដោយផ្ដោតអាទិភាពលើការការពារកុមារ និងពលរដ្ឋអាមេរិកវ័យចំណាស់ដែលរងគ្រោះពីការឆបោក។ លោកបន្ថែមថា FBI និងដៃគូអនុវត្តច្បាប់នឹងបន្តតាមប្រមាញ់ជនល្មើសដោយមិនបន្ធូរដៃឡើយ និងអំពាវនាវឱ្យសាធារណជនផ្ដល់ព័ត៌មាន ប្រសិនបើដឹងអំពីទីតាំង ឬសកម្មភាពរបស់បណ្ដាញឆបោកតាមអនឡាញទាំងនោះ។
ការបញ្ជាក់ជំហរប្ដេជ្ញាចិត្តរបស់នាយកទីភ្នាក់ងារស៊ើបអង្កេតសហព័ន្ធ (FBI) នេះបន្ទាប់ពីលោកបានមកបំពេញទស្សនកិច្ចនៅបណ្ដាប្រទេសតំបន់អាស៊ីអាគ្នេយ៍ដើម្បីជួបពិភាក្សាជាមួយមេដឹកនាំប្រទេសមួយចំនួន រួមទាំងក្រុមមេដឹកនាំកម្ពុជា ស្ដីពីការពង្រឹងកិច្ចសហប្រតិបត្តិការសន្តិសុខ និងជំរុញការបង្ក្រាបបណ្ដាញឆបោកតាមអនឡាញ។
ក្នុងអំឡុងទស្សនកិច្ចនៅកម្ពុជា លោក កាស ប៉ាទែល បានជជែកទល់មុខជាមួយលោកនាយករដ្ឋមន្ត្រី ហ៊ុន ម៉ាណែត និងជំរុញឱ្យរដ្ឋាភិបាលកម្ពុជាពន្លឿនការស៊ើបអង្កេត និងចាប់ខ្លួនមេខ្លោងសំខាន់ៗដែលពាក់ព័ន្ធនឹងឧស្សាហកម្មឆបោកតាមអនឡាញ។ លោក ហ៊ុន ម៉ាណែត បញ្ជាក់ថា កម្ពុជានឹងប្ដេជ្ញាពង្រឹងកិច្ចសហប្រតិបត្តិការ និងផ្លាស់ប្ដូរព័ត៌មានជាមួយស្ថាប័ន FBI ដើម្បីប្រឆាំងនឹងឧក្រិដ្ឋកម្មទាំងនេះ។ រីឯ សំណុំរឿងពាក់ព័ន្ធការដាក់ទណ្ឌកម្ម និងការចោទប្រកាន់ដោយសហរដ្ឋអាមេរិកលើសមាជិកព្រឹទ្ធសភា ២រូបរបស់គណបក្សប្រជាជនកម្ពុជាគឺលោក លី យ៉ុងផាត់ និងលោក កុក អាន លោក ហ៊ុន ម៉ាណែត បានបញ្ជាក់ក្នុងបទសម្ភាសន៍ជាមួយទូរទស្សន៍ប្លូមបឺក (Bloomberg) ថា គឺជារឿងបុគ្គល ហើយពួកគេក៏កំពុងដោះស្រាយបញ្ហានេះតាមនីតិវិធីដោយមានមេធាវីការពារក្ដី ដើម្បីលាងជម្រះកេរ្តិ៍ឈ្មោះរបស់ពួកគេ។
សមាជិកព្រឹទ្ធសភាកម្ពុជា ២រូបគឺលោក លី យ៉ុងផាត់ និងលោក កុក អាន ត្រូវបានសហរដ្ឋអាមេរិកដាក់ទណ្ឌកម្ម និងចោទប្រកាន់ថា ជាមេខ្លោងជាប់ពាក់ព័ន្ធនឹងបណ្ដាញមជ្ឈមណ្ឌលឆបោកតាមអនឡាញនៅកម្ពុជា និងឆបោកយកលុយពីពលរដ្ឋអាមេរិក និងជនរងគ្រោះជុំវិញពិភពលោកក្នុងទំហំទឹកប្រាក់រាប់សិបពាន់លានដុល្លារ។
ជុំវិញរឿងនេះ អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ លើកឡើងថា មេឈ្មួញឧកញ៉ា និងមន្ត្រីជំនិតៗមួយចំនួនរបស់រដ្ឋាភិបាលត្រកូល ហ៊ុន ដែលពាក់ព័ន្ធនឹងអំពើឧក្រិដ្ឋកម្មកំពុងស្ថិតក្នុងស្ថានភាពភ័យស្លន់ស្លោ និងប្រឈមមុខនឹងការចាប់ខ្លួនដោយទីភ្នាក់ងារស៊ើបអង្កេតសហព័ន្ធ (FBI) សហរដ្ឋអាមេរិក។ លោកបន្តថា FBI មាននីតិវិធី និងភស្តុតាងគ្រប់គ្រាន់ ដើម្បីស្វែងរកចាប់ខ្លួន និងកសាងសំណុំរឿងប្រឆាំងនឹងមេខ្លោងសំខាន់ៗនៅកម្ពុជា។
លោក គឹម សុខ៖ «អាមេរិកាំងមានឯកសារភស្តុតាងច្បាស់ អំពីការពាក់ព័ន្ធរបស់ពួកមន្ត្រីដឹកនាំរដ្ឋាភិបាល និងពួកអ្នកមានឥទ្ធិពលនៅកម្ពុជា ដែលធ្វើជាមេបណ្ដាញឆបោកអនឡាញនៅប្រទេសកម្ពុជាហើយ។ ទោះបីសហរដ្ឋអាមេរិក មិនបានការសហប្រតិបត្តិការពេញដៃពេញជើងពីរដ្ឋាភិបាលលោក ហ៊ុន ម៉ាណែត ក៏ដោយ ប៉ុន្តែបេសកកម្មរបស់សហរដ្ឋអាមេរិក គឺប្ដេជ្ញាកម្ទេចឧក្រិដ្ឋកម្មឆបោកអនឡាញនៅលើពិភពលោកឱ្យបាន។ ពីព្រោះវានឹងក្លាយទៅជាផ្នែកមួយ នៃអំពើភេរវកម្មដ៏សាហាវ ការឆបោកអនឡាញនៅលើពិភពលោក ប្រសិនបើទប់ស្កាត់មិនបានទាន់ពេលទេ»។
នេះជាលើកទីមួយហើយដែលទីភ្នាក់ងារស៊ើបអង្កេតសហព័ន្ធ (FBI) សហរដ្ឋអាមេរិក ប្រកាសពីបេសកកម្មទ្រង់ទ្រាយធំ ដើម្បីតាមប្រមាញ់ និងបង្ក្រាបបណ្ដាញឧក្រិដ្ឋកម្មឆបោកតាមអនឡាញនៅទូទាំងពិភពលោក។ ការប្រកាសនេះក៏ស្របពេលបណ្ដាញឧក្រិដ្ឋជនដែលភាគច្រើនជាជនជាតិចិនបានប្រើប្រាស់ទឹកដីកម្ពុជា និងប្រទេសមួយចំនួនក្នុងតំបន់ អស់រយៈពេលជាច្រើនឆ្នាំ ដើម្បីអភិវឌ្ឍទៅជាអាណាចក្រមជ្ឈមណ្ឌលឆបោក ការជួញដូរមនុស្ស បង្ខាំងជនរងគ្រោះធ្វើទារុណកម្ម ដើម្បីបង្ខំឱ្យចូលរួមប្រព្រឹត្តអំពើឆបោកយកប្រាក់ពីជនរងគ្រោះនៅជុំវិញពិភពលោក។
ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម ហៅកាត់ថា (UNODC) បញ្ជាក់ថា ការជួញដូរគ្រឿងញៀន អំពើឆបោកអនឡាញ អំពើជួញដូរមនុស្ស ការលាងលុយកខ្វក់ និងឧក្រិដ្ឋកម្មតាមបច្ចេកវិទ្យា កំពុងត្រូវបានបណ្ដាញឧក្រិដ្ឋកម្មនៅអាស៊ីអាគ្នេយ៍ចង់ភ្ជាប់រួមបញ្ចូលគ្នាជាប្រព័ន្ធតែមួយ។ ចំណែកឯ ការជួញដូរមនុស្សនៅតែជាបញ្ហាធ្ងន់ធ្ងរ ដោយសារតែមនុស្សជាច្រើនត្រូវបានឧក្រិដ្ឋជនបោកបញ្ឆោតឱ្យទៅធ្វើការនៅមជ្ឈមណ្ឌលឆបោកអនឡាញ និងត្រូវបានបង្ខំឱ្យប្រព្រឹត្តឧក្រិដ្ឋកម្មក្រោមលក្ខខណ្ឌបំពានសិទ្ធិមនុស្សឃោរឃៅ។អង្គការអន្តរជាតិមួយនេះរកឃើញថា ក្នុងឆ្នាំ២០២៥ ប្រជាជននៅអាស៊ីបូព៌ា អាស៊ីអាគ្នេយ៍ អូស្ត្រាលី (Australia) និងនូវែលហ្សេឡង់ (New Zealand) បានខាតបង់ប្រាក់ជាង ១១៤ពាន់លានដុល្លារ ដោយសារការឆបោកតាមអនឡាញរបស់ក្រុមឧក្រិដ្ឋជននៅតំបន់អាស៊ីអាគ្នេយ៍៕
